ဇွန် ၁၅၊ ၂၀၂၂
M-Media
-နာမည်ကျော် Squid Game ရှုပ်ရှင်ပါ ကစားနည်းတွေကို အပြင်မှာ ယှဥ်ပြိုင်ကစားဖို့ ဖျော်ဖြေရေး ကုမ္ပဏီ Netflix က စီစဥ်နေပြီး လက်ရှိမှာ ကစားမယ့်သူတွေကို စုဆောင်းနေပါတယ်။
Squid Game ဟာ Netflix မှာ နာမည်ကြီးသွားတဲ့ ကိုရီးယားဇာတ်လမ်းတွဲတစ်ခုဖြစ်ပါတယ်။ ငွေကြေးလိုအပ်နေတဲ့ သူတွေကို စုဆောင်းကာ ရိုးရာကစားနည်းတွေ ယှဥ်ပြိုင်ခိုင်းတာကို အခြေပြု ရိုက်ကူးထားတာပါ။ အဆင့်တိုင်းမှာ ရှုံးနိမ့်သူတွေဟာ အသက်ပေးရပြီး နောက်ဆုံး တစ်ယောက်တည်းကျန်တဲ့သူက ဆုငွေအမြောက်အများ ရတာဖြစ်ပါတယ်။
အပြင်က ဒီကစားနည်းအတွက် ဆုငွေ ဒေါ်လာ ၄.၅၆ သန်းအထိ ချီးမြှင့်မှာ ဖြစ်ပြီး လူသေဆုံးတာ၊ ထိခိုက်ဒဏ်ရာရတာမျိုး ရှိမှာမဟုတ်ဘူးလို့ ကုမ္ပဏီရဲ့ ဒီကနေ့ ထုတ်ပြန်ချက်မှာ ဖော်ပြထားပါတယ်။
လက်ရှိမှာ ကစားမယ့်သူ ၄၅၆ ဦး ရရှိထားပြီလို့လည်း ဆိုပါတယ်။
Squid Game ဒုတိယတွဲကို ရိုက်ကူးထုတ်လွှင့်မယ်လို့ Netflix က ကြေငြာပြီး ၂ ရက်အကြာမှာပဲ အပြင်မှာ ဒီကစားပွဲတွေ ကျင်းပမယ်ဆိုတဲ့သတင်း ထွက်လာတာ ဖြစ်ပါတယ်။
“၀င်ပြိုင်သူတွေဟာ ရုပ်ရှင်ထဲကအတိုင်း ကစားနည်းတွေကို ကစားရမှာ ဖြစ်သလို စိန်ခေါ်မှုအသစ်တွေလည်း ပါ၀င်မှာပါ။ ကစားသူတွေဟာ မဟာဗျူချတာ၊ မဟာမိတ်ဖွဲ့တာ စတဲ့ နည်းလမ်းတွေနဲ့ ပြိုင်ပွဲက မထွက်ရအောင် ကြံဆောင်ရမှာ ဖြစ်ပါတယ်”
၀င်ရောက်ယှဥ်ပြိုင်မယ့်သူတွေဟာ အနည်းဆုံး အသက် ၂၁ နှစ် ရှိရမှာဖြစ်ပြီး အင်္ဂလိပ်စကား ပြောတတ်ရမှာဖြစ်ကာ၊ ၂၀၂၃ ခုနှစ် အစောပိုင်းမှာ ၄ ပတ်တာ ရိုက်ကူးရေးအတွက် အဆင်သင့်ဖြစ်နေရမယ်လို့ Netflix ရဲ့ ထုတ်ပြန်ချက်မှာ ဖော်ပြထားပါတယ်။
Squid Game ရုပ်ရှင်ဟာ Netflix ရဲ့ အကျော်ကြားဆုံး ရုပ်ရှင်ဖြစ်ခဲ့ကာ ပြသပြီး ပထမ ၂၈ ရက်အတွင်းမှာတင် ကြည့်ရှုသူပေါင်း ၁၁၁ သန်း ရှိခဲ့ပါတယ်။
ဒါရိုက်တာ Game Hwang Dong-hyuk က ဇာတ်လမ်းတွဲကိုရိုက်ဖို့ ၁၂ နှစ် ကြာြမင့်ခဲ့ပေမယ့် ၁၂ ရက်အတွင်း နာမည်ကြီးသွားခဲ့တယ်လို့ တနင်္လာနေ့က ပြောကြားခဲ့ပါတယ်။
Ref: CNA
