Tag: russia

သြဂုတ် ၁၄၊ ၂၀၂၄
M-Media

-ပြီးခဲ့တဲ့တစ်ပတ်က စတင်တဲ့ ယူကရိန်းရဲ့ ရုရှားပိုင်နက်ထဲအထိ ရုတ်တရက် ထိုးစစ်ဟာ မြန်မြန်ဆန်ဆန်ပဲ အောင်မြင်မှု ရရှိနေပြီး ပြည်နယ်နှစ်ခုအထိ ၀င်ရောက်ထိုး ဖောက်နိုင်ပြီ ဖြစ်ပါတယ်။

ယူကရိန်းနဲ့ ကပ်နေတဲ့ ကာ့ဆ် ပြည်နယ်ကို စတင် ၀င်ရောက်ခဲ့တဲ့ ယူကရိန်းတပ်တွေဟာ ရုရှားရဲ့ ခံစစ်လိုင်း ၂ ခုကို အောင်မြင်စွာ ဖောက်ထွက်နိုင်ခဲ့ပြီး အနည်းဆုံး ရွာပေါင်း ၂၈ ရွာကို သိမ်းပိုက် ထားနိုင်ပါတယ်။ ရုရှားစစ်သား ၁၀၀ ကျော်ကို ဖမ်းဆီးထားနိုင်တယ်လို့ ယူကရိန်းဖက်က ထုတ်ပြန်ပါတယ်။

သြဂုတ်လ ၁၃ ရက်နေ့မှာတော့ ယူကရိန်းတပ်တွေဟာ ကာ့ဆ်နဲ့ ကပ်နေတဲ့ ဘယ်ဂိုရော့ဒ် ပြည်နယ်ကိုပါ တိုက်ခိုက်လာတဲ့အတွက် ရုရှားအစိုးရက အရေးပေါ်အခြေအနေ ကြေငြာထားရပါတယ်။

ယူကရိန်းစစ်တပ် နိုင်ငံထဲအထိ ထိုးဖောက်၀င်ရောက်လာတာကို ရုရှားကလည်း ၀န်ခံခဲ့ပါတယ်။

အမေရိကန်သမ္မတ ဂျိုးဘိုင်ဒန်က ယူကရိန်းရဲ့ ကာ့ဆ်ထိုးစစ်ဟာ ရုရှားသမ္မတ ပူတင်အတွက် ခေါင်းခဲစရာဖြစ်မယ်လို့ မှတ်ချက်ပေးခဲ့ပေမယ့် ဒီကိစ္စမှာ အမေရိကန်ဖက်က ပါ၀င်ပတ်သက်ခြင်းမရှိဘူးလို့ ပြောကြားခဲ့ပါတယ်။

Ref: Reuters

ဇွန် ၂၁၊ ၂၀၂၄
M-Media 

-တိုက်ခိုက်မှုတွေနဲ့ ကြုံလာရတဲ့အခါ အပြန်အလှန် စစ်ရေးနဲ့ ကူညီပေးဖို့ ရုရှားနဲ့ မြောက်ကိုရီးယားတို့ သဘောတူညီခဲ့ကြပါတယ်။

ရုရှားသမ္မတပူတင်ရဲ့ မြောက်ကိုရီးယား ခရီးစဥ်အတွင်း ဇွန်လ ၁၉ ရက်နေ့မှာ မြောက်ကိုရီးယားခေါင်းဆောင် ကင်ဂျုံအွန်နဲ့ လက်မှတ်ရေးထိုးခဲ့တာဖြစ်ပါတယ်။ 

ရုရှားဟာ မြောက်ကိုရီးယားကို လက်နက်တွေ ထောက်ပံ့ပေးသွားနိုင်တယ်လို့လည်း သမ္မတပူတင်က ဇွန်လ ၂၀ ရက်နေ့ ဗီယက်နမ်နိုင်ငံမှာပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။ 

အနောက်နိုင်ငံတွေက ယူကရိန်းကို လက်နက်တွေ ထောက်ပံ့ပေးပြီး ရုရှားကိုတိုက်ခိုက်ဖို့ ခွင့်ပြုတဲ့အတွက် တုန့်ပြန်တာလို့လည်း သူက ဆိုပါတယ်။ 

အမေရိကန်နဲ့ အနောက်နိုင်ငံတွေရဲ့ ရန်ဖက်တိုင်းပြည်တွေကို လက်နက်တွေ ထောက်ပံ့ပေးသွားနိုင်တယ်လို့ ပူတင်က ဇွန်လအစောပိုင်းမှာ ပြောကြားထားပါတယ်။ 

မြောက်ကိုရီးယားနဲ့ ရုရှားတို့ရဲ့ ပူးပေါင်းဆောင်ရွက်မှုဟာ အနောက်နိုင်ငံတွေကို တားဆီးရေး ဖြစ်လာမယ်လို့လည်း ပူတင်က ဆိုပါတယ်။ မြောက်ကိုရီးယားစစ်သားတွေကို ယူကရိန်းစစ်ပွဲမှာ အသုံးပြုမယ်ဆိုတဲ့ သတင်းတွေကိုတော့ ပူတင်က ငြင်းဆိုပါတယ်။ 

ရုရှားရဲ့ ယူကရိန်းကျူးကျော်စစ်ပွဲမှာ မြောက်ကိုရီးယားက ရုရှားကို လက်နက်ခဲယမ်းတွေ အမြောက်အများ ထောက်ပံ့ပေးထားတယ်လို့ အမေရိကန်နဲ့ အနောက်နိုင်ငံတွေက စွပ်စွဲထားကြပြီး ရုရှားနဲ့ မြောက်ကိုရီးယားက ဒီသတင်းတွေကို ငြင်းဆိုထားပါတယ်။

Ref: Reuters 

မေ ၂၃၊ ၂၀၂၄

M-Media

-မေလ ၂၃ ရက်နေ့ ရုရှားရဲ့ ဂြိုဟ်တုလွှတ်တင်မှုမှာ အာကာသထဲရှိနေတဲ့ ဂြိုဟ်တုတွေကို တိုက်ခိုက်နိုင်တဲ့ လက်နက်မျိုး ပါ၀င်တယ်လို့ ယုံကြည်ကြောင်း အမေရိကန်က ထုတ်ပြန်လာပါတယ်။ 

ဆိုယုဇ်ဒုံးပျံနဲ့ ကမ္ဘာပတ်လမ်းထဲ ရုရှားကလွှတ်တင်မှုမှာ ဂြိုဟ်တု အနည်းဆုံး ၉ လုံး တင်ဆောင်သွားပါတယ် အဲဒီအထဲမှာ COSMOS 2576 အမည်နဲ့ ဂြိုဟ်တုလည်း ပါ၀င်ပါတယ်။ 

COSMOS 2576 ဂြိုဟ်တုဟာ အာကာသထဲက အခြားဂြိုဟ်တုတွေကို ထောက်လှမ်း တိုက်ခိုက်နိုင်တဲ့ လက်နက်တစ်မျိုးဖြစ်တယ်လို့ အမေရိကန်က စွပ်စွဲထားပြီး အရင်ကတည်းက ကန့်ကွက်ခဲ့တာ ဖြစ်ပါတယ်။ 

အမေရိကန် အာကာသဆိုင်ရာ စစ်ဌာနချုပ်ရဲ့ ထုတ်ပြတ်ချက်မှာ ရုရှားဟာ COSMOS 2576 ဂြိုဟ်တုကို အမေရိကန် ဂြိုဟ်တုတွေ ရှိနေတဲ့ ကမ္ဘာပတ်လမ်းကြောင်းထဲ လွှတ်တင်ခဲ့တာဖြစ်ပြီး ဒါကို ကန့်ကွက်တယ်လို့ ဖော်ပြထားပါတယ်။ 

ရုရှားရဲ့ ဒီလွှတ်တင်မှုကို အမေရိကန်ထောက်လှမ်းရေးက ကြိုတင်ခန့်မှန်းထားပြီး၊ မဟာမိတ်နိုင်ငံတွေကိုလည်း သတင်းအချက်အလက်တွေ ပေးပို့ထားပြီး ဖြစ်ပါတယ်။ 

ရုရှားရဲ့ ဒုတိယနိုင်ငံခြားရေး၀န်ကြီး ဆာဂျီ ရှဘ်ကော့ဗ်က အမေရိကန်ရဲ့ စွပ်စွဲမှုကို ပယ်ချခဲ့ပြီး ရုရှားဟာ ကမ္ဘာပတ်လမ်းမှာ လက်နက်တွေ ချထားမှုကို ဆန့်ကျင်တယ်လို့ တုန့်ပြန်ပါတယ်။ 

“၀ါရှင်တန်ကလာတဲ့ သတင်းမှားတွေကို တုန့်ပြန်စရာ မလိုဘူးလို့ ကျွန်တော်ထင်ပါတယ်”

Ref: Reuters 

မေ ၁၃၊ ၂၀၂၄

M-Media 

-ရုရှားသမ္မတ ပူတင်ဟာ နှစ်အကြာကြီး တွဲလာတဲ့ လူယုံတစ်ဦးဖြစ်သူ ကာကွယ်ရေး၀န်ကြီး ဆာဂျီ ရှိုဂူကို ရာထူးကနေ ဖယ်ရှားလိုက်ပါတယ်။

၂၀၁၂ ခုနှစ်ကတည်းက ကာကွယ်ရေး၀န်ကြီးတာ၀န် ထမ်းဆောင်လာတဲ့ အသက် ၆၈ နှစ်အရွယ် ရှီုဂူဟာ ရုရှားလုံခြုံရေးကောင်စီရဲ့ အတွင်းရေးမှူး ဖြစ်လာမှာ ဖြစ်ပါတယ်။ 

ရုရှားသမ္မတရုံးရဲ့ ထုတ်ပြန်ချက်မှာ ကာကွယ်ရေး၀န်ကြီးဌာနဟာ ဆန်းသစ်တဲ့ အတွေးအခေါ်ရှိသူကို လိုအပ်နေပြီး ဒုတိယ၀န်ကြီးချုပ် အန်ဒရေ ဘယ်လူဆော့ဗ်က ကာကွယ်ရေး၀န်ကြီးတာ၀န် ယူသွားမယ်လို့ ဖော်ပြပါတယ်။ 

ရှိုဂီဟာ သမ္မတပူတင်နဲ့ ပုဂ္ဂိုလ်ရေးအရပါ အလွန်ရင်းနှီးသူတစ်ဦး ဖြစ်ပါတယ်။ ရုရှားထိပ်ပိုင်းခေါင်းဆောင်တွေထဲမှာ စစ်ဖက်ကလာတာမဟုတ်ဘဲနဲ့ ကာကွယ်ရေး၀န်ကြီးရာထူး ပေးအပ်ခံရတဲ့အထိ ပူတင်ရဲ့ ယုံကြည်မှုကို ရရှိထားသူပါ။ 

ကာကွယ်ရေး၀န်ကြီးသစ်ဖြစ်လာမယ့် ဘယ်လူဆော့ဗ်ဟာ ရှိုဂီလိုပဲ စစ်ဖက်ကျောထောက်နောက်ခံမရှိဘဲ စီးပွားရေးပညာရှင်တစ်ဦး ဖြစ်ပါတယ်။ 

Ref: BBC  

(ငါးဖမ်းခရီးတစ်ခုတွင် သမ္မတပူတင်နှင့်အတူ တွေ့ရသည့် ရှိုဂီ)