Tag: ShortNews

မြန်မာနိုင်ငံ ငါးလုပ်ငန်း အဖွဲ့ချုပ်၏ နှစ်ပတ်လည် အစည်းအဝေးနှင့် အမှုဆောင် ရွေးချယ်ပွဲ ရွေ့ဆိုင်း

မတ် ၄၊ ၂၀၁၄
M-Media
လမင်း

ရန်ကုန် ။ ။ မြန်မာနိုင်ငံငါးလုပ်ငန်းအဖွဲ့ချုပ်၏ ၂၀၁၄-၂၀၁၆ ဆဌမသက်တမ်းအတွက် အလုပ်အမှုဆောင်များ ရွေးချယ်တင်မြောက်ပွဲနှင့် (၁၅) ကြိမ်မြောက် နှစ်ပတ်လည်အစည်းအဝေးကို အကြောင်းမညီညွတ်၍ ရက်ရွေ့ဆိုင်းလိုက်ကြောင်း မြန်မာနိုင်ငံငါးလုပ်ငန်းအဖွဲ့ချုပ်က ပြောကြားခဲ့သည်။

၎င်းနှစ်ပတ်လည်အစည်းအဝေးနှင့် ရွေးချယ်တင်မြောက်ပွဲကို ၂၀၁၄ခုနှစ် မတ်လ ၈ ရက်နေ့တွင်ကျင်းပရန် ယခင်က စီစဉ်ဆောင်ရွက်ထားသော်လည်း အကြောင်းအမျိုးမျိုး၊ အခြေအနေအမျိုးမျိုးကြောင့်ရွေ့ဆိုင်းခဲ့ရကြောင်း သိရသည်။

“ကျွန်တော်တို့မှာအခက်အခဲလေးတွေရှိနေပါတယ်။ အမှုဆောင်ရွေးချယ်ဖို့ကလည်း ရွေးမှာက ၅၅ ယောက်ပဲ အခုရှိနေတာက ၈၃ ယောက်ဖြစ်နေတယ်။ ကျွန်တော်တို့လည်းရွေးရခက်နေတာပဲ။ ဥက္ကဌနေရာလည်းအဲလိုပဲ များနေတယ်။ သေချာစိစစ်ပြီးမှ ရွေးချယ်သွားမှာပါ။ လူရွေးဖို့ကလည်း လွယ်တဲ့အလုပ်မဟုတ်ပါဘူး၊ တာဝန်ကြီးပါတယ်” ဟု ငါးလုပ်ငန်းအဖွဲ့ချုပ်မှ ဒေါက်တာ သန်းလှ က ပြောကြားခဲ့ပါသည်။

အလုပ်အမှုဆောင်ရွေးချယ်တင်မြောက်ပွံနှင့် နှစ်ပတ်လည်အစည်းအဝေးကျင်းပမည့်ရက်ရွေ့ဆ်ိုင်းခြင်းကို အချိန်အကန့်အသတ်မရှိရွေ့ဆိုင်းထားပြီး ကျင်းပမည့်နေ့ရက်ကို အတည်ပြုသတ်မှတ်ပြီးမှသာ ကြေငြာမည်ဖြစ်ကြောင်း သိရပါသည်။

March 4, 2014
စင်္ကာပူနိုင်ငံမှ မြန်မာ ပညာရှင်များ ဟောပြောဆွေးနွေး ပွဲပြုလုပ်

မတ် ၁၊ ၂၀၁၄
M-Media
လမင်း

ရန်ကုန်။ ။ ဘာသာရပ်ဆိုင်ရာ ပညာရှင်များဟောပြောဆွေးနွေးပွဲကို ပြည်ထောင်စု သမ္မတမြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင် များ အသင်းချုပ်တွင် ယနေ့ မတ်လ ၁ ရက်နေ့၌ ကျင်းပခဲ့သည်။

စကာင်္ပူနိုင်ငံ Myanmar Transitional Platform (MTP) အဖွဲ့ရှိမြန်မာ ပညာရှင်များမှ ဦးဆောင်၍ ဟောပြောဆွေးနွေးခဲ့ပါသည်။ မြန်မာ အပြောင်း အလဲ အတွက် နိုင်ငံသားတို့၏ သိပိုင်ခွင့်ဆိုင်ရာ ဥပဒေ (Freedom of Information) ခေါင်းစဉ်ဖြင့် ဒေါက်တာ သိန်းသန်းဝင်းမှ လည်းကောင်း၊ ပြည်တွင်း စားသုံးရန် ပြည်ပ တင်ပို့ရန် ဘေး အန္တရာယ်ကင်းသည့် အစားအသောက်များ (Safe Food for Local and Global Consumption) အကြောင်း ကို ဒေါ်စိမ့်ရည်ထက်မှ လည်းကောင်း ဟောပြောခဲ့ပါသည်။

ထို့အပြင် ဦးစိုးမင်းဆက်မှ ဆောက်လုပ်ရေး လုပ်ငန်းနှင့် ပတ်သက်သည့် (Implementation of Construction Project with Detailed Contract Documents) ကို လည်းကောင်း၊ ဦးအေးငြိမ်းမှ နိုင်ငံခြားသားများအား အလုပ်ခန့်ထားခြင်းဆိုင်ရာ ဥပဒေ (Employment of Foreign Manpower Act) ခေါင်းစဉ်ဖြင့် အသီးသီးဟောပြောဆွေးနွေးခဲ့ကြပါသည်။

ဟောပြောဆွေးနွေးပွဲကို နေ့လည် ၂ နာရီမှ ၄ နာရီထိကျင်းပခဲ့ပြီး ဟောပြောပွဲ အပြီးတွင် တက်ရောက်လာသော သူများ သိလိုသမျှကို ဖြေကြားခဲ့ပြီး အခမ်းအနားကို ရုတ်သိမ်းခဲ့ပါသည်။

March 1, 2014
ဟိုင်းလပ်ယာဉ်များ ပိတ်သိမ်းမှု မတ်လ ၃၁ ရက်နေ့ထိ ရွေ့ဆိုင်း

မတ် ၁၊ ၂၀၁၄
M-Media
လင်းလင်း

ရန်ကုန် ။ ။ ရန်ကုန်တိုင်းဒေသကြီး စည်ပင်သာယာ နယ်နမိတ်အတွင်း ခရီးသည်များ တင်ဆောင်သော ဟိုင်းလပ်ယာဉ်များ ပိတ်သိမ်းမှုကိုမတ်လ ၃၁ ရက်နေ့ထိနောက်ဆုံးထား၍ တိုးမြှင့်ပေးလိုက်ကြောင်း မ.ထ.သ (ဗဟို) ၏ပြောကြားချက်အရ သိရပါသည်။

ဟိုင်းလပ်ယာဉ်များကို ချက်ချင်း ရပ်နားလိုက်ပါက ခရီးသွားပြည်သူများ အနေနှင့် အခက်အခဲများကြုံတွေ့လာနိုင်သောကြောင့် လည်းကောင်း၊ ယာဉ် ပိုင်ရှင်များအနေနှင့် အစားထိုးမည့် ယာဉ်များကို ၀ယ်ယူရာတွင် အခက်အခဲ အမျိုးမျိုးတို့ကြောင့် လည်းကောင်း၊ ပြေးဆွဲမည့် လမ်းကြောင်းများ၏ အခြေ အနေကို မ.ထ.သ (ဗဟို)မှ စစ်ဆေးပြီး ပြေးဆွဲမည့် လမ်းကြောင်းများ၌ ယာဉ်လုပ်သားများ ကျွမ်းကျင်မှုများရှိစေရန် အချက်များကြောင့် တိုင်းဒေသကြီး အစိုးရအဖွဲ့နှင့် မ.ထ.သ (ဗဟို)တို့မှ ဆွေးနွေးပြီး ရွေ့ဆိုင်းလိုက်ရခြင်းဖြစ်သည်။

“ပြင်ဆင်မှုတွေကိုပြုလုပ်ဖို့ အချိန်တွေ လိုသေးတယ်ထင်လို့ ရွေ့ဆိုင်းလိုက်ရတာပါ။ အခုတစ်ခါပြောင်းလဲရွေ့ဆိုင်းလိုက်တာက နောက်ဆုံး ဖြစ်ပါတယ် လို့ တိုင်းဒေသကြီး အစိုးရအဖွဲ့ကလည်းပြောတယ်။ ကျွန်တော့်အနေနဲ့လည်း နောက်ဆုံးရွေ့ဆိုင်းခြင်းဖြစ်တာလို့ပြောချင်တယ်။ တစ်လဆိုတဲ့ အချိန်မှာ ပြင်စရာတွေကို အပြီးပြုပြင်သွားမှာပါ” ဟု မ.ထ.သ (ဗဟို) မှ ဥက္ကဌ ဦးလှအောင်ကပြောကြားခဲ့သည်။

ဟိုင်းလပ်ယာဉ်များပြောင်းလဲရွေ့ဆိုင်းမှုကို သုံးကြိမ်တိုင်ရွေ့ဆိုင်းပြောင်းလဲခဲ့ပြီးဖြစ်ပြီး ယခုတစ်ခါရွေ့ဆိုင်းပြောင်းလဲမှုသည် နောက်ဆုံး ဖြစ်ကြောင်း သိရသည်။ မတ်လ ၃၁ ရက်နေ့တွင် စည်ပင်သာယာပိုင် နယ်နမိတ်ယာဉ်များသာ ပိတ်သိမ်းမည်ဖြစ်ပြီး စည်ပင်သာယာ နယ်နမိတ်ပြင်ပယာဉ်များသည် ခရီးသည် တင်ဆောင်ခွင့်ရှိကြောင်း သိရပါသည်။

March 1, 2014
CNG ဂတ်စ်အိုးလျောက်ထားမှုကို ဆက်လက် ဆိုင်းငံ့ထားပါက ယာဉ်ပိုင်ရှင်များမှ ဆန္ဒဖော်ထုတ်သွားမည်ဟုပြော

ဖေဖော်ဝါရီ ၂၈၊ ၂၀၁၄
M-Media
လမင်း

ရန်ကုန် ။ ။ CNG ဂတ်စ်အိုးလျောက်ထားမှုကို စွမ်းအင်ဝန်ကြီးဌာနမှ ကာလကြာမြင့်နေသော်လည်း တိကျစွာ အကြောင်းပြန်ခြင်း မရှိသောကြောင့် ယခုသတင်းစာ ရှင်းလင်းပွဲပြုလုပ်သည့်နေ့ရက်မှ နှစ်ပတ်အကြာတွင် နိုင်ငံတော် သမ္မတကြီးထံသို့ စာတင်ပြီး ဆန္ဒဖော်ထုတ်မှုကိုပါပြုလုပ်သွားမည် ဖြစ်ကြောင်း CNG လျောက်ထားသော ယာဉ်ပိုင်ရှင်များမှ ဖေဖော်ဝါရီလ ၂၈ ရက်နေ့တွင် မြန်မာ ဂျာနယ်လစ် ရုံးခန်းတွင်ပြုလုပ်သော သတင်းစာ ရှင်းလင်းပွဲတွင် ပြောကြားခဲ့သည်။

ယာဉ်အိုယာဉ်ဟောင်း အပ်နှံသော စီမံချက်အရ CNG သဘာဝ ဓာတ်ငွေ့သုံး ယာဉ်များကို ခရီးသည်တင် ယာဉ်လိုင်းများပြေးဆွဲလျက်ရှိသည့် ယာဉ်ပိုင်ရှင် အမည်တူမော်တော်ယဉ်များသို့ ပြောင်းလဲ တပ်ဆင်ခွင့် အတွက် CNG လျောက်ထားမှုကို ခွင့်ပြုခဲ့သဖြင့် ယာဉ်ပိုင်ရှင်များက ငွေကုန်ကြေး ကျခံရာ ၁ နှစ် နီးပါးရှိသည့် အထိ စွမ်းအင် ၀န်ကြီးဌာနမှ ယာဉ်ပိုင်ရှင်များထံသို့ အကြောင်း တစ်စုံတစ်ရာပြန်ခြင်း မရှိခဲ့ကြောင်း သိရပါသည်။

“ကျွန်တော်တို့မှာ ကုန်ကျစရိတ်တွေ အများကြီးရှိပါတယ်။ အတူ တင်ထားတဲ့ လူတွေလည်း ရချင်တဲ့လူရတယ်။ အချက်လက်တွေလည်းပြည့်စုံပါတယ်။ သူတို့ပြည့်စုံလို့ လက်မှတ်ရေးထိုးပေးထားတာ။ ဒီ CNG ကိစ္စက မ.ထ.သ နဲ့ဘာမှ မပတ်သက်ပါဘူး။ မ.ထ.သ ကအပြင် အဖွဲ့အစည်းတစ်ရပ်ဖြစ်ပါတယ်။ အခုတော့ မ.ထ.သ ဟာ စွမ်းအင်ဝန်ကြီးဌာနကို အုပ်စိုးနေသလိုဖြစ်နေတယ်။ အစိုးရအဆင့်ကို မ.ထ.သ က ကန့်ကွက်နေတာပါ။ မ.ထ.သ က ကန့်ကွက် လို့ စွမ်းအင် ၀န်ကြီးက ဆိုင်းငံ့ ထားပါတယ်လို့ ပြောပါတယ်” ဟု လျောက်ထားသူ ယာဉ်ပိုင်ရှင်တစ်ဦးကပြောကြားခဲ့သည်။

ဆီနဲ့မောင်းရင် ကားသမားတွေ အနေနှင့် မကိုက်ကြောင်း၊ CNG လျောက်ထားမှုသည် ၃၅ သိန်း ၀န်းကျင် ကုန်ကျခံရပြီး အချိန်အားဖြင့်လည်း အများကြီး စောင့်ဆိုင်းထားရကြောင်း ယာဉ်ပိုင်ရှင်များမှ ပြောကြားခဲ့သည်။

March 1, 2014
အားကစားကွင်းပြန် မရပါက လမ်းလျောက် ဆန္ဒဖော်ထုတ် သွားမည်ဟုဆို

ဖေဖော်ဝါရီ ၂၇၊ ၂၀၁၄
M-Media
လင်းလင်း

ရန်ကုန် ။ ။ ရန်ကုန်မြို့ ဒဂုံမြို့သစ် (မြောက်ပိုင်း) မြို့နယ် ၂၉- ရပ်ကွက်ရှိ နွယ်သာကီလမ်းနှင့် နှစ်လမ်းထောင့်တွင်ရှိသည့် အားကစား ကွင်းတွင် Three Friends ဆောက်လုပ်ရေးကုမ္မဏီက အိမ်ယာများဆောက်လုပ်ရန်ပြင်ဆင်နေမှုကို ရပ်ကွက်နေပြည်သူများက ကန့်ကွက်ခဲ့ ပြီး မြေနေရာပြန်လည်ရရှိရေးအတွက် လမ်းလျောက်ဆန္ဒဖော်ထုတ်သွားမည်ဟု ဖေဖော်ဝါရီလ ၂၆ ရက်နေ့တွင် မြန်မာဂျာနယ်လစ် ရုံးခန်းတွင် ပြုလုပ်သောသတင်းစာရှင်းလင်းပွဲ၌ ပြောကြားခဲ့သည်။

“အရင်က အားကစားကွင်း နှစ်ကွင်းရှိတယ် တစ်ကွင်းကိုတော့ ဘယ်ဌာနကိုရောင်းလိုက်လဲမသိဘူး။ အိမ်ယာတွေဆောက်လိုက်ကြတယ်။ အခုကျန်သေးတဲ့တစ်ကွင်းကလည်း နိုင်ငံတော်ရဲ့နေ့ကြီးရက်ကြီးတွေနဲ့ တရားပွဲတွေ ပျော်ပွဲရွှင်ပွဲတွေ ကလေးတွေ ကစားနေတဲ့ နေရာလေး ဖြစ်တယ်။ အခုလိုထပ်လုပ်မယ်ဆိုရင် နှစ်ကွင်းလုံးဆုံးရှုးသွားမယ်။ ဒါကြောင့်ကျွန်တော်တို့ပြည်သူတွေကနေပြီးတော့ ဆန္ဒဖော်ထုတ်သွားမှာ ဖြစ်တယ်။ သက်ဆိုင်ရာကိုလည်း ခွင့်ပြုမိန့်တင်ရဦးမှာဆိုတော့ ရက်တော့အတိအကျပြောလို့မရသေးဘူး” ဦးမြင့်သန်းကပြောသည်။

အားကစားကွင်းပြန်လည်ရရှိရေးအတွက် နိုင်ငံတော်သမ္မတကြီး၊ ရန်ကုန်တိုင်းဒေသကြီးအစိုးရအဖွဲ့၊ ပြည်သူ့လွှတ်တော်ဥက္ကဌ၊ တရားဥပဒေ စိုးမိုးရေးကော်မတီ၊ ရန်ကုန်မြို့တော်ဝန် နှင့် အခြားသက်ဆိုင်ရာဌာနများသို့ ရပ်ကွက်နေပြည်သူများမှလတ်မှတ်ရေးထိုးကာ တင်ပြ တောင်းဆိုခဲ့သော်လည်း တစ်စုံတစ်ရာဖြေရှင်းပေးခြင်းမရှိကြောင်း သိရပါသည်။

February 27, 2014