Tag: opinion

သြဂုတ် ၁၀ ၊ ၂၀၁၄
M-Media
.ဆောင်းပါးရှင်- မီလာ

Political Correctness (သို့) PC ဆိုတဲ့ စကားစုဟာ ၁၉၇၀ နောက်ပိုင်းမှာ အမေရိကန်နဲ့ ဗြိတိန်နိုင်ငံတွေ မှာ ခေတ်စားလာခဲ့ပါတယ်။ PC ရဲ့ အဓိပ္ပါယ် ဖွင့်ဆိုချက်ကတော့ “လူတစ်ဦး(သို့မဟုတ်) လူတစ်စုအပေါ် နှိမ့်ချ၊ ခွဲခြား၊ စော်ကားမှု ဖြစ်စေသော စကားလုံးအသုံးအနှုံးများကို ဂရုပြုရှောင်ကျဉ်ခြင်း” ဖြစ်ပါတယ်။ ဒီလိုပြောလို့ လူအချို့က လွတ်လပ်စွာပြောဆိုမှု (Freedom of speech ) ကို ကန့်သတ်ချုပ်ချယ်တယ် လို့ ဆိုကောင်းဆိုကြပါလိမ့်မယ်။ တကယ်တော့ “လွတ်လပ်စွာပြောဆို ခွင့်ရှိခြင်း” နဲ့ “တစ်ဖက်သားအပေါ် လေးစားမှုနှင့် ပြောဆိုခြင်း”ဟာ အင်မတန်ကွာခြားပါတယ်ရှင်။

မိမိလွတ်လပ်ခွင့်နဲ့ သုံးနှုံးလိုက်တဲ့ စကားလုံးတစ်လုံး၊ စကား တစ်ခွန်းဟာ တစ်ဖက်သားအပေါ် စော်ကားရာရောက်ခဲ့ရင်တော့ ဒီလို အသုံးအနှုံးမျိုးကို ရှောင်ရှားသင့်တယ် ဆိုတာ ယနေ့ခေတ်မှာ လက်ခံလာတဲ့ ယုံကြည်မှုတစ်ခုပါ။ လူမျိုးစု၊ ကျား/မ၊ ကိုးကွယ်ရာဘာသာ နှင့် အဖွဲ့အစည်းများအား ထိခိုက်စေသောအသုံးအနှုံးတိုင်းကို အစားထိုးသုံးစွဲဖို့ အနောက်နိုင်ငံတွေမှာ သတင်းမီဒီယာတွေက အစ၊ တက္ကသိုလ်နှင့် ကျောင်းစာသင်ခန်းတွေ အလယ်၊ ပြည်သူလူထုထဲ အထိ ကျယ်ကျယ်ပြန့်ပြန့် ကျင့်သုံးလာကြတာကို တွေ့ရပါတယ်။

ကျွန်မတို့ လက်ရှိမြန်မာပြည်မှာ သုံးနှုံးနေတဲ့ စကားလုံးအချို့ကိုပဲ လေ့လာကြည့်ရအောင်။ ဥပမာအားဖြင့် အရပ်ပုတဲ့ လူတစ်ယောက်ကို “ဂျပု” ၊ မျက်မှန်တပ်ထားသူကို “လေးလုံး” ၊ ခပ်၀၀လူ တစ်ယောက်ကို “ဖက်တီး” ၊ ထိပ်ပြောင်တဲ့သူကို “ပြောင်ကြီး”အစရှိသည်ဖြင့် ခေါ်ဝေါ်သုံးနှုံးခြင်းဟာ လူတစ်ယောက်ရဲ့ ပုံသဏ္ဍာန်ကို ရှုံ့ချခေါ်ဝေါ်လိုက်တဲ့ စကားလုံးပါ။ (ဒီနေရာမှာ သူငယ်ချင်းအချင်းချင်း ချစ်စနိုးနဲ့ နောက်ပြောင်ခေါ်တာမျိုးကို ပါတ်ဝန်းကျင်က လက်ခံထားပေမယ့် အခေါ်ခံရထဲသူရဲ့ စိတ်ထဲမှာ စိတ် မကောင်းဖြစ်သွားရင်၊ ခံရခက်သွားရင် ဒါဟာလည်း offensive word ဖြစ်ပါတယ်)။ PC အရတော့ “short” ဆိုတဲ့စကားလုံး အစား “vertically challenge”၊ “deaf” အစား “hearing impaired”၊ “blind” အစား “visually impaired” လို့ ပြောင်းလဲသုံးစွဲလာပါတယ်။

ဒီလိုပါပဲ ယောက်ျား၊ မိန်းမ ခွဲခြားသုံးနှုံးတဲ့ စကားလုံးတွေကိုလည်း အစားထိုးသုံးစွဲဖို့ ကြိုးစားလာကြပါတယ်။ ဥပမာ.အ၀တ်အထည်ပြုလုပ်တဲ့ ကုန်ကြမ်းနဲ့ ပတ်သက်ပြီး “manmade fibre” လို့ သုံးစွဲခြင်းဟာ ကျား၊မခွဲခြားမှုရှိတဲ့ စကားလုံးလို့ ယူဆတဲ့ အတွက် “synthetic or artificial fibre” လို့ ပြောင်းလဲ အသုံးပြုလာကြပါတယ်။ “Housewife” “Househusband” ဆိုတဲ့ စာလုံးတွေနေရာမှာ “Homemaker” ဆိုတဲ့ စကားလုံး လှလှလေးက နေရာယူလာပါပြီ။ “policeman”၊ “fireman” ဆိုတဲ့စာလုံးတွေကို ကျား၊မခွဲခြားမှု မရှိတဲ့ “police officer”၊ “fire-fighter” ဆိုတဲ့ စကားလုံးတွေနဲ့ ပြောင်းလဲရေးသားနေကြပါပြီ။ “Husband” “wife” ဆိုတဲ့ အသုံးအနှုန်း အစား “spouse” (အိမ်ထောင်ဖက်) ဆိုတဲ့ စာလုံးကို လျှောက်လွှာ၊ မှတ်တမ်းများမှာ ရေးသားလာကြပါတယ်။

အထူးသဖြင့် လူသိများတဲ့ စကားလုံးပြောင်းလဲမှု ကတော့ “Black” “Negro” (လူမည်း) ဆိုတဲ့ စကားလုံးတွေကို လုံးဝ သုံးနှုန်းခွင့် မပြုတော့ဘဲ “African” ဒါမှမဟုတ် နေထိုင်တဲ့ နိုင်ငံသား အလိုက် ပြောင်းလဲခေါ်ဝေါ်စေခဲ့ပါတယ်။ အသားအရောင်ကို ခွဲခြားနှိမ်ချ ခေါ်ဝေါ်တဲ့ စကားလုံးဟာ လွတ်လပ်စွာပြောဆိုခြင်း မဟုတ်ဘဲ သူတစ်ပါးကို ထိခိုက်စော်ကားမှုတွေ ပျော်ဝင်နေတယ်လို့ ကျွန်မခံစားမိပါတယ်။

ခရစ်ယာန်ဘာသာတရားနဲ့ ဆိုင်တဲ့ “Christmas holiday” ဆိုတဲ့ နှစ်ပေါင်းများစွာသုံးစွဲခဲ့တဲ့ စကားလုံးကိုတောင် “Holiday season” (သို့မဟုတ်) “winter holiday” ဆိုပြီး ပြောင်းလဲရေးသားဖို့ တိုက်တွန်းလာပါတယ်။ ဒါဟာ ခရစ်ယာန် မဟုတ်တဲ့ ဘာသာခြားတွေအတွက်၊ culture မတူတဲ့ အခြားနိုင်ငံသားတွေ အတွက် ပြောင်းလဲသုံးနှုန်းဖို့ပါပဲ။

ဒါပေမယ့်လည်း PC ဟာ စကားလုံး သုံးနှုန်းမှုကို ရှုပ်ထွေးစေတယ်၊ လွတ်လပ်စွာပြောဆိုခွင့်ကို ပိတ်ပင်တယ်ဆိုပြီး ဆန့်ကျင်တဲ့ လူအများအပြားလည်း ရှိကြပါတယ်။ ကျွန်မအမြင်ကတော့ တစ်ဖက်သားရဲ့ ခံစားမှုကို အလေးထားတာ၊ တစ်ဖက်သား မနှစ်သက်မယ့် အပြောအဆို အခေါ်အဝေါ်မျိုးကို ရှောင်ကြဉ်တာဟာ ယဉ်ကျေးမှုရဲ့ ပြရုပ် တစ်ခုလို့ပဲ ထင်ပါတယ်။ ရှေးယခင် နဂို စဉ်ဆက်ကတည်းက သုံးခဲ့တဲ့ အသုံးအနှုံးမှန်ခဲ့ရင်တောင်မှ လက်ရှိကာလမှာ လိုက်လျောညီထွေ မရှိရင် (သို့) တစ်ဖက်သားက မနှစ်သက်ရင် ပြောင်းလဲသင့်ပါတယ်။

ယနေ့ ကျွန်မတို့ မြန်မာတွေကြားမှာ ကြားနေရတဲ့ “ကုလား” စကားလုံးရဲ့ အစဟာ ကူးဝင်လာသူ (သို့) ကူးလာ ဆိုသော စကားလုံးမှ ဆင်းသက်လာတယ်လို့ အချို့က ဆိုပါတယ်။ အချို့ကလည်း “ကာလား” မဲခြင်းဆိုတဲ့ စကားလုံးကို ဆင့်ပွါးသုံးတယ်လို့ ပြောပါတယ်။ ဗုဒ္ဓ ဘာသာ ဆရာတော် တစ်ပါးကတော့ ပါဠိ စကားလုံး “ကုလ” (မြန်မာအဓိပ္ပါယ် “အမျိုး”) ကနေ “ကုလား” လို့ ပြောင်းလဲလာတယ်လို့ ယူဆပါတယ်။ အသားဖြူတဲ့ အင်္ဂလိပ် လူမျိုးတွေကိုလည်း “ကုလားဖြူ” လို့ခေါ်ခဲ့ကြတာပါ။ “အိန္ဒိယမှာ ဗြဟ္မဏ၊ ခတ္တိယ၊ ၀ဿ၊ သုဒ္ဓ ဆိုတဲ့ အမျိုး (ကုလ) လေးပါးရှိပါတယ်။ လုပ်တဲ့ အလုပ်အကိုင်ပေါ်မှာ မူတည်ပြီး ဒီလေးမျိုးကို ခွဲခြားခဲ့ကြတာပါ” လို့ ဆရာတော်က ရှင်းပြထားပါတယ်။ ဒါကြောင့် အိန္ဒိယလူမျိုးတွေ ကိုလည်း ကုလားလို့ ခေါ်ရင်း အခုခေတ်အထိ မွတ်ဆလင်(မ်)၊ ဟိန္ဒူ အားလုံးကိုလည်း ဆက်လက်ခေါ်ဝေါ် သုံးစွဲခဲ့ကြပါတယ်။

ရှေးယခင်ကတည်းက ခေါ်ရိုးခေါ်စဉ်ဖြစ်ပေမယ့်လည်း နောက်ပိုင်းမှာ လူမျိုးရေး ပဋိပက္ခတွေနဲ့ အတူ တစ်ဖက်သား လက်မခံချင်တဲ့ သုံးနှုန်းမှုမျိုးတွေကြောင့် “မွတ်ဆလင်မ်” လို့ စကားလုံးပြောင်းလဲ သုံးစွဲဖို့ကို မီဒီယာတွေက အစ လက်ခံလာရပါတယ်။ အခုအချိန်မှာ အင်္ဂလိပ်လူမျိုး တစ်ဦးကို ဘယ်မြန်မာနိုင်ငံသားကမှ “ကုလားဖြူ” လို့ မခေါ်ကြတော့ပါ။ ဒါဟာ ခေတ်နဲ့ အညီ အခေါ်အဝေါ်ပြောင်းလဲ သွားခြင်းမျိုးဖြစ်ပြီး ယဉ်ကျေးမှုရှိတဲ့ လူသားစု အနေနဲ့ တစ်ဖက်သား စိတ်အနှောင့်အယှက်ဖြစ်စေမယ့် အသုံးအနှုံးမျိုးကို ရှောင်သင့်တယ်လို့ ထင်ပါတယ်။ ဒါပေမယ့်လည်း နားလည် တတ်ကျွမ်းသူတွေကအစ အများစုဟာ ဟိန္ဒူ လူမျိုးတွေနဲ့ မွတ်ဆလင်မ်တွေအပေါ် “ကုလား” ဆိုတဲ့ အသုံးအနှုန်းကို ဆက်လက် သုံးစွဲနေကြဆဲပါပဲ။ မသိသေးတဲ့ သူတွေကို ရှင်းပြဖို့ မကြိုးစားဘဲ၊ သိလျက်နဲ့ ဆက်လက်ခေါ်နေခြင်းဟာ မိမိတို့ ရဲ့ ခွဲခြားလိုစိတ်ကို ဖွင့်လှစ်ပြသရာရောက်တယ်ဆိုတာကို စဉ်းစားစေချင်ပါတယ်။

ဘာသာရေး၊ လူမျိုးရေးတွေကိုထည့်မတွေးဘဲ လူသားအချင်းချင်း စိတ်အနှောင့်အယှက်ကင်းစွာနဲ့ ပေါင်းသင်းဆက်ဆံမှုကို ဦးတည်ဖို့သာ အဓိကကျပါတယ်။ ယဉ်ကျေးမှု ထွန်းကားတဲ့ ကျွန်မတို့ နိုင်ငံမှာ ကျား၊မ ခွဲခြားတဲ့၊ လူမျိုးရေးခွဲခြားတဲ့၊ ဘာသာရေးခွဲခြားတဲ့ အသုံးအနှုံးတွ ရှောင်ကျဉ်သုံးစွဲနိုင်ကြပါစေလို့ ဆန္ဒပြုလိုက်ရပါတယ်ရှင်။

မီလာ

References:
http://en.wikipedia.org/wiki/Political_correctness
http://blog.hillsbiblechurch.org/2012/03/05/evangelicals-twisting-the-scripture/politically-correct/
http://www.shwemyotaw.com/profiles/blogs/oketama-sara-fb-name

သြဂုတ် ၆ ၊ ၂၀၁၄
M-Media
.ရေးသူ- ကိုရေချမ်း

မြောက်များလှစွာသောလူတွေဟာ ရုပ်ရှင်၊ ၀တ္ထု၊ (သမိုင်းအမည်ခံ)ပုံပြင်ဒဏ္ဍာရီတွေရဲ့ အလိမ်အညာတွေကြားထဲ စီးမျောရင်း နစ်မြုပ်ကုန်ကြတယ်။ ဘ၀တည်ဆောက်ပုံဖော်မှု လမ်းချော်ကုန်တယ်။ ဒါကို မိမိတို့ဖာသာ သတိမမူမိကြဘူး။ မောဟနဲ့ ရှေ့ဆက်မိတဲ့ အခါကျတော့ မိမိတို့ ပုဂ္ဂလရေးရာ သာမက ရံဖန်ရံခါ လူ့အဖွဲ့အစည်းနဲ့ အသိုင်းအ၀ိုင်းကိုပါ ထိခိုက်နစ်နာသွားစေတတ်တဲ့ အန္တရာယ်ရှိကြောင်း သဘောပေါက်ဖို့ လိုပါတယ်။

တချို့က စိတ်ပြေလက်ပျောက် ဖျော်ဖြေရေးသက်သက်လို့ ဆင်ခြေပေးတယ်။ ဖျော်ဖြေရေးလို့ တကယ် သဘောထားနိုင်ရင် အဲ့ဒီအရာတွေကို လက်တွေ့လူ့ဘ၀ထဲ မသယ်ဆောင်လာဖို့ အရေးကြီးပါတယ်။

တချို့က သင်ခန်းစာယူဖို့ဆိုပြီး ဆင်ခြေပေးကြတယ်။ သင်ခန်းစာရယူတယ်ဆိုတာ သရုပ်ဖော်ပြတာနဲ့ ထပ်တူလုပ်ဆောင်ဖို့ ဆိုလိုတာမဟုတ်ကြောင်း နားလည်ထားဖို့ အရေးကြီးပါတယ်။

တချို့ကျတော့ အသိအမြင်ဗဟုသုတအနေနဲ့ သဘောထားကြတယ်။

သိပ်ကောင်းပါတယ်။ များများသိတော့ အမြင်ပိုကျယ်နိုင်ပါတယ်။ သို့သော် အဲ့ဒီအသိကို အကျိုးရှိရှိ အသုံးမချနိုင်ရင်တော့ ပလိုင်းပေါက်နဲ့ ဖားကောက်သလိုပါပဲ။ ဒါ့အပြင် ရလာတဲ့ အသိအမြင်က အစစ်အမှန်လား အတုအယောင်လားဆိုတာ ဆန်းစစ်ပိုင်းခြားဖို့လည်း အရေးကြီးပါတယ်။

အမျိုးမျိုးပေါ့လေ။ ကျနော် ချပြလိုတဲ့ အဓိကအချက်ကတော့ လမ်းခင်းပုံဖော်ထားတဲ့ အဆင်အယင်ထက် ဘာ message ပေးထားလဲ၊ အခြေခံအနှစ်သာရက ဘာလဲဆိုတာကို ခြုံငုံကြည့်မြင်တတ်ဖို့ လိုပါတယ်။ ဒါမှလည်း စဉ်းစားဝေဖန်ပိုင်းခြားမှု မှန်ကန်သွားနိုင်မှာ ဖြစ်ပါတယ်။ ပိတ်ကားထက်က၊ စာရွက်ပေါ်က ဇာတ်လမ်းအားလုံးဟာ လက်တွေ့လူ့ဘ၀ဇာတ်ပွဲနဲ့ အမြဲတစေ ထပ်တူမကျတတ်ပါဘူး။ ထပ်တူကျအောင် အတင်းအဓမ္မ ဇွတ်ပုံသွင်းမယ်၊ ပုံဖော်မယ်ဆိုရင်တော့ မိမိကိုရော မိမိနဲ့ဆက်နွှယ်နေသူ့ဘ၀များကိုပါ ရေရှည်မှာ ထိခိုက်နစ်နာ သွားစေပါမယ်။ ကောင်းကျိုး မဖြစ်ထွန်းဘဲ မကောင်းတဲ့အကျိုးဆက်သာ တိုးပွားလာပါလိမ့်မယ်။

ဒီလောကမှာ လူရယ်လို့ဖြစ်လာရင် လောကဓံကို ကြုံဆုံရတာချည်းပါဘဲ။ လူ့ဘ၀ဆိုတာ စမ်းသပ်ကွင်းပြင် တစ်ခုပါ။ ပြင်းထန်တာနဲ့ ပျော့ပြောင်းတာ – ဒါဘဲ ကွာပါတယ်။ ကြုံကြိုက်ခံစားမှုမှာ တစ်ဦးနဲ့တစ်ဦး တူညီတာရှိသလို ဖြောင့်ဖြောင့်ကြီး ဆန့်ကျင်တာရှိပါတယ်။ လူတွေရဲ့ ကျောထောက်နောက်ခံ အခြေအနေ၊ ပင်ကိုယ်စိတ်အခံ၊ ခံယူချက်၊ ကိုယ်ရည်ကိုယ်သွေး၊ ပညာဥာဏ်ရည် စတာတွေအပေါ် မူတည်ပြီး ခြားနားချက် အနည်းနဲ့အများ ရှိနေကြပါတယ်။ အတွေ့အကြုံချင်းဖလှယ်တာဖြစ်စေ၊ ဘ၀သောင်းပြောင်း အထွေထွေအပေါ် ကြည့်ရှုလေ့လာခံစားတာဖြစ်စေ၊ ကောက်ချက်ချတာဖြစ်စေ၊ အကြံပြုလမ်းညွှန်တာဖြစ်စေ တခါတလေ ပေးချင်တဲ့ message က တစ်မျိုး၊ ရသွားတဲ့အကျိုး(အနှစ်သာရ)က တစ်ခြား ဖြစ်သွားတာရှိတယ်။ ဥပမာ – မိမိတို့ရဲ့ယဉ်ကျေးမှုကို တန်ဖိုးထားတတ်အောင် ပုံဖော်တဲ့ message ဖြစ်သော်လည်း ပရိသတ်က အခြားသောယဉ်ကျေးမှုတွေအပေါ် မုန်းတီးရွံရှာစိတ်ဝင်သွားတာမျိုးပါ။

အလားတူစွာဘဲ ပေးသူက မိမိရဲ့ message ကို အပေါ်ယံသကာရည်လောင်းထားတယ်၊ တကယ့်အနှစ်သာရကို လှန်လျောကြည့်ရှုလိုက်တဲ့ အခါ လောက်တက်မစင်တွေ ဖြစ်နေတတ်ကြတယ်။ ဥပမာ – မအ,အောင် သမိုင်းကိုသိရမယ် ဆိုတဲ့စကားနဲ့ သမိုင်းဖြစ်စဉ်တစ်ချို့ကို ဆန္ဒစွဲ အရင်းတည်ပြီး လုပ်ကြံဖန်တီးချက်တွေ၊ မုသားတွေနဲ့အတူ ရောစွက်တင်ပြလိုက်တော့ ပရိသတ်ဖက်က (လိမ်ညာလှည့်စားခံရမှန်း မသိဘဲ) အမှန်လို့မှတ်ယူမိတယ်။ တကယ့်အရှိတရား သမိုင်းအစစ်၊ ဖြစ်စဉ်အမှန်များကို ပစ်ပယ်လိုက်ကြတယ်။ သကာဖုံးမုသားတွေကို ခံယူချက်အဖြစ် အသွင်ပြောင်းသွားစေအောင် ကြံဆောင်တာမျိုးပါ။ ဒီလိုအမျိုးအစားကို ၀ါဒဖြန့်ခြင်းကဏ္ဍတွေမှာ တွေ့နိုင်ပါလိမ့်မယ်။ ကြည့်တတ်ရင် မြင်နိုင်ပါတယ်။

ဒီတော့ ဒီလောကမှာ ဘယ်သူမှရှောင်လွှဲမရနိုင်သော ကံကံ၏အကျိုးတွေ၊ ဆန္ဒစွဲကင်းသော တကယ့်ဖြစ်စဉ်မှန်တွေကို လက်မခံတတ်ဘူး ဆိုရင် “လောကဓံ”အဖြစ်မှ “လောကဒဏ်”အဖြစ် ပြောင်းလဲသွားတတ်ကြောင်း သတိချပ်ကြဖို့ တိုက်တွန်းလိုက်ရပါတယ်။

ကိုရေချမ်း