News @ M-Media

Tag: Palestine

  • တရားမ၀င်ဂျူးများ၏ တိုက်ခိုက်မှုကို တိုးမြှင့်ခံစားလာရသည့် ဌာနေပါလက်စတိုင်းများ

    တရားမ၀င်ဂျူးများ၏ တိုက်ခိုက်မှုကို တိုးမြှင့်ခံစားလာရသည့် ဌာနေပါလက်စတိုင်းများ

    အောက်တိုဘာ ၂၀၊ ၂၀၂၂

    M-Media 

    -ပါလက်စတိုင်းနိုင်ငံ အနောက်ဖက်ကမ်းဒေသက တရားမ၀င်ဂျူးအခြေချအိမ်ယာတွေမှာ နေထိုင်သူတွေရဲ့ ပါလက်စတိုင်းတွေအပေါ် အကြမ်းဖက်တိုက်ခိုက်မှုဟာ သိသိသာသာ မြင့်တက်လာပါတယ်။ 

    မကြာသေးခင်က ဖြစ်ပွားခဲ့ပြီး အထင်ရှားဆုံးတစ်ခုက အောက်တိုဘာ ၄ ရက်နေ့ ပါလက်စတိုင်းစာသင်ကျောင်းကို တရားမ၀င်ဂျူးတွေ ၀င်ရောက်တိုက်ခိုက်မှုပါ။ 

    အနောက်ဖက်ကမ်း နဘ်လုစ်မြို့က Huwwara ယောင်္ကျားလေး အလယ်တန်းကျောင်းကို ဒါဇင်နဲ့ချီတဲ့ ဂျူးတွေက တုတ်တွေနဲ့ ၀င်ရိုက်၊ ခဲတွေနဲ့ ပစ်ပေါက်ခဲ့ပါတယ်။ ဂျူးတစ်ယောက်ဆိုရင် ကျောင်းသားနဲ့ ဆရာတွေကို သေနတ်နဲ့ချိန်ပြီး ခြိမ်းခြောက်တဲ့အထိ လုပ်ခဲ့ပါတယ်။

    အဲဒီကျောင်းမှာ ကျောင်းသား ၃၅၀ လောက်ရှိပြီး ဒီအဖြစ်အပျက်ကြောင့် ကျောင်းသားတစ်ချို့ ဒဏ်ရာရခဲ့ပါတယ်။ တိုက်ခိုက်သူတွေပြန်သွားတဲ့အခါ အစ္စရေးစစ်တပ်က၀င်လာပြီး စာသင်ခန်းတွေထဲမှာ မျက်ရည်ယိုဗုံး ခွဲသွားတာကြောင့် ကျောင်းသားနဲ့ ဆရာတွေ အသက်ရှုလမ်းကြောင်းပိုင်းဆိုင်ရာ ဒဏ်ရာတွေ ထပ်ရခဲ့ပါတယ်။ 

    ဂျူးလူအုပ်ဟာ ကျောင်းက ပစ္စည်းတွေကို ဖျက်ဆီးသွားသလို၊ ကျောင်းပတ်၀န်းကျင်မှာရှိတဲ့ ကားမှန်တွေကိုလည်း ရိုက်ခွဲသွားပါတယ်။

    “ဒီကောင်တွေ  ကျွန်တော့်ကို ခဲနဲ့ပေါက်တယ်။ ကားတွေ၊ ကျောင်းကပစ္စည်းအားလုံးကိုလည်း ခဲနဲ့ ပစ်ခွဲသွားတယ်။ ခဲမိုးရွာသလိုပါပဲ။ ကျွန်တော့်လက်၊ ခြေထာက်နဲ့ ရင်ဘတ်တွေမှာ ဒဏ်ရာရသွားတယ်” လို့ အသက် ၅၃ နှစ်အရွယ် ကျောင်းအုပ်ကြီး အဘ်ဒူလ်ဟာမစ် ရှီဟာဒါက ပြောပါတယ်။

    တိုက်ခိုက်မှု မြင့်တက်

    ပါလက်စတိုင်းဒေသတွေက တရားမ၀င် အခြေချအိမ်ယာတွေမှာ နေထိုင်တဲ့ ဂျူးတွေ ဌာနေပါလက်စတိုင်းတွေအပေါ် အကြမ်းဖက် တိုက်ခိုက်မှုဟာ အခုနှစ်ပိုင်းအတွင်း သိသိသာသာ မြင့်တက်လာပြီး ဒီလုပ်ရပ်ကို အစ္စရေးစစ်တပ်ကလည်း ပံ့ပိုးကူညီပေးနေပါတယ်။ 

    အခုနှစ် ဇန်န၀ါရီလကနေ အောက်တိုဘာ ၁၀ ရက်နေ့အထိ ပါလက်စတိုင်းတွေအပေါ် ဂျူးလူအုပ်ရဲ့ တိုက်ခိုက်မှုပေါင်း ၅၀၀ ကျော်ရှိပြီး၊ နေအိမ်အဆောက်အဦး ၄၀၀ ကျော် ဖျက်ဆီးခံခဲ့ရပါတယ်။ 

    အဲဒီတိုက်ခိုက်မှုတွေအတွင်း ပါလက်စတိုင်းပြည်သူ ၂ ဦး သေဆုံးခဲ့ပါတယ်။

    တိုက်ခိုက်မှုတွေဖြစ်တိုင်း အစ္စရေးစစ်တပ်ဟာ ပါလက်စတိုင်းတွေရဲ့ လှုပ်ရှားသွားလာခွင့်ကို ပိုမိုကန့်သတ်ပါတယ်။ ပါလက်စတိုင်းပိုင်နက်က နေရာတိုင်းမှာ စစ်ဆေးရေးဂိတ်တွေချပြီး တစ်ချို့ဂိတ်တွေဆိုရင် ဖြတ်ကျော်ခွင့်ရဖို့ နာရီနဲ့ချီ ကြာမြင့်ပါတယ်။

    ဒီလိုဖိနှိပ်မှုတွေကို လက်တုန့်ပြန်တဲ့အနေနဲ့ ပါလက်စတိုင်းတွေကလည်း အစ္စရေးစစ်သားတွေကို ပစ်မှတ်ထားတဲ့ တစ်ကိုယ်တော် ပစ်ခတ်မှုတွေ ပိုမို ပြုလုပ်လာပါတယ်။

    “တိုက်ခိုက်မှုတွေမြင့်တက်လာတာကို တွေ့ရတယ်။ ပိုပြီး စနစ်တကျနဲ့ လုပ်လာကြတာပါ။ ဂျူးအခြေချနေထိုင်သူတွေဟာ ပိုပြီးတော့ အတင့်ရဲလာတယ်။ ဖြစ်နေတာတွေက တော်တော် အန္တရာယ်ရှိပါတယ်” လို့ အနောက်ဖက်ကမ်းက တရားမ၀င်ဂျူးတွေရဲ့ လှုပ်ရှားမှုကို စောင့်ကြည့်လေ့လာသူ ဂါဆန် ဒဂ်လက်စ်က ပြောပါတယ်။

    တိုက်ခိုက်မှုတွေဟာ အစ္စရေးစစ်တပ်ကို အကာအကွယ်ယူ လုပ်ဆောင်တာဖြစ်ပြီး၊ ပါလက်စတိုင်းတွေအပေါ် အစ္စရေးအစိုးရက ပိုမိုဖိနှိပ်ဖို့ ရည်ရွယ်တာလည်း ဖြစ်ပါတယ်။ 

    အစ္စရေးမှာ ရွေးကောက်ပွဲရှိလာရင် ဒီလိုတိုက်ခိုက်မှုတွေ ပိုမိုဖြစ်ပွားလေ့ရှိပါတယ်။ 

    “ပါလက်စတိုင်းတွေကို ပိုများများသတ်နိုင်တဲ့လူက ရွေးကောက်ပွဲနိုင်တယ်ဆိုတဲ့ သမိုင်းကြောင်းမျိုး အစ္စရေးမှာရှိတယ်။ ပြောရရင် အစိုးရကကျူးလွန်တဲ့ ရာဇ၀တ်မှုပါ” လို့ ဟောင်၀ါရာ ဒေသဆိုင်ရာ တာ၀န်ရှိသူ ၀ါဂျီ အိုဒါက ပြောပါတယ်။

    အစ္စရေးမှာ လာမယ့်နို၀င်ဘာလအတွင်း ရွေးကောက်ပွဲရှိနေပြီး ပါလက်စတိုင်းတွေအပေါ် အကြမ်းဖက်တိုက်ခိုက်မှုတွေ ပိုမိုမြင့်တက်လာမယ့် အနေအထား ဖြစ်ပါတယ်။

    Ref: Aljazeera 

  • ပါလက်စတိုင်း ပိုင်နက်အတွင်း နိုင်ငံခြားသားများ မ၀င်ရောက်နိုင်ရေး အစ္စရေးက ကန့်သတ်ချက်အသစ်ထုတ်

    ပါလက်စတိုင်း ပိုင်နက်အတွင်း နိုင်ငံခြားသားများ မ၀င်ရောက်နိုင်ရေး အစ္စရေးက ကန့်သတ်ချက်အသစ်ထုတ်

    စက်တင်ဘာ ၄၊ ၂၀၂၂
    M-Media

    -ပါလက်စတိုင်းမှာ နိုင်ငံခြားသားတွေ ရှိနေမှုကို ကန့်သတ်တဲ့ စည်းကမ်းချက်အသစ်တွေကို အစ္စရေးက ထုတ်ပြန်လိုက်ပါတယ်။

    ဒါဟာ ပါလက်စတိုင်းတွေ ဖိနှိပ်ညှင်းပမ်းခံနေရတာကို ကမ္ဘာက မသိရှိနိုင်ဖို့၊ နိုင်ငံတကာက ပါလက်စတိုင်းကို ပေးနေတဲ့ အကူအညီတွေ လျော့ကျသွားဖို့၊ ပါလက်စတိုင်းပြည်သူတွေ အဆင့်မြင့်ပညာရပ်တွေ မဆည်းပူးနိုင်စေဖို့ ရည်ရွယ်တာလို့ စောင့်ကြည့်အဖွဲ့တွေက ပြောပါတယ်။

    စက်တင်ဘာ ၅ ရက်နေ့မှာ စတင်သက်ရောက်မယ့် အဲဒီ ကန့်သတ်ချက်အသစ်တွေထဲမှာ ပါလက်စတိုင်းနိုင်ငံသားတွေနဲ့ ချစ်ကြိုက်တဲ့ နိုင်ငံခြားသားတွေဟာ ရက် ၃၀ အတွင်း အစ္စရေးစစ်တပ်ကို အကြောင်းကြားဖို့ ပါ၀င်ပါတယ်။

    ပါလက်စတိုင်းနိုင်ငံသားနဲ့ လက်ထက်လိုက်တဲ့ နိုင်ငံခြားသားတွေကတော့ ၂၇ လအတွင်း ထွက်ခွာရမှာဖြစ်ပြီး နောက်ထပ် ၆ လကြာမှ ပါလက်စတိုင်းထဲ ပြန်၀င်ဖို့ အစ္စရေးထံမှာ ဗီဇာလျှောက်နိုင်မှာ ဖြစ်ပါတယ်။

    ပါလက်စတိုင်းတက္ကသိုလ်အားလုံးဟာ စုစုပေါင်း နိုင်ငံခြားကျောင်းသား ၁၅၀ ကိုသာ ဗီဇာပေးခွင့်ရှိမှာ ဖြစ်ပြီး၊ နိုင်ငံခြားသားကျောင်းဆရာ ၁၀၀ သာ ခန့်ထားခွင့်ရှိမယ်လို့ ကန့်သတ်ချက်အသစ်မှာ ဖော်ပြထားပါတယ်။

    ဒီစည်ကမ်းအသစ်မှာ ပါလက်စတိုင်းပိုင်နက်မှာ ရှိနေတဲ့ နိုင်ငံခြားသားတွေ၊ ဗီဇာလျှောက်ခွင့်၊ သက်တမ်းတိုးခွင့်ကို ပိုမိုကန့်သတ်တာတွေလည်း ပါ၀င်ပါတယ်။

    ပါလက်စတိုင်းပိုင်နက်တွေဖြစ်တဲ့ အနောက်ဖက်ကမ်းနဲ့ ဂါဇာကမ်းမြှောင်တွေကို အစ္စရေးက ထိန်းချုပ်ပိတ်ဆို့ကာ ပါလက်စတိုင်းပြည်တွေကို ပုံစံမျိုးစုံနဲ့ ဖိနှိပ်ချုပ်ချယ် တိုက်ခိုက်နေတာ ဖြစ်ပါတယ်။

    နိုင်ငံခြားသားတွေ တည်ရှိမှုကို ကန့်သတ်တဲ့ စည်းမျဥ်းအသစ်တွေကြောင့် ပါလက်စတိုင်းမှာ လုပ်ဆောင်နေတဲ့ အကူအညီပေးရေးလုပ်ငန်းတွေ၊ စီးပွားရေးလုပ်ငန်းတွေ အကြီးအကျယ် ထိခိုက်လိမ့်မယ်လို့ အကူအညီပေးရေး အဖွဲ့တွေက ပြောပါတယ်။

    “ပါလက်စတိုင်းလူ့အဖွဲ့အစည်းရဲ့ အနေအထားကို ပြောင်းသွားအောင် ပါလက်စတိုင်းလူ့အဖွဲ့အစည်းကို ကမ္ဘာကြီးနဲ့ အဆက်အသွက်ပျက်အောင်၊ ပါလက်စတိုင်းက အဖွဲ့အစည်းတွေမှာ အလုပ်လုပ်လိုသူတွေ၊ စေတနာ့၀န်ထမ်းတွေ၊ ရင်းနှီးမြှုပ်နှံသူတွေ၊ ပညာသင်ပေးလိုသူတွေ၊ ကျောင်းတက်လိုသူတွေကို ပိုခက်အောင် လုပ်လိုက်တာပါ” လို့ အစ္စရေး အကူအညီပေးရေး အဖွဲ့အစည်း HaMoked ရဲ့ အကြီးအကဲ ဂျက်ဆီကာ မွန်တဲလ်က ပြောပါတယ်။

    ဒီစည်းမျဥ်းတွေကို ပြန်လည်ရုပ်သိမ်းပေးရေးအတွက် HaMoked အပါအ၀င်၊ အစ္စရေးနဲ့ ပါလက်စတိုင်း တက်ကြွလှုပ်ရှားသူ ၁၉ ဦးက လက်မှတ်ရေးထိုးကာ အစ္စရေးတရားရုံးကို အသနားခံစာ တင်ထားပါတယ်။

    Ref: BBC

  • ၂၀၂၁ ခုနှစ်အတွင်း ပါလက်စတိုင်းရှိ အဆောက်အဦး တစ်ထောင်ကျော် ဖျက်ဆီးခံရ

    ၂၀၂၁ ခုနှစ်အတွင်း ပါလက်စတိုင်းရှိ အဆောက်အဦး တစ်ထောင်ကျော် ဖျက်ဆီးခံရ

    ဇွန် ၁၄၊ ၂၀၂၂
    M-Media

    -၂၀၂၁ ခုနှစ်အတွင်း ပါလက်စတိုင်းပိုင်နက်တွေမှာ အစ္စရေးက ဖြိုချဖျက်ဆီးခဲ့တဲ့ အဆောက်အဦးအရေအတွက် ၁၀၃၂ ခု ရှိခဲ့ပြီး လူ ၂၀၀၀ နီးပါး အိုးမဲ့အိမ်မဲ့ ဖြစ်ခဲ့ပါတယ်။

    အနောက်ဖက်ကမ်းနဲ့ အရှေ့ဂျေရုစလင်မှာ အစ္စရေးရဲ့ လုပ်ရပ်တွေကို လေ့လာဆန်းစစ်ပြီးတဲ့နောက် ပါလက်စတိုင်း သတင်းအချက်အလက်စင်တာက အစီရင်ခံစာ ထုတ်ပြန်ခဲ့တာပါ။

    အစ္စရေးဟာ ကလေးငယ် ၂၆၀၀၊ အမျိုးသမီး ၁၈၀၀ အပါအ၀င် ပါလက်စတိုင်းပြည်သူ ၅ ထောင်ကျော်ကို ၀န်ဆောင်မှုပေးနေတဲ့ အဆောက်အဦး ၆၇၁ ခုကို ၂၀၂၁ ခုနှစ်အတွင်းမှာ ဖျက်ဆီးခဲ့ပါတယ်။

    ပါလက်စတိုင်းတွေရဲ့ လယ်ယာမြေ ဧက ၁၈၀၀ လောက်ကို ရေပေးနေတဲ့ ရေတွင်း ၉၃ တွင်း၊ သိုးအုပ် ၁၆၄၀၀ နေထိုင်တဲ့ သိုးခြံ ၂၁၆ ခုလည်း ဖျက်ဆီးခံခဲ့ရပါတယ်။
    အစ္စရေးဟာ ပါလက်စတိုင်းပိုင်နက်တွေမှာ ပါလက်စတိုင်းတွေရဲ့ နေအိမ် အဆောက်အဦးတွေကို ပုံမှန်လိုလို ဖြိုချ ဖျက်ဆီးကာ၊ ဖျက်ဆီးခကိုလည်း ပါလက်စတိုင်းတွေဆီက တောင်းလေ့ရှိပါတယ်။

    ဖျက်ဆီးပြီးတဲ့ ပါလက်စတိုင်းနေအိမ်တွေ၊ လယ်ယာမြေတွေနေရာမှာ အစ္စရေးက တရားမ၀င် ကျူးအခြေချအိမ်ယာတွေ ဆောက်လုပ်တာ ဖြစ်ပါတယ်။

    Ref: Press TV

  • အစ္စရေးကိုရှုတ်ချသည့် ကုလ၏ အစီရင်ခံစာသစ်တစ်ခု ထပ်ထွက်လာ

    အစ္စရေးကိုရှုတ်ချသည့် ကုလ၏ အစီရင်ခံစာသစ်တစ်ခု ထပ်ထွက်လာ

    ဇွန် ၈၊ ၂၀၂၂
    M-Media

    -ပါလက်စတိုင်းပိုင်နက်မှာ အစ္စရေးရဲ့ကျူးကျော်မှုတွေ၊ ဖိနှိပ်ချုပ်ချယ်တဲ့ မူ၀ါဒတွေကို ဆန့်ကျင်ရှုတ်ချတဲ့ ကုလသမဂ္ဂရဲ့ အစီရင်ခံစာသစ်တစ်စောင် မနေ့က ထွက်လာပါတယ်။

    ၂၀၂၁ ခုနှစ် ဂါဇာကမ်းမြှောင်ကို အစ္စရေးက တိုက်ခိုက်ခဲ့ပြီးတဲ့နောက် ကုလသမဂ္ဂရဲ့ လူ့အခွင့်အရေးကောင်စီက လွတ်လပ်တဲ့ စုံစမ်းစစ်ဆေးရေးကော်မရှင်တစ်ခု ဖွဲ့စည်းပြီး အစ္စရေးရဲ့ လုပ်ရပ်တွေကို သုံးသပ်ခဲ့တာပါ။ ပါလက်စတိုင်းပိုင်နက်မှာ ပြည်ပကဂျူးတွေ ၀င်ရောက်ပြီး လက်နက်ကိုင်သိမ်းပိုက်ကာ အစ္စရေးနိုင်ငံ ထူထောင်မှုမှာ ဗြိတိန်နဲ့ ကုလသမဂ္ဂတို့က အဓိကကျတဲ့ အခန်းကဏ္ဍကနေ ပါ၀င်ခဲ့တာ ဖြစ်ပါတယ်။

    အင်္ဂါနေ့က ကုလရဲ့ထုတ်ပြန်ချက်မှာ အရင်က ပါလက်စတိုင်းနိုင်ငံထူထောင်ရေး နှစ်ဖက်သဘောတူထားတဲ့ အနောက်ဖက်ကမ်း၊ အရှေ့ဂျေရုစလင်တို့ကို အစ္စရေးဖက်က အပြည့်အ၀ထိန်းချုပ်နိုင်ရေး ကြိုးပမ်းနေတာကို တွေ့ရပြီး ရပ်တန့်မယ့်အလားအလာမျိုး မရှိဘူးလို့ ဖော်ပြထားပါတယ်။

    ဒီလို ကျူးကျော်သိမ်းပိုက်မှုတွေ၊ ပါလက်စတိုင်းတွေအပေါ် ညှင်းပမ်းမှုတွေ၊ ဂျူးတွေများလာပြီး ပါလက်စတိုင်းတွေနည်းသွားအောင်လုပ်တာတွေ ရပ်တန့်ဖို့လည်း စုံစမ်းစစ်ဆေးရေးကော်မရှင်က အစ္စရေးကို တိုက်တွန်းထားပါတယ်။

    အနောက်ဖက်ကမ်းနဲ့ အရှေ့ဂျေရုစလင်က အစ္စရေးရဲ့ ကျူးကျော်အိမ်ယာတွေမှာ နေထိုင်တဲ့ ဂျူးလူမျိုးအရေအတွက် ၇ သိန်းကျော်ရှိပြီး နိုင်ငံတကာအသိုင်းအ၀ိုင်းက ဒီလိုအိမ်ယာတွေ ဆောက်လုပ်မှုကို ကန့်ကွက်ထားပါတယ်။

    ဂါဇာကမ်းမြှောင်ကို ထိန်းချုပ်ထားတဲ့ ပါလက်စတိုင်းတော်လှန်ရေးအဖွဲ့ ဟားမက်စ်နဲ့ အနောက်ဖက်ကမ်းက ပါလက်စတိုင်းအာဏာပိုင်အဖွဲ့တို့က ကုလရဲ့ ဒီအစီရင်ခံစာကို ချီးကျူးကြိုဆိုကြောင်း ပြောကြားခဲ့ပြီး ပါလက်စတိုင်းတွေအပေါ် ကျူးလွန်တဲ့ စစ်ရာဇ၀တ်မှုတွေအတွက် အစ္စရေးခေါင်းဆောင်တွေကို တရားစွဲဆိုဖို့ တိုက်တွန်းခဲ့ပါတယ်။

    အစ္စရေး နိုင်ငံခြားရေး၀န်ကြီးဌာနက ကော်မရှင်ဟာ​ အချိန်နဲ့ ​ေငွကို ဖြုန်းတီးပစ်တာသာဖြစ်တယ်လို့ ရှုတ်ချခဲ့ပါတယ်။

    ကုလလူ့အခွင့်အရေးကောင်စီရဲ့ လာမယ့်တစ်ပတ်အစည်းအ​ေ၀းမှာ ဒီအစီရင်ခံစာကို ဆွေးနွေးမှာ ဖြစ်ပါတယ်။

    Ref : Reuters

  • ဂျူးလက်ယာစွန်းရောက်များ အလ်အက်ဆွာဗလီကို ၀င်စီး

    ဂျူးလက်ယာစွန်းရောက်များ အလ်အက်ဆွာဗလီကို ၀င်စီး

    မေ ၂၉၊ ၂၀၂၂
    M-Media

    -ပါလက်စတိုင်းပိုင်နက်ဖြစ်တဲ့ ဂျေရုစလင်က အလ်အက်ဆွာဗလီကို ဂျူးအစွန်းရောက်တွေ ဒီကနေ့မနက်ပိုင်းမှာ ၀င်ရောက်စီးနင်းခဲ့ပြီး ပါလက်စတိုင်းတွေရဲ့ အချုပ်အခြာနဲ့ ဘာသာရေးကို ကျူးကျော်စော်ကားမှု မြင့်တက်လာတဲ့ ပြယုဂ်တစ်ခု ဖြစ်ပါတယ်။

    အစ္စရေးလွှတ်တော်မှာ အမတ်နေရာတစ်ချို့ ရရှိထားတဲ့ ဂျူးအမျိုးသားရေးအစွန်းရောက်ပါတီတစ်ခုရဲ့ ခေါင်းဆောင် အီတာမာရ် ဘင်ဂဗီရ်က ဦးဆောင်ပြီး ဗလီထဲကို ၀င်ရောက်စီးနင်းခဲ့တာပါ။

    အစ္စရေးတပ်ဖွဲ့တွေကလည်း ဗလီထဲ ၀င်ရောက်တပ်စွဲကာ ၀တ်ပြုနေတဲ့ ပါလက်စတိုင်းတွေကို တံခါးပိတ်လှောင်ပြီး ဂျူးအစွန်းရောက်တွေအတွက် လမ်းရှင်းပေးခဲ့ပါတယ်။

    သတင်းယူဖို့သွားတဲ့ ဂျာနယ်လစ်တွေကို အစ္စရေးတပ်ဖွဲ့တွေက ဟန့်တားခဲ့သလို၊ ဗလီအတွင်းရှိနေတဲ့ ပါလက်စတိုင်းတွေကို ရာဘာကျည်တွေနဲ့ ပစ်ခတ်တာကြောင့် အနည်းဆုံး ၁၈ ဦး ဒဏ်ရာရခဲ့ပါတယ်။

    ဂျူးအစွန်းရောက်တွေဟာ ဗလီထဲမှာ ဂျူးဘာသာအတိုင်း ဘရားရှိခိုးဖို့အထိ ကြိုးစားခဲ့ကြတာပါ။ အစ္စရေးဥပဒေအရ အလ်အက်ဆွာဗလီထဲမှာ ဂျူးတွေ ဘုရား၀တ်ပြုခွင့်မရှိလို့ တားမြစ်ထားတာ ဖြစ်ပါတယ်။

    အစ္စရေးတပ်ဖွဲ့တွေနဲ့ ဂျူးအခြေချနေထိုင်သူတွေဟာ ပါလက်စတိုင်းတွေရဲ့ နေအိမ်တွေ၊ လယ်ယာတွေကို အတင်းအဓမ္မ ကျူးကျော်သိမ်းပိုက်ရုံသာမက အလ်အက်ဆွာဗလီကို ဖြိုချပြီး ဂျူးဘုရားကျောင်းဆောက်ဖို့အတွက် ကြိုးပမ်းလာကြတာ ဖြစ်ပါတယ်။

    ၁၉၆၇ ခုနှစ် စစ်ပွဲမှာ ပါလက်စတိုင်းပိုင်နက်တွေကို ထပ်မံ ကျူးကျော်သိမ်းပိုက်နိုင်တဲ့ အထိမ်းအမှတ်အဖြစ် နှစ်စဥ်နှစ်တိုင်း ဂျူးအခြေချသူတွေဟာ ဂျေရုစလင်က ပါလက်စတိုင်းရပ်ကွက်တွေမှာ ချီတက်လှည့်လည် ရန်စလေ့ရှိပြီး လာမယ့်ရက်ပိုင်းအတွင်း ဒီလိုချီတက်မှု ပြုလုပ်ဖို့ရှိနေပါတယ်။

    Ref: Aljazeera

    mmInternationalNews