News @ M-Media

Tag: Taiwan

  • ထိုင်ဝမ်ကိစ္စ ဝင်မရှုပ်ရန် အမေရိကန်ကို တရုတ် သတိပေး

    ထိုင်ဝမ်ကိစ္စ ဝင်မရှုပ်ရန် အမေရိကန်ကို တရုတ် သတိပေး

    ဇွန် ၁၂၊ ၂၀၂၂
    M-Media

    -ထိုင်ဝမ်ကျွန်းက ခွဲထွက်ရေး လုပ်ဆောင်မယ်ဆိုရင် မိမိတို့ အစွမ်းကုန် တိုက်ခိုက်သွားမယ်လို့ တရုတ်ကာကွယ်ရေးဝန်ကြီး ဝေဖန်ဟီက ပြောကြားလိုက်ပြီး ပြည်တွင်းရေးကိစ္စကို ဝင်မရှုပ်ဖို့လည်း အမေရိကန်ကို သတိပေးခဲ့ပါတယ်။

    စင်ကာပူမှာ ပြုလုပ်နေတဲ့ Shangri-La လုံခြုံရေးဆိုင်ရာ အစည်းအဝေးမှာ အမေရိကန် ထိပ်တန်း တာဝန်ရှိသူတွေနဲ့ တရုတ်ကာကွယ်ရေးဝန်ကြီးတို့အကြား ထိုင်ဝမ်ကိစ္စ အပြန်အလှန်ပြောဆိုမှုတွေ ရှိခဲ့ပါတယ်။

    အမေရိကန် ကာကွယ်ရေးဝန်ကြီး လွိုက်အော်စတင်က တရုတ်ဟာ စစ်ဖက်ဆိုင်ရာ လှုပ်ရှားမှုတွေနဲ့ ‌ဒေသအတွင်း မတည်မငြိမ်ဖြစ်အောင် လုပ်နေတယ်လို့ ဝေဖန်ခဲ့ပါတယ်။ ထိုင်ဝမ်လေပိုင်နက်ထဲ တရုတ်စစ်လေယာဉ်တွေ အုပ်စုလိုက် မကြာခဏ ဝင်ရောက်ပျံသန်းမှုကို ရည်ညွှန်းပြောဆိုခဲ့တာ ဖြစ်ပါတယ်။

    တရုတ်ကာကွယ်ရေးဝန်ကြီး ဝေဖန်ဟီက ထိုင်ဝမ်ကို တရုတ်ပြည်ကနေခွဲထုတ်ရင် အသေအကြေ တိုက်ခိုက်ဖို့ကလွဲ‌ပြီး အခြား ရွေးချယ်စရာမရှိဘူးလို့ တုန့်ပြန် ပြောကြားခဲ့ပါတယ်။

    “နယ်မြေပိုင်ဆိုင်မှုကို ကာကွယ်တဲ့နေရာ တရုတ်စစ်တပ်ရဲ့ လုပ်ဆောင်နိုင်စွမ်းနဲ့ ဖြေရှင်းနိုင်စွမ်းကို လျှော့တွက်မထားသင့်ပါဘူး။ ထိုင်ဝမ်ကို တရုတ်ကနေခွဲထုတ်ပြီး လွတ်လပ်တဲ့နိုင်ငံဖြစ်အောင် လုပ်ချင်သူတွေရဲ့ အဆုံးသတ်က သိပ်ကောင်းမှာ မဟုတ်ပါဘူး”

    ထိုင်ဝမ်က သူတို့ဟာ လွတ်လပ်တဲ့ အချုပ်အခြာအာဏာပိုင်နိုင်ငံ ဖြစ်တယ်လို့ မှတ်ယူထားပြီး တရုတ်အစိုးရက သူတို့ပိုင်တဲ့ ပြည်နယ်တစ်ခုအဖြစ် သတ်မှတ်ထားတာပါ။ ထိုင်ဝမ်ကျွန်း တရုတ်နိုင်ငံကနေ ခွဲထွက်မသွားဖို့အတွက် လိုအပ်ရင် တိုက်ခိုက်သွားမယ်လို့ တရုတ်က အရင်ကတည်းက ပြောကြားထားတာ ဖြစ်ပါတယ်။

    အမေရိကန်အနေနဲ့ တရုတ်နိုင်ငံရဲ့ ပြည်တွင်းရေးကို ဝင်မစွက်ဖို့နဲ့ တရုတ်ရဲ့ အကျိုးစီးပွားကို ထိခိုက်အောင် မလုပ်ဖို့လည်း ဝေဖန်ဟီက ထည့်သွင်းသတိပေးခဲ့ပါတယ်။

    Ref: Reuters

  • ထိုင်၀မ်ကို တရုတ်ကတိုက်လျှင် အမေရိကန်က တရုတ်ကို ပြန်တိုက်မည်

    ထိုင်၀မ်ကို တရုတ်ကတိုက်လျှင် အမေရိကန်က တရုတ်ကို ပြန်တိုက်မည်

    မေ ၂၃၊ ၂၀၂၂

    M-Media


    -ထိုင်၀မ်ကျွန်းကို တရုတ်က တိုက်ခိုက်မယ်ဆိုရင် စစ်အင်အားသုံးပြီး ထိုင်၀မ်ကို ကာကွယ်ပေးသွားမယ်လို့ အမေရိကန်သမ္မတ ဂျိုးဘိုင်ဒန်က ပြောကြားလိုက်ပါတယ်။ 

    ဂျပန်ကိုရောက်နေတဲ့ ဘိုင်ဒန်ရဲ့ ဒီစကားဟာ အရှေ့အာရှဆိုင်ရာ မူ၀ါဒမှာ အမေရိကန်က အင်အားသုံးမှာမဟုတ်ဘူးဆိုတဲ့ အရင်က မဟာဗျူဟာကို ပြောင်းလဲလိုက်တဲ့ လက္ခဏာလည်း ဖြစ်ပါတယ်။ 

    ထိုင်၀မ်ဟာ မိမိတို့ပိုင်တဲ့ ဒေသတစ်ခုဖြစ်ပြီး လိုအပ်ရင် တိုက်ခိုက်သိမ်းပိုက်သွားမယ်လို့ တရုတ်အစိုးရက ပြောကြားထားပါတယ်။ 

    မနေ့က ဂျပန်၀န်ကြီးချုပ် ဖူမီယို ကီရှီဒါနဲ့ သတင်းစာရှင်းလင်းပွဲအတွင်း သတင်းထောက်တစ်ယောက်ရဲ့ မေးမြန်းမှုမှာတော့ ထိုင်၀မ်ကို ကာကွယ်ပေးရေး အမေရိကန်က ကတိက၀တ်ပြုထားပြီးသားလို့ ဘိုင်ဒန်က ဖြေကြားခဲ့ပါတယ်။

    တရုတ်တစ်နိုင်ငံတည်းပေါ်လစီကို အမေရိကန်က သဘောတူပေမယ့် ထိုင်၀မ်ကို အင်အားသုံး သိမ်းပိုက်တာမျိုးက မသင့်တော်ကြောင်း၊ ထိုင်၀မ်ရေလက်ကြားမှာ တရုတ်က ပြုမူဆောင်ရွက်နေတာတွေဟာ အန္တရာယ်ကို ဖိတ်ခေါ်နေသလိုဖြစ်ကြောင်းလည်း ဘိုင်ဒန်က ထည့်သွင်းပြောဆိုခဲ့ပါတယ်။ 

    တရုတ်အစိုးရကတော့ အချုပ်အခြာအာဏာ၊ နယ်မြေပိုင်စိုးမှုနဲ့ပတ်သက်ပြီး တရုတ်ပြည်သူတွေရဲ့ ကာကွယ်နိုင်စွမ်း၊ ဖြေရှင်းနိုင်စွမ်းကို လျှော့မတွက်ဖို့ ချက်ခြင်း တုန့်ပြန် သတိပေးခဲ့ပါတယ်။ 

    Ref: Reuters 

  • ထိုင်၀မ်ကို အဆင်မြင့် ပက်ထရီယော့ ဒုံးခွင်းစနစ် ကန်ရောင်းမည်

    ထိုင်၀မ်ကို အဆင်မြင့် ပက်ထရီယော့ ဒုံးခွင်းစနစ် ကန်ရောင်းမည်

    ဧပြီ ၆၊ ၂၀၂၂

    M-Media


    -တရုတ်နဲ့ ဆက်ဆံရေးတင်းမာမှုတွေ ရှိနေတဲ့ ထိုင်၀မ်ကို နည်းပညာမြင့် ပက်ထရီယော့ ဒုံးခွင်းစနစ် ရောင်းချသွားဖို့ အမေရိကန် အစိုးရက အတည်ပြုလိုက်ပါတယ်။ 

    ထိုင်၀မ်က သူတို့ဟာ လွတ်လပ်တဲ့ ဒီမိုကရက်တစ်နိုင်ငံတစ်ခု ဖြစ်တယ်လို့ သတ်မှတ်ထားပေမယ့် တရုတ်အစိုးရကတော့ ပြည်မကြီးရဲ့ တစ်စိတ်တစ်ပိုင်းအဖြစ် မှတ်ယူထားပြီး၊ လိုအပ်ရပ် စစ်အင်အားသုံး သိမ်းပိုက်မယ်လို့ ခြိမ်းခြောက်ထားပါတယ်။ 

    ဒါဟာ သမ္မတ ဂျိုးဘိုင်ဒန်လက်ထက် ထိုင်၀မ်ကို တတိယအကြိမ်မြောက် လက်နက်ရောင်းချတာပါ။ အခုတစ်ခေါက်မှာတော့ ပက်ထရီယော့ ဒုံးခွင်းစနစ် ချထားရေး၊ ထိန်းသိမ်းရေး၊ လေ့ကျင့်သင်ကြားပေးရေး ပါ၀င်မှာဖြစ်ပြီး ကန်ဒေါ်လာ ၉၅ သန်း တန်ဖိုးရှိပါတယ်။ 

    ထိုင်၀မ်စစ်တပ်ကို ခေတ်မီရေးနဲ့ လေကြောင်းကာကွယ်ရေးစွမ်းအား ကောင်းမွန်လာရေး ကူညီမှုဟာ အမေရိကန်ရဲ့ အမျိုးသားအကျိုးစီးပွား၊ စီးပွားရေးနဲ့ လုံခြုံရေးကို ပံ့ပိုးပေးတာ ဖြစ်တယ်လို့ ကန်ကာကွယ်ရေး၀န်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။ 

    အစိုးရရဲ့ သဘောထားကို လွှတ်တော်က အတည်ပြုဖို့ လိုပြီး ထိုင်၀မ် ကာကွယ်ရေး၀န်ကြီးက တစ်လအတွင်း ဒီသဘောတူညီချက် အသက်၀င်မယ်လို့ မျှော်လင့်ကြောင်း ပြောကြားခဲ့ပါတယ်။ 

    ဘိုင်ဒန်အစိုးရလက်ထက်မှာ ထိုင်၀မ်ကို ဟောင်၀စ်ဇာအမြောက် ပါ၀င်တဲ့ ကန်ဒေါ်လာ သန်း ၇၅၀ တန် လက်နက်ရောင်းချမှု၊ ဒေါ်လာသန်း ၁၀၀ တန်ကြေးရှိတဲ့ ပက်ထရီယော့ ဒုံးခွင်းစနစ်ရောင်းချမှုတွေ ပြုလုပ်ပြီး ဖြစ်ပါတယ်။ 

    Ref: Reuters  

  • ယူကရိန်းကိစ္စနှင့်ပတ်သက်၍ ထိုင်၀မ်ကို တရုတ်က အပြစ်ရှာ

    ယူကရိန်းကိစ္စနှင့်ပတ်သက်၍ ထိုင်၀မ်ကို တရုတ်က အပြစ်ရှာ

    မတ် ၁၆၊ ၂၀၂၂

    M-Media

    -ထိုင်၀မ်ဟာ ယူကရိန်းကိစ္စကို အမြတ်ထုတ်နေတယ်လို့ တရုတ်က လူသိရှင်ကြား ၀ေဖန်လိုက်ပါတယ်။ 

    ရုရှားလိုပဲ တရုတ်ကလည်း ထိုင်၀မ်ကို ဒီလို ကျူးကျော် တိုက်ခိုက်နိုင်တယ်လို့ ထိုင်၀မ်ပြည်သူတွေက ရှုမြင်နေပြီး၊ ဒုက္ခရောက်နေတဲ့ ယူကရိန်းနိုင်ငံသားတွေအတွက် လူသားချင်း စာနာထောက်ထားမှုဆိုင်ရာ အကူအညီတွေလည်း ပေးပို့နေတာ ဖြစ်ပါတယ်။ 

    ထိုင်၀မ်က လွတ်လပ်တဲ့ ဒီမိုကရက်တစ် နိုင်ငံအဖြစ် ရပ်တည်နေပေမယ့် တရုတ်က ထိုင်၀မ်ဟာ သူတို့ပိုင်နက်ဖြစ်ပြီး ပြန်လည် ပေါင်းစည်းဖို့အတွက် လိုအပ်ရင် အင်အားသုံးသွားမယ်လို့ အရင်ကတည်းက ပြောထားပါတယ်။

    ယူကရိန်းကို လူသားချင်း စာနာထောက်ထားမှုဆိုင်ရာ အကူအညီတွေကို ထိုင်၀မ်က ပေးပို့တာ၊ ရုရှားအပေါ် ထိုင်၀မ်က စီးပွားရေးပိတ်ဆို့မှုတွေဟာ ယူကရိန်းကိစ္စကို  အသုံးချပြီး သူတို့ရဲ့တည်ရှိမှုကို တရား၀င်အောင် လုပ်နေတာဖြစ်ပြီး၊ ဓားခုတ်ရာ လက်၀င်လျှိုနေတာလို့ တရုတ်အစိုးရ ထိုင်၀မ်ရေးရာရုံး ပြောရေးဆိုခွင့်ရှိသူ ကျူးဖုန့်လျန်က မနေ့ကလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။ 

    Ref: Reuters 

  • ရုရှားကဲ့သို့ တရုတ်က လုပ်ဆောင်လာမည်ကို ထိုင်၀မ် စိုးရိမ်နေ

    ရုရှားကဲ့သို့ တရုတ်က လုပ်ဆောင်လာမည်ကို ထိုင်၀မ် စိုးရိမ်နေ

    ဖေဖော်၀ါရီ ၂၃၊ ၂၀၂၂
    M-Media

    -ကမ္ဘာကြီးက ရုရှားနဲ့ ယူကရိန်းကိစ္စကို အာရုံစိုက်နေတဲ့အချိန် တရုတ်က မိမိတို့ပိုင်နက်ကို ကျူးကျော်တိုက်ခိုက်လာမှာ စိုးရိမ်မိတယ်လို့ ထိုင်၀မ်နိုင်ငံက ပြောကြားလိုက်ပါတယ်။

    တရုတ်အစိုးရက ထိုင်၀မ်ဟာ တရုတ်ပြည်မကြီးရဲ့ အစိတ်အပိုင်းအဖြစ် သတ်မှတ်ထားပြီး လိုအပ်ရင် အင်အားသုံးသိမ်းပိုက်မယ်လို့ ပြောကြားထားတာ ဖြစ်ပါတယ်။ ပြီးခဲ့တဲ့နှစ်ကစလို့ တရုတ်လေတပ်က လေယာဥ်တွေ အုပ်စုလိုက် ထိုင်၀မ်လေပိုင်နက်ထဲ ကျူးကျော်၀င်ရောက် ပျံသန်းကာ အင်အားပြတာတွေလည်း အများအပြား ရှိနေပါတယ်။

    ယူကရိန်းကို ရုရှားက ကျူးကျော်မယ့်အန္တရာယ်ရှိနေတဲ့အချိန် တရုတ်ကလည်း ဒီလိုလုပ်ဆောင်လာမှာကို ထိုင်၀မ်က စိုးရိမ်နေတာ ဖြစ်ပါတယ်။ ယူကရိန်းကိစ္စကို စောင့်ကြည့်လေ့လာ သုံးသပ်ဖို့အဖွဲ့ ထိုင်၀မ်အစိုးရက အဖွဲ့တစ်ခု ဖွဲ့စည်းထားပါတယ်။

    မနေ့က ဒီအဖွဲ့ရဲ့ အစည်းအ၀ေးမှာ ထိုင်၀မ်သမ္မတ Tsai Ing-wen က ဒေသတွင်း စစ်ရေးလှုပ်ရှားမှုတွေကို မိမိတို့က ပိုမိုသတိထား စောင့်ကြည့်သွားဖို့လိုအပ်ပြီး၊ နိုင်ငံခြားတိုင်းပြည်က သတင်းအမှားတွေကိုလည်း တိုက်ဖျက်ပစ်ရမယ်လို့ ပြောကြားခဲ့ပါတယ်။ သူမဟာ တရုတ်နိုင်ငံရဲ့အမည်ကို ထည့်သွင်းပြောဆိုခြင်း မရှိပါဘူး။

    ထိုင်၀မ် နိုင်ငံခြားရေး၀န်ကြီး Joseph Wu ရဲ့ အခုလ အင်တာဗျူး နှစ်ခုမှာ ရုရှား-ယူကရိန်း ပဋိပက္ခကို အခွင့်ကောင်းယူပြီး တရုတ်က ထိုင်၀မ်အပေါ် ကျူးကျော်သိမ်းပိုက်လာနိုင်ခြေကို မိမိတို့ အထူးသတိထား စောင့်ကြည့်နေတယ်လို့ ဖြေကြားခဲ့ပါတယ်။

    နိုင်ငံတကာဖိအားတွေကြောင့် ရုရှားဟာ ယူကရိန်းကို တိုက်ရိုက်ကျူးကျော်တာမျိုး မလုပ်ပေမယ့် ယူကရိန်းအရှေ့ပိုင်းက ခွဲထွက်ရေးလုပ်နေတဲ့ ဒေသနှစ်ခုရဲ့ လွတ်လပ်ရေးကို အသိအမှတ်ပြုကြောင်း တနလ်ာနေ့မှာ ကြေငြာခဲ့ပြီး၊ တပ်တွေစေလွှတ်ဖို့လည်း သမ္မတပူတင်က အမိန့်ပေးခဲ့ပါတယ်။
    Ref: Reuters