Tag: Palestine

နိုဝင်ဘာ ၇၊ ၂၀၂၀
M-Media

-ပါလက်စတိုင်းတွေရဲ့နေအိမ်တွေကို အစ္စရေးက ဖျက်ဆီးတာဟာ လူမျိုးစုလိုက် သုတ်သင်ရှင်းလင်းမှု မြောက်တယ်လို့ လူ့အခွင့်အရေးအဖွဲ့တွေက ပြောကြားလိုက်ပြီး နိုင်ငံတကာအသိုင်းအဝိုင်းကလည်း ဒီကိစ္စကို ရှုတ်ချလိုက်ပါတယ်။

အခုတစ်ပတ်အစောပိုင်းမှာ ပါလက်စတိုင်းပိုင် ဂျော်ဒန်ဂျိုင့်ဝှမ်းဒေသက ရွာတစ်ခုလုံးကို အစ္စရေးစစ်သားတွေက ဖြိုချဖျက်ဆီးခဲ့ပါတယ်။ ​ဒီအဖြစ်အပျက်ကြောင့် ပါလက်စတိုင်းပြည်သူ ၇၀ လောက် အိုးမဲ့အိမ်မဲ့ဖြစ်ခဲ့ပါတယ်။

အစ္စရေးစစ်သားတွေဟာ အိမ်တွေကို မဖြိုခင်မှာ ပါလက်စတိုင်းတွေရဲ့ ပိုင်ဆိုင်မှုကို သိမ်းဆည်းတယ်ဆိုတဲ့ အဖြစ်အပျက်တွေလည်း ရှိပါတယ်။

ပါလက်စတိုင်း လူ့အခွင့်အရေးအဖွဲ့ဖြစ်တဲ့ Palestinian Center for Human Rights (PCHR) ရဲ့ ကြာသာပတေးနေ့က ထုတ်ပြန်တဲ့ အစီရင်ခံစာမှာ ဒီလုပ်ရပ်တွေဟာ လူမျိုးစုလိုက် သုတ်သင်ရှင်းလင်းမှုမြောက်တယ်လို့ ဖော်ပြထားပါတယ်။

“ပါလက်စတိုင်းနယ်မြေကို သိမ်းပိုက်ရေး၊ တရားမဝင်အိမ်ယာတွေ တိုးချဲ့ဆောက်လုပ်ရေး စီမံကိန်းအောက်မှာ ဒီလုပ်ရပ်တွေကို လုပ်ဆောင်နေတာပါ။ ဌာနေပါလက်စတိုင်းလူမျိုးတွေကို လူမျိုးစုလိုက်သုတ်သင်ရှင်းလင်းတယ်လို့ ပြောလို့ရပါတယ်”

အစ္စရေးက ပါလက်စတိုင်းတွေအပေါ် ဆောင်ရွက်နေတဲ့ ရာဇဝတ်မှုတွေကို အလျင်အမြန်တားဆီးပေးဖို့လည်း PCHR က နိုင်ငံအတကာအသိုင်းအဝိုင်းကို တိုက်တွန်းခဲ့ပါတယ်။

ဒီကိစ္စနဲ့ပတ်သက်လို့ ဥရောပသမဂ္ဂရဲ့ ကြာသာပတေးနေ့ ကြေငြာချက်မှာ ပါလက်စတိုင်းနေအိမ်တွေ ဖြိုဖျက်တာကို ရပ်တန့်ဖို့ အစ္စရေးကို တိုက်တွန်းခဲ့ပြီး ဒါဟာ နှစ်နိုင်ငံတည်ရှိရေးအဖြေကို ပျက်ပြားစေလိမ့်မယ်လို့ ဖော်ပြထားပါတယ်။

အစ္စရေးဟာ ပါလက်စတိုင်းပိုင်နက်တွေမှာ နေအိမ်တွေ ဖြိုချဖျက်ဆီးတာ၊ တရားမ၀င် အခြေချအိမ်ယာတွေ တိုးချဲ့တာတွေကို တိုးမြှင့်လုပ်ဆောင်နေတာ ဖြစ်ပါတယ်။ အခုနှစ်အတွင်း အစ္စရေးက နေအိမ်တွေ ဖြိုချဖျက်ဆီးမှုကြောင့် ပါလက်စတိုင်းပြည်သူ အနည်းဆုံး ၈၀၀ ကျော်အိုးမဲ့အိမ်မဲ့ ဖြစ်ခဲ့ရပြီး ဒါဟာ ၄ နှစ်အတွင်း အမြင့်ဆုံး ပမာဏ ဖြစ်ပါတယ်။

ကုလရဲ့ ပါလက်စတိုင်းကူညီ​ရေးအဖွဲ့ OCHA က လူသားချင်းစာနာထောက်ထားမှုနဲ့ မိမိတို့ ဆောက်ပေးထားတဲ့ အဆောက်အဦးတွေပါ ဖျက်ဆီးခံခဲ့ရပြီး၊ ကိုဗစ်ကပ်ရောဂါ၊ အေးလွန်းလှတဲ့ ဆောင်းရာသီတွေက အိုးမဲ့အိမ်မဲ့ဖြစ်သွားတဲ့ ပါလက်စတိုင်းတွေရဲ့အခြေအနေတွေကို ပိုဆိုးစေလိမ့်မယ်လို့ သတိပေးခဲ့ပါတယ်။

Ref: Press TV

နိုဝင်ဘာ ၅၊ ၂၀၂၀
M-Media

-ပါလက်စတိုင်းပိုင် အနောက်ဖက်ကမ်းက ပါလက်စတိုင်းရွာ တစ်ခုလုံးက အိမ်တွေကို အစ္စ​ရေးစစ်တပ်က ဖြိုချဖျက်ဆီးလိုက်ပါတယ်။

ဂျော်ဒန်ချိုင့်ဝှမ်းဒေသက Khirbet Humsa ဆိုတဲ့ရွာမှာ အင်္ဂါနေ့က ဖြစ်ပွားခဲ့တဲ့ အဲဒီအဖြစ်အပျက်ကြောင့် ပါလက်စတိုင်းပြည်သူ စုစုပေါင်း ၈၀ လောက် အိုးမဲ့အိမ်မဲ့ ဖြစ်ခဲ့ပါတယ်။ အဲဒီအထဲမှာ ထက်ဝက်ကျော်က ကလေးငယ်တွေဖြစ်တယ်လို့ NGO အဖွဲ့ B’Tselem က ပြောကြားခဲ့ပါတယ်။

အစ္စရေးစစ်တပ်ဟာ အင်္ဂါနေ့ညဘက်မှာ မြေတူးစက်တွေအသုံးပြုပြီး နေအိမ်တွေကို ဖြိုချဖျက်ဆီးခဲ့တာပါ။ မဖြိုချခင်မှာ ပစ္စည်းပြောင်းရွှေ့ဖို့ ၁၀ မိနစ်သာ အချိန်​ပေးခဲ့တယ်လို့ အိုးအိမ်ဆုံးရှုံးရသူတွေက ပြောကြားခဲ့ပါတယ်။

ပါလက်စတိုင်းဝန်ကြီးချုပ် မိုဟာမက် ရှက်တာယာဟ်က ပါလက်စတိုင်းပြည်သူတွေ အိုးမဲ့အိမ်မဲ့ဘ၀ရောက်အောင် အစ္စရေးက လုပ်ဆောင်နေမှုကို နိုင်ငံတကာအသိုင်းအဝိုင်းက ကြားဝင်ဟန့်တားပေးဖို့ တောင်းဆိုခဲ့ပါတယ်။

ပါလက်စတိုင်းပိုင်နက်ဖြစ်တဲ့ အနောက်ဖက်ကမ်းက ဂျော်ဒန်ချို့ဝှမ်းဒေသမှာ လူ ၆ သောင်းလောက် နေထိုင်ပါတယ်။ ဒါပေမယ့် အဲဒီဒေသရဲ့ ၉၀ ရာခိုင်နှုန်းလောက်ကို အစ္စရေးက ထိန်းချုပ်ပိတ်ဆို့ထားပြီး တရားမဝင်အခြေချအိမ်ယာတွေ၊ စစ်စခန်းတွေ တည်ဆောက်ကာ ပါလက်စတိုင်းပြည်သူတွေ လျော့နည်းသွားအောင် လုပ်ဆောင်နေပါတယ်။

Ref: Aljazeera

အောက်တိုဘာ ၁၅၊ ၂၀၂၀
M-Media

-ပါလက်စတိုင်းပိုင် အနောက်ဖက်ကမ်းမှာ တရားမဝင် ခြေချအိမ်ယာတွေ ထပ်မံတိုးချဲ့ဆောက်လုပ်ဖို့အတွက် အစ္စရေးက မနေ့မှာ အတည်ပြုလိုက်ပါတယ်။

ပါလက်စတိုင်းပိုင်နက်တွေမှာ အစ္စရေးက အခြေချအိမ်ယာတွေ တည်ဆောက်တာဟာ နိုင်ငံတကာဥပဒေအရ တရားမဝင်ဘဲ ကမ္ဘာ့အသိုင်းအဝိုင်းကလည်း လက်ခံခြင်းမရှိပါဘူး။​ အနောက်ဖက်ကမ်းက ဒီတရားမဝင် အိမ်ယာတွေမှာ ဂျူလူမျိုး သန်းဝက်လောက်နေထိုင်နေပြီး ပါလက်စတိုင်း-အစ္စရေး ငြိမ်းချမ်းရေးရဲ့အဓိပြဿနာလည်း ဖြစ်ပါတယ်။

ဗုဒ္ဓဟူးနေ့က အတည်ပြုလိုက်တဲ့အစီအစဉ်မှာ အိမ်ယာ ၂၁၆၆ လုံး ဆောက်လုပ်ဖို့ ပါဝင်ပြီး၊ နောကထပ် အိမ်အလုံး ၂ ထောင်ကျော် ဆောက်လုပ်မယ့် အစီအစဉ်ကို ကြာသာပတေးနေ့မှာ အစ္စရေးက အတည်ပြုဖို့ ရှိနေပါတယ်။

ဒါဟာ ယူ​အေအီး၊ ဘာရိန်းတို့နဲ့ ဆက်ဆံရေးတည်ဆောက်ဖို့ သဘောတူညီချက်ရပြီး တစ်လမပြည့်ခင်မှာပဲ ပေါ်ပေါက်လာတာပါ။

ယူအေအီးနဲ့ ဘာရိန်းတို့က အနောက်ဖက်ကမ်းကို သိမ်းယူမယ့် အစ္စရေးရဲ့အစီအစဉ်ကို ဒီသဘောတူညီချက်နဲ့ ဟန့်တားနိုင်ခဲ့တယ်လို့ ထုတ်ပြန်ထားပါတယ်။

အန်ဂျီအိုအဖွဲ့တစ်ခုဖြစ်တဲ့ Peace Now က တရားမဝင်အခြေချအိမ်ယာတွေ ဆောက်လုပ်မယ့် အစ္စရေးရဲ့ အစီအစဉ်ဟာ ပါလက်စတိုင်းနိုင်ငံပေါ်လာရေးကို လက်မခံဘူးဆိုတဲ့ ထင်ရှားတဲ့လက္ခဏာ ဖြစ်တယ်လို့ ပြောကြားခဲ့ပါတယ်။

Ref: Aljazeera