မေ ၂၆၊ ၂၀၂၁
M-Media
-ပါလက်စတိုင်းနဲ့ ဆက်ဆံရေးကို ပြန်လည်တည်ဆောက်သွားမယ်လို့ အရှေ့အလယ်ပိုင်းကိုရောက်နေတဲ့ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်က ပြောကြားလိုက်ပါတယ်။
အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်း ရာမာလာဟ်မြို့ကို ဘလင်ကန်ဟာ မနေ့က သွားရောက်ခဲ့ပြီး ပါလက်စတိုင်းသမ္မတ မဟ်မူးဒ်အဘတ်စ်နဲ့ တွေ့ဆုံခဲ့ပါတယ်။
မကြာသေးခင်က အစ္စရေးနဲ့ ဟားမက်စ်တို့ ရရှိထားတဲ့ အပစ်ရပ်ရေးသဘောတူညီချက်ကို လိုက်နာဖို့လိုတယ်လို့ ပြောကြားခဲ့သလို၊ အစ္စရေးရဲ့လုံခြုံရေးကို အမေရိကန် အပြည့်အဝ ကာကွယ်သွားမယ်လို့လည်း ထပ်လောင်း ကတိပြုခဲ့ပါတယ်။
ပါလက်စတိုင်းအာဏာပိုင်အဖွဲ့၊ ပါလက်စတိုင်းပြည်သူတွေနဲ့ ဆက်ဆံရေးပြန်လည်တည်ဆောက်ဖို့ အမေရိကန်က စိတ်ဆန္ဒရှိတယ်လို့ မဟ်မူးဒ်အဘတ်စ်နဲ့ ပြုလုပ်တဲ့ သတင်းစာရှင်းလင်းပွဲမှာ ဘလင်ကန်က ပြောကြားခဲ့ပါတယ်။
ပါလက်စတိုင်းဆိုင်ရာ အမေရိကန်ကောင်စစ်ဝန်ရုံး ဂျေရုစလင်မှာ ပြန်လည်ဖွင့်လှစ်ဖို့ လုပ်ဆောင်နေတယ်လို့လည်း ဘလင်ကန်က ဆိုပါတယ်။
သမ္မတဟောင်း ထရမ့်လက်ထက်က ဂျေရုစလင်ကို အစ္စရေးပိုင်အဖြစ် အသိအမှတ်ပြုခဲ့ပြီးတဲ့နောက် ထုတ်ပြန်ခဲ့တဲ့ အရှေ့အလယ်ပိုင်း ငြိမ်းချမ်းရေးအစီအစဉ်ကို ကန့်ကွက်တဲ့အနေနဲ့ ပါလက်စတိုင်းက အမေရိကန်နဲ့ အဆက်အသွယ်အားလုံး ဖြတ်ခဲ့တာပါ။
ပြီးခဲ့တဲ့ရက်ပိုင်းအတွင်း လူပေါင်း ၂၀၀ ကျော် သေဆုံးခဲ့တဲ့ အစ္စရေးရဲ့ ဗုံးကြဲတိုက်ခိုက်မှုကို ခံခဲ့ရတဲ့ ဂါဇာကမ်းမြှောင်ဒေသ ပြန်လည်ထူထောင်ရေးလုပ်ငန်းအတွက် အမေရိကန်ဟာ နိုင်ငံတကာအသိုင်းအဝိုင်း၊ အစ္စရေး၊ ပါလက်စတိုင်းအာဏာပိုင်အဖွဲ့တို့နဲ့ ဆက်သွယ်လုပ်ဆောင်တယ်လို့လည်း ဘလင်ကန်က ပြောပါတယ်။
ဂါဇာအတွက် အရေးပေါ်ထောက်ပံ့ကူညီငွေ ကန်ဒေါ်လာ ၅.၅ သန်း၊ ပါလက်စတိုင်း ပြည်သူတွေကို ကူညီနေတဲ့ ကုလအဖွဲ့ UNRWA ကို ကန်ဒေါ်လာ ၃၂ သန်း အမေရိကန်က ကူညီမှာဖြစ်ကြောင်း ဘလင်ကန်က ဆိုပါတယ်။
Ref: BBC
