စက်တင်ဘာ ၇၊ ၂၀၁၅
M-Media
– ဇူလိုင်လ ၃၁ ရက်နေ့က ပါလက်စတိုင်းပိုက်နက်ဖြစ်သော အနောက်ဖက်ကမ်း၌ ဂျူးအခြေချနေထိုင်သူများ၏ မီးရှို့မှုအတွင်း နေအိမ်မီးလောင်ကာ မီးလောင်ဒဏ်ရာများ ရရှိခဲ့သည့် ပါလက်စတိုင်း အမျိုးသမီးသမီးတစ်ဦးမှာ ယမန်နေ့က သေဆုံးသွားခဲ့သည်ဟု သိရသည်။
အသက် ၂၆ နှစ်အရွယ် ရီဟမ် ဒါဝဘ်ရှာဟ် ဆိုသူဖြစ်ပြီး ယမန်နေ့ညက အစ္စရေးဆေးရုံ၌ သေဆုံးခဲ့ခြင်းဖြစ်သည်။ သူမမှာ မီးလောင်မှုအတွင်း ခန္ဓာကိုယ်၏ ၈၀ ရာခိုင်နှုန်း မီးလောင်ကျွမ်းခဲ့သည်။
သူမ၏ ၁၈ လအတွင် သားငယ်လေးမှာ အခင်းဖြစ်ပွားသည့်နေ့တွင် မီးလောင်သေဆုံးခဲ့ပြီး၊ ခင်ပွန်းဖြစ်သူ ဆအဒ်မှာ ၈ ရက်အကြာတွင် မီးလောင်ဒဏ်ရာများဖြင့်ပင် သေဆုံးခဲ့သည်။ အသက် ၄ နှစ်အရွယ် သားငယ် အလီမှာလည်း မီးလောင်ခဲ့ပြီး ယခုအချိန်အထိ ဆေးရုံတွင် ဆေးကုသမှု ခံယူနေရသည်။
ထိုမီးလောင်မှုတွင် အနောက်ဘက်ကမ်းရှိ ဒူးမားရွာမှ နေအိမ်နှစ်လုံးကို ဂျူးအခြေချနေထိုင်သူများက ရေနံဆီဗုံးများသုံးကာ မီးရှို့ခဲ့ခြင်းဖြစ်သည်ဟု ဆိုသည်။ ထိုအဖြစ်အပျက် ဖြစ်ပွားပြီးနောက် သံသယရှိသူ အများအပြားကို အစ္စရေးက ဖမ်းဆီးခဲ့သည်။
“ရီဟမ် ဒါဝဘ်ရှာဟ်ဟာ မနေ့ညမှာ သေဆုံးခဲ့ပါတယ်” ဟု တဲလ်အဗီးရှိ Tel Hashomer ဆေးရုံမှ ပြောရေးဆိုခွင့်ရှိသူ တစ်ဦးက ပြောကြားခဲ့ပြီး၊ သူမ၏ ခန္ဓာကိုယ် ၈၀ ရာခိုင်နှုန်းမှာ မီးလောင်ကျွမ်းခဲ့သည်ဟု အတည်ပြုခဲ့သည်။
သူမ၏ မိသားစုဝင်တစ်ဦးဖြစ်သူ အန်ဝါရ် ဒါဝဘ်ရှာကလည်း ရီဟမ်သေဆုံးကြောင်းကို အကြောင်းခဲ့သည်ဟု အတည်ပြုခဲ့ပြီး တနင်္လာနေ့ (ယနေ့) တွင် ဒူးမားရွာ၌ ဈာပနအခမ်းအနားကို ကျင်းပမည်ဟု ပြောကြားခဲ့သည်။
Ref: Aljazeera
