Tag: Pakistan

ဧပြီ ၂၅၊ ၂၀၂၁
M-Media

-ကိုဗစ်ဒဏ်ကို တစ်ကျော့ပြန် ခံနေရတဲ့ အိန္ဒိယနိုင်ငံအတွက် မရှိမဖြစ် ဆေးဘက်ဆိုင်ရာပစ္စည်းတွေကို ထောက်ပံ့ပေးဖို့ ပါကစ္စတန်နိုင်ငံက ကမ်းလှမ်းလိုက်ပါတယ်။

အိန္ဒိယမှာ ပြီးခဲ့တဲ့ သီတင်းပတ်အနည်းငယ်စလို့ ကိုဗစ်လှိုင်း ထပ်ဖြစ်ခဲ့ပြီး နေ့စဉ် လူ သိန်းချီ ရောဂါကူးစက်နေကာ သေဆုံးသူတွေလည်း ထောင်ချီရှိနေတာပါ။ အိန္ဒိယနိုင်ငံတစ်ဝှမ်း ဆေးရုံဆေးခန်းတွေ၊ အောက်ဆီဂျင်အပါအဝင် ဆေးဘက်ဆိုင်ရာပစ္စည်းတွေ မလုံမလောက်ဖြစ်နေတာကိုလည်း ကြုံတွေ့နေရပါတယ်။

ပါကစ္စတန် နိုင်ငံခြားရေးဝန်ကြီးဌာနရဲ့ မနေ့က ထုတ်ပြန်ချက်မှာ အိန္ဒိယပြည်သူတွေနဲ့ တစ်သားတည်းရှိကြောင်း ပြသဖို့အတွက် ဒီလိုကမ်းလှမ်းတာဖြစ်တယ်လို့ ဖော်ပြထားပါတယ်။

ထောက်ပံ့ပေးမယ့် ပစ္စည်းတွေထဲမှာ အသက်ရှုစက်တွေ၊ အောက်ဆီဂျင်နဲ့ ဆက်စက်ပစ္စည်းတွေ၊ ဒစ်ဂျစ်တယ် X-ray စက်တွေ၊ PPE နဲ့ ဆက်စပ်ကိရိယာတွေ ပါဝယ်ပါတယ်။

ဒီပစ္စည်းတွေ အလျင်အမြန် ပို့ပေးနိုင်ရေး၊ ကပ်ရောဂါကြောင့် ကြုံတွေ့နေရတဲ့ စိန်ခေါ်မှုတွေကို လျော့ချနိုင်ရေးမှာ ပူးပေါင်းဆောင်ရွက်နိုင်ဖို့အတွက် နှစ်ဖက်အာဏာပိုင်တွင် အတူနည်းလမ်းရှာ လုပ်ဆောင်နိုင်တယ်လို့လည်း ကြေငြာချက်က ဆိုပါတယ်။

သောကြာနေ့ကလည်း ပါကစ္စတန်ဝန်ကြီးချုပ် အင်မရန်းခန်းက ကိုဗစ်ဒဏ်ခံစားနေရတဲ့ အိန္ဒိယပြည်သူတွေ အမြန်ဆုံး သက်သာပါစေကြောင်း Twitter ကနေတစ်ဆင့် ဆုမွန်ကောင်း တောင်းခဲ့ပါတယ်။

ပါကစ္စတန်နိုင်ငံခြားရေးဝန်ကြီး ရှား မဟ်မူးဒ် ကိုရိုက်ရှီက လူသားချင်းစာနာထောက်ထားမှုကို ဦးစားပေးကာ ဒီလိုအကူအညီပေးဖို့ ကမ်းလှမ်းခဲ့တာဖြစ်ပြီး အိန္ဒိယအစိုးရရဲ့ တုန့်ပြန်မှုကို စောင့်ဆိုင်းနေတယ်လို့ ပြောကြားခဲ့ပါတယ်။

အိန္ဒိယနဲ့ ပါကစ္စတန်တို့ဟာ ရန်ဘက်နိုင်ငံတွေဖြစ်ပြီး ပိုင်ဆိုင်မှုအငြင်းပွားနေတဲ့ ကက်ရှ်မီးယားဒေသအတွက် စစ်ဖြစ်ဖူးပါတယ်။ ဒါပေမယ့် ပြီးခဲ့တဲ့နှစ်ကစလို့ ဆက်ဆံရေးပုံမှန်ပြန်ဖြစ်အောင် နှစ်ဖက်အာဏာပိုင်တွေက လျှို့ဝှက် ဆွေးနွေးမှုတွေ လုပ်ဆောင်နေကြပါတယ်။

Ref: Pakistan Today

ဖေဖော်ဝါရီ ၂၅၊ ၂၀၂၁
M-Media

-ပိုင်ဆိုင်မှုအငြင်းပွားနေတဲ့ ကက်ရှ်မီးယားဒေသမှာ နယ်စပ်ဖြတ်ကျော် ပစ်ခတ်မှုတွေ မလုပ်ဖို့အတွက် အိန္ဒိယနဲ့ ပါကစ္စတန်တို့ ဒီကနေ့မှာ သဘောတူခဲ့ကြပါတယ်။

ကက်ရှ်မီးယားပိုင်ဆိုင်မှုအတွက် အိန္ဒိယနဲ့ ပါကစ္စတန်တို့ နှစ်ကြိမ်တိုင်တိုင် စစ်ဖြစ်ဖူးပြီး ဒီဒေသကို နှစ်နိုင်ငံစလုံးက တစ်ခြမ်းစီ ထိန်းချုပ်ထားပါတယ်။

နယ်ခြားမှာ Line of Control (LOC) သတ်မှတ်ထားကာ ၂၀၀၃ ခုနှစ်ကတည်းက အပစ်ရပ်ရေး လက်မှတ်ထိုးထားပေမယ့် LOC ကျော်ပြီး ပစ်ခတ်မှုတွေ မကြာခဏ ဖြစ်ပေါ်နေပြီး နှစ်ဖက် စစ်သားတွေ၊ အရပ်သားတွေ သေဆုံးမှုလည်း ရှိခဲ့ပါတယ်။

အိန္ဒိယနဲ့ ပါကစ္စတန်​စစ်တပ်က စစ်ဆင်ရေးဆိုင်ရာ အကြီးအကဲတွေရဲ့ ဒီနေ့မနက် ဖုန်းနဲ့ဆွေးနွေးမှုမှာ အပစ်ရပ်ရေးနဲ့ အခြားသဘောတူညီချက်တွေ အားလုံးကို တိတိကျကျ လိုက်နာဖို့အတွက် ထပ်မံသဘောတူညီခဲ့ကြပါတယ်။ ဒီသဘောတူညီချက်ဟာ ကြာသာပတေးနေ့ည သန်းခေါင်ယံအချိန်မှာ စတင်သက်ရောက်မှာပါ။

ပူးတွဲထုတ်ပြန်တဲ့ ကြေငြာချက်မှာတော့ နှစ်ဖက်စစ်တပ်ဟာ ရင်းရင်းနှီးနှီး ပွင့်ပွင့်လင်းလင်း ဆွေးနွေးခဲ့ကြတယ်လို့ ဖော်ပြထားပါတယ်။

Ref: Aljazeera