Tag: MyanmarCoup2021

ဇူလိုင် ၁၃၊ ၂၀၂၃

M-Media 

-မြန်မာနိုင်ငံမှာ ဖြစ်ပွားနေတဲ့ ပဋိပက္ခကို ဖြေရှင်းနိုင်ရေး အာဆီယံ နိုင်ငံခြားရေး၀န်ကြီးတွေ မနေ့က အစည်းအ၀ေး ပြုလုပ်ခဲ့ပါတယ်။ 

အင်ဒိုနီးရှားနိုင်ငံခြားရေး၀န်ကြီး ရတ္တနို မာဆူဒီက အာဆီယံက လက်ခံသဘောတူထားတဲ့ ဘုံသဘောတူညီချက် ၅ ချက်ကို အကောင်အထည်ဖော်ရေး ဆွေးနွေးခဲ့ကြတယ်လို့ ပြောပါတယ်။ 

အကြမ်းဖက်မှုတွေကို မရပ်တန့်နိုင်ရင် တွေ့ဆုံဆွေးနွေးရေးနဲ့ အကူအညီပေးရေး ဆောင်ရွက်နိုင်မယ့် အခြေအနေမျိုး ပေါ်ပေါက်လာမှာမဟုတ်ဘူးလို့ မာဆူဒီက ထည့်သွင်းပြောဆိုခဲ့ပါတယ်။ 

ပြီးခဲ့တဲ့လမှာ ထိုင်းနိုင်ငံက ဦးဆောင်ပြီး မြန်မာ့အရေးဆွေးနွေးပွဲတစ်ခု လုပ်ဆောင်ခဲ့ပြီး အာဏာသိမ်း မြန်မာစစ်ခေါင်းဆောင်တွေကိုပါ ဖိတ်ကြားခဲ့ပါတယ်။ 

ဒီအတွက် အာဆီယံအဖွဲ့၀င်နိုင်ငံတွေက ၀ေဖန်ခဲ့ပါတယ်။ 

ထိုင်နိုင်ငံခြားရေး၀န်ကြီး ဒွန် ပရာမွဒ်၀ီနိုင်းက မြန်မာပြဿနာကြောင့် ထိုင်းနိုင်ငံက ကြုံတွေ့နေရတဲ့ နယ်စပ်ကိစ္စ၊ ကုန်သွယ်ရေးနဲ့ ဒုက္ခသည်ကိစ္စတွေ ပြေလည်စေရေး ကျင်းပရခြင်းဖြစ်တယ်လို့ မနေ့ကအစည်းအ၀ေးမှာ ကာကွယ်ပြောကြားခဲ့ပါတယ်။ 

ဒေါ်စုနဲ့တွေ့ 

ပရာမွဒ်၀ီနိုင်းက မကြာသေးခင်က မြန်မာနိုင်ငံကို သွားရောက်စဥ်အတွင်း မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံခဲ့တယ်လို့ သီးခြားပြောကြားခဲ့ပါတယ်။ 

ထိုင်းနိုင်ငံခြားရေး၀န်ကြီးဟာ မြန်မာနိုင်ငံကို ဧပြီလမှာတစ်ကြိမ်၊ ဇွန်လမှာတစ်ကြိမ် သွားရောက်ခဲ့တာဖြစ်ပါတယ်။ 

ပြီးခဲ့တဲ့ တနင်္ဂနွေနေ့က နောက်ထပ်တစ်ကြိမ် သွားရောက်မှုအတွင်း ဒေါ်အောင်ဆန်းစုကြည်နဲ့ ၁ နာရီကြာ တွေ့ဆုံစကားပြောခွင့်ရခဲ့တယ်လို့ သူက ဆိုပါတယ်။ 

ဒေါ်အောင်ဆန်းစုကြည်ဟာ ကျန်းမာရေးကောင်းမွန်ပြီး၊ လက်ရှိ မြန်မာ့အရေးနဲ့ပတ်သက်လို့ ဆွေးနွေးညှိနှိုင်းဖို့ တိုက်တွန်းခဲ့တယ်လို့ ပရာမွဒ်၀ီနိုင်းက သတင်းထောက်တွေကို ပြောဆိုခဲ့ပါတယ်။ 

ဒီပြောကြားမှုအတွက် ဒေါ်အောင်ဆန်းစုကြည်နဲ့ပတ်သက်တဲ့ အသိုင်းအ၀ိုင်းက မှတ်ချက်ပေးတာမျိုး မရှိသေးပါဘူး။ 

အာဆီယံမူ မပြောင်း 

အင်ဒိုနီးရှားနိုင်ငံခြားရေး မာဆူဒီက မြန်မာ့အရေးနဲ့ ပတ်သက်လာရင် အာဆီယံ ဘုံသဘောတူညီချက် ၅ ချက်ကို ဆက်လက်စွဲကိုင်သွားမှာဖြစ်တယ်လို့ ထပ်လောင်းပြောကြားခဲ့ပါတယ်။ 

“အခြားကြိုးပမ်းမှုတွေဟာ ဘုံသဘောတူညီချက် ၅ ရပ် အကောင်အထည်ဖော်မှုကို ထောက်ခံအားပေးတာမျိုးသာ ဖြစ်ရပါမယ်”

Ref: AFP

ဇူလိုင် ၁၀၊ ၂၀၂၃

M-Media 

– မြန်မာနိုင်ငံက ပဋိပက္ခကို ဖြေရှင်းဖို့အတွက် မိမိတို့ဖက်က လုပ်ကိုင်ဆောင်ရွက်နေတာတွေ ရှိတယ်လို့ အင်ဒိုနီးရှားနိုင်ငံခြားရေး၀န်ကြီး ရတ္တနို မာဆူဒီက ပြီးခဲ့တဲ့တစ်ပတ်မှာ ပြောကြားခဲ့ပါတယ်။ 

အင်ဒိုနီးရှားဦးဆောင်မယ့် အာဆီယံအဖွဲ့ဟာ အခုတစ်ပတ်အတွင်း နိုင်ငံခြားရေး၀န်ကြီးအဆင့် အစည်းအ၀ေးတစ်ခုကို ကျင်းပဖို့ ရှိနေပြီး မြန်မာ့အရေး အဓိက ဆွေးနွေးကြမှာ ဖြစ်ပါတယ်။ 

ဒီအစည်းအ၀ေးမှာ အမေရိကန်၊ တရုတ်နဲ့ ရုရှား နိုင်ငံခြားရေး၀န်ကြီးတို့လည်း တက်ရောက်မှာ ဖြစ်ပါတယ်။ 

သောကြောနေ့ကပြုလုပ်တဲ့ သတင်းစာရှင်းလင်းပွဲမှာ မာဆူဒီက အာဆီယံရဲ့ ဘုံသဘောတူညီချက် ၅ ရပ်ကို အကောင်အထည်ဖော်ဖို့အတွက် သက်ဆိုင်သူတွေနဲ့ လူချင်း၊ အွန်လိုင်းနဲ့ ဖုန်းအစည်းအ၀ေး စုစုပေါင်း ၁၁၀ ခုလောက် လုပ်ဆောင်ခဲ့တယ်လို့ ပြောပါတယ်။

အဲဒီလိုဆွေးနွေးမှုတွေထဲမှာ စစ်ကောင်စီတာ၀န်ရှိသူတွေ၊ NUG တာ၀န်ရှိသူတွေ၊ တိုင်းရင်းသားလက်နက်ကိုင်အဖွဲ့တွေ၊ အရပ်ဖက်အဖွဲ့တွေ ပါ၀င်ပါတယ်။ 

“ဆွေးနွေးပွဲတွေနဲ့ ပြီးသွားဖို့ မဟုတ်ပါဘူး။ ဒါပေမယ့် ရေရှည်တည်တံ့တဲ့ ငြိမ်းချမ်းရေးကို ရရှိရေး အားလုံးပါ၀င်တဲ့ ဆွေးနွေးမှု ဖြစ်လာဖို့ဆိုတဲ့ ရည်ရွယ်ချက်အတွက် ဒါက လမ်းကြောင်းတစ်ခု ဖြစ်ပါတယ်။  အားလုံးပါ၀င်တဲ့ ဆွေးနွေးမှု မရှိဘဲနဲ့ အာလုံးလက်ခံနိုင်တဲ့၊ ငြိမ်းချမ်းတဲ့ အဖြေတစ်ခု ရမှာ မဟုတ်ပါဘူး။ အဲလိုဆိုရင် မြန်မာနိုင်ငံမှာ ငြိမ်းချမ်းရေး ရလာမှာ မဟုတ်ပါဘူး” လို့ မာဆူဒီက ထည့်သွင်းပြောဆိုခဲ့ပါတယ်။ 

အင်ဒိုနီးရှားဟာ အခုနှစ် အာဆီယံ ဥက္ကဌအဖြစ် ဆောင်ရွက်နေတာ ဖြစ်ပါတယ်။ 

Ref: The Diplomat

ဇူလိုင် ၉၊ ၂၀၂၃

M-Media 

-စစ်အာဏာရှင်တွေရဲ့ စိတ်ထင်တိုင်း လုပ်ဆောင်မှုကြောင့် မြန်မာနိုင်ငံဟာ ပိုမိုနက်ရှိုင်းတဲ့ ပဋိပက္ခဆီ အတားအဆီးမရှိ ကျရောက်နေတယ်လို့ ကုလ လူ့အခွင့်အရေးဆိုင်ရာ အကြီးအကဲက ပြောကြားလိုက်ပါတယ်။ 

ကုလ လူ့အခွင့်အရေးကောင်စီရဲ့ ၅၃ ကြိမ်မြောက် အစည်းအ၀ေးမှာ ကောင်စီအကြီးအကဲ ဗိုလ်ကာ တာ့က်က မြန်မာနိုင်ငံအကြောင်းကို တင်ပြ ဆွေးနွေးခဲ့ပါတယ်။ 

နောက်ထပ်ဖြစ်လာမဲ့ ထိခိုက်မှုတွေကို မြန်မာပြည်သူတွေ ကြံ့ကြံ့ခံနိုင်မလားဆိုတာ စဥ်စားလို့ မရနိုင်ဘူးလို့လည်း သူက ပြောပါတယ်။ 

“တိုင်းပြည်ဟာ ပိုမိုနက်ရှိုင်းတဲ့ ပဋိပက္ခနဲ့ ၀မ်းနည်းကြေကွဲမှုတွေဆီ အတားအဆီးမရှိ၊  ကျဆင်းနေပါတယ်”

၂၀၂၁ခုနှစ် စစ်အာဏာသိမ်းမှုနောက်ပိုင်း စီးပွားရေး ပိုမိုကျဆင်းလာတာ၊ ဆင်းရဲမွဲတွေမှု ပိုဆိုးတာ၊ သဘာ၀ သယံဇာတွေ ပိုမိုအမြတ်ထုတ်ခံရတာ၊ တရားလက်လွတ်ဖမ်းဆီးမှုတွေ၊ အရပ်သားပျောက်ဆုံးမှုတွေ၊ ညှင်းပမ်းနှိပ်စက်မှုတွေကိုလည်း ဗိုလ်ကာက ထောက်ပြဆွေးနွေးခဲ့ပါတယ်။ 

အရပ်သားတွေ အသက်ရှင်ရေး လိုအပ်တဲ့ အကူအညီတွေကို အာဏာသိမ်းစစ်ကောင်စီက စနစ်တကျ တားဆီးပိတ်တာ၊ လိုအပ်နေတဲ့သူတွေ အကူအညီ မရနိုင်အောင် ဥပဒေ၊ ဘဏ္ဍာရေးနဲ့ အုပ်ချုပ်ရေးစည်းမျဥ်းတွေ အသုံးပြု လုပ်ဆောင်တာတွေကိုလည်း သူက အစည်းအ၀ေးမှာ ထည့်သွင်းပြောဆိုခဲ့ပါတယ်။ 

မြန်မာနိုင်ငံမှာ အရပ်သားပြည်သူ ၁၅ ဒဿမ ၂ သန်းလောက်ဟာ စားနပ်ရိက္ခာနဲ့ အာဟာရထောက်ပံ့မှုတွေ ချက်ချင်း လိုအပ်နေတယ်လို့လည်း ဗိုလ်ကာက ပြောကြားခဲ့ပါတယ်။ 

Ref: The Star

လက်နက်ကိုင်ပဋိပက္ခလို ကိစ္စမျိုးမှာ လူသားချင်း စာနာထောက်ထားမှု အကူအညီတွေကို ရည်ရွယ်ချက်ရှိရှိ တားဆီးတာ၊ ငြင်းပယ်တာတွေဟာ စစ်ရာဇ၀တ်မှု မြောက်ပါတယ်။ တမင်သတ်ဖြတ်တာ၊ ညှင်းပမ်းနှိပ်စက်တာ၊ အစာငတ်အောင်လုပ်တာ၊ မဆိုင်ဘဲ အပြစ်ပေးတာလို ဖိနှိပ်တဲ့လုပ်ရပ်တွေနဲ့ အတူတူပါပဲ 

-ကုလသမ္မဂ လူ့အခွင့်အရေးကောင်စီ