ဒီဇင်ဘာ ၄၊ ၂၀၂၁
M-Media
-တမန်တော်မိုဟာမက်ကို စော်ကားတယ်ဆိုတဲ့ခေါင်းစဉ်နဲ့ သီရိလင်္ကာနိုင်ငံသားတစ်ဦး သတ်ဖြတ်ခံရမှုမှာ ပါဝင်သူ အနည်းဆုံး ၁၂၀ လောက်ကို ဖမ်းဆီးထားတယ်လို့ ပါကစ္စတန်အစိုးရက ထုတ်ပြန်ပါတယ်။
မြို့တော် အစ္စလာမ်မာဘတ်မှာ သောကြာနေ့က ဖြစ်ပွားခဲ့တာပါ။ စက်ရုံမန်နေဂျာ သီရိလင်္ကာနိုင်ငံသားတစ်ဦးက တမန်တော်မိုဟာမက်ကို စော်ကားပြောဆိုတယ်ဆိုတဲ့သတင်း ထွက်လာပြီးတဲ့နောက်မှာ ဒေါသထွက်နေတဲ့ လူအုပ်ကြီးက စက်ရုံကို၀ိုင်းပြီး မန်နေဂျာကို ဆွဲထုတ်ကာ ရိုက်နှက်ပြီး မီးရှို့သတ်ဖြတ်ခဲ့တာ ဖြစ်ပါတယ်။
ဒီအဖြစ်အပျက်ကို ကျူးလွန်သူတွေက ဗီဒီယိုရိုက်ကာ ဆိုရှယ်မီဒီယာပေါ်မှာပါ လွှင့်တင်ခဲ့ပါတယ်။
ပါကစ္စတန်ရဲတပ်ဖွဲ့ ပြောရေးဆိုခွင့်ရှိသူ ခူရမ် ရှဇက်က ဒီအကြမ်းဖက်မှုအတွက် အဓိကတာဝန်ရှိသူတစ်ဦး အပါအဝင် လူပေါင်း ၁၂၀ ကို ဖမ်းဆီးထားပြီး ဆက်လက်စုံစမ်းမှုတွေလုပ်ဆောင်နေတယ်လို့လည်း ဒီကနေ့မှာ ပြောကြားခဲ့ပါတယ်။
ဝန်ကြီးချုပ် အင်မရန်းခန်းရဲ့ ဘာသာရေးဆိုင်ရာအကြံပေး အစ္စလာမ်သာသနာ့ပညာရှင် တာဟီရ် အက်ရှ်ရာဖီက ဖမ်းဆီးမှုတွေလုပ်ထားကြောင်း အတည်ပြုခဲ့ပြီး၊ မန်နေဂျာက စည်းကမ်းတင်းကြပ်မှုအတွက် အလုပ်သမားအချို့ မကျေနပ်တာတွေ ရှိနေတာကို ဖမ်းဆီးထားသူတွေထံက သိရကြောင်း ပြောကြားခဲ့ပါတယ်။
“စက်ရုံအလုပ်သမားတစ်ချို့က မန်နေဂျာကို မကျေနပ်တာနဲ့ ဘာသာရေးကို အလွဲသုံးစားလုပ်လိုက်လားဆိုတာအပါအဝင် ဒီကိစ္စကို ရှုထောင့်ပေါင်းစုံကနေ ရဲတပ်ဖွဲ့က စုံစမ်းစစ်ဆေးနေပါတယ်”
ရှက်စရာ
ဒီတိုက်ခိုက်သတ်ဖြတ်မှုကြောင့် နိုင်ငံတစ်ဝှမ်း အုပ်အော်သောင်းနင်းဖြစ်ခဲ့ပြီး ပါကစ္စတန်ဝန်ကြီးချုပ် အင်မရန်းခန်းက ဒါဟာ တိုင်းပြည်အတွက် ‘အရှက်ရစရာနေ့တစ်နေ့’ ဖြစ်တယ်လို့ Twitter စာမျက်နှာမှာ ရေးသားခဲ့ပါတယ်။
“ဆီလ်ကွတ်မှာ သီရိလင်္ကာမန်နေဂျာတစ်ဦးကို လူအုပ်ကြီးက အရှင်လတ်လတ်မီးရှို့သတ်လိုက်တဲ့ စက်ဆုပ်ဖွယ်ရာဒီကိစ္စဟာ ပါကစ္စတန်အတွက် အရှက်ရစရာနေ့တစ်နေ့ ဖြစ်ပါတယ်။ စုံစမ်းစစ်ဆေးမှုကို ကျွန်တော် ကြီးကြပ်နေပြီး ကျူးလွန်တဲ့သူတွေကို ဥပဒေအတိုင်း ပြည့်ပြည့်၀၀ အရေးယူအပြစ်ပေးသွားမှာ ဖြစ်ပါတယ်။ ဖမ်းဆီးမှုတွေလည်း လုပ်နေပါပြီ”
ဒုတိယမြို့တော် ကရာချီမှာလည်း အရပ်ဖက်အဖွဲ့အစည်းတွေဟာ ဒီသတ်ဖြတ်မှုကို ရှုတ်ချတဲ့ ဆန္ဒပြပွဲတစ်ခုကို ဒီကနေ့မှာ လုပ်ဆောင်ခဲ့ပါတယ်။
သတ်ဖြတ်မှုကို ရှုတ်ချတယ်လို့ ဆန္ဒပြသူတွေက ဆိုပြီး၊ သာသနာညှိုးနွမ်းစေမှုဥပဒေ အလွဲသုံးစားလုပ်ခံနေရတာကို တားမြစ်အရေးယူပေးဖို့လည်း အစိုးရကို တောင်းဆိုခဲ့ပါတယ်။
“ဘာသာရေးစော်ကားတယ်ဆိုပြီး မတရားစွပ်စွဲ အသတ်ခံလိုက်ရတာပါ။ သူ့ကိုသတ်တဲ့သူတွေက သူ့လက်အောက်မှာ အလုပ်မလုပ်ချင်တဲ့သူတွေပါ။ ရိုးရိုးသားသားအလုပ်လုပ်လို့ ပြောတဲ့အတွက် ဘာသာရေးစော်ကားတယ်ဆိုတဲ့ ခေါင်းစဉ်တပ်ပြီး သတ်လိုက်ကြတာ ဖြစ်ပါတယ်။ သာသနာညှိုးနွမ်းစေမှု ဥပဒေကို လူတွေက အလွဲသုံးစားလုပ်နေကြပါတယ်” လို့ လူ့အခွင့်အရေးရှေ့နေတစ်ဦးဖြစ်တဲ့ မဟ်နက်ဇ်ရဟ်မန်က ပြောပါတယ်။
Ref: Aljazeera
