Tag: Palestine

ဇွန် ၆၊ ၂၀၂၄

M-Media 

-ပါလက်စတိုင်းနိုင်ငံ ဂါဇာကမ်းမြှောင်အလယ်ပိုင်း နူစီရတ် ဒုက္ခသည်စခန်းက စစ်ရှောင်တွေ ခိုလှုံနေတဲ့ ကုလ စာသင်ကျောင်းကို အစ္စရေးက ဇွန်လ ၅ ရက်နေ့မှာ အကြမ်းဖက်တိုက်ခိုက်ခဲ့ပြီး လူ ၄၀ ထက်မနည်း သေဆုံးခဲ့ပါတယ်။ 

“စာသင်ကျောင်းထဲမှာ ကျွန်တော်တို့ ရှိနေတဲ့အချိန် ရုတ်တရက် ဗုံးလာကြဲသွားပြီး လူတွေက တစ်စစီ ဖြစ်သွားတယ်။ ဒီကျောင်းထဲမှာ မိသားစုတွေ၊ လူငယ်တွေ နေထိုင်နေကြတာ။ သတိပေးတာမျိုးလည်း မလုပ်ဘဲ ဗုံးကြဲခဲ့တာပါ” လို့ ကိုယ်တိုင်ကြုံတွေ့ခဲ့ရသူ စစ်ရှောင်ပြည်သူ အနက်စ် အလ်-ဒါဟွတ်က ပြောပါတယ်။ 

ဒီတိုက်ခိုက်မှုကို ကုလသမဂ္ဂအပါအ၀င် ကမ္ဘာတစ်၀ှမ်းက ဆန့်ကျင် ရှုတ်ချခဲ့ပါတယ်။ 

“အစ္စရေးရဲ့ အကြမ်းဖက်၀ါဒကို ဒီမှာတွေ့ရမှာပါ။ အစ္စရေးလောက် အကြမ်းဖက်တာ ကမ္ဘာမှာ တစ်ခြားဘယ်သူမှ မရှိပါဘူး။ ဂါဇာမှာ အစ္စရေးဟာ စည်းတွေ၊ ဘောင်တွေအားလုံးကို ကျော်ပြီး တိုက်ခိုက်နေတာဖြစ်ပါတယ်”လို့ တိုက်ခိုက်မှုကို ကိုယ်တိုင်ကြုံတွေ့ခဲ့ရသူ နအင်း အလ်-ဒါဒါဟ်က ပြောပါတယ်။ 

နအင်းဟာ ဂါဇာမြောက်ပိုင်း ဂါဇာစီးတီးကဖြစ်ပြီး အစ္စရေးရဲ့ အကြမ်းဖက်တိုက်ခိုက်မှုတွေကြောင့်၊ တောင်ပိုင်း ခန်ယူနစ်မြို့၊ တောင်ဘက်အစွန်း ရာဖာမြို့တွေကို ထွက်ပြေးခဲ့ရကာ အခု ဂါဇာအလယ်ပိုင်းက နူစီရတ် ဒုက္ခသည်စခန်းမှာ ခိုလှုံနေရတာဖြစ်ပါတယ်။ 

အစ္စရေးဟာ နေရာတိုင်းကို အကြမ်းဖက်တိုက်ခိုက်မှုတွေ လုပ်ဆောင်နေတယ်လို့ သူက ပြောပါတယ်။ 

“ကြိုတင်သတိပေး အကြောင်းကြာတာမျိုး မရှိဘဲ အစ္စရေးလေယာဥ်တွေဟာ ကုလစာသင်ကျောင်းကို ဒုံးကျည် ၂ လုံးနဲ့ ပစ်ခတ်တိုက်ခိုက်ခဲ့တာ ဖြစ်ပါတယ်”

တိုက်ခိုက်မှုကြောင့် ဒဏ်ရာရရှိသူ အများပြား ရှိနေပြီး သေဆုံးသူ ထပ်တိုးလာနိုင်တယ်လို့ ဂါဇာ ကျန်းမာရေး၀န်ကြီးဌာနက ပြောပါတယ်။ 

ပြီးခဲ့တဲ့နှစ် အောက်တိုဘာ ၇ ရက်နေ့ကတည်းက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အသတ်ခံရသူ အရေအတွက်ဟာ ၃၆၆၅၄ ဦး ရှိလာပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။ 

Ref: Aljazeera 

(ဓာတ်ပုံ – တိုက်ခိုက်ခံမှုပြီးနောက် တွေ့ရသည့် နူစီရတ်ဒုက္ခသည်စခန်းမှ ကုလစာသင်ကျောင်း)

ဇွန် ၁၊ ၂၀၂၄

M-Media

-ပြီးခဲ့တဲ့နှစ် အောက်တိုဘာ ၇ ရက်နေ့က စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲအတွင်း မိမိတို့အဖွဲ့၀င် ၃၃ ဦး အသတ်ခံထားရတယ်လို့ ပါလက်စတိုင်း လခြမ်းနီအဖွဲ့က ထုတ်ပြန်ပါတယ်။ 

မေလ ၃၁ ရက်နေ့ည ရာဖာက စစ်ရှောင်စခန်းတွေကို အစ္စရေးက အကြမ်းဖက်တိုက်ခိုက်မှုအတွင်း လခြမ်းနီအဖွဲ့၀င် မိုဟာမက် ဂျီဟတ် အာဘဒ် သေဆုံးခဲ့ပါတယ်။ 

ဒါဟာ ၈ လအတွင်း အစ္စရေးရဲ့သတ်ဖြတ်မှုကို ခံခဲ့ရတဲ့ ၃၃ ယောက်မြောက် လခြမ်းနီအဖွဲ့၀င် ဖြစ်ပါတယ်။ အဲဒီအထဲက ၁၉ ဦးဟာ ကူညီကယ်ဆယ်ရေးတွေ လုပ်ဆောင်နေစဥ်မှာ သတ်ဖြတ်ခံရတာဖြစ်တယ်လို့ ပါလက်စတိုင်းလခြမ်းနီအဖွဲ့က ထုတ်ပြန်ပါတယ်။ 

၈ လအတွင်း ဂါဇာမှာ အစ္စရေးက လူပေါင်း ၃၆၀၀၀ ကျော် သတ်ဖြတ်ထားပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။ ယခုလက်ရှိမှာတော့ ရာဖာက စစ်ရှောင်စခန်းတွေကို အစ္စရေးက အကြမ်းဖက်တိုက်ခိုက်မှုတွေ ပြုလုပ်နေပါတယ်။

Ref: Aljazeera

မေ ၂၉၊ ၂၀၂၄

M-Media 

-အစ္စရေးရဲ့ လုပ်ရပ်တွေကြောင့် ပါလက်စတိုင်းနိုင်ငံ ဂါဇာကမ်းမြှောင်ဒေသဟာ အငတ်ဘေးဆိုက်တဲ့ ဒေသတစ်ခု ဖြစ်လာပြီလို့ ပါလက်စတိုင်း အကူအညီပေးရေးကွန်ယက် PNGO က ပြောပါတယ်။ 

ဂါဇာကို အငတ်ဘေးဆိုက်ဇုန်အဖြစ် ကြေငြာဖို့ လိုအပ်နေတယ် လို့ ရာမာလာမြို့မှာ ပြုလုပ်တဲ့ သတင်းစာရှင်းလင်းပွဲမှာ PNGO ဒါရိုက်တာ အမ်ဂျဒ် ရှာ၀ါက ပြောပါတယ်။ 

အစ္စရေးဟာ ပါလက်စတိုင်းပြည်သူတွေအပေါ် ပစ်မှတ်ထားကာ အကြမ်းဖက် တိုက်ခိုက်သတ်ဖြတ်မှုတွေ ဆက်လက်ပြုလုပ်နေပြီး နိုင်ငံတကာက ပေးအပ်တဲ့ အကူအညီတွေကို ဂါဇာကမ်းမြှောင်ထဲ ၀င်ခွင့်မပေးပါဘူး။ 

ဂါဇာမှာ စစ်ရှောင်စခန်းတွေအကြား ရေဆိုးတွေ ပြန့်နှံ့နေပြီး သန့်စင်တဲ့ သောက်သုံးရေလည်း ပြတ်လပ်နေပြီလို့ အမ်ဂျဒ် ရှာ၀ါက ပြောပါတယ်။ 

အစ္စရေးရဲ့ ရက်စက်ကြမ်းကြုတ်မှုတွေ၊ မြင်မြင်သမျှ ဗုံးကြဲတိုက်ခိုက်မှုတွေကြောင့် အခြေအနေတွေဟာ မိနစ်နဲ့အမျှ ဆိုးလာနေတယ်လို့လည်း သူက ဆိုပါတယ်။ 

ငတ်ပြတ်အောင် လုပ်နေသလား

အကူအညီပေးရေးအဖွဲ့ ဒါရိုက်တာတစ်ဦးဖြစ်တဲ့ မိုဟာမက် အီဒါကလည်း အစ္စရေးဟာ ဂါဇာပြည်သူတွေ ငတ်ပြတ်လာအောင် ရည်ရွက်ချက်ရှိရှိ လုပ်ဆောင်နေတယ်လို့ ၀ေဖန်ခဲ့ပါတယ်။ 

ဂါဇာပြည်သူတွေဟာ ငတ်မွတ်ခေါင်းပါးမှု၊ ဆေး၀ါးပြတ်လပ်မှု၊ ကလေးငယ်တွေအကြား အဟာရချို့တဲ့မှု၊ ရေဓာတ်မလုံလောက်မှု၊ ရေဆိုးပြန့်နှံ့မှုကြောင့် ကူးစက်ရောဂါတွေ ဖြစ်ပွားမှု စတဲ့ အခြေအနေဆိုးတွေကို တွေ့ကြုံ ခံစားနေရတယ်လို့ အီဒါက ပြောပါတယ်။ 

“ပြိုကျနေတဲ့ အဆောက်အဦးတွေကြားထဲ အလောင်းတော်တော်များများ ပိတ်မိနေတယ်။ တစ်ချို့အလောင်းတွေကလည်း လမ်းပေါ်မှာ ပြန့်ကျဲနေပါတယ်။ ဂါဇာကမ်းမြှောင်က ပြည်သူတွေ ငတ်မွတ်ခေါင်းပါးပြီး နေရပ်စွန့်ခွာသွားအောင် အစ္စရေးက ရည်ရွယ်လုပ်ဆောင်နေတာလား”

၁၉၇၇ ခုနှစ် ဂျီနီဗာကွန်ဗန်းရှင်းရဲ့ အပိုဒ် ၁၄ အရ နယ်မြေတစ်ခုကို ကျူးကျော်တိုက်ခိုက်ပြီး ပြည်သူတွေကို ငတ်မွတ်ခေါင်းပါးအောင် လုပ်ဆောင်တာ၊ အသက်ရှင်ရပ်တည်ဖို့ လိုအပ်တဲ့ အခြေခံ အဆောက်အဦးတွေကို ပစ်မှတ်ထား တိုက်ခိုက်ဖျက်ဆီးတာတွေဟာ ရာဇ၀တ်မှုမြောက်တယ်လို့လည်း  အီဒါက ထောက်ပြပြောဆိုခဲ့ပါတယ်။ 

Ref: Aljazeera