ဒီဇင်ဘာ ၂၈၊ ၂၀၁၉
M-Media
-အကြမ်းဖက်သမားတွေဟာ အစ္စလာမ်သာသနာကို နာမည်ဖျက်နေတယ်လို့ နိုက်ဂျီးရီးယားသမ္မတ မဟာမာဒူ ဘူဟာရီက ပြောကြားလိုက်ပြီး၊ အကြမ်းဖက်တွေရဲ့ ဘာသာရေးသွေးခွဲမှုကို လက်မခံကြဖို့ ပြည်သူတွေကို တိုက်တွန်းလိုက်ပါတယ်။
IS အကြမ်းဖက်အဖွဲ့ရဲ့ အနောက်အာဖရိကအဖွဲ့ခွဲ (ISWAP) က သူတို့ဖမ်းဆီးထားတဲ့ ခရစ်ယာန်နဲ့ မွတ်စလင်တွေကို ခေါင်းဖြတ်သတ်လိုက်တယ်လို့ ကြေငြာခဲ့ပြီးတဲ့နောက် ဘူဟာရီက ဒီလို တုန့်ပြန်ခဲ့တာပါ။
မနေ့ကထုတ်ပြန်တဲ့ကြေငြာချက်မှာ ဘူဟာရီက ဒီသတ်ဖြတ်မှုကို ရှုတ်ချခဲ့ပြီး၊ အကြမ်းဖက်သမားတွေကို တိုက်ဖျက်ရေး ညီညီညွတ်ညွတ်လုပ်ဆောင်ကြဖို့၊ ဘိုကိုဟရမ်နဲ့ ISWAP တွေရဲ့ ဝါဒဖြန့်မှုတွေကို မယုံကြဖို့ ပြည်သူတွေကို တိုက်တွန်းခဲ့ပါတယ်။
“တစ်ဘ၀စံတွေ၊ ဘုရားမဲ့ဝါဒီတွေ၊ ကြမ်းကြုတ်တဲ့ လူသတ်သမားတွေလက်ထဲမှာ အပြစ်မဲ့ ဓားစာခံတွေ အသတ်ခံခဲ့ရတဲ့အတွက် အလွန်အမင်း ဝမ်းနည်းကြေကွဲရပါတယ်။ ဒီလူတွေက ရက်စက်ကြမ်းကြုတ်တဲ့လုပ်ရပ်တွေကြောင့် အစ္စလာမ်သာသနာလည်း နာမည်ပျက်ရပါတယ်”
အကြမ်းဖက်သမားတွေရဲ့လုပ်ရပ်ဟာ အစ္စလာမ်သာသနာနဲ့ သန်းပေါင်းများစွာသော အစ္စလာမ်ဘာသာဝင်တွေကို ကိုယ်စားမပြုဘဲ၊ ဒီလုပ်ရပ်တွေကြောင့် ခရစ်ယာန်နဲ့ မွတ်စလင်တွေအကြား သွေးကွဲမှုကို ခွင့်ပြုလို့မရကြောင်း ဘူဟာရီက ထည့်သွင်းပြောကြားခဲ့ပါတယ်။
နိုက်ဂျီးရီးယားပြည်သူအားလုံးရဲ့ လုံခြုံရေးကို အထူးဦးစားပေးဆောင်ရွက်သွားမှာ ဖြစ်တယ်လို့လည်း နိုက်ဂျီးရီးယားသမ္မတက ထည့်သွင်းပြောဆိုခဲ့ပါတယ်။
Ref: Ripples Nigeria
