Tag: russia

မေ ၆၊ ၂၀၂၄

M-Media 

-နျူလက်နက်ပစ်ခတ်မှု ပါ၀င်မယ့် စစ်ရေးလေ့ကျင့်မှုတစ်ခု မကြာခင် ပြုလုပ်သွားမယ်လို့ ရုရှားနိုင်ငံက မေလ ၆ ရက်နေ့မှာ ထုတ်ပြန်ကြေငြာပါတယ်။ 

အနောက်နိုင်ငံတွေက ယူကရိန်းကို စစ်သားစေလွှတ်မှု အပါအ၀င် စစ်ရေးထောက်ပံ့မှု ပိုလုပ်သွားမယ်ဆိုတဲ့ ကတိပေးပြီး တစ်ရက်အကြာမှာ ရုရှားရဲ့ ဒီထုတ်ပြန်ချက် ပေါ်ထွက်လာတာပါ။ 

ရုရှား ကာကွယ်ရေး၀န်ကြီးဌာနရဲ့ ထုတ်ပြန်ချက်မှာ အနောက်နိုင်ငံတွေရဲ့ ရန်လိုတဲ့ ခြိမ်းခြောက်ထုတ်ပြန်မှုတွေ ပေါ်ထွက်လာတဲ့အတွက် နျူလက်နက်အဆင်သင့်ဖြစ်ရေးကို ရည်ရွယ်ပြီး စစ်ရေးလေ့ကျင်မှု လုပ်ဆောင်ရတာလို့ ဖော်ပြပါတယ်။ 

စစ်ရေးလေ့ကျင့်မှုမှာ ရုရှားရဲ့ တောင်းပိုင်းစစ်ဌာဒေသ ဒုံးကျည်တပ်ဖွဲ့နဲ့ ရေတပ်တို့ ပူးပေါင်းပါ၀င်သွားမှာ ဖြစ်ပါတယ်။ လေ့ကျင့်မှုလုပ်မယ့် အချိန်အတိအကျကို မထုတ်ပြန်ပါဘူး။ 

ယူကရိန်းကို ရုရှားက ကျူးကျော်တိုက်ခိုက်မှု ပြုလုပ်တာ ၂ နှစ်ကျော် ရှိလာပြီဖြစ်ပြီး အမေရိကန်အပါအ၀င် အနောက်နိုင်ငံတွေက ယူကရိန်းထံ စစ်လက်နက်ပစ္စည်း ထောက်ပံ့ပေးပို့မှုတွေ ပိုမို လုပ်ဆောင်လာပါတယ်။ 

အခုနောက်ပိုင်းမှာတော့ ဥရောပနိုင်ငံတစ်ချို့က ယူကရိန်းဖက်က တောင်းခံလာရင် စစ်သားတွေ စေလွှတ်ဖို့အထိ စဥ်စားနေတယ်လို့ ထုတ်ပြန်ထားပါတယ်။ 

Ref: Reuters 

ဧပြီ ၂၊ ၂၀၂၄

M-Media 

-ရုရှားစစ်တပ်ဟာ သူတို့ထုတ်လုပ်ထားတဲ့ လူမဲ့စစ်ကား Zubilo ကို အဆင့်မြှင့်တင်ပြီး ယူကရိန်းစစ်ပွဲမှာ အသုံးပြုဖို့ စီစဥ်နေပါတယ်။ 

ကားထုတ်လုပ်တဲ့ Remdizel JSC ကုမ္ပဏီက Zubilo စစ်ကားတွေကို ရုရှားစစ်တပ်ထံ ရောင်းချနေတယ်လို့ အတည်ပြု ပြောဆိုပါတယ်။ 

၂၀၂၃ ခုနှစ်မှာ နမူနာထွက်လာတဲ့ Zubilo ဟာ ဘက်စုံသုံး စစ်ကားပါ။ ရှေ့တန်းစစ်မျက်နှာက တပ်ဖွဲ့တွေကို လက်နက်ခဲယမ်း၊ ရိက္ခာတွေ ထောက်ပံ့ဖို့၊ ဒဏ်ရာရသူတွေကို သယ်ဆောင်ဖို့၊ ရေဒီယိုစခန်းတွေနဲ့ လူမဲ့ ရဟတ်ယာဥ်ငယ်တွေမှာအသုံးပြုတဲ့ ဘထ္ထရီတွေကို အားပြန်သွင်းဖို့ စသဖြင့် ရည်ရွယ်ချက်မျိုးစုံအတွက် အသုံးပြုနိုင်ပါတယ်။ 

တိုက်ပွဲအခြေအနေပေါ်လိုက်ပြီး အပေါ့စား စက်သေနတ်တွေ၊ လေယာဥ်ပစ်သေနတ်တွေကိုလည်း တပ်ဆင်အသုံးပြုနိုင်ပါတယ်။ 

ပုံမှန် Zubilo တစ်စီးဟာ အလျား ၇ ဒဿမ ၆၅ မီတာ ရှိကာ ၊၁၆ တန်လေးပါတယ်။ အင်ဂျင်ပါ၀ါ မြင်းကောင်ရေအား ၃၅၀ ရှိပြီး၊ တစ်နာရီကို ကီလိုမီတာ ၁၀၀ နှုန်း မောင်းနှင်နိုင်ပါတယ်။ လျှောစောက်တွေဆိုရင် ၃၀ ဒီဂရီရှိတဲ့ လျှောစောက်တွေအထိ တက်နိုင်ပါတယ်။ 

အခုတစ်ခေါက် အဆင့်မြှင့်တင်မှုမှာ ရုရှားစစ်တပ်နဲ့ လိုက်လျောညီထွေမှုရှိတဲ့ အပြောင်းအလဲတွေ လုပ်ဆောင်ထားပါတယ်။ 

အဓိက အဆင့်မြှင့်တင်မှုက Zubilo ကားကို တိုက်ပွဲ၀င်ဒရုန်းတွေ လွှတ်တင်နိုင်တဲ့ ကြားခံအဖြစ် အသုံးပြုနိုင်မှုပါ။ တိုက်ပွဲ၀င် ဒရုန်းတွေကို ဒီကားမှာပဲ တစ်ခါတည်း အားသွင်းနိုင်မှာ ဖြစ်ပါတယ်။ 

အဆင့်မြှင့်တင်ထားတဲ့ Zubilo ကား စမ်းသပ်မှုကို ယူကရိန်းက ရှေ့တန်းအပြင် အခြားနေရာတွေမှာလည်း လုပ်ဆောင်မှာပါ။ 

စစ်သုံးယာဥ် လျော့နည်း 

ယူကရိန်းကျူးကျော်စစ်မှာ ရုရှားရဲ့ တင့်ကားတွေ၊ အခြားစစ်သုံးယာဥ်တွေ အများအပြား ဖျက်ဆီးခံထားရပါတယ်။ 

စစ်အေးခေတ်က Ladoga လို အသုံးနည်းတဲ့ စစ်ကားမျိုး ယူကရိန်းစစ်ပွဲမှာ ပြန်သုံးလာတာကိုကြည့်ရင် ရုရှားစစ်တပ်အတွင်း စစ်သုံးယာဥ် ပြတ်လတ်မှု ကြီးကြီးများများ ဖြစ်နေတယ်ဆိုတာကို သိနိုင်ပါတယ်။ 

ရုရှားစစ်တပ်မှာ ယာဥ်အိုယာဥ်ဟောင်းတွေ အများအပြားရှိပေမယ့် နည်းပညာမြင့်ယာဥ်တွေ ပြတ်လပ်နေပြီး ဒါကို နည်းမျိုးစုံနဲ့ ဖြည့်တင်းနိုင်အောင် ရုရှားက ကြိုးပမ်းနေပါတယ်။ 

Ref: Interesting Engineering 

နို၀င်ဘာ ၁၇၊ ၂၀၂၃

M-Media 

-အသံထက်မြန်တဲ့အရှိန်မျိုး တင်နိုင်မယ့် Avangard တောင်ပံ တပ်ဆင်ထားတဲ့ တိုက်ချင်းပစ် ဒုံးကျည်တစ်စင်းကို ရုရှားက ပစ်စင်ပေါ် တင်ထားလိုက်ပါတယ်။ 

ကာဇက်စတန်နဲ့ ကပ်နေတဲ့ နိုင်ငံတောင်ပိုင်း အိုရန်ဘဂ်မှာ ဒုံးကျည်ကို အသင့်ပြင်ထားလိုက်တာပါ။ ဒီဒုံးကျည်ဟာ နျူထိပ်ဖူးလည်း တပ်ဆင်နိုင်ပါတယ်။

အသံထက်မြန်တဲ့အရှိန်မျိုး တင်ပေးနိုင်မယ့် Avangard တောင်ပံကို တီထွင်ထားကြောင့် သမ္မတပူတင်က ၂၀၁၈ ခုနှစ်မှာ ကြေငြာခဲ့တာပါ။ အသံထက် ၂၇ ဆမြန်တဲ့ အမြန်နှုန်း (တစ်နာရီ မိုင်ပေါင်း ၂၁၀၀၀) မျိုးကို ဒီတောင်ပံကနေ ရရှိနိုင်ပါတယ်။ 

Avangard တပ်ထားတဲ့ တိုက်ချင်းပစ် ဒုံးကျည်တစ်လုံးကို ၂၀၁၉ ခုနှစ်မှာ အိုရန်ဘက်က ဒုံးပစ်စင်မှာပဲ တပ်ဆင် အသင့်ပြင်ထားဖူးပြီး အခု ဒုတိယအကြိမ်မြောက် ဖြစ်ပါတယ်။ 

 လက်နက်မပြန့်ပွားရေးစာချုပ်တွေကို ကမ္ဘာ့နိုင်ငံတွေက လိုက်နာမှု အားနည်းတဲ့အတွက် စိတ်ပျက်ကြောင်း ရုရှားနဲ့ အမေရိကန်တို့က ပြောကြားထားပြီး တစ်ဖက်မှာလည်း ဒီနှစ်နိုင်ငံဟာ လက်နက်အသစ်တွေကို တီထွင်ထုတ်လုပ်နေကြပါတယ်။ 

အသံထက်မြန်တဲ့လက်နက် ထုတ်လုပ်မှုမှာ တရုတ်နိုင်ငံက ပြိုင်ဘက်ဖြစ်ပြီး၊ ရုရှားကို ခြိမ်းခြောက်မှုတစ်ခုလို့ ရှုမြင်ကြောင်း အမေရိကန်က ထုတ်ပြောထားပါတယ်။ 

Ref: Aljazeera