Tag: Palestine

မေ ၁၃၊ ၂၀၂၁
M-Media

-ပါလက်စတိုင်းပိုင် ဂါဇာကမ်းမြှောင်မှာ အစ္စရေးက လူနေရပ်ကွက်တွေကို လေကြောင်းကနေတိုက်ခိုက်မှုတွေ ဆက်လက်လုပ်ဆောင်နေတာကြောင့် သေဆုံးသူအရေအတွက်ဟာ ၈၃ ဦးရှိလာပြီ ဖြစ်ပါတယ်။

အစ္စရေးဟာ တိုက်ခိုက်မှုတွေကို တနင်္လာနေ့ ညနေပိုင်းကတည်းက စတင်လုပ်ဆောင်နေတာပါ။ တိုက်ခိုက်မှုတွေဟာ တစ်ဖြည်းဖြည်း ပြင်းထန်လာပြီး အထပ်မြင့် လူနေအဆောက်အဦးတွေကို ပစ်မှတ်ထားလာကြောင့် သေဆုံးသူတွေ မြင့်တက်လာတာလည်း ဖြစ်ပါတယ်။

သေဆုံးသူ အနည်းဆုံး ၈၃ ဦးရှိတယ်လို့ ဂါဇာကျန်းမာရေးဌာနက ထုတ်ပြန်ထားပြီး အဲဒီအထဲမှာ ကလေးငယ် ၁၇ ဦး ပါဝင်ပါတယ်။ ဒဏ်ရာရသူအရေအတွက်ကတော့ ၄၈၀ လောက် ရှိနေပါတယ်။

ပြီခဲ့တဲ့ သီတင်းပတ်အနည်းအငယ်အတွင်း အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်းမှာ ပါလက်စတိုင်းနေအိမ်တွေကို ဂျူးအခြေချသူတွေက လုယူသိမ်းပိုက်ခဲ့ပြီးတဲ့နောက် ပါလက်စတိုင်းနဲ့ အစ္စရေးတို့အကြား တင်းမာမှုတွေ မြင့်တက်လာတာပါ။

ဒီလုယူမှုကို မကျေနပ်တဲ့အတွက် ပါလက်စတိုင်းတွေက ဂျေရုစလင်မှာရှိတဲ့ အလ်အက္ကဆွာဗလီမှာ ထိုင်သပိတ်ပြုလုပ်ခဲ့ပြီး အစ္စရေးတပ်ဖွဲ့က မနေ့ကအထိ ဝင်ရောက်စီးနင်း ဖြိုခွဲရာမှာ ပါလက်စတိုင်းပြည်သူ ၇၀၀ ကျော် ဒဏ်ရာရခဲ့ပါတယ်။

ဟားမက်စ်က အလ်အက္ကဆွာဗလီမှာ အစ္စရေးတပ်ဖွဲ့တွေက အကြမ်းဖက်တာကို လက်တုန့်ပြန်တဲ့အနေနဲ့ မနေ့ကအထိ ဂါဇာကနေ ဒုံးကျည်တွေနဲ့ ပစ်ခတ်ခဲ့ပြီး အနည်းဆုံး အစ္စရေး ၇ ဦး သေဆုံးခဲ့ပါတယ်။

Ref: Aljazeera

မေ ၁၁၊ ၂၀၂၁
M-Media

-ပါလက်စတိုင်းပိုင်နက်ဖြစ်တဲ့ ဂါဇာမှာ မနေ့က အစ္စရေးက လေကြောင်းကနေ တိုက်ခိုက်မှုတွေ ပြုလုပ်တာကြောင့် ကလေးငယ် ၉ ဦးအပါအဝင် အနည်းဆုံး လူ ၂၄ ဦး သေဆုံးခဲ့ပါတယ်။

ဂါဇာကို အစ္စရေးက ​ရေကြောင်း၊ လေကြောင်း၊ ကုန်းကြောင်းကနေ ပိတ်ဆို့ဖြတ်တောက်ထားတာ ၁၀ နှစ်လောက် ရှိပါပြီ။ ဟားမက်စ်အဖွဲ့က အစ္စရေးဘက်ကို ဒုံးကျည်တွေပစ်တာကြောင့် ဒီလိုတိုက်ခိုက်တာဖြစ်တယ်လို့ အစ္စရေးက ထုတ်ပြန်ပါတယ်။

​အစ္စရေးရဲ့ တိုက်ခိုက်မှုမှာ ဒုက္ခသည်စခန်းတွေ လူနေရပ်ကွက်တွေလည်း ပစ်မှတ်ထား ခံခဲ့ရပါတယ်။ ဒီကနေ့မနက်ပိုင်းမှာလည်း ဂါဇာကို အစ္စရေးက လေကြောင်းကနေ ထပ်မံ တိုက်ခိုက်ခဲ့ပါတယ်။

ပြီးခဲ့တဲ့ သီတင်းပတ်အနည်းအငယ်အတွင်း အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်းမှာ ပါလက်စတိုင်းနေအိမ်တွေကို ဂျူးအခြေချသူတွေက လုယူသိမ်းပိုက်ခဲ့ပြီးတဲ့နောက် ပါလက်စတိုင်းနဲ့ အစ္စရေးတို့အကြား တင်းမာမှုတွေ မြင့်တက်လာတာပါ။

ဒီလုယူမှုကို မကျေနပ်တဲ့အတွက် ပါလက်စတိုင်းတွေက ဂျေရုစလင်မှာရှိတဲ့ အလ်အက္ကဆွာဗလီမှာ ထိုင်သပိတ်ပြုလုပ်ခဲ့ပြီး အစ္စရေးတပ်ဖွဲ့က မနေ့ကအထိ ဝင်ရောက်စီးနင်း ဖြိုခွဲရာမှာ ပါလက်စတိုင်းပြည်သူ ၇၀၀ ကျော် ဒဏ်ရာရခဲ့ပါတယ်။

ဟားမက်စ်က အလ်အက္ကဆွာဗလီမှာ အစ္စရေးတပ်ဖွဲ့တွေက အကြမ်းဖက်တဲ့အတွက် ဒုံးကျည်တွေနဲ့ ပစ်ခတ်တာလို့ ထုတ်ပြန်ပါတယ်။

Ref: Aljazeera

မေ ၁၀၊ ၂၀၂၁
M-Media

-အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင်နက်မှာ တင်းမာမှုတွေ မြင့်တက်နေချိန် ဂျူးအမျိုးသားရေး လက်ယာစွန်းသမားတွေက ချီတက်ဆန္ဒပြပွဲ ပြုလုပ်ဖို့ စီစဉ်နေပါတယ်။

ပြီးခဲ့တဲ့ သီတင်းပတ်တွေအတွင်း ဂျူးအခြေချသူတွေက ပါလက်စတိုင်းတွေရဲ့နေအိမ်တွေကို လုယူတာ၊ ဒါကို မကျေနပ်လို့ အလ်အက္ကဆွာဗလီထဲမှာ ထိုင်သပိတ်လုပ်တဲ့ ပါလက်စတိုင်းပြည်သူတွေကို အစ္စရေးစစ်သားတွေက ဝင်ရောက်အကြမ်းဖက်တာတွေကြောင့် ပါလက်စတိုင်းပိုင်နက်တွေမှာ တင်းမာမှုတွေ မြင့်တက်နေတာပါ။

အစ္စရေးတပ်ဖွဲ့တွေရဲ့လက်ချက်ကြောင့် ဒီအဖြစ်အပျက်အတွင်း ပါလက်စတိုင်းပြည်သူ ၃၀၀ ကျော်လောက် ဒဏ်ရာရရှိခဲ့ပါတယ်။

၁၉၆၇ ခုနှစ် ပါလက်စတိုင်းပိုင် အရှေ့ဂျေရုစလင်ကို အစ္စရေးတပ်တွေက သိမ်းပိုက်ခဲ့တာကို အစွဲပြုပြီး ဂျူးလက်ယာစွန်းသမားတွေက Jerusalem Day Flag ချီတက်ဆန္ဒပြမှုကို နှစ်စဉ် ဆောင်ရွက်ကြတာပါ။

ပါလက်စတိုင်းရပ်ကွက်တွေမှာ အလံတွေဝှေ့ယမ်းတာ၊ ကြွေးကျော်သံတွေ ရွတ်ဆို လှည့်လည်ကြတာဖြစ်ပြီး ပါလက်စတိုင်းတွေကတော့ ဒါဟာ သူတို့ကို ရန်စမှုလို့ ရှုမြင်ပါတယ်။ ဒီနှစ် ချီတက်ပွဲကို လာမယ့်ရက်အနည်းငယ်အတွင်း လုပ်ဖို့ ဂျူးလက်ယာစွန်းသမားတွေက စီစဉ်ထားပါတယ်။

အစ္စရေးတပ်တွေဟာ ပြီးခဲ့တဲ့ရက်တွေမှာ နေ့စဉ်လိုလို အလ်အက္ကဆွာဗလီထဲကို ဝင်ရောက်ပြီး အကြမ်းဖက်တာတွေ လုပ်ဆောင်နေတာ ဖြစ်ပါတယ်။

တင်းမာမှုတွေ မြင့်တက်နေတဲ့အချိန် ဂျူးလက်ယာစွန်းရောက်တွေရဲ့ ဒီဆန္ဒပြမှုကြောင့် အခြေအနေ ပိုမိုဆိုးရွားသွားနိုင်တယ်ဆိုတဲ့ စိုးရိမ်မှုတွေ ရှိနေပါတယ်။

Ref: BBC