ဇွန် ၃၀၊ ၂၀၁၇
M-Media
– ကမ္ဘာကျော် Star Wars ဇာတ်ကားမှာ သရုပ်ဆောင်တွေ ၀တ်ဆင်တဲ့ ၀တ်စုံနဲ့ ဆင်တူတဲ့ မျိုးဆက်သစ် တိုက်ပွဲဝင် ၀တ်စုံသစ် နမူနာကို ရုရှား စစ်ဖက်ဆိုင်ရာ ထိပ်တန်း သုတေသနစင်တာစ်ခုက ထုတ်ဖော်ပြသလိုက်ပါတယ်။
အနာဂတ်တိုက်ပွဲတွေမှာ ရုရှားစစ်သားတွေ ၀တ်ဆင်မယ့် အဲဒီဝတ်စုံဟာ စစ်သားရဲ့ ဦးခေါင်းကို ဖုံးအုပ်ထားတဲ့ ဦးထုပ်နဲ့အတူ ဆန်းသစ်တဲ့ ကျည်ကာဝတ်စုံ ဖြစ်ပါတယ်။ ပြီးတော့ တိုက်ခိုက်မှုအတွင်းမှာ စွမ်းဆောင်ရည်နဲ့ သက်လုံတို့ကို တိုးတတ်စေဖို့အတွက် စက်အကူနဲ့ လှုပ်ရှားမှုစနစ်လည်း ပါဝင်တယ်။
ဒီနမူနာကို မော်စကိုက အမျိုးသား သိပ္ပံနဲ့ နည်းပညာတက္ကသိုလ် (MISIS) မှာ နည်းပညာမြင့် ပစ္စည်းတွေကို ထုတ်ဖော်ပြသတဲ့ ရုရှားရဲ့ အကြီးဆုံးပြပွဲ ဖွင့်ပွဲအခမ်းအနားမှာ ထုတ်ဖော်ပြသလိုက်တာ ဖြစ်ပါတယ်။
ဝတ်စုံကို ရုရှားရဲ့ ထိပ်တန်း စစ်လက်နက်ပစ္စည်း တီထွင်ရေးစင်တာ Central Research Institute for Precision Machine Building က ဖန်တီးထားတာပါ။
“အနာဂတ်အတွက် တိုက်ပွဲဝင် ၀တ်စုံအတွက် ရည်ရွယ်ပြီး ကျွန်တော်တို့ ဆောင်ရွက်နေတာပါ။ ဒီလို ထုတ်ပြတာက နောက်ထပ် ၂ နှစ်လောက်အတွင်းမှာ ထုတ်လုပ်ဖို့ ရည်ရွယ်ပြီး ပြသတာဖြစ်ပါတယ်” လို့ စင်တာရဲ့ စစ်လက်နက်ဆိုင်ရာ ဒုတိယအကြီးအကဲ အိုလက် ချီကာရက်ဗ်က ပြောကြားခဲ့ပါတယ်။
နောက်ပြီး စစ်သားတွေ စစ်ဆင်ရေး ဆောင်ရွက်ရာမှာ အထောက်အကူဖြစ်စေမယ့် အခြား ပစ္စည်းတွေကိုလည်း အခြားကုမ္ပဏီတွေနဲ့ ပူးပေါင်းပြီး ထုတ်လုပ်နေတယ်လို့ သူက ဆိုပါတယ်။
ကမ္ဘာ့ စစ်အင်အားကြီးနိုင်ငံတွေဟာ အနာဂတ်တိုက်ပွဲတွေအတွက် သုတေသနနဲ့ ဖွံ့ဖြိုးရေး လုပ်ငန်းတွေမှာ ကြီးကြီးမားမားမား ရင်းနှီးမြှုပ်နှံမှုတွေ ပြုလုပ်နေပြီး အဲဒီအထဲမှာ ရုရှားနိုင်ငံလည်း ပါဝင်ပါတယ်။
ပြီးခဲ့တဲ့နှစ်တုန်းက ရုရှားစစ်တပ်ဟာ ကြည်းတပ်၊ ရေတပ်၊ လေတပ်က လူသားစစ်သားတွေနေရာနဲ့ အာကာသနယ်ပယ်တွေမှာ တစ်ဖြည်းဖြည်းနဲ့ စက်ရုပ်တွေ၊ စက်ရုတ်တစ်ပိုင်း လူတစ်ပိုင်းတွေ အစားထိုးသွားလိမ့်မယ်လို့ ပြောကြားခဲ့ပါတယ်။
Ref : RT
