ဧပြီ ၈ ၊ ၂၀၁၄
M-Media
– ယူကရိန်းနိုင်ငံ မတည်မငြိမ်ဖြစ်အောင် ရုရှားဘက်မှ ဆက်လက်လုပ်ဆောင်ပါက ထိုလုပ်ရပ်အတွက် ပေးဆပ်ရမည်ဟု အမေရိကန်နိုင်ငံခြားရေးဝန်ကြီး ဂျွန်ကယ်ရီက ရုရှားနိုင်ငံခြားရေးဝန်ကြီးအား သတိပေးခဲ့သည်ဟု သိရသည်။
ယမန်နေ့က ရုရှားနိုင်ငံခြားရေးဝန်ကြီး လာဗရော့နှင့် ဖုန်းပြောဆိုမှုအတွင်း ကယ်ရီက ယခုကဲ့သို့ ပြောကြားခဲ့ခြင်းဖြစ်သည်။ ထို့ပြင် ယူကရိန်းနိုင်ငံတွင် လွန်ခဲ့ ၂၄ နာရီအတွင်း ဖြစ်ပွားနေသော အဖြစ်အပျက်များအား အမေရိကန်က စောင့်ကြည့်နေကြောင်း၊ ထိုကိစ္စများမှာ အလိုအလျောက်ဖြစ်လာခြင်း မဟုတ်ဘဲ ရုရှား၏ ထောက်ပံ့မှုနှင့် အတူ စည်းဝါးတကျ ဖြစ်လာသည့် လှုပ်ရှားမှုဖြစ်ကြောင်း ကယ်ရီက ပြောကြားခဲ့သည်ဟု သတင်းစာရှင်းလင်းပွဲတွင် အမေရိကန် အစိုးရ ပြောရေးဆိုခွင့်ရှိသူ ဂျန်ဆာကီက ပြောကြားခဲ့သည်။
ထို့ပြင် ယူကရိန်းရှိ ခွဲထွက်ရေးသမားများ၊ အဖျက် အမှောင့်သမားများနှင့် ရန်လိုသူများအား ရုရှားဘက်က လူသိရှင်ကြား ရှုတ်ချရန်လည်း တိုက်တွန်းခဲ့သည်ဆိုသည်။
ယူကရိန်းနိုင်ငံအရှေ့ပိုင်းပြည်နယ်များတွင် တနင်္ဂနွေနေ့မှစ၍ ရုရှားလိုလားသူများက အစိုးရအဆောက်အဦးများကို တိုက်ခိုက်သိမ်းပိုက်ခြင်းများ ပြုလုပ်ခဲ့ကြပြီး Donetsk မြို့ကိုလည်း လွတ်လပ်သော သမ္မတနိုင်ငံအဖြစ် ယမန်နေ့က ကြေညာခဲ့သည်။ ယူကရိန်း ကြားဖြတ်သမ္မတ ယတ်ဆန်ယွတ်ကလည်း မိမိတို့နိုင်ငံအတွင်းမတည်ငြိမ်မှုများမှာ ရုရှား၏ သွေးထိုးပေးမှုကြောင့်ဖြစ်သည်ဟု ပြောကြားခဲ့သည်။
ယူကရိန်းအရှေ့ပိုင်းတွင်ဖြစ်ပွားနေသည့် ထိုပြဿနာအား အင်အားသုံးဖြေရှင်းပါက အခြေအနေမှာ ပြည်တွင်းစစ်သို့ ဦးတည်သွားနိုင်သည်ဟု ရုရှားဘက်က ယနေ့တွင် သတိပေးခဲ့သည်။
ဆင်ဟွာ
