Tag: turkey

စက်တင်ဘာ ၁၃၊ ၂၀၁၈
M-Media

– နိုင်ငံရဲ့ အိမ်ခြံမြေဈေးကွက်အတွင်း ရောင်းဝယ်ငှား လုပ်ရာမှာ နိုင်ငံခြားငွေကြေး သုံးစွဲမှုကို တူရကီသမ္မတ အာဒိုဂန်က ဒီကနေ့မှာ အမိန့်ထုတ်ပြန် တားမြစ်လိုက်ပြီး တူရကီလီရာ ကျဆင်းမှုကို တားဆီးဖို့ ရည်ရွယ်တာ ဖြစ်ပါတယ်။

ဇန်န၀ါရီလကတည်းက တစ်ဖြည်းဖြည်း ကျဆင်းလာတဲ့ လီရာဟာ အမေရိကန်က တူရကီအပေါ် ပိတ်ဆိုမှုတွေလုပ်ခဲ့တဲ့ ပြီးခဲ့လမှာ သိသိသာသာကို ဆိုးရွားလာခဲ့ပါတယ်။

အာဒိုဂန်က နိုင်ငံသားတွေအနေနဲ့ သူတို့ဝယ်ယူထားတဲ့ အမေရိကန်ဒေါ်လာတွေ၊ ယူရိုတွေကို ရောင်းချဖို့ အရင်က တိုက်တွန်းခဲ့ဖူးပါတယ်။

တူရကီဗဟိုဘဏ်ကလည်း အခုတစ်ပတ်အတွင်း အတိုးနှုန်းကို သိသိသာသာ မြှင့်တင်ကာ လီရာ ပြန်လည်ဦးမော့လာဖို့ လုပ်ဆောင်ခဲ့ပါတယ်။

အိမ်ခြံမြေဈေးကွက်မှာ နိုင်ငံခြားငွေကြေးတွေ အသုံးမပြုဖို့ တားမြစ်တဲ့အမိန့်ကို အစိုးရသတင်းစာမှာ ဖော်ပြခဲ့တာဖြစ်ပြီး၊ လက်ရှိ နိုင်ငံခြားငွေကြေးနဲ့ ဆောင်ရွက်ထားသမျှကို ရက်ပေါင်း ၃၀ အတွင်း ပြောင်းလဲရမှာ ဖြစ်ပါတယ်။

တူရကီမှာ နေထိုင်တဲ့ နိုင်ငံခြားသားတွေ အိမ်တွေကို ၀ယ်ယူတာ၊ ငှားရမ်းတာတွေမှာ အများစုက အမေရိကန်ဒေါ်လာတွေ၊ ယူရိုငွေကြေးတွေနဲ့ လုပ်ဆောင်ကြတာ ဖြစ်ပါတယ်။

တူရကီဆောက်လုပ်ရေးကုမ္ပဏီတော်တော်များများဟာ နိုင်ငံခြားငွေကြေးတွေနဲ့ ချေးယူထားတာတွေ ရှိနေပြီး တူရကီလီရာက သိသိသာသာ ကျဆင်းနေတာကြောင့် ချေးငွေတွေ ပြန်မဆပ်နိုင်မှာကို စိုးရိမ်နေကြပါတယ်။

အန်ကာရာက ကုန်သည်ကြီးများအသင်းမှာ ဒီကနေ့ပြောကြားတဲ့ မိန်းခွန်းမှာ အာဒိုဂန်က သွင်းကုန်၊ ထုတ်ကုန်သမားတွေကလွဲလို့ ဘယ်သူမှ နိုင်ငံအတွင်းမှာ နိုင်ငံခြားငွေကြေးကို အသုံးမပြုသင့်ဘူးလို့ ထည့်သွင်းပြောဆိုခဲ့ပါတယ်။

Ref: BBC

စက်တင်ဘာ ၁၀၊ ၂၀၁၈
M-Media

– တူရကီနိုင်ငံတောင်ပိုင်း ဘတ္တမန်ပြည်နယ် ဟာဆန်ကက်ဖ်ခရိုင်မှာ လွန်ခဲ့တဲ့နှစ်ပေါင်း ၉၀၀ က တည်ဆောက်ခဲ့တဲ့ ရှေးဟောင်း ဗလီဝတ်ကျောင်းတော်တစ်လုံးကို ဒီကနေ့မှာ အလုံးလိုက် ရွှေ့ပြောင်းခဲ့ပါတယ်။

အာတူကစ်မင်းဆက်လက်ထက်က ဆောက်လုပ်ခဲ့တဲ့ အဲဒီဗလီငယ်ဟာ တန်ပေါင်း ၈၅၀ လေးပြီး ဘီး ၂၅၆ ဘီးပါတဲ့ အထူးထရပ်ကားနဲ့ မူရင်းနေရာကနေ ၂.၄ ကီလိုမီတာအဝေးကို ရွှေ့ခဲ့တာပါ။ အနီးအနားမှာ ရေလှောင်တမံအသစ်တစ်ခု ဖွင့်လှစ်ပြီးတဲ့နောက် အနာဂတ်မှာ ရေကြီးမယ့် အန္တရာယ်ကို စိုးရိမ်တဲ့အတွက် ဗလီကို ဒီလို ပြောင်းရွှေ့ခဲ့တာ ဖြစ်ပါတယ်။

ဗလီရဲ့ မင်နာရတ်မျှော်စင်ကိုတော့ အခုတစ်ပတ်အတွင်းမှာ ရွှေ့ဖို့ ရှိနေပါတယ်။

တူရကီဟာ အရင်ကလည်း နှစ်ပေါင်း ၅၄၀ ကြာမြင့်နေပြီးဖြစ်တဲ့ ဂူဗိမာန်တစ်ခု၊ ရှေးဟောင်း တူရကီရေချိုးကန်တစ်ခုတို့ကို ဘတ္တမန်ပြည်နယ်မှာပဲ အလုံးလိုက် ရွှေ့ပြောင်းခဲ့ဖူးပါတယ်။

ပြည်နယ်ဟိုက်ဒရောလစ်လုပ်ငန်းအဖွဲ့ (DSI) ရဲ့ လက်ထောက်ညွှန်ကြားရေးမှူး မူရက်ဒဂ်ဒီဗီရန်က ဒီဗလီငယ်ကို နေရာရွှေ့ပြောင်းမှုဟာ သမိုင်းဝင်လုပ်ငန်းတစ်ခုဖြစ်တယ်လို့ ပြောကြားခဲ့ပါတယ်။

ဟာဆန်ကက်ဖ်ခရိုင်ကို ရှေးဟောင်းအမွေအနှစ် ထိန်းသိမ်းရာ ဌာနအဖြစ် တူရကီက ၁၉၈၁ ခုနှစ်မှာ သတ်မှတ်ခဲ့ပြီး ခရစ်ယာန်နဲ့ မွတ်စလင်တွေရဲ့ ၀တ်ပြုရာနေရာတွေ၊ ကျောက်ဂူတွေနဲ့ ဘိုင်ဇန်တိုင်းခေတ်က ခံတပ်တွေကို အစိုးရအစီအစဉ်နဲ့ ထိန်းသိမ်းစောင့်ရှောက်ထားပါတယ်။

Ref: AA