Tag: MyanmarCoup2021

ဇွန် ၂၂၊ ၂၀၂၃

M-Media 

-မြန်မာစစ်ကောင်စီရဲ့ နိုင်ငံခြားငွေတွေကို စီမံကိုင်တွယ်ပေးနေတဲ့ ဘဏ်နှစ်ခုကို အမေရိကန်က ဗုဒ္ဓဟူးနေ့မှာ ပိတ်ဆို့အရေးယူမှုတွေ လုပ်ဆောင်လိုက်ပါတယ်။ 

မြန်မာ့ရင်းနှီးမြှုပ်နှံမှုနှင့် ကူးသန်းရောင်း၀ယ်ရေးဘဏ်နဲ့ မြန်မာ့ နိုင်ငံခြားကုန်သွယ်မှုဘဏ်တို့ ဖြစ်ပြီး စစ်ခေါင်းဆောင်တွေ အမြတ်အစွန်း အမြောက်အများရနေတဲ့ နိုင်ငံပိုင် စီးပွားရေး လုပ်ငန်းတွေရဲ့ နိုင်ငံခြားငွေ အထုတ်၊ အသွင်းကို အဓိက လုပ်ဆောင်ပေးနေတာ ဖြစ်ပါတယ်။  

၂၀၂၁ ခုနှစ် အာဏာသိမ်းမှု၊ အဲဒီနောက်ပိုင်း လူထုအပေါ် အကြမ်းဖက်မှုတွေကြောင့် အမေရိကန်နဲ့ အနောက်နိုင်ငံတွေဟာ မြန်မာစစ်ခေါင်းဆောင်တွေ ပိုင်ဆိုင်တဲ့ စီးပွားရေးလုပ်ငန်းတွေအပေါ် ဘဏ္ဍာရေးအရ ပိတ်ဆို့အရေးယူမှုတွေ အများအပြား လုပ်ဆောင်ခဲ့ပါတယ်။ 

အခုလို ဘဏ်တွေကို အရေးယူမှုနဲ့ပတ်သက်ပြီး သူတို့ဖက်က ဘာမှ ဆုံးရှုံးမှု ရှိမှာမဟုတ်ဘူးလို့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောပါတယ်။ ဒီလို ပိတ်ဆို့မှုတွေဟာ ပါတီစုံဒီမိုကရေစီစနစ်ကို လျှောက်လှမ်းမှုမှာ မလိုအပ်တဲ့ နှောင့်နှေးမှုတွေ ဖြစ်လာလိမ့်မယ်လို့လည်း သူက ခြိမ်းခြောက်ခဲ့ပါတယ်။ 

နိုင်ငံခြားနဲ့ ဆက်သွယ်ဆောင်ရွက်တဲ့ မြန်မာဘဏ်တွေကို အမေရိကန်က အခုလို အရေးယူမှုဟာ အာဆီယံဒေသတွင်းက နိုင်ငံတွေကိုပါ ရိုက်ခတ်မှုရှိမှာ ဖြစ်ပါတယ်။ 

Ref: Reuters 

ဇွန် ၁၉၊ ၂၀၂၃

M-Media 

-အာဏာသိမ်း မြန်မာစစ်ခေါင်းဆောင်တွေကို အာဆီယံအဆင့်မှာ ပြန်လာပါ၀င်လာနိုင်ရေး ရည်ရွယ်တဲ့ အလွတ်သဘော ဆွေးနွေးပွဲတစ်ရပ် ဦးဆောင်ကျင်းပပေးမယ်လို့ ထိုင်း အိမ်စောင့်အစိုးရက ထုတ်ပြန်ပါတယ်။ 

စစ်အာဏာသိမ်းမှုနဲ့ နောက်ဆက်တွဲ ပြည်သူတွေအပေါ် အကြမ်းဖက်မှုကြောင့် မြန်မာစစ်ခေါင်းဆောင်တွေကို အာဆီယံက ဖယ်ကျဥ်ထားတာပါ။ 

စစ်တပ်ကျောထောက်နောက်ခံပြု ထိုင်းအိမ်စောင့်အစိုးရရဲ့ မနေ့ကထုတ်ပြန်တဲ့ ကြေငြာချက်မှာ မြန်မာနိုင်ငံက ပြဿနာကို ဖြေရှင်းရေး အာဆီယံရဲ့ ကြိုးပမ်းမှုကို အထောက်အကူဖြစ်စေဖို့အတွက် ဒီဆွေးနွေးပွဲကို စီစဥ်ရတာဖြစ်တယ်လို့ ဖော်ပြထားပါတယ်။ 

ဆွေးနွေးပွဲကို လာအို၊ ကမ္ဘောဒီးယား၊ တရုတ်၊ ဘရူနိုင်း၊ ဗီယက်နမ်နဲ့ မြန်မာစစ်ကောင်စီ နိုင်ငံခြားရေး၀န်ကြီးတို့ တက်ရောက်လိမ့်မယ်လို့ ထိုင်းက ပြောပါတယ်။ 

လူ့အခွင့်အရေးစောင့်ကြည့်ရေးအဖွဲ့ Human Rights Watch က စစ်ကောင်စီကို အာဆီယံအဆင့်မှာ နေရာပြန်ပေးရေး ဒီတွေ့ဆုံပွဲမှာ ဆွေးနွေးဖို့ရှိတယ်လို့ ပြောပါတယ်။ 

လက်ရှိ အာဆီယံဥက္ကဌဖြစ်တဲ့ အင်ဒိုနီးရှားက ဒီဆွေးနွေးပွဲကို တက်မှာ မဟုတ်ပါဘူး။ မလေးရှားက အစိုးရက ထုတ်ပြန်တဲ့ ကြေငြာချက်မှာ ဒီဆွေးနွေးပွဲဟာ အာဆီယံအဖွဲ့ရဲ့ ညီညွတ်မှုကို ထိခိုက်စေနိုင်တဲ့အတွက် တက်ရောက်မှာမဟုတ်ဘူးလို့ ဖော်ပြထားပါတယ်။ 

Ref: AFP

ဇွန် ၁၄၊ ၂၀၂၃

M-Media

-၂၀၂၁ ခုနှစ် ဖေဖော်၀ါရီ ၁ ရက်နေ့ စစ်အာဏာသိမ်းမှုနောက်ပိုင်း ဖြစ်ပေါ်လာတဲ့ မတည်ငြိမ်မှုတွေကြောင့် မြန်မာနိုင်ငံမှာ အရပ်သား ၆ ထောင်ကျော်လောက် သေဆုံးခဲ့တယ်လို့ သိရပါတယ်။ 

အချက်အလက်တွေကို အော်စလို အခြေစိုက် သုတေသနအဖွဲ့ Peace Research Institute of Oslo က စစ်တမ်းကောက်ယူ ထုတ်ပြန်တာ ဖြစ်ပါတယ်။ 

“လူတွေထိခိုက်သေဆုံးမှု အရေအတွက်ဟာ အရင်က ထုတ်ပြန်ထားတာတွေထက် ပိုမိုများပြားနေတာကို ကျွန်တော်တို့ တွေ့ရပါတယ်။ စစ်တပ်က အဓိကသတ်ဖြတ်တာဖြစ်ပြီး၊ စစ်တပ်ဆန့်ကျင်ရေးအဖွဲ့အစည်းတွေရဲ့လက်မှာလည်း သွေးတော်တော်စွန်းထားပါတယ်” လို့ အစီရင်ခံစာ ပူးတွဲရေးသားသူ စတိုင် တိုနက်ဆန်က ပြောပါတယ်။ 

၂၀၂၁ ခုနှစ် ဖေဖော်၀ါရီ ၁ ရက်နေ့ကနေ ၂၀၂၂ ခုနှစ် စက်တင်ဘာ ၃၀ ရက်နေ့အထိ နိုင်ငံရေးကြောင့် သတ်ဖြတ်ခံရသူ ၆၃၃၇ ဦး ရှိပြီး၊ ဒဏ်ရာရသူက ၂၆၁၄ ဦး ရှိတယ်လို့ သုတေသနအဖွဲ့က ဆိုပါတယ်။ 

ဒီအရေအတွက်ဟာ နိုင်ငံတကာအဖွဲ့အစည်းတွေ အရင်က ထုတ်ပြန်ထားတဲ့ ပမဏာထက် သိသိသာသာ များပြားနေတာ ဖြစ်ပါတယ်။ 

သေဆုံးသူ ထက်၀က်လောက်ဖြစ်တဲ့ ၃၀၀၃ ဦးကို အာဏာသိမ်းစစ်ခေါင်းဆောင်ရဲ့ လက်ပါးစေ စစ်တပ်၊ ရဲတပ်ဖွဲ့နဲ့ ပြည်သူ့စစ်တွေ သတ်ဖြတ်တာဖြစ်တယ်လို့ အစီရင်ခံစာမှာ ဖော်ပြထားပါတယ်။ 

စစ်ကောင်စီကို ဆန့်ကျင်တဲ့အဖွဲ့တွေရဲ့ သတ်ဖြတ်မှုက ၂၁၅၂ ဦး ရှိပါတယ်။ သာမန်ပြည်သူအချင်းချင်း သတ်ဖြတ်ခံရမှုဟာ ၁၂ ဦးရှိပြီး ၁၁၇၀ ဦးရဲ့ သေဆုံးရတဲ့အကြောင်းအရင်းကို တိတိကျကျ မသိရဘူးလို့ Peace Research Institute of Oslo အဖွဲ့က ဆိုပါတယ်။ 

“မီဒီယာတွေကဖော်ပြတဲ့ အရေအတွက်ထက်ကို ပိုများပါတယ်။ ဒါတောင် စိတ်ချရတဲ့ မီဒီယာဖော်ပြချက်တွေကို အခြေခံပြီး ခန့်မှန်း တွက်ချက်ထားတာပါ။ သတင်းမထွက်လာတာတွေ ရှိတာကြောင့် အမှန်တကယ်အရေအတွက်ဟာ အခုထက်ပိုများမှာ အသေအချာပါပဲ”

Ref: AFP