Tag: TechNews

တစ်ပတ်အတွင်း နည်းပညာသင်းများ

ဇူလိုင် ၆၊ ၂၀၂၀
M-Media

အိမ်မှအလုပ်လုပ်သည့်စနစ်ကို ဂျပန်နည်းပညာကုမ္ပဏီ ပြောင်းမည်

အိမ်ကနေ အလုပ်လုပ်တဲ့ပုံစံကို ကုမ္ပဏီရဲ့ အဓိကပုံစံအဖြစ် သတ်မှတ်သွားမယ်လို့ ဂျပန်နည်းပညာကုမ္ပဏီ Fujitsu က ထုတ်ပြန်လိုက်ပါတယ်။

ကုမ္ပဏီမှာ စုစုပေါင်း ဝန်ထမ်း ၈ သောင်းလောက်ရှိပြီး အလုပ်ချိန်ကိုလည်း ပြောင်းလွယ်ပြင်လွယ် အနေအထားနဲ့ လုပ်ဆောင်နိုင်မှာ ဖြစ်ပါတယ်။ ဒါဟာ ပိုပြီး အလုပ်တွင်စေဖို့၊ ဝန်ထမ်းတွေကို စွမ်းဆောင်ရည် မြှင့်တင်ပေးဖို့၊ တီထွင်ကြံဆမှု မြှင့်တင်နိုင်မယ့် ဆန်းသစ်တဲ့ အတွေ့အကြုံတွေရစေဖို့၊ ဖောက်သည်တွေနဲ့ဆက်နွယ်ပတ်သက်သူတွေကို အလေးထားမှုပေးနိုင်ဖို့ ဖြစ်တယ်လို့ ဘီဘီစီသတင်းဌာနကို ကုမ္ပဏီက ပေးပို့တဲ့ ကြေငြာချက်ထဲမှာ ဖော်ပြထားပါတယ်။

ကိုဗစ်ကပ်ရောဂါ ကြုံတွေ့လာခဲ့ပြီးတဲ့နောက် စီးပွားရေးလုပ်ငန်းတွေဟာ နေအိမ်ကနေ အလုပ်လုပ်တဲ့ပုံစံကို ပိုမိုစဉ်းစားလာကြပြီး ဆိုရှယ်မီဒီယာကုမ္ပဏီ Twitter က ဒီစနစ်ကို မေလမှာ ပထမဆုံး ကျင့်သုံးခဲ့ပါတယ်။

ဟောင်ကောင်အစိုးရကတောင်းခံသည့် အချက်အလက်ကို Facebook က ပေးမည်မဟုတ်

ဟောင်ကောင်အတွက်ပြဌာန်းတဲ့ တရုတ်အစိုးရရဲ့ အငြင်းပွားဖွယ် လုံခြုံရေးဥပဒေအောက်ကနေ ဟောင်ကောင်အစိုးရက အချက်အလက်တောင်းခံမှုတွေကို ပေးမှာမဟုတ်ဘူးလို့ Facebook နဲ့ WhatsApp တို့က ပြောပါတယ်။

တရုတ်ရဲ့ဒီဥပဒေသစ်ဟာ ဟောင်ကောင်ပြည်သူတွေရဲ့ လွတ်လပ်ခွင့်ကို ထိပါးရာရောက်တယ်လို့ ဝေဖခံနေရတာပါ။ Facebook က လွတ်လပ်စွာ ထုတ်ဖော်ပြောဆိုခွင့်ဟာ အခြေခံလူ့အခွင့်အရေးဖြစ်ပြီး ကြောက်ရွံမှုမရှိဘဲ မိမိတိုယုံကြည်ရာ ပြောဆိုခွင့်ကို မိမိတို့က ဆက်လက်ထောက်ခံမယ်လို့ ထည့်သွင်းပြောကြားခဲ့ပါတယ်။

တရုတ်အစိုးရရဲ့ ဒီဥပဒေသစ်ကို Facebook က သုံးသပ်ဖို့လည်း ရှိနေပါတယ်။ တရုတ်ဟာ ဟောင်ကောင်ကို ပြည်မကြီးရဲ့ အစိတ်အပိုင်းတစ်ခုအဖြစ် သတ်မှတ်ထားပြီး ဟောင်ကောင်ပြည်သူတွေကတော့ လွတ်လပ်တဲ့နိုင်ငံတစ်ခု ဖြစ်ချင်နေတာ ဖြစ်ပါတယ်။

Huawei ကို လက်ခံထားသည့်ကိစ္စ ယူကေ ပြန်စဉ်းစားနေ

တရုတ်အစိုးရရဲ့ သူလျှိုဖြစ်နိုင်တယ်ဆိုတဲ့အချက်ကြောင့် Huawei ကုမ္ပဏီကို လုပ်ကိုင်ခွင့်ရုပ်သိမ်းဖို့ ယူကေအစိုးရက စဉ်းစားနေကြောင်း သတင်းထွက်လာပါတယ်။

အမေရိကန်က သတိပေးထားပေမယ့် Huawei ကို ယူကေက သူတို့ရဲ့ 5G ကွန်ယက်တည်ဆောက်မှုမှာ ပါဝင်ခိုင်းထားတာပါ။တိုင်းပြည်ရဲ့ လုံခြုံရေးကို Huawei က ခြိမ်းခြောက်နိုင်ခြင်း ရှိ၊ မရှိ ဗြိတိန် အမျိုးသား ဆိုက်ဘာလုံခြုံရေးစင်တာက အစီရင်ခံစာတစ်စောင်ရေးသားကာ ဆက်သွယ်ရေးဝန်ကြီးဌာနကို ပေးပို့ထားပါတယ်။

အဲဒီကနေတစ်ဆင့် မှတ်ချက်နဲ့ ဝန်ကြီးချုပ် ဘောရစ် ဂျွန်ဆင်ဆီကို ရောက်မှာဖြစ်ပါတယ်။ဂျွန်ဆင်က တိုင်းပြည်ရဲ့ လုံခြုံရေးကို အထိအခိုက်မခံနိုင်ဘူးလို့ ပြောထားတာရှိပြီး Huawei ကတော့ ဆွေးနွေးဖို့ လမ်းဖွင့်ထားတယ်လို့ ပြောဆိုထားပါတယ်။

Ref: BBC,CNN

July 6, 2020
တစ်ပတ်အတွင်း နည်းပညာသတင်းများ

ဖေဖော်ဝါရီ ၁၀၊ ၂၀၂၀
M-Media

Twitter နှင့် Instagram က အကောင့်တစ်ချို့ကို ဟက်ကာများ သိမ်းပိုက်

Twitter နဲ့ Instagram တို့မှာရှိနေတဲ့ Facebook ရဲ့ တရားဝင်အကောင့်တွေကို OurMine လို့ခေါ်တဲ့အဖွဲ့က သောကြာနေ့ နေ့လည်ပိုင်းမှာ ဖောက်ထွင်းရယူခဲ့ပါတယ်။ ဒီလို ရယူလိုက်တာဟာ ဆိုရှယ်မီဒီယာတွေရဲ့ ဆိုက်ဘာလုံခြုံရေး အားနည်းမှုတွေကို ပြသတာဖြစ်တယ်လို့ ဒီအဖွဲ့က ဆိုပါတယ်။ ပြီးခဲ့တဲ့ ဇန်နဝါရီလကလည်း အမေရိကန်ဘောလုံးလိဂ် US National Football League က အသင်းတွေရဲ့ အကောင့်တွေကို OurMine အဖွဲ့က ဟက်ခဲ့ဖူးပါတယ်။ Twitter က Facebook အကောင့်ကို ဟက်ပြီးတဲ့နောက် ‘Facebook ဟာ ဖောက်ထွင်းလို့ရပေမယ့် Twitter ထက်တော့ လုံခြုံရေးပိုင်းမှာ ပိုသာတယ်’ လို့ ဒီအဖွဲ့က ရေးသားခဲ့ပါတယ်။ Facebook ရဲ့ မူရင်းဝဘ်ဆိုက်ကိုတော့ ဟက်နိုင်ခြင်း မရှိပါဘူး။ Twitter နဲ့ Instagram တို့ကလည်း သူတို့ရဲ့အကောင့်တွေ တိုက်ခိုက်ခံခဲ့ရပြီး နောက်ပိုင်းမှာ ပြန်ယူနိုင်ခဲ့တယ်လို့ ထုတ်ပြန်ခဲ့ပါတယ်။

Huawei နှင့် တရုတ်အစိုးရတို့ ပတ်သက်မှုမရှိဟု သံအမတ်ပြော

UK ရဲ့ 5G ကွန်ယက်မှာ Huawei ပါဝင်မှုကို ဆန့်ကျင်နေတဲ့ နိုင်ငံရေးသမားတွေဟာ ခြောက်လှန့်နေတာသာ ဖြစ်တယ်လို့ ယူကေဆိုင်ရာ တရုတ်သံအမတ် လျူရှောင်မင်းက ဝေဖန်ပြောကြားလိုက်ပါတယ်။ ယူကေဟာ 5G ကွန်ယက်အတွက် Huawei ကို ကန်ထရိုက်ပေးထားပြီး ဝန်ကြီးဟောင်း ၄ ဦး အပါအဝင် ကွန်ဆာဗေးတစ်အမတ်တစ်ချို့ဟာ ဒါဟာ တိုင်းပြည်လုံခြုံရေးအတွက် အန္တရာယ်ရှိတယ်လို့ လွှတ်တော်ကို စာရေးသား ပေးပို့ခဲ့ပါတယ်။ Huawei ဟာ ပုဂ္ဂလိကကုမ္ပဏီသက်သက်ဖြစ်ပြီး တရုတ်အစိုးရရဲ့ပတ်သက်မှု မရှိဘူးလို့ သံအမတ် လျူက ထည့်သွင်းပြောဆိုခဲ့ပါတယ်။ Huawei ဟာ တရုတ်အစိုးရအတွက် သူလျှိုလုပ်ပေးတယ်လို့ အမေရိကန်က စွပ်စွဲထားပြီး မဟာမိတ်နိုင်ငံတွေအနေနဲ့ မပတ်သက်ဖို့ သတိပေးထားတာ ဖြစ်ပါတယ်။

iPhone သုံးသူများကို လှည့်စားသည့် Apple ဒဏ်ရိုက်ခံရ

အရင်ကထွက်ထားတဲ့ iPhone အချို့မှာ စွမ်းဆောင်ရည်ကျဆင်းအောင် လုပ်ဆောင်ခဲ့မှုအတွက် ပြင်သစ် စျေးကွက်စောင့်ကြည့်ရေးအဖွဲ့ DGCCRF က Apple ကုမ္ပဏီကို ယူရို ၂၅ သန်း ဒဏ်ရိုက်လိုက်ပါတယ်။ iPhone အသစ်တွေထွက်တဲ့အခါ လူတွေ ထပ်ဝယ်အောင်လို့ အဟောင်းတွေမှာ စွမ်းဆောင်ရည်ကျဆင်းအောင် Apple က လုပ်ဆောင်တယ်လို့ အချိန်အတော်ကြာကတည်းက သတင်းတွေထွက်ခဲ့ပြီး ၂၀၁၇ ခုနှစ်မှာ Apple ကိုယ်တိုင်က ဝန်ခံခဲ့ပါတယ်။ ဒါပေမယ့် ဒါဟာ ဘတ္ထရီမနိုင်တဲ့အတွက် iPhone အဟောင်းတွေ ကြာရှည်ခံရေး လိုအပ်လို့လုပ်တာလို့ ဆိုပါတယ်။ DGCCRF က IOS ဗားရှင်းအမြင့်တွေကို Update လုပ်ရာမှာ iPhone တွေ စွမ်းဆောင်ရည်ကျဆင်းသွားနိုင်တယ်ဆိုတာကို Apple က အသုံးပြုသူတွေကို အသိမပေးခဲ့ဘဲ ဒါဟာ စီးပွားရေး လှည့်စားမှုတစ်ခုဖြစ်တဲ့အတွက် အပြစ်ရှိတယ်လို့ ထုတ်ပြန်ခဲ့ပါတယ်။ Apple က ဒဏ်ငွေပေးဖို့ သဘောတူခဲ့ပါတယ်။

ရာနှုန်းပြည့် မောင်းသူမဲ့ကားကို အမေရိကန်တွင် ပထမဆုံး စမ်းသပ်မည်

စတီယာတိုင်၊ ဂီယာ၊ လီဗာတို့လို လူသားတွေ ဝင်ရောက်ထိန်းချုပ်နိုင်မယ့် နည်းလမ်းတွေ လုံး၀မပါတဲ့ မောင်းသူမဲ့ ပစ္စည်းပို့ယာဉ်တစ်ခုကို တက္ကဆက်ပြည်နယ်က လူသွားလမ်းပေါ်မှာ စမ်းသပ်ဖို့အတွက် အမေရိကန်အာဏာပိုင်တွေက ခွင့်ပြုခဲ့ပါတယ်။ အရင်က မောင်းသူမဲ့ကားတွေကို စမ်းသပ်ဖို့ ခွင့်ပြုရာမှာ လူသားဒရိုင်ဘာတစ်ဦး ပါဝင်ရပြီး‌ ရာနှုန်းပြည့်‌အော်တိုကားကို စမ်းသပ်ခွင့်ပြုတာဟာ ဒါ ပထမဆုံးအကြိမ် ဖြစ်ပါတယ်။ Nuro ကုမ္ပဏီက ထုတ်လုပ်ပြီး R2 လို့ အမည်ပေးထားတဲ့ အဲဒီ ပစ္စည်းပို့ကားဟာ တစ်နာရီကို ၂၅ မိုင်သွားနိုင်ပြီး စမ်းသပ်မှုအတွင်း ပို့ဆောင်ရေးဝန်ကြီးဌာနက အနီးကပ် စောင့်ကြည့်သွားမှာဖြစ်ပါတယ်။ Nuro ကုမ္ပဏီက ဒီခွင့်ပြုချက်ဟာ မောင်းသူမဲ့ကားသမိုင်းမှာ မှတ်တိုင်သစ်တစ်ခု ဖြစ်တယ်လို့ ပြောကြားခဲ့ပါတယ်။

Ref : BBC

February 10, 2020
တစ်ပတ်အတွင်း သိပ္ပံနှင့် နည်းပညာသတင်းများ

ဖေဖော်ဝါရီ ၃၊ ၂၀၂၀
M-Media

AI နည်းပညာကို ဆေးဘက်ဆိုင်ရာအတွက် ပထမဆုံး အသုံးပြုမည်

ဉာဏ်ရည်တုနည်းပညာ (AI) အသုံးပြု ဖန်တီးထားတဲ့ ဆေးဝါးကို အလုပ်တစ်ခုကို အကြိမ်ကြိမ်လုပ်တတ်တဲ့ စိတ်ကစဉ့်ကလျားရောဂါ OCD အတွက် လူသားတွေမှာ စမ်းသပ်အသုံးပြုဖို့ ရှိနေပြီး ဆေးဘက်ဆိုင်ရာမှာ AI နည်းပညာကို ပထမဆုံးအသုံးပြုမှုလည်း ဖြစ်ပါတယ်။ အခုဆေးကို ဗြိတိန်နဲ့ ဂျပန်ဆေးကုမ္ပဏီတွေက ပူးပေါင်း ဖန်တီးတာပါ။ သာမန်ဆေးဝါးတွေ ဖန်တီးထုတ်လုပ်မယ်ဆိုရင် လူသားတွေမှာ စမ်းသပ်နိုင်ဖို့ ၅ နှစ်လောက် ကြာနိုင်ပေမယ့် AI နဲ့ ထုတ်တဲ့ဆေးကတော့ ၁၂ လသာ ကြာမြင့်မှာ ဖြစ်ပါတယ်။ အရင်က လူနာတွေကို စမ်းသပ်စစ်ဆေးတာ၊ လူနာရဲ့ အချက်အလက်တွေကို ‌စူးစမ်းတာတွေမှာ AI နည်းပညာကို အသုံးပြုခဲ့ပေမယ့် ဆေးဝါး ထုတ်လုပ်မှု့တော့ ပထမဆုံး ဖြစ်ပါတယ်။

နေစူးစမ်းရေး အာကာသယာဉ် နောက်တစ်ပတ်တွင် လွှတ်တင်မည်

နေရဲ့ အလုပ်လုပ်ပုံကို အသေးစိတ်စူးစမ်းနိုင်ဖို့အတွက် ဥရောပအာကာသအေဂျင်စီရဲ့ အာကာသယာဉ်လွှတ်တင်မယ့် အစီအစဉ်ဟာ အဆင်သင့်ဖြစ်နေပြီး ဖေဖော်၀ါရီ ၉ ရက်နေ့မှာ လွှတ်တင်ဖို့ ရှိနေပါတယ်။ Solar Obiter ဆိုတဲ့ အာကာသာယာဉ်ဟာ နေရဲ့ အမြဲတမ်းပြောင်းလဲနေတဲ့ သဘောတရားကို သိပ္ပံပညာရှင်တွေ နားလည်နိုင်ရေး အထောက်အကူဖြစ်စေမှာ ဖြစ်ပါတယ်။ အာကာသယာဉ်ဟာ နေရဲ့ ပတ်လမ်းမှာလှည့်ပတ်ကာ မျက်နှာပြင်၊ အမှုန်တွေ၊ သံလိုက်စက်ကွင်းတွေကို လေ့လာမှာ ဖြစ်ပါတယ်။

စကော့လူမျိုး အမျိုးသမီးသိပ္ပံပညာရှင်ကို ဂုဏ်ပြုလိုက်တဲ့ ဂူးဂဲလ်

စကော့လူမျိုး အမျိုးသမီးသိပ္ပံပညာရှင် မေရီ ဆိုမာဗီလ်ကို ဂုဏ်ပြုတဲ့အနေနဲ့ ဖေဖော်ဝါရီ ၂ ရက်နေ့က ယူကေရဲ့ Home Page မှာ ဂူးဂဲလ်က ဆိုမာဗီလ်ရဲ့ ကာတွန်းပုံ လွှင့်တင်ခဲ့ပါတယ်။ ဆိုမာဗီလ်ဟာ ၁၉ ရာစုက အကြီးကျယ်ဆုံး ‌ဘာသာရပ်ဆိုင်ရာ စာရေးဆရာတွေထဲက တစ်ဦးဖြစ်ပြီး သူမရဲ့ နာမည်ကြီး သိပ္ပံဆိုင်ရာ စာအုပ်တွေဟာ နောက်ထပ် အမျိုးသမီး သိပ္ပံပညာရှင်တွေ ပေါ်ထွက်လာရေး လမ်းဖွင့်ပေးလိုက်တာဖြစ်တယ်လို့ ဂူးဂဲလ်က ရေးသားဖော်ပြခဲ့ပါတယ်။ စကော့တလန်ငွေ စတာလင်ပေါင် ၁၀ တန်မှာလည်း ဆိုမာဗီလ်ရဲ့ပုံကို ဂုဏ်ပြုရိုက်နှိပ်ထားပါတယ်။ ၁၇၈၀ ပြည့်နှစ်မှာ မွေးဖွားခဲ့တဲ့ ဆိုမာဗီလ်ရဲ့ ယူကေ နက္ခတဗေဒအဖွဲ့ရဲ့ ပထမဆုံး အမျိုးသမီးအဖွဲ့ဝင် ဖြစ်ပါတယ်။ အမျိုးသမီးအခွင့်အရေး၊ မဲပေးခွင့်ရရေး၊ ပညာသင်ကြားခွင့်ရရေးအတွက်လည်း သူမဟာ စွမ်းစွမ်းတမံ ဆောင်ရွက်ခဲ့ပါတယ်။ ၁၈၇၂ ခုမှာ ဆိုမာဗီလ် ကွယ်လွန်ခဲ့ပါတယ်။

ယူကေက Huawei ကိုလက်ခံမှု အန္တရာယ်ကို ဖိတ်ခေါ်မှုဖြစ်နိုင်

တရုတ်ဆက်သွယ်ရေးကုမ္ပဏီ Huawei ကို ဗြိတိန်က 5G ကွန်ယက် ကန်ထရိုက်ပေးလိုက်တာဟာ အန္တရာယ်တစ်ခု ဖန်တီးလိုက်တာဖြစ်တယ်လို့ အမေရိကန်နိုင်ငံခြားရေးဝန်ကြီး မိုက်ပွမ်ပီယိုက ပြီးခဲ့တဲ့တစ်ပတ်မှာ ပြောကြားခဲ့ပါတယ်။ 5G ကို Huawei နဲ့ လုပ်ဆောင်ဖို့ ၂ ကြိမ်တိုင်တိုင် တုံ့ဆိုင်းမှုတွေ ရှိခဲ့ပေမယ့် နောက်ဆုံးမှာတော့ ရှယ်ယာ ၃၅ ရာခိုင်နှုန်းနဲ့ ယူကေက ပါဝင်ခွင့်ပေးခဲ့တာပါ။ ယူကေနိုင်ငံခြားရေးဝန်ကြီးက ဒါဟာ ၂ နိုင်ငံစလုံးအတွက် ကောင်းမွန်မှုလို့ ကင်ပွန်းတပ်ခဲ့ပါတယ်။ ပွမ်ပီယိုက အမေရိကန်ဟာ ယုံကြည်ရတဲ့ ကွန်ယက်တွေကနေတစ်ဆင့်သာ သတင်းအချက်အလက် မျှဝေသွားမယ်လို့ ဆိုပါတယ်။ Huawei က တရုတ်အစိုးရအတွက် သူလျှိုလုပ်ငန်းလုပ်ပေးနေတယ်လို့ အမေရိကန်က စွပ်စွဲထားတာ ဖြစ်ပါတယ်။

Ref: BBC, VOA

February 3, 2020
တစ်ပတ်အတွင်း သိပ္ပံနှင့် နည်းပညာသတင်းများ

ဇန်နဝါရီ ၂၇၊ ၂၀၂၀
M-Media

ISS မှာ အာကာသယာဉ်မှူးတွေ ပထမဆုံး ကွတ်ကီးဖုတ်

ဆွဲအား သုညီဒီဂရီရှိတဲ့ နိုင်ငံတကာအာကာသစခန်း (ISS) မှာ အာကာသယာဉ်မှူးတွေဟာ ပြီးခဲ့တဲ့လက ကွတ်ကီးကို ပထမဆုံးအကြိမ် အောင်မြင်စွာဖုတ်နိုင်ခဲ့ပါတယ်။ ဒါဟာ အာကာသမှာ ရေရှည်နေတဲ့ ခရီးစဉ်တွေအတွက် အာကာယာဉ်မှူးတွေကိုယ်တိုင် ချက်ပြုတ်နိုင်ရေး ပမာဏစမ်းသပ်မှုလည်း ဖြစ်ပါတယ်။ ဖုတ်ထားတဲ့ကွတ်ကီးတွေကို ဇန်နဝါရီ ၇ ရက်နေ့က ‌ကမ္ဘာမြေကို ပြန်ယူလာခဲ့ပြီး စားသုံးဖို့ သင့်၊ မသင့် စမ်းသပ် သုတေသနပြုသွားမှာဖြစ်ပါတယ်။ အာကာသမှာ ကွတ်ကီးဖုတ်ရတာဟာ ကမ္ဘာမြေပြင်မှာ ဖုတ်ရတာထက် ကြာမြင့်တယ်လို့ ဆိုပါတယ်။

LONDON, ENGLAND – AUGUST 02: Police guard as Tourists and well wishers watch on as Prince Philip, Duke of Edinburgh attends The Captain General’s Parade at Buckingham Palace on August 2, 2017 in London, England. (Photo by Jeff Spicer/Getty Images)

Facial recognitio‌n နည်းပညာကို လန်ဒန်ရဲတပ်ဖွဲ့ အသုံးပြုမည်

ရာဇဝတ်မှု သံသယရှိသူတွေကို ဖော်ထုတ်ဖို့နဲ့ ရဲလုပ်ငန်းတွေကို ပိုမိုအဆင်ပြေစွာ ‌ဆောင်ရွက်နိုင်ဖို့အတွက် ကင်မရာအသုံးပြု မျက်နှာစောင့်ကြည့်ဖော်ထုတ်မှုနည်းပညာ (facial recognition technology) ကို အသုံးပြုသွားမယ်လို့ လန်ဒန်ရဲတပ်ဖွဲ့က ပြောကြားလိုက်ပါတယ်။ လုယက်မှု၊ ဓားပြတိုက်မှု၊ ကလေးငယ်တွေအပေါ် စော်ကားမှုတွေလို ရာဇဝတ်မှုထူပြောတဲ့ဒေသတွေမှာ ကင်မရာတွေကို တပ်ဆင်သွားမှာပါ။ ဒီနည်းပညာကို ဂျပန်ကုမ္ပဏီ NEC က ဖန်တီးတာဖြစ်ပြီး လုံခြုံရေးကင်မရာ၊ ကားနံပတ်ဖော်ထုတ်မှု နည်းပညာ၊ ရဲတွေရဲ့ ခန္ဓာကိုယ်မှာ တပ်ဆင်ထားတဲ့ ကင်မရာတွေနဲ့ ဆက်စပ်အသုံးပြုမှာမဟုတ်ဘဲ သီးသန့်စနစ်တစ်ခုအဖြစ်သာ အသုံးပြုသွားမှာဖြစ်ပါတယ်။ မျက်နှာကိုစောင့်ကြည့်ဖော်ထုတ်တဲ့နည်းပညာဟာ လူတွေရဲ့ ကိုယ်ပိုင်လွတ်လပ်ခွင့်ကို ချိုးဖောက်ရာရောက်တယ်ဆိုပြီး ဥရောပမှာ ဝေဖန်မှုတွေ ရှိနေပါတယ်။

ထိပ်တန်း e-sport လိဂ်များကို YouTube က တိုက်ရိုက်လွှင့်မည်

ကမ္ဘာပေါ်က ထိပ်န်း e-sport လိဂ်တော်တော်များများ တိုက်ရိုက်ထုတ်လွှင့်ခွင့်အတွက် Google ရဲ့ YouTube က ဗီဒီယိုဂိမ်းကုမ္ပဏီ Activision Blizzard Inc နဲ့ လက်မှတ်ရေးထိုးခဲ့ပါတယ်။ ဒါ့ကြောင့် လူကြိုက်များတဲ့ Overwatch League၊ အသစ်ထွက်လာမယ့် Call of Duty League အပါအဝင် ထိပ်တန်း e-sport လိဂ်ပြိုင်ပွဲတစ်ချို့ကို YouTube က တိုက်ရိုက်ထုတ်လွှင့်နိုင်တော့မှာ ဖြစ်ပါတယ်။ သဘောတူညီချက်အရ Google ဟာ Activision ရဲ့ အွန်လိုင်းဂိမ်းတွေအတွက် Cloud အသုံးပြုခွင့် ပေးရမှာ ဖြစ်ပါတယ်။

Palm print recognition and access concept. Security software by biometric data. Identification by hand prints scanning. Two palmprint pattern scanning screen with HUD elements and program code

လက်စကန်ဖတ်ကာ ငွေချေနိုင်မည့်စနစ် လာတော့မည်

စျေးဝယ်ထွက်တဲ့အခါမှာ ပိုက်ဆံအိတ်တွေ၊ ကဒ်တွေ သယ်သွားစရာမလိုဘဲ လက်ကိုစကန်ဖတ်ကာ ငွေပေးချနိုင်တဲ့စနစ်ကို Amazon က ဖန်တီးတီထွင်နေပါတယ်။ ဒီနည်းပညာကို Visa၊ Master စတဲ့ ကုမ္ပဏီတွေနဲ့ ပူးပေါင်းလုပ်ဆောင်နေတာဖြစ်ပြီး အသုံးပြုသူတွေဟာ သူတို့ရဲ့ လက်ကို ကဒ်တွေနဲ့ အရင် ချိတ်ဆက်ထားရမှာဖြစ်ပါတယ်။

Ref: Forbes, CNN, BBC

January 27, 2020
တစ်ပတ်အတွင်း သိပ္ပံနှင့် နည်းပညာသတင်းများ

ဇန်နဝါရီ ၂၀၊ ၂၀၂၀
M-Media

ကာဘွန်ထုတ်လွှတ်မှုကို သုညရာခိုင်နှုန်းအထိ လျှော့ချမယ့် မိုက်ခရိုဆော့ဖ်
==============
မိမိတို့ကုမ္ပဏီ၊ ကုမ္ပဏီနဲ့ ဆက်နွယ်နေတဲ့ စီးပွားရေးလုပ်ငန်းတွေမှာ ကာဘွန်ထုတ်လွှတ်မှုကို ၂၀၃၀ ပြည့်နှစ်ရောက်ရင် သုညရာခိုင်နှုန်းအထိ လျှော့ချဖို့ ရည်မှန်းထားတယ်လို့ မိုက်ခရိုဆော့ဖ်ကုမ္ပဏီက ပြီးခဲ့တဲ့တစ်ပတ်မှာ ထုတ်ပြန်ကြေငြာလိုက်ပါတယ်။ ကုမ္ပဏီအတွက် လိုအပ်တဲ့ဓာတ်အားကို ပြည့်ဖြိုးမြဲစွမ်းအင်တွေကနေ ရယူသုံးစွဲတာအပါအဝင် ရည်မှန်းချက် အောင်မြင်ရေး နည်းလမ်းပေါင်းစုံ အသုံးပြုမှာ ဖြစ်ပါတယ်။

ကာဘွန်ထုတ်လွှတ်မှု လျော့ချတဲ့ နည်းပညာတွေ စူးစမ်းရှာဖွေဖို့လည်း မိုက်ခရိုဆော့ဖ်က ရန်ပုံငွေ ဒေါ်လာ ၁ ဘီလီယံ မတည်မယ်လို့ ဆိုပါတယ်။ နည်းပညာကုမ္ပဏီတွေအနေနဲ့ ရာသီဥတု ပြောင်းလဲမှုကို ထိထိရောက်ရောက် တားဆီးဟန့်တားဖို့ ဖိအားတွေ ရှိနေတဲ့အချိန် မိုက်ခရိုဆော့ဖ်ရဲ့ ဒီလိုထုတ်ပြန်ချက် ပေါ်ထွက်လာတာပါ။

Facial recognition နည်းပညာကို ဥရောပသမဂ္ဂက ယာယီပိတ်ပင်မည်
=================
လူတွေရဲ့ မျက်နှာတွေကို လုံခြုံရေးကင်မရာကနေတစ်ဆင့် ကွန်ပျူတာစနစ်မှာ မှတ်သားသိမ်းဆည်းထားတဲ့ Facial recognition စနစ်ကိုအများပြည်သူနဲ့ သက်ဆိုင်တဲ့နေရာတွေမှာ အသုံးပြုခွင့် ၅ နှစ်အထိ ပိတ်ပင်သွားဖို့ စီစဉ်နေတယ်လို့ ဥရောပသမဂ္ဂက ပြောကြားလိုက်ပါတယ်။ ဒီနည်းပညာကို တစ်လွဲသုံးတာမျိုး ရှောင်ရှားဖို့ဖြစ်ပြီး ဉာဏ်ရည်တု နည်းပညာ (AI) ကို စောင့်ကြည့်စစ်ဆေးတဲ့ အာဏာပိုင်အဖွဲ့တစ်ခု ဖွဲ့စည်းဖို့လည်း ‌အဖွဲ့ဝင်နိုင်ငံတွေကို တိုက်တွန်းခဲ့ပါတယ်။ ပိတ်ပင်ထားတဲ့ ၃ နှစ်ကနေ ၅ နှစ်အတွင်း Facial recognition နည်းပညာ တစ်လွဲသုံးမှုကို ထိန်းချုပ်နိုင်တဲ့ နည်းလမ်းတွေကို ဥရောပသမဂ္ဂက ရှာဖွေသွားဖို့ ရှိနေပါတယ်။

အာကာသယာဉ်မှူးများ အရေးပေါ် ခုန်ထွက်သည့်စနစ်ကို Space X က အောင်မြင်စွာ စမ်းသပ်
=================
ဒုံးပျံလွှတ်တင်မှုအတွင်း အာသာယာဉ်မှူးတွေလိုက်ပါတဲ့ယာဉ်ငယ် အရေးပေါ်ရှောင်ထွက်တဲ့စနစ်ကို Space X ကုမ္ပဏီက အမေရိကန်ပြည်ထောင်စု ကနေဒီ အာကာသစခန်းမှာ မနေ့က အောင်မြင်စွာ စမ်းသပ်နိုင်ခဲ့ပါတယ်။ Falcon-9 ဒုံးပျံလွှတ်တင်ပြီး စက္ကန့် ၈၀ အကြာမှာ ဖောက်ခွဲခဲ့ကာ အာကာသယာဉ်မှူးတွေ လိုက်ပါမယ့် Dragon ယာဉ်ငယ်ဟာ အထိအခိုက်မရှိ ထွက်နိုင်ခဲ့တာဖြစ်ပါတယ်။ ဒီအောင်မြင်မှုကြောင့် နာဆာရဲ့ နိုင်ငံတကာအာကာသစခန်း (ISS) ထံ အနာဂတ် လူပို့လွှတ်မှုမှာ Space X က ပူးပေါင်းပါဝင်နိုင်ဖို့ အလားအလာ ရှိနေပါတယ်။ အခုစမ်းသပ်မှုအတွင်း လူလိုက်ပါခြင်း မရှိပါဘူး။

လျှပ်စစ် သုံးဘီးကားများကို Amazon က အိန္ဒိယသို့ ပထမဆုံး တင်သွင်း
===================
Amazon ကုမ္ပဏီဟာ သူတို့ရဲ့ ပထမဆုံး လျှပ်စစ် သုံးဘီးကားတွေကို ဒီကနေ့မှာ အိန္ဒိယကို စတင်တင်သွင်းခဲ့ပါတယ်။ ဒါဟာ ရာသီဥတုပြောင်းလဲရေး တိုက်ဖျက်သွားမယ်ဆိုတဲ့ စက်တင်ဘာလက ကတိကဝတ် တစ်စိတ်တစ်ပိုင်းဖြစ်ပြီး ၂၀၂၅ မှာ အစီးရေ တစ်သောင်း ၂၀၃၀ ရောက်ရင် အစီးရေ တစ်သိန်းအထိ တင်ပို့ဖို့ Amazon က စီစဉ်ထားပါတယ်။ အခု လျှပ်စစ် သုံးဘီးကားတွေဟာ ကာဘွန်ထုတ်လွှတ်မှု သုညသာ ရှိမှာဖြစ်ပြီး ၂၀၁၉ ခုနှစ်က အိန္ဒိယတစ်ဝှမ်းမြို့တွေမှာ စမ်းသမ်းအသုံးပြုခဲ့ပါတယ်။

Android နှင့် IOS ဗားရှင်းအဟောင်များတွင် WhatsApp အသုံးပြုနိုင်တော့မည်မဟုတ်
================
Android version 2.3.7 နဲ့ အဲဒီထက်နိမ့်တဲ့ ဗားရှင်းတွေ၊ iOS 8 နဲ့ အဲဒီအရင်ဗားရှင်းတွေမှာ ဖေဖော်ဝါရီ ၁ ရက်နေ့ကစပြီး မိမိတို့စနစ်အသုံးပြုမှုကို ပိတ်ပင်သွားမယ်လို့ WhatsApp က ပြီးခဲ့တဲ့ရက်ပိုင်းမှာ ကြေငြာလိုက်ပါတယ်။ WhatsApp ဟာ Windows ဖုန်းတွေမှာလည်း ၂၀၁၉ ခုနှစ် ဒီဇင်ဘာ ၃၁ ရက်နေ့ကစပြီး သူတို့ရဲ့ ဝန်ဆောင်မှုကို အသုံးပြုခွင့် ပိတ်ပင်ခဲ့ပါတယ်။ အသုံးပြုသူတွေအနေနဲ့ မှတ်တမ်းတွေကို Export လုပ်ထားကြဖို့လည်း WhatsApp က တိုက်တွန်းထားပါတယ်။

Ref: CNN,BBC, Gadget

January 20, 2020