News @ M-Media

Tag: MyanmarCoup2021

  • မြန်မာနယ်စပ်ရှိ တရုတ်ကာစီနိုရုံများကို ထိုင်းက မီးဖြတ်

    မြန်မာနယ်စပ်ရှိ တရုတ်ကာစီနိုရုံများကို ထိုင်းက မီးဖြတ်

    ဇွန် ၉၊ ၂၀၂၃

    M-Media 


    -ကရင်ပြည်နယ်က လက်နက်ကိုင်တွေ ထိန်းချုပ်ထားတဲ့ မြို့နှစ်ခုကို ထိုင်းနိုင်ငံက တနင်္လာနေ့ကစတင်ပြီး လျှပ်စစ်မီး ဖြတ်တောက်လိုက်ပါတယ်။ 

    ရွှေကုက္ကိုနဲ့ လေကေးကော်တို့ဖြစ်ပြီး တရုတ်လောင်းကစားလုပ်ငန်းတွေ တည်ရှိရာ နေရာတွေပါ။ ပတ်၀န်းကျင်နိုင်ငံတွေက ပြည်သူတွေ လူကုန်ကူး ကျွန်ပြုခံရမှု အဓိကဖြစ်ပွားတဲ့ ဒေသတွေလည်း ဖြစ်ပါတယ်။ 

    လျှပ်စစ်၀ယ်ယူရေး စာချုပ်သက်တမ်းပြည့်သွားတာကြောင့် မီးဖြတ်လိုက်တာဖြစ်ပြီး မြန်မာအစိုးရက သက်တမ်းတိုးဖို့ ငြင်းခဲ့တယ်လို့ ထိုင်းဖက်က ထုတ်ပြန်ပါတယ်။ 

    လက်နက်ကိုင်အစောင့်အကြပ်အားကိုးနဲ့ ဖွင့်လှစ်ထားတဲ့ တရုတ်လောင်းကစားရုံတွေဟာ ကိုယ်ပိုင်မီးစက်တွေနဲ့ လာမယ့်သီတင်းပတ်အနည်းငယ်အထိ တောင့်ခံထားနိုင်လိမ့်မယ်လို့လည်း ထိုင်းတာ၀န်ရှိသူတွေက ဆိုပါတယ်။ 

    တရုတ်ပြည်မက စီးပွားရေးသမားတွေဟာ လောင်းကစားရုံတွေအပြင် အခြားတရားမ၀င်လုပ်ငန်းတွေ၊ အွန်လိုင်းငွေလိမ်လုပ်ငန်းတွေကိုလည်း အဲဒီဒေသတွေမှာ အကြီးအကျယ် လုပ်ဆောင်နေကြပါတယ်။ 

    Ref: South China Morning Post 

  • မိုခါမုန်တိုင်းဒဏ်ခံပြည်သူများ အကူအညီ အလွန်လိုအပ်နေ

    မိုခါမုန်တိုင်းဒဏ်ခံပြည်သူများ အကူအညီ အလွန်လိုအပ်နေ

    ဇွန် ၃၊ ၂၀၂၃

    M-Media 


    -မြန်မာနိုင်ငံမှာ မိုခါမုန်တိုင်းကြောင့် ထိခိုက်ခံစားရမှုဟာ အလွန်အမင်း ကြီးမားတာကြောင့် အကူအညီတွေ ပိုလိုအပ်နေတယ်လို့ ကုလသမဂ္ဂ ဖွံ့ဖြိုးတိုးတက်ရေးအစီအစဥ် (UNDP) တာ၀န်ရှိသူက ပြောကြားလိုက်ပါတယ်။ 

    မေလ ၁၄ ရက်နေ့က တိုက်ခတ်ခဲ့တဲ့ အဲဒီမုန်တိုင်းကို ရခိုင်ပြည်နယ်က အဓိက ခံစားခဲ့ရတာပါ။ မုန်တိုင်းကြောင့် မြန်မာနိုင်ငံတစ်၀ှမ်း နေအိမ်ပေါင်း ၇ သိန်းလောက် ပျက်ဆီးခဲ့တဲ့လို့ UNDP ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် တီတွန် မီထရာက မနေ့က ပြုလုပ်တဲ့ ကုလအစည်းအ၀ေးမှာ ပြောကြားခဲ့ပါတယ်။ 

    စစ်တွေမြို့က အဆောက်အဦးတွေရဲ့ ၈၀ ကနေ ၉၀ ရာခိုင်နှုန်းလောက် ပျက်ဆီးသွားပါတယ်။ 

    ပျက်ဆီးဆုံးရှုံးမှုနဲ့ နှိုင်းယှဥ်ရင် အကူအညီပေးအပ်မှုတွေဟာ မလုံလောက်သေးဘဲ လူပေါင်း ၁.၆ သန်းလောက် အကူအညီတွေ လိုအပ်မယ်လို့လည်း မီထရာက ထည့်သွင်းပြောဆိုခဲ့ပါတယ်။ 

    မုန်တိုင်းကြောင့် မြန်မာနိုင်ငံမြောက်ပိုင်းက စစ်ဘေးရှာင်တွေရဲ့ ယာယီတဲတွေ ပျက်ဆီးသွားကြောင်း၊ မိုးတွင်းကာလ ရောက်တော့မှာ ဖြစ်တာကြောင့် ရေကြီး မြေပြိုမယ့် အန္တရာယ်တွေလည်း ရှိနေကြောင်း ဌာနေကိုယ်စားလှယ်က ထည့်သွင်း သတိပေးခဲ့ပါတယ်။ 

    Ref: UN News 

  • မြန်မာနိုင်ငံမှ ချင်းဒုက္ခသည်များကို ဓားစားခံလုပ်ကာ နိုင်ငံရေးအမြတ်ထုတ်လာသည့် အိန္ဒိယအစိုးရ

    မြန်မာနိုင်ငံမှ ချင်းဒုက္ခသည်များကို ဓားစားခံလုပ်ကာ နိုင်ငံရေးအမြတ်ထုတ်လာသည့် အိန္ဒိယအစိုးရ

    မေ ၂၆၊ ၂၀၂၃

    M-Media 


    -မကြာသေးခင်က မဏိပူရပြည်နယ်မှာ ဖြစ်ပွားခဲ့တဲ့ လူမျိုးရေးအဓိကရုဏ်းနဲ့ပတ်သက်ပြီး အိန္ဒိယအစိုးရဟာ မြန်မာနိုင်ငံက၀င်လာတဲ့ ချင်းလူမျိုး ဒုက္ခသည်တွေအပေါ် ၀ေဖန်ပြစ်တင်လာပါတယ်။ 

    မဏိပူရပြည်နယ်ဟာ လူမျိုးစုံတဲ့ပြည်နယ် ဖြစ်ပါတယ်။ ဟိန္ဒူလူများစုမှာ ပါ၀င်တဲ့ ကသည်းလူမျိုးတွေက နိုင်ငံရေးကို စိုးမိုးထားပြီး ခရစ်ယာန်ဘာသာကို ကိုးကွယ်ကြတဲ့ နာဂနဲ့ ကူကီးလူမျိုးတွေက လူနည်းစုတွေ ဖြစ်ပါတယ်။

    ကူကီးတွေဟာ မြန်မာနိုင်ငံက ချင်းလူမျိုးတွေနဲ့ သွေးနီးပြီး စစ်အာဏာသိမ်းမှုကြောင့် ဒုက္ခရောက်ကြတဲ့ ချင်းလူမျိုးတွေကို ကူညီသူတွေလည်း ဖြစ်ပါတယ်။

    ကသည်းလူမျိုးတွေက ပြည်နယ်တွင်းမှာ ရှိနေတဲ့ လူနည်းစု တိုင်းရင်းသားတွေနည်းတူ အထူးအခွင့်အရေး ပိုတောင်းတာကို လူမျိုးစုတွေက ကန့်ကွက်ရာကနေ ဧပြီနဲ့ မေလအတွင်း မဏိပူရမှာ လူမျိုးရေးအဓိကရုဏ်း အကြီးအကျယ် ဖြစ်ပွားခဲ့ပါတယ်။

    နှစ်ဖက်လူ့အဖွဲ့အစည်းမှာ အနည်းဆုံး လူ ၇၀ လောက် သေဆုံးခဲ့ပြီး ၄၈၀၀၀ လောက် အိုးအိမ်စွန့်ခွာ ထွက်ပြေးခဲ့ရပါတယ်။ လူနေအိမ်တွေ၊ ဘုရားကျောင်းတွေ တော်တော်များများလည်း မီးရှို့ဖျက်ဆီးခံခဲ့ရပါတယ်။

    ဟိန္ဒူအမျိုးသားရေးပါတီ BJP အုပ်စိုးတဲ့ အိန္ဒိယအစိုးရက ဒီပြဿနာမှာ မြန်မာနိုင်ငံက ၀င်ရောက်လာတဲ့ ချင်းလူမျိုးတွေ အဓိကပါ၀င်တယ်လို့ ပြစ်တင်ပြောဆိုပါတယ်။

    “စစ်အာဏာသိမ်းပြီးနောက်ပိုင်း ဒုက္ခသည်တွေ အများအပြား၀င်လာပြီး ပြည်တွင်းမှာ ပြဿနာတွေဖြစ်အောင် ဖန်တီးတာကို ကျွန်တော်တို့ ပထမဆုံး မြင်ရတာပါ” လို့ BJP အစိုးရရဲ့ ပြည်ထဲရေး၀န်ကြီးဟောင်း၊ အိန္ဒိယ အရှေ့မြောက်ပိုင်းဆိုင်ရာ တွဲဖက်အတွင်းရေးမှူးဟောင်း Gopal Krishna Pillai က ပြောပါတယ်။ 

    မဏိပူရပြည်နယ်အစိုးရကို BJP ပါတီ၀င် ကသည်းလူမျိုးတွေက လွှမ်းမိုးထားပါတယ်။ 

    “မြန်မာပြည်က ဒုက္ခသည်တွေလို့ ခေါ်ရင် ကျွန်တော်တို့ အရမ်းစိတ်ဆိုးတယ်။ ဒီပြဿနာကို နိုင်ငံရေးအမြတ်ထုတ်ဖို့ အဲဒီလို ခေါ်ကြတာ။ နိုင်ငံတကာကိစ္စဖြစ်အောင်လုပ်မယ်။ ပြီးရင် အစိုးရက ကျွန်တော်တို့ကို အရေးယူမှာပါ” လို့ ကသည်းလူအုပ်စု တိုက်ခိုက်မီးရှို့မှုကြောင့် ပြည်နယ်မြို့တော် အင်ဖာလ်ကနေ ထွက်ပြေးလာရတဲ့ ကူကီးလူမျိုး Letminlal Hoakip က ပြောပါတယ်။ 

    လွှတ်တော်အမတ်ဟောင်း Kim Gangte ကလည်း အဓိကရုဏ်းကြောင့် အင်ဖာလ်ကနေ ထွက်ပြေးခဲ့ရပါတယ်။ ဒီပြဿနာကို ပိုဆိုးလာအောင် BJP အစိုးရက ဖန်တီးတာလို့ သူမက ဆိုပါတယ်။ 

    “ဘာသာရေးလွတ်လပ်ခွင့်ကို လူတိုင်းခံစားနိုင်ရမယ့် အိန္ဒိယလို ဒီမိုကရေစီနိုင်ငံမျိုးမှာ ခရစ်ယာန်ဘုရားကျောင်း ၂၀၀ ကျော် ဘာဖြစ်လို့ မီးရှို့ခံလိုက်ရတာလဲ။ မီဒီယာမှာ သူတစ်ပြန်ကိုယ်တစ်ပြန် စွပ်စွဲပြောဆိုနေကြတဲ့ လူ့အဖွဲ့အစည်းရဲ့ ဒေါသတွေ ပြေပျောက်အောင် အစိုးရခေါင်းဆောင်တွေက ကြိုတင်တားဆီးမှု မရှိတာဟာ ၀မ်းနည်းစရာပါပဲ” 

    မြန်မာနိုင်ငံက ၀င်လာတဲ့ ချင်းတွေဟာ မဏိပူရက ကူကီးတွေနဲ့ပေါင်းပြီး ဘိန်းစိုက်တာ၊ ဘိန်းရောင်း၀ယ်တာတွေ လုပ်နေတယ်လို့ မဏိပူရပြည်နယ် ၀န်ကြီးချုပ်က မတ်လအတွင်းမှာ ပြောကြားဖူးပါတယ်။

    နိုင်ငံရေး လေ့လာစောင့်ကြည့်သူတွေက BJP အစိုးရဟာ လူမျိုးစုတွေကို ဓားစာခံလုပ်ကာ နိုင်ငံရေးအမြတ်ထုတ်နေတယ်လို့ သုံးသပ်ပါတယ်။ 

    “အခုဆိုရင် ကူကီးတွေကို ခိုး၀င်လာသူတွေလို့ တံဆိပ်ကပ်ဖို့ ပိုလွယ်သွားပြီ။ နယ်ခြားမသတ်မှတ်ခင် နှစ်ရာပေါင်းများစွာကတည်းက ကူကီးတွေဟာ မဏိပူရမှာ နေထိုင်ခဲ့ကြတာပါ” လို့ ဒေလီအခြေစိုက် သုတေသနအဖွဲ့ Center for Policy Research က ကျွမ်းကျင်သူ  Angshuman Choudhury က ပြောပါတယ်။ 

    အဓိကရုဏ်းလေ့လာရေး အဖွဲ့အ၀င်တစ်ဦးအဖြစ် မဏိပူရကို အခုလအတွင်း သွားရောက်လေ့လာခဲ့တဲ့ အတိုက်အခံ Indian National Congress ပါတီက Ajoy Kumar ကလည်း BJP အစိုးရဟာ လူ့အဖွဲ့အစည်းတွေအကြား အကွဲအပြဲတွေဖြစ်အောင် ဖန်တီးနေတယ်လို့ ဗုဒ္ဓဟူးနေ့က သတင်းစာရှင်းလင်းပွဲမှာ ပြောကြားခဲ့ပါတယ်။ 

    “အထူးအခွင့်အရေးရ လူမျိုးစုစာရင်းမှာပါ၀င်တဲ့ ကျွန်တော်တို့ နိုင်ငံသားတွေဟာ ခိုး၀င်၊ မူးယစ်ရာဇာ၊ ဘိန်းစိုက်သူတွေလို့ ကင်းပွန်းတပ်ခံလာရပါတယ်” 

    မြန်မာနိုင်ငံမှာ စစ်အာဏာသိမ်းပြီးနောက်ပိုင်း ၀င်လာတဲ့ ချင်းလူမျိုး ဒုက္ခသည်တွေကို နှိမ်နှင်းဖို့အတွက် ကသည်းလူမျိုးတွေက တောင်းဆိုတာကြောင့် မဏိပူရအစိုးရဟာ ဒုက္ခသည်တွေ နေထိုင်တဲ့ နေရာတွေကို ဖျက်ဆီးရှင်းလင်းတာ၊ မောင်းထုတ်တာတွေ လုပ်လာပါတယ်။ 

    ပြည်နယ်လွှတ်တော်မှာ ရှိနေကြတဲ့ ကူကီးလွှတ်တော်အမတ်တွေက အဓိကရုဏ်းတွေ၊ BJP ရဲ့ လူမျိုးရေး အမြတ်ထုတ်မှုတွေကြောင့် ကူကီးတွေကို ပြည်နယ်သီးသန့်ခွဲထုတ်ကာ အုပ်ချုပ်ရေးထားရှိဖို့ ဗဟိုအစိုးရကို တောင်းဆိုမှု ပြုလုပ်ထားပါတယ်။

    Ref: Washington Post 

  • မြန်မာ့အရေးဖြေရှင်းဖို့ အာဆီယံ လက်မလျှော့သေး

    မြန်မာ့အရေးဖြေရှင်းဖို့ အာဆီယံ လက်မလျှော့သေး

    မေ ၁၂၊ ၂၀၂၃

    M-Media

    -မြန်မာနိုင်ငံက ပြဿနာကို ၂ နှစ်ကျော်ကြာ ဖြေရှင်းရာမှာ ဘာတိုးတက်မှုမှ မရှိပေမယ့် လက်လျှော့သွားမှာ မဟုတ်ဘူးလို့ အာဆီယံအဖွဲ့က ပြောကြားလိုက်ပါတယ်။ 

    ၂၀၂၃ ခုနှစ် အာဆီယံ အလှည့်ကျဥက္ကဌအဖြစ် ဆောင်ရွက်တဲ့ အင်ဒိုနီးရှားနိုင်ငံမှာ အာဆီယံခေါင်းဆောင်တွေ မနေ့က တွေ့ဆုံ ဆွေးနွေးခဲ့ကြပါတယ်။ 

    မြန်မာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို ဒီပွဲ ဖိတ်ကြားခြင်း မရှိပါဘူး။ 

    ၀ေဖန်

    အာဏာသိမ်း မြန်မာစစ်ခေါင်းဆောင်ဟာ ပြဿနာဖြေရှင်းရေး ဘာမှလုပ်ဆောင်ခြင်းမရှိသလို၊ အာဆီယံ ဘုံသဘောတူညီချက် ၅ ရပ်ကို မလိုက်နာဘူးလို့ အင်ဒိုနီးရှားသမ္မတ ဂျိုကို ၀ီဒိုဒိုက ပြောပါတယ်။ 

    “တည့်တည့်ပဲ ပြောပါရစေ။ ဘုံသဘောတူညီချက် ၅ ရပ်ကို အကောင်အထည်ဖော်ရာမှာ ဘာတိုးတက်မှုမှ မရှိပါဘူး”

    ၂၀၂၁ ခုနှစ် အာဏာသိမ်းပြီး သိပ်မကြာခင်မှာ အာဆီယံဟာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို ဖိတ်ခေါ်ပြီး အာဆီယံ ဘုံသဘောတူညီချက် ၅ ချက်အတိုင်း ပြဿနာဖြေရှင်းရေး ကတိက၀တ် တောင်းခံခဲ့တာ ဖြစ်ပါတယ်။ 

    အကြမ်းဖက်မှု ရပ်တန့်ရေး၊ ထိခိုက်ခံစားရတဲ့ ပြည်သူတွေကို လူသားချင်း စာနာထောက်ထားမှုဆိုင်ရာ အကူအညီတွေ ပေးအပ်ရေး၊ သက်ဆိုင်သူအားလုံး တွေ့ဆုံဆွေးနွေးအဖြေရှာရေးတွေ ဒီ ၅ ချက်မှာ ပါ၀င်ပါတယ်။

    မြန်မာနိုင်ငံမှာ ဖြစ်နေတဲ့ လူ့အခွင့်အရေး ချိုးဖောက်မှုတွေ၊ အကြမ်းဖက်မှုတွေကို သည်းခံလို့မရဘဲ၊ ဒါတွေကို ရပ်တန့်ရေး၊ ပြည်သူတွေကို ကာကွယ်ပေးရေး လုပ်ဆောင်သွားရမယ်လို့ ၀ီဒိုဒိုက ထည့်သွင်းပြောဆိုခဲ့ပါတယ်။

    သဘောထား

    စင်ကာပူ၀န်ကြီးချုပ် လီရှန်လွန်းက မြန်မာစစ်ခေါင်းဆောင်တွေနဲ့ ပတ်သက်တဲ့ အာဆီယံရဲ့ သဘောထားကို ပြောင်းလဲမှာမဟုတ်ဘူးလို့ အစည်းအ၀ေးမှာ ပြောကြားခဲ့ပါတယ်။ 

    လက်ရှိ အာဆီယံဟာ မြန်မာအာဏာသိမ်းစစ်တပ်နဲ့ ဆက်သွယ်ဆောင်ရွက်တာမျိုး မလုပ်ဘဲ၊ အစည်းအ၀ေးတွေမှာလည်း စစ်ခေါင်းဆောင်တွေကို ဖိတ်ကြားခြင်း မပြုပါဘူး။ 

    လီရှန်လွန်းက အာဆီယံဟာ ရှေ့ဆက် ဒီလိုအနေအထားအတိုင်း ဆက်သွားမှာဖြစ်ပြီး စစ်ခေါင်းဆောင်တွေ၊ NLD တာ၀န်ရှိသူတွေ အပါအ၀င် သက်ဆိုင်သူတွေအကြား တွေ့ဆုံဆွေးနွေးရေးအတွက် ကြိုးပမ်းသွားမယ်လို့ ထည့်သွင်းပြောဆိုခဲ့ပါတယ်။ 

    “တစ်ဖက်နဲ့တစ်ဖက် တွေ့ဆုံဆွေးနွေးဖို့၊ တော်တော်လေး ထိခိုက်ခံစားနေရတဲ့ ပြည်သူတွေကို လူသားချင် စာနာထောက်ထားမှုဆိုင်ရာ အကူအညီတွေ ပေးဖို့ စသဖြင့် အခြေအနေတွေ ပိုကောင်းလာအောင် ကျွန်တော်တို့ အကောင်းဆုံး ကြိုးစားသွားမှာပါ။ ဖြစ်နိုင်ရင် အကြမ်းဖက်မှု ရပ်တန့်ဖို့လည်း တိုက်တွန်းသွားမှာပါ။ မလွယ်တော့မလွယ်ဘူး။ အချိန်အများကြီး ပေးရလိမ့်မယ်”

    နောက်ကွယ်က ဆောင်ရွက်

    အင်ဒိုနီးရှား နိုင်ငံခြားရေး၀န်ကြီး ရက်တနို မာဆူဒီက မြန်မာ့အရေး ဖြေရှင်းနိုင်ဖို့အတွက် သက်ဆိုင်သူတွေအားလုံးနဲ့ ပြီးခဲ့တဲ့လတွေအတွင်း တွေ့ဆုံဆွေးနွေးမှု ပြုလုပ်ထားတယ်လို့ မကြာသေးခင်က ထုတ်ပြောထားပါတယ်။ 

    ဒါပေမယ့် ထင်သာမြင်သာတဲ့ ရလဒ်မျိုးတော့ မရခဲ့ပါဘူး။ 

    “တိုးတက်မှုမရှိပေမယ့်လည်း ကျွန်မတို့ နောက်ဆုတ်သွားမှာ မဟုတ်ပါဘူး” လို့ မနေ့က အစည်းအ၀ေး အပိတ်မိန့်ခွန်းမှာ ပြောကြားခဲ့ပါတယ်။ 

    အာဆီယံ အတွင်းရေးမှူး ကော်ကင်ဟွန်းက မြန်မာစစ်အာဏာရှင်တွေနဲ့ ဆက်သွယ်ဆောင်ရွက်ရာမှာ အကြမ်းဖက်မှု ရပ်တန့်ရေးကို အခြေခံအချက်အဖြစ် စွဲကိုင်သွားမယ်လို့ ပြောကြားခဲ့ပါတယ်။ 

    “ခရီးတစ်ခုသွားတယ်ဆိုကြပါစို့။ ပထမ ပြေးသွားမယ်။ မပြေးနိုင်ရင် လမ်းလျှောက်မယ်။ မလျှောက်ရင် လေးဘက်သွားရပါမယ်။ အရှေ့ကိုသွားနေသမျှ တိုးတက်မှုပါပဲ”

    မလေးရှားနိုင်ငံခြားရေး၀န်ကြီး ဇမ်ဘရီ အဘ်ဒူလ် ကာဒရ်က မြန်မာ့အရေးဖြေရှင်းဖို့ အာဆီယံက စိတ်နှစ်ထားပြီး အတူတကွ ပူးပေါင်းဆောင်ရွက်သွားရမယ်လို့ ဆိုပါတယ်။ 

    “အဖွဲ့၀င်နိုင်ငံတိုင်းက ရေရှည်တည်တံ့မယ့် ငြိမ်းချမ်းတဲ့ အဖြေတစ်ခုကို ရှာချင်ကြတာပါ” 

    Ref: CNA

  • တရုတ်-မြန်မာ လူ့အဖွဲ့အစည်းတစ်ခု တည်ထောင်ရန် တရုတ်က အဆင်သင့်ရှိနေ

    တရုတ်-မြန်မာ လူ့အဖွဲ့အစည်းတစ်ခု တည်ထောင်ရန် တရုတ်က အဆင်သင့်ရှိနေ

    မေ ၃၊ ၂၀၂၃

    M-Media 


    -မြန်မာစစ်ကောင်စီနဲ့ ပြည့်၀တဲ့ မဟာဗျူဟာဆက်ဆံရေး တိုးမြှင့်သွားဖို့ သဘောတူညီမှု ရခဲ့တယ်လို့ တရုတ်နိုင်ငံခြားရေး၀န်ကြီး ကျင်ဂန်းက ပြောပါတယ်။ 

    ကျင်ဂန်းနဲ့ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်တို့ မနေ့က နေပြည်တော်မှာ တွေ့ဆုံဆွေးနွေးခဲ့တာပါ။ 

    တရုတ်နိုင်ငံဟာ မြန်မာနိုင်ငံနဲ့ ဆွေမျိုးပေါက်ဖော်ဆက်ဆံရေးကို အလေးထားပြီး တရုတ်-မြန်မာ လူ့အဖွဲ့အစည်းတစ်ခု တည်ထောင်ဖို့ အဆင်သင့်ရှိနေတယ်လို့ ကျင်ဂန်းက ဆိုပါတယ်။ 

    မြန်မာနိုင်ငံအတွင်း တည်ငြိမ်မှုနဲ့ ဖွံ့ဖြိုးတိုးတက်မှုရဖို့ တရုတ်က စိတ်ရင်းမှန်နဲ့ မျှော်လင့်ပြီး၊ မြန်မာ့အမျိုးသားရေးလက္ခဏာနဲ့ ကိုက်ညီတဲ့ ဖွံ့ဖြိုးရေးလမ်းကြောင်းတစ်ခု ရှာဖွေဖို့ ထောက်ခံအားပေးတယ်လို့လည်း တရုတ်နိုင်ငံခြားရေး၀န်ကြီးက ဆိုပါတယ်။ 

    စစ်ကောင်စီရဲ့ နိုင်ငံရေး အသွင်ကူးပြောင်းမှုလုပ်ငန်း၊ အမျိုးသားရင်ကြားစေ့ရေးလုပ်ငန်းတွေကို တရုတ်က ထောက်ခံကြောင်း ကျင်ဂန်းက ထည့်သွင်းပြောကြားခဲ့ပါတဘ်။ 

    နိုင်ငံတကာအသိုင်းအ၀ိုင်းအနေနဲ့ မြန်မာနိုင်ငံရဲ့ အချုပ်အခြာအာဏာကို အလေးထားဖို့၊ ငြိမ်းချမ်းရေးနဲ့ အမျိုးသားရင်ကြားစေ့ရေး ဆောင်ရွက်ရာမှာ အပြုသဘောဆောင်တဲ့ အခန်းကဏ္ဍမျိုးကနေ ပါ၀င်ဖို့ နိုင်ငံတကာအသိုင်းအ၀ိုင်းကို သူက တိုက်တွန်းခဲ့ပါတယ်။ 

    စစ်ကောင်စီဟာ ဘင်္ဂလားဒေ့ရှ်နဲ့ ဆက်ဆံရေးတိုးတက်လာကာ ဆက်စပ်ကိစ္စတွေကို ညှိနှိုင်းမှုကနေတစ်ဆင့် ဖြေရှင်းတာကို တရုတ်က ထောက်ခံပြီး၊ တရုတ်-မြန်မာ-ဘင်္ဂလားဒေ့ရှ် လက်တွေ့ကျတဲ့ ပူးပေါင်းဆောင်ရွက်မှု ဖြစ်တည်လာရေးအတွက် တိုးချဲ့ဆောင်ရွက်သွားဖို့ တရုတ်နိုင်ငံက ဆန္ဒရှိကြောင်း ကျင်ဂန်းက မြန်မာ အာဏာသိမ်းစစ်ခေါင်းဆောင်ကို ပြောကြားခဲ့ပါတယ်။ 

    Ref: CGTN