News @ M-Media

Tag: TechNews

  • တစ်ပတ်အတွင်း သိပ္ပံနှင့် နည်းပညာသတင်းများ

    တစ်ပတ်အတွင်း သိပ္ပံနှင့် နည်းပညာသတင်းများ

    ဇန်နဝါရီ ၁၈၊ ၂၀၂၁
    M-Media

    FILE PHOTO: A sign of Foxconn is seen at a glass door inside its office building in Taipei, Taiwan November 12, 2020. REUTERS/Ann Wang/File photo

    ဆမ်ဆောင်း ဒုတိယဥက္ကဌ လာဘ်ပေးလာဘ်ယူကိစ္စဖြင့် ထောင် ၂ နှစ်ခွဲကျ

    တောင်ကိုရီးယားဖုန်းကုမ္ပဏီ ဆမ်းဆောင်းရဲ့ ဒုတိယဥက္ကဌ လီဂျယ်​ယွန်ဟာ ​လာဘ်ပေးလာဘ်ယူမှု၊ ငွေကြေးခဝါချမှုတွေအတွက် ဒီနေ့မှာ ထောင်ဒဏ် ၂ နှစ်ခွဲ ချမှတ်ခံလိုက်ရပါတယ်။

    လီဂျယ်ယွန်ရဲ့ကိစ္စဟာ တောင်ကိုရီးယားသမ္မတ ပက်ယုံဂျေး ဖြုတ်ချခံလိုက်ရမှုနဲ့ ပတ်သက်နေတဲ့ အမှုတွဲဖြစ်ပါတယ်။ အာဏာရဖို့ မသမာတဲ့နည်းလမ်းနဲ့ ပက်ရဲ့ဆောင်ရွက်မှုအတွက် လီက ဒေါ်လာသန်းချီပေးခဲ့ပြီး အပြန်အလှန်အားဖြင့် စီးပွားရေးအခွင့်ထူးတွေ ရယူခဲ့တာ ဖြစ်ပါတယ်။

    ဆိုးလ်ခရိုင်တရားရုံးရဲ့အမိန့်မှာ ကမ္ဘာ့အသိုင်းအဝိုင်းမှာ ဂုဏ်ယူရတဲ့ နိုင်ငံရဲ့ထိပ်တန်းကုမ္ပဏီကြီးက နိုင်ငံရေးအပြောင်းအလဲဖြစ်တိုင်း ရာဇဝတ်မှုတွေမှာ အကြိမ်ကြိမ်ပါဝင်နေတာဟာ စိတ်မကောင်းစရာဖြစ်တယ်လို့ ဖော်ပြထားပါတယ်။

    ထိုင်၀မ်နည်းပညာကုမ္ပဏီက ဗီယက်နမ်တွင် စက်ရုံလာဆောက်မည်

    လက်တော့နဲ့ တက်ဘလက်တွေ အဓိကထုတ်လုပ်တဲ့ ထိုင်ဝမ်ကုမ္ပဏီ Foxconn ရဲ့ ကန်ဒေါ်လာ သန်း ၂၇၀ တန် စက်ရုံစီမံကိန်းကို ဗီယက်နမ်အစိုးရက ခွင့်ပြုပေးလိုက်ပါတယ်။

    ဒီစက်ရုံကို နိုင်ငံမြောက်ပိုင်းမှာ ဆောက်လုပ်ကာ တစ်နှစ်ကို အလုံးရေ ၈ သန်း ထုတ်လုပ်ဖို့ ရည်မှန်းထားပါတယ်။

    Foxconn ဟာ ဗီယက်နမ်မှာ ဒေါ်လာ ၁.၅ ဘီလီယံ ရင်းနှီးမြှုပ်နှံထားပြီး နောက်ထပ် သန်း ၇၀၀ လောက် ရင်းနှီးဖို့လည်း ရှိပါတယ်။ အခုနှစ်အတွင်း ဗီယက်နမ်ပြည်သူ တစ်သောင်းကျော်လောက် အလုပ်အကိုင်ပေးနိုင်မှာပါ။

    Foxconn ဟာ အက်ပဲလ်ရဲ့ Ipad နဲ့ MacBook တွေကို အဓိကထား ထုတ်လုပ်ပေးနေပြီး အက်ပဲလ်ရဲ့ တောင်းဆိုမှုကြောင့် စက်ရုံကို တရုတ်ကနေ ဗီယက်နမ်ကို ရွှေ့လိုက်တာ ဖြစ်ပါတယ်။

    Huawei ကို အမေရိကန်က ပိတ်ဆို့မှုထပ်လုပ်

    တရုတ်နည်းပညာကုမ္ပဏီ ဟွာဝေးထံ ပစ္စည်းတင်ပို့ခွင့်လိုင်စင်ကို ရုပ်သိမ်းလိုက်တယ်လို့ ကန်အစိုးရက နာမည်ကျော် Intel အပါအဝင် နည်းပညာကုမ္ပဏီတွေကို စာပို့ အကြောင်းကြားလိုက်ပါတယ်။

    ဟွာဝေးဟာ တရုတ်အစိုးရကို သူလျှိုလှုပ်ပေးနေတဲ့အတွက် နိုင်ငံတော်လုံခြုံရေးကိုခြိမ်းခြောက်မှုဖြစ်တယ်လို့ အမေရိကန်က သတ်မှတ်ထားတာပါ။ အရင်ကလည်း ဟွာဝေးအပေါ် ပိတ်ဆို့အရေးယူမှု လုပ်ခဲ့ပါတယ်။

    ထရမ့်ရဲ့ သမ္မတသက်တမ်းဟာ ၂ ရက်သာ ကျန်တော့ပြီး ဟွာဝေးကို ထုတ်ကုန်တင်ပို့နိုင်ရေး အမေရိကန်နည်းပညာကုမ္ပဏီတွေရဲ့ လျှောက်ထားမှုအားလုံးကို ပယ်ချသွားမယ်လို့လည်း ဒီကိစ္စနဲ့နီးစပ်သူတွေက ရိုက်တာသတင်းဌာနကို ပြောကြားခဲ့ပါတယ်။

    Ref: Reuters

  • တစ်ပတ်အတွင်း သိပ္ပံနှင့် နည်းပညာသတင်းများ

    တစ်ပတ်အတွင်း သိပ္ပံနှင့် နည်းပညာသတင်းများ

    အောက်တိုဘာ ၅၊ ၂၀၂၀
    M-Media

    လက်ဝါးအသုံးပြု နည်းပညာတစ်ခုကို အမေဇုန်မိတ်ဆက်

    လက်ဝါးအသုံးပြုပြီး ဘယ်သူဘယ်ဝါဆိုတာကို ဖော်ထုတ်တဲ့ နည်းပညာ Amazon One ကို အမေဇုန် ကုမ္ပဏီက ပြီးခဲ့တဲ့တစ်ပတ်မှာ မိတ်ဆက်ခဲ့ပါတယ်။ လက်ကောက်ဝတ်၊ လက်ဝါးက လက္ခဏာတွေကို အခြေခံထားတဲ့ ဒီနည်းပညာနဲ့ ငွေပေးချေတာ၊ အများသုံး သယ်ယူပို့ဆောင်ရေးယာဉ်တွေ အသုံးပြုတာ စတာတွေကို လုပ်ဆောင်နိုင်မှာဖြစ်ပြီး လက်ရှိအသုံးပြုနေတဲ့ အီလက်ထရောနစ်ကဒ်တွေနေရာကို အစားထိုးနိုင်မှာဖြစ်ပါတယ်။ ဆီယက်တဲလ်မြို့က အမေဇုန် စတိုးတစ်ခုမှာ ဒီနည်းပညာကို စတင်အသုံးပြုနေပါတယ်။ အမေဇုန်ဟာ စျေးဝယ်တာနဲ့ ငွေချေတာမျိုးကို လွယ်ကူစေဖို့အတွက် နည်းပညာတွေကို ဖန်တီးအသုံးပြုနေပြီး Amazon One က တစ်ကိုယ်ရေလုံခြုံရေးကို တစ်ဆင့်မြှင့်လိုက်တာလို့ ပြောကြားခဲ့ပါတယ်။

    ဆိုရှယ်မီဒီယာတွင် အများသမီးများကို ကာကွယ်ပေးရန် နိုင်ငံတကာအဖွဲ့အစည်းတစ်ခု တိုက်တွန်း

    Facebook၊ Instagram နဲ့ Twitter တို့လို ဆိုရှယ်မီဒီယာတွေကို အသုံးပြုနေတဲ့ အမျိုးသမီး ၆၀ ရာခိုင်နှုန်းလောက်ဟာ အရှက်တကွဲပြုတာ၊ စော်ကားပြောဆိုတာတွေကို ခံနေရပြီး၊ ဆိုရှယ်မီဒီယာကို စွန့်ခွာသွားတဲ့အထိ ဖြစ်လာတယ်လို့ နိုင်ငံတကာ အမျိုးသမီးအခွင့်ရေးအဖွဲ့ Plan International ရဲ့ ပြီးခဲ့တဲ့ရက်ပိုင်းက အစီရင်ခံစာမှာ ဖော်ပြထားပါတယ်။ Facebook မှာ ပမာဏအများဆုံးဖြစ်ပြီး Whatsapp၊ Snapchat နဲ့ TikTok တို့မှာလည်း ဒီလို စော်ကားမှုတွေကို အမျိုးသမီးတွေက ကြုံနေရပါတယ်။ Plan International အဖွဲ့က အကြီးအကဲက တွေ့ရှိချက်တွေကို ဆိုရှယ်မီဒီယာကုမ္ပဏီတွေ၊ ကမ္ဘာတစ်ဝှမ်းက လွှတ်တော်အမတ်တွေထံ ပို့ပေးသွားမှာဖြစ်ပြီး ဒီပြဿနာကို ဝိုင်းဝန်းဖြေရှင်းကြဖို့လည်း တိုက်တွန်းခဲ့ပါတယ်။

    Tesla နှင့်ပေါင်းကာ နိုင်ငံအတွင်း လျှပ်စစ်ကားထုတ်နိုင်ရေး အင်ဒိုနီးရှား ကြိုးပမ်းနေ

    လျှပ်စစ်ကားထုတ်လုပ်တဲ့ Tesla ကုမ္ပဏီနဲ့ ရင်းနှီးမြှုပ်နှံမှု ပြုလုပ်ရေးအတွက် အင်ဒိုနီးရှားက ဆွေးနွေးမှုတွေလုပ်ဆောင်နေပါတယ်။ အင်ဒိုနီးရှားနိုင်ငံဟာ နီကယ်အဓိကတင်ပို့တဲ့နိုင်ငံဖြစ်ပြီး နိုင်ငံအတွင်း ရင်းနှီးမြှုပ်နှံမှုတွေ ပိုရဖို့အတွက် နီကယ်ကုန်ကြမ်းတွေကို ပြည်ပတင်ပို့ခြင်း မပြုတော့ပါဘူး။ ရင်းနှီးမြှုပ်နှံမှုဌာနက အကြီးတန်းတာ၀န်ရှိသူ အာယွဒ်ဟီယာ ကလာကီက နိုင်ငံအတွင်း Tesla က ရင်းနှီးမြှုပ်နှံရေး ကနဦးဆွေးနွေးမှုတွေ လုပ်ဆောင်နတယ်လို့ ပြောကြားခဲ့ပြီး လျှပ်စစ်ကား ထုတ်လုပ်နိုင်မယ်ဆိုရင် နိုင်ငံအတွက် အကျိုးအမြတ် အများအပြား ရနိုင်မယ်လို့ ပြောကြားခဲ့ပါတယ်။ Tesla က ဒီကိစ္စနဲ့ပတ်သက်ပြီး မထုတ်ပြန်သေးပါဘူး။ ပြီးခဲ့တဲ့လကလည်း နိုင်ငံအတွင်း လစ်သီယံ ဘထ္ထရီစက်ရုံတည်ဆောက်ရေး တောင်ကိုရီးယား အီလက်ထရောနစ်ကုမ္ပဏီ LG နဲ့ သဘောတူညီချက် ရခဲ့ပါတယ်

    Ref: BBC

    mmFootballNews

  • တစ်ပတ်အတွင်း နည်းပညာသတင်းများ

    တစ်ပတ်အတွင်း နည်းပညာသတင်းများ

    သြဂုတ် ၂၄၊ ၂၀၂၀
    M-Media

    TikTok က ကန်အစိုးရကို ဥပေဒကြောင်းဖြင့် ရင်ဆိုင်မည်

    အမေရိကန်အစိုးရကို ဥပဒေကြောင်းအရ ရင်ဆိုင်သွားမယ်ဖို့ TikTok က စီစဥ်နေပါတယ်။ ကန်ပြည်သူတွေရဲ့ အချက်အလက်တွေ တရုတ်စိုးရထံ ပေါက်ကြားမှာ စိုးရိမ်တဲ့အတွက် ထရမ့်အစိုးရက TikTok ကို ပိတ်ပင်ထားတာပါ။ ထရမ့်အစိုးရနဲ့ ညှိနှိုင်းနေတာ တစ်နှစ်လောက်ရှိနေပမယ့် ဘာမှ ထူးမလာဘူးလို့လည်း TikTok ကိုပိုင်တဲ့ တရုတ်ကုမ္ပဏီ ByteDance က ပြောပါတယ်။

    မျိုးဗီဇပြင်ထားသည့် ခြင်သန်း ၇၅၀ ကို ဖလော်ရီဒါတွင် လွှတ်မည်

    သွေးလွန်တုပ်ကွေးနဲ့ ဇီကာလိုရောဂါသယ်နိုင်တဲ့ ခြင်အရေအတွက်ကို လျော့ချပေးမယ့် မျိုးရိုးဗီဇပြင် ခြင်အကောင်ရည် သန်း ၇၅၀ လောက်ကို အမေရိကန်ပြည်ထောင်စု ဖလော်ရီဒါမှာ လွှတ်ပေးတော့မှာပါ။ OX5034 လို့ ခေါ်တဲ့ အေးဒီးစ်ခြင်မှာ လူကိုကိုက်တဲ့ ခြင်အမတွေကို ကိုက်နိုင်တဲ့အရွယ်မရောက်ခင် သေဆုံးစေမယ့် ပရိုတိန်းတစ်မျိုး ပါ၀င်ပါတယ်။ ဒီခြင်တွေဟာ သဘာ၀ပတ်၀န်းကျင် ဟန်ချက်ညီမှုကို ထိခိုက်စေလိမ့်မယ်လို့ ၀ေဖန်မှုတွေရှိပေမယ့် သုတေသနအဖွဲ့နဲ့ အစိုးရတာ၀န်ရှိသူတွေက လူနဲ့ သဘာ၀ပတ်၀န်းကျင်အပေါ် အန္တရာယ်မရှိဘူးဆိုတာ စမ်းသပ်မှုအတွင်း တွေ့ရတယ်လို့ တုန့်ပြန်ခဲ့ပါတယ်။

    Uber လုံခြုံရေးအကြီးအကဲဟောာင်းကို ကန်တရားစွဲ

    ယာဥ်မောင်းတွေ၊ အသုံးပြုသူတွေရဲ့ အချက်အလက်တွေ ပေါက်ကြားမှုကို ဖုံးကွယ်ခဲ့တဲ့ Uber လုံခြုံရေးအကြီးအကဲဟောင်း ဂျိုးဆက်ဖ် ဆူလီဗန်ကို ကန်တရားရေးဌာနက တရားစွဲဆိုလိုက်ပါတယ်။ ၂၀၁၆ ခုနှစ်မှာ Uber အငှားယာဥ်လုပ်ငန်းကို အသုံးပြုသူပေါင်း ၅၇ သန်းရဲ့ အချက်အလက်တွေဟာ ဟက်ကာတွေရဲ့ ခိုးယူမှုကို ခံခဲ့ရပြီး ဆူလီဗန်လည်း ၂၀၁၇ ခုနှစ်မှာ အလုပ်ထုတ်ခံခဲ့ရပါတယ်။ ယူသွားတဲ့အချက်အလက်တွေကို ဖျက်ပစ်ဖို့အတွက် ဟက်ကာတွေကို ကန်ဒေါ်လာ ၁ သိန်း ပေးခဲ့ရတယ်လို့ Uber က ၀န်ခံခဲ့ပါတယ်။

    Source – BBC

  • တစ်ပတ်အတွင်း သိပ္ပံနှင့် နည်းပညာသတင်းများ

    တစ်ပတ်အတွင်း သိပ္ပံနှင့် နည်းပညာသတင်းများ

    ဩဂုတ် ၁၁၊ ၂၀၂၀
    M-Media

    Twitter က TikTok ကိုဝယ်မည်ဟု သတင်းထွက်

    နာမည်ကြီးဆိုရှယ်မီဒီယာတစ်ခုဖြစ်တဲ့ Twitter ဟာ TikTok ကို ဝယ်ယူဖို့ တရုတ်ကုမ္ပဏီ ByteDance ကို ချဉ်းကပ်နေတယ်လို့ သတင်းတွေထွက်လာပါတယ်။

    လုံခြုံရေးဆိုင်ရာ စိုးရိမ်မှုတွေကြောင့် အမေရိကန်သမ္မတ ဒေါ်နယ်ထရမ့်ဟာ TikTok ကို ၄၅ ရက်ပိတ်ထားတာပါ။ မိုက်ခရိုဆော့ဖ်ကလည်း TikTok ကိုဝယ်ဖို့ ကြိုးစားနေပါတယ်။

    ဒီကိစ္စနဲ့ပတ်သက်ပြီး Twitter ဖက်ကတော့ မှတ်ချက်မပေးသေးပါဘူး။ TikTok ရဲ့တန်ဖိုး ဘယ်လောက်ရှိမလဲဆိုတာနဲ့ ၄၅ ရက်အတွင်း ဝယ်ဖို့ အဆင်သင့်ဖြစ်ပါ့မလားဆိုတာတွေကိုလည်း တိတိကျကျ မသိရသေးပါဘူး။

    TikTok ကို Twitter က ဝယ်ယူမယ်ဆိုရင် မိုက်ခရိုဆော့ဖ်ထက် လုံခြုံရေးဆိုင်ရာ စောင့်ကြည့်မှု အားနည်းလိမ့်မယ်လို့ ကျွမ်းကျင်သူတွေက သုံးသပ်ပါတယ်။

    Fifa 21 တွင် အပြုသဘောမဆောင်သည့် အောင်ပွဲခံမှုများကို ဖယ်ရှားမည်

    Fifa 21 ဘောလုံးဂိမ်းမှာ အပြုသဘောမ​ဆောင်တဲ့အောင်ပွဲခံမှုတွေ မထည့်တော့ဘူးလို့ ဂိမ်းထုတ်လုပ်တဲ့ EA Sports ကုမ္ပဏီက ပြောကြားလိုက်ပါတယ်။

    ​EA ဟာ Fifa 21 ကို အောက်တိုဘာလမှာ ဖြန့်ချီရောင်းချမှာ ဖြစ်ပါတယ်။ ဂိမ်မာတွေရဲ့ တောင်းဆိုမှုကြောင့် Shushing လို၊ A-OK လို ပြိုင်ဘက်ကို မလေးစား နှိမ့်ချတဲ့ အောင်ပွဲခံမှုမျိုးတွေ ထည့်တော့မှာမဟုတ်ဘဲ ဂိမ်းနဲ့မဆိုင်တာတွေ မလုပ်မိစေဖို့ ရည်ရွယ်တယ်လို့ ပရိုဂျူဆာ ဆမ်ရီဗီရာက ပြောပါတယ်။

    စင်တီဘီလီယံနာစာရင်းတွင် မာ့ခ် ဇက်ကာဘတ် ပါဝင်လာ

    Facebook ကို တည်ထောင်သူ မာ့ခ် ဇက်ကာဘတ်ရဲ့ ကြွယ်၀မှုဟာ ပြီးခဲ့တဲ့တစ်ပတ်မှာ ကန်ဒေါ်လာ ဘီလီယံ ၁၀၀ ကျော်သွားခဲ့ပြီး ‘စင်တီဘီလီယံနာ’ လို့ခေါ်တဲ့ သန်းထောင်ပေါင်း ၁၀၀ ကျော် သူကြွယ်စာရင်းမှာ ပါဝင်ခဲ့ပါတယ်။

    အမေရိကန်မှာ လက်ရှိပိတ်ထားတဲ့ TikTok ကို ပြိုင်မယ့် ဗီဒီယိုအက်ပလီကေးရှင်း Instagram Reels ကို မိတ်ဆက်မယ်လို့ Facebook က ကြေငြာခဲ့ပြီးတဲ့နောက် ရှယ်ယာတွေတက်သွားပြီး အခုလို ကြွယ်၀မှု မြင့်လာတာပါ။

    စင်တီဘီလီယံနာစာရင်းမှာ ၃ ဦးသာရှိသေးပြီး Amazon တည်ထောင်သူ ဂျက်ဖ် ဘီဇို့စ်၊ မိုက်ခရိုဆော့ဖ်တည်ထောင်သူ ဘီလ်ဂိတ်နဲ့ မာ့ခ် ဇက်ကာဘတ်တို့ ဖြစ်ပါတယ်။

    Ref: BBC, CNN

  • တစ်ပတ်အတွင်း သိပ္ပံနှင့် နည်းပညာသတင်းများ

    တစ်ပတ်အတွင်း သိပ္ပံနှင့် နည်းပညာသတင်းများ

    ဇူလိုင် ၃၀၊ ၂၀၂၀
    M-Media

    င်္ဂါဂြိုဟ်စူးစမ်းရေးယာဉ်တစ်စီးကို ကန်လွှတ်တင်

    အင်္ဂါဂြိုဟ်မှာ သက်ရှိတွေကို ရှာဖွေမယ့် Perseverance စူးစမ်းလေ့လာရေးယာဉ်ကို အမေရိကန်က ဒီကနေ့ ဖလော်ရီဒါ အာကာသစခန်းကနေ လွှတ်တင်ခဲ့ပါတယ်။ ယာဉ်ကို လာမယ့်နှစ် ဖေဖော်ဝါရီလမှာ အင်္ဂါဂြိုဟ်ပေါ် ဆင်းသက်ဖို့ စီစဉ်ထားပါတယ်။ စူးစမ်းရေးယာဉ်ဟာ အင်္ဂါဂြိုဟ် ၁ နှစ် (ကမ္ဘာမြေ ၂ နှစ်) နေထိုင်ကာ သက်ရှိ ရှိ၊ မရှိကို လေ့လာမှာ ဖြစ်ပါတယ်။ အခုလအတွင်း အင်္ဂါဂြိုဟ်ကို စူစမ်းရေးယာဉ်စေလွှတ်မှု ၃ ခု ရှိခဲ့ပြီး ယူအေအီး၊ တရုတ်နဲ့ အခု အမေရိကန်တို့ ဖြစ်ပါတယ်။

    ပြိုင်ဘက်များကို နှိပ်ကွပ်မှုမရှိဟု ကမ္ဘာ့ နည်းပညာကုမ္ပဏီများ ငြင်း

    ပြိုင်ဘက်တွေကို အနိုင်ယူဖို့ မလျော်ဩဇာသုံးခဲ့တယ်ဆိုတဲ့ စွပ်စွဲချက်တွေကို Facebook၊ Amazon၊ Google နဲ့ Apple ကုမ္ပဏီတွေရဲ့ အကြီးအကဲတွေက ပယ်ချလိုက်ပါတယ်။ ဇက်ကာဘတ်၊ ဂျက်ဖ် ဘီဇော့စ်၊ ဆွန်ဒါ ပီချိုင်း၊ တင်မ်ကွတ်တို့ဟာ မနေ့က ကန်လွှတ်တော်အမတ်တွေရှေ့မှာ ဗီဒီယိုကနေတဆင့် ၅ နာရီကြာ ဖြေရှင်းချက်ပေးခဲ့ရပါတယ်။ နည်းပညာကုမ္ပဏီကြီးတွေဟာ ကုမ္ပဏီငယ်တွေ ကြီးထွားမလာအောင် ဥပဒေပလုပ်ဆောင်တယ်လို့ ကန်လွှတ်တော်အမတ်တွေက ယူဆနေပြီး ဥပဒေတွေကို ပိုပိုတင်းကြပ်နိုင်ဖို့အတွက် စုံစမ်းစစ်ဆေးမှုတွေလည်း လုပ်နေပါတယ်။ ကုမ္ပဏီ ၄ ခုက အကြီးအကဲတွေက သူတို့ရဲ့ ထုတ်ကုန်တွေဟာ ကုမ္ပဏီငယ်တွေကို အကူအညီဖြစ်စေပြီး စျေးကွက်ယှဉ်ပြိုင်မှုကို လမ်းဖွင့်ပေးထားတယ်လို့ ထွက်ဆိုခဲ့ပါတယ်။

    Ref: BBC