News @ M-Media

Tag: Uighur Muslims

  • ရှင်ကျန်းတွင် ဝီဂါများကို ဖိနှိပ်သည့်အကျဉ်းစခန်းအရေအတွက် ၃၈၀ ကျော်ရှိနေ

    ရှင်ကျန်းတွင် ဝီဂါများကို ဖိနှိပ်သည့်အကျဉ်းစခန်းအရေအတွက် ၃၈၀ ကျော်ရှိနေ

    စက်တင်ဘာ ၂၄၊ ၂၀၂၀
    M-Media

    -တရုတ်နိုင်ငံ​အနောက်ပိုင်း ရှင်ကျန်းပြည်နယ်မှာ ဝီဂါနဲ့ အခြားလူနည်းစုတွေကို ထိန်းသိမ်းထားတဲ့ အကျဉ်းစခန်းအရေအတွက်ဟာ ၃၈၀ ကျော် ရှိတယ်လို့ ဩစတေးလျအခြေစိုက် တတ်သိပညာရှင်အဖွဲ့တစ်ခုက ပြောကြားလိုက်ပြီး ဒါဟာ အရင်က ထင်ထားတာထက် ပိုမိုများပြားနေတာ ဖြစ်ပါတယ်။

    ရှင်ကျန်းမှာ ဝီဂါနဲ့ အခြား တူရကီစကားပြော လူနည်းစု တစ်သန်းကျော်လောက်ကို တရုတ်အစိုးရက အကျဉ်းစခန်းတွေထဲမှာ ထိန်းသိမ်းထားပြီး ညှင်းပမ်းနှိပ်စက်နေတယ်လို့ ကမ္ဘာ့မီဒီယာ​တွေနဲ့ ကုလသမဂ္ဂက စုံစမ်းဖော်ထုတ်ထားပါတယ်။

    တရုတ်ကတော့ ဒီစခန်းတွေဟာ အကျဉ်းစခန်းတွေမဟုတ်ဘဲ အစွန်းရောက်ဝါဒတိုက်ဖျက်ရေး လုပ်ဆောင်နေတဲ့ အသက်မွေးဝမ်းကြောင်းဆိုင်ရာ သင်တန်းကျောင်းတွေ ဖြစ်တယ်လို့ တုန့်ပြန်ခဲ့ပါတယ်။

    ဩစတေးလျက တတ်သိပညာရှင်များအဖွဲ့ (ASPI) က လေ့လာမှုတွေအရ ရှင်ကျန်းမှာ အကျဉ်းစခန်းပေါင်း ၃၈၀ ကျော်ရှိပြီးဒါဟာ အရင်ကတွက်ချက်ထားတဲ့ ပမာဏထက် ၄၀ ရာခိုင်နှုန်းဝန်းကျင် မြင့်တက်လာတာ ဖြစ်ပါတယ်။

    “အသက်မွေးဝမ်းကြောင်း သင်တန်းကျောင်းလို့ သူတို့ခေါ်တဲ့နေရာတွေက သင်တန်းသားတွေဟာ ၂၀၁၉ ခုနှစ် နှောင်ပိုင်းမှာ သင်တန် းပ​ြီးကာ ပြန်သွားကြပြီလို့ တရုတ်အာဏာပိုင်တွေရဲ့ပြော​ကြားမှုနဲ့ အခုတွေ့ရှိချက်တွေက ကွဲလွဲနေပါတယ်။ တရားလက်လွတ်ဖမ်းဆီးခံထားရတဲ့သူတွေကို လုံခြုံရေးပိုမြင့်တဲ့ စခန်းတွေမှာ ထိန်းသိမ်းထားတယ်ဆိုတာ အခုအထောက်အထားတွေက ပြသနေပါတယ်” လို့ ASPI အဖွဲ့က သုတေသနအဖွဲ့ခေါင်းဆောင် နသန်ရူဆာက ပြောကြားခဲ့ပါတယ်။

    ဂြိုဟ်တုကရရှိတဲ့ ပုံရိပ်တွေ၊ ကိုယ်တိုင်တွေ့ကြုံလာရသူတွေ၊ မီဒီယာက သတင်းဖော်ပြချက်တွေ၊ အကျဉ်းစခန်းတွေဆောက်ဖို့ တရုတ်အစိုးရက တင်ဒါခေါ်တဲ့ စာရွက်စာတမ်းတွေကို အခြေခံပြီး ASPI က သုတေသနလုပ် ထုတ်ပြန်ခဲ့တာ ဖြစ်ပါတယ်။

    ၂၀၂၀ ခုနှစ် အစပိုင်းကနေ ဇူလိုင်လအထိ အသစ်ဆောက်လုပ်ခဲ့တဲ့ အကျဉ်းစခန်းနဲ့ တိုးချဲ့တဲ့အကျဉ်းစခန်း အနည်းဆုံး ၆၁ ခုရှိတယ်လို့ ASPI က ဆိုပါတယ်။ နောက်ထပ် ၁၄ ခုက ဆောက်လုပ်ဆဲအနေအထားမှာ ဖြစ်ပါတယ်။

    သံဆူးကြိုခြံစည်းရိုး ဒါမှမဟုတ် နံရံအမြင့်ကြီးတွေကို ဖယ်ရှားလိုက်တဲ့ အကျဉ်းစခန်းက ၇၀ လောက်ရှိပြီး ဒါဟာ ဒီစခန်းတွေကို ပိတ်ပစ်လိုက်တာ ဒါမှမဟုတ် နောက်ထပ်ပုံစံတစ်မျိုး ပြောင်းလဲအသုံးပြုတာ ဖြစ်နိုင်တယ်လို့ ASPI က ပြောကြားခဲ့ပါတယ်။

    ASPI ဟာ Xinjiang Data Project လို့ အမည်ပေးထားတဲ့ စီမံကိန်းတစ်ခုကို ဖော်ဆောင်နေပြီး အဲဒီအထဲမှာ ရှင်ကျန်းက အကျဉ်းစခန်းကွန်ယက်နဲ့ အခြား ဘာသာရေး၊ ယဉ်ကျေးမှုဆိုင်ရာ အထင်ကရနေရာတွေကို အအသေးစိတ် 3D ပုံရိပ်တွေနဲ့ ဖော်ပြမှာ ဖြစ်ပါတယ်။

    ရူဆာက တိုးချဲ့လိုက်တဲ့ အကျဉ်းစခန်းအများစုဟာ လုံခြုံရေးပိုမြင့်တဲ့ စခန်းတွေဖြစ်ပြီး၊ စက်မှုဇုန်တွေရဲ့ဘေးမှာလည်း အကျဉ်းစခန်းတွေကို တည်ဆောက်ထားတာကြောင့် ထိန်းသိမ်းထားသူတွေကို စက်ရုံတွေမှာ အဓမ္မလုပ်အားခိုင်းစေတာမျိုး ရှိနိုင်တယ်လို့လည်း ASPI က ထည့်သွင်းသုံးသပ်ထားပါတယ်။

    အမေရိကန်တာဝန်ရှိသူတွေကတော့ ရှင်ကျန်းစက်ရုံတွေက ထုတ်လုပ်တဲ့ ကုန်ပစ္စည်းတွေမှာ ဝီဂါတွေရဲ့ အဓမ္မလုပ်အားပါတဲ့အတွက် တစ်ချို့ပစ္စည်းတွေကို အမေရိကန်ကတင်ပို့ခွင့် ပိတ်ပင်ထားပါတယ်။

    Ref: Aljazeera

  • အကျဉ်းစခန်းများတွင် ဝီဂါမွတ်စလင် တစ်ဦးမှမရှိတော့ဟု တရုတ်ပြော

    အကျဉ်းစခန်းများတွင် ဝီဂါမွတ်စလင် တစ်ဦးမှမရှိတော့ဟု တရုတ်ပြော

    ဩဂုတ် ၃၁၊ ၂၀၂၀
    M-Media

    ထိုင်းနိုင်ငံကို ထွက်ပြေးလာသည့် ဝီဂါမိသားစုတစ်ခု

    -နိုင်ငံအနောက်ပိုင်းက ဝီဂါလူမျိုးတွေအပေါ် ညှင်းပမ်းမှုတွေရှိတယ်ဆိုတဲ့သတင်းတွေကို ဥရောပရောက် တရုတ်နိုင်ငံခြားရေးဝန်ကြီး ဝမ်ယီက မနေ့မှာ ထပ်ငြင်းလိုက်ပြီး ပြည်တွင်းရေးကိစ္စမှာ ဥရောပနိုင်ငံတွေက ဝင်မစွက်ဖို့လည်း သတိပေးလိုက်ပါတယ်။

    ရှင်ကျန်းပြည်နယ်မှာ အစ္စလာမ်ဘာသာဝင် ဝီဂါနဲ့ အခြားလူမျိုးစုငယ်တွေကို တရုတ်အစိုးရက ဖိနှိပ်မှုတွေ လုပ်ဆောင်နေပြီး အနည်းဆုံး လူ ၁ သန်းလောက်ကို အကျဉ်းစခန်းထဲမှာ ပိတ်လှောင်ထားတယ်လို့ ကမ္ဘာ့မီဒီယာတွေက ဖော်ထုတ်တင်ပြခဲ့ကြပါတယ်။ တရုတ်ကတော့ ဒီသတင်းကို ငြင်းဆိုပြီး အကျဉ်းစခန်းတွေမဟုတ်ဘဲ လေ့ကျင့်သင်ကြားရေးက​ျောင်းတွေသာ ဖြစ်တယ်လို့ တုန့်ပြန်ခဲ့ပါတယ်။

    မနေ့က ပဲရစ်ကိုရောက်လာတဲ့ ဝမ်ယီကလည်း အဲဒီသင်တန်းကျောင်းတွေကို ပို့ဆောင်ခံရတဲ့သူတွေဟာ အကြမ်းဖက်ဝါဒ၊ အစွန်းရောက်ဝါဒတွေ ဝင်နေတဲ့သူတွေဖြစ်ကြောင်း၊ လက်ရှိမှာ သူတို့ကို ပြန်လွှတ်ပေးလိုက်ပြီး လုပ်ငန်းခွင် ဝင်နေကြပြီဖြစ်ကြောင်း ထည့်သွင်းပြောဆိုခဲ့ပါတယ်။

    “အခုဆိုရင် သူတို့အားလုံး ဘွဲရသွားပါပြီ။ လေ့ကျင့်သင်ကြားရေးကျောင်းတွေမှာ တစ်ယောက်မှ မရှိတော့ပါဘူး။ အားလုံး အလုပ်ရသွားပါပြီ”

    တရုတ်အစိုးရဟာ ဝီဂါတွေနဲ့ အခြားလူမျိုးစုငယ်တွေအပေါ်မှာ ဖိနှိပ်ချုပ်ချယ်မှုတွေ အခုအချိန်အထိ ဆက်လက်ဆောင်ရွက်နေတုန်းပဲလို့ တက်ကြွလှုပ်ရှားသူတွေ ဖိနှိပ်ခံရတဲ့ မိသားစုတွေက ပြောဆိုနေကြဆဲ ဖြစ်ပါတယ်။

    Ref: Alarabiya

  • ဝီဂါဒေသဖြစ်သည့် ရှင်ကျန်းပြည်နယ်ကို လာကြည့်ရန် ကန်ကို တရုတ် ဖိတ်ခေါ်

    ဝီဂါဒေသဖြစ်သည့် ရှင်ကျန်းပြည်နယ်ကို လာကြည့်ရန် ကန်ကို တရုတ် ဖိတ်ခေါ်

    ဇူလိုင် ၁၆၊ ၂၀၂၀
    M-Media

    ရှင်ကျန်းပြည်နယ်မြို့တော် အွမ်ရူကီမှ မြင်ကွင်း

    -ရှန်ကျန်းပြည်နယ်မှာ လူ့အခွင့်အရေးချိုးဖောက်မှုတွေ ရှိ၊ မရှိ လာရောက်ကြည့်ရှုဖို့အတွက် အမေရိကန်နိုင်ငံခြားရေးဝန်ကြီး မိုက်ပွမ်ပီယိုကို ဖိတ်ခေါ်တယ်လို့ တရုတ်နိုင်ငံက ပြောကြားလိုက်ပါတယ်။

    တရုတ်နိုင်ငံအနောက်ပိုင်း ရှန်ကျန်းပြည်နယ်မှာ ဝီဂါနဲ့ အခြားလူမျိုးငယ် အနည်းဆုံး ၁ သန်းလောက်ကို တရုတ်အစိုးရက အကျဉ်းစခန်းတွေထဲ ထည့်ထားပြီး ဖိနှိပ်ညှင်းပမ်းမှုတွေ ရှိတယ်လို့ သတင်းတွေ ကျယ်ကျယ်ပြန့်ပြန့် ထွက်ပေါ်နေတာပါ။ တရုတ်ဖက်ကတော့ ဒါကို ငြင်းဆိုထားပါတယ်။

    တရုတ်နိုင်ငံခြားရေးဝန်ကြီးဌာနရဲ့ ဒီကနေ့ အကျဉ်းချုပ် သတင်းစာရှင်းလင်းပွဲမှာ ဝန်ကြီးဌာန ပြောရေးဆိုခွင့်ရှိသူ ဟွာချွမ်ယင်းက ရှင်ကျန်းပြည်နယ်မှာ ဝီဂါမွတ်စလင်တွေအပေါ် လူ့အခွင့်အရေး ချိုးဖောက်မှုတွေ မရှိဘဲ၊ ဒါတွေကို လာကြည့်ဖို့အတွက် ကန်နိုင်ငံခြားရေးဝန်ကြီး မိုက်ပွမ်ပီယိုကို ဖိတ်ခေါ်တယ်လို့ ပြောကြားခဲ့ပါတယ်။

    ဒါ့အပြင် တရုတ်အနေနဲ့ အမေရိကန်ရဲ့နေရာကို ယူဖို့ မကြိုးစားသလို၊ စိန်ခေါ်မှာလည်းမဟုတ်ကြောင်း အမေရိကန်အနေနဲ့ တရုတ်နဲ့ပတ်သက်တဲ့ ပေါ်လစီကို ဓမ္မဓိဌာန်ကျကျ ပြန်လည်သုံးသပ်ဖို့ တိုက်တွန်းကြောင်း ဟွာချွမ်ယင်းက ထည့်သွင်းပြောဆိုခဲ့ပါတယ်။

    ရှင်ကျန်းပြည်နယ်က လူ့အခွင့်အရေးချိုးဖောက်မှုတွေအတွက် တရုတ်ကွန်မြူနစ်ပါတီ ခေါင်းဆောင်တစ်ချို့ကို အမေရိကန်က ပိတ်ဆို့အရေးယူမှုတွေ လုပ်ဆောင်ထားသလို၊ ထိုင်ဝမ်ကိစ္စ၊ တောင်တရုတ်ပင်လယ်ကိစ္စတွေနဲ့ပတ်သက်ပြီးတော့လည်း တရုတ်နဲ့ အမေရိကန်တို့အကြား အခုသီတင်းပတ်တွေအတွင်း တင်းမာမှုတွေ မြင့်တက်နေတာ ဖြစ်ပါတယ်။

    Ref: Reuters

  • ဝီဂါများအားဖိနှိပ်သည့် တရုတ်အရာရှိများကို အရေးယူရေး ထရမ့်က ဥပဒေတစ်ခုကို အတည်ပြု

    ဝီဂါများအားဖိနှိပ်သည့် တရုတ်အရာရှိများကို အရေးယူရေး ထရမ့်က ဥပဒေတစ်ခုကို အတည်ပြု

    ဇွန် ၁၈၊ ၂၀၂၀
    M-Media

    -တရုတ်နိုင်ငံအနောက်ပိုင်းက ဝီဂါလူမျိုးတွေ ဖိနှိပ်ခံရမှုမှာ တာဝန်ရှိသူတွေအပေါ် ပိတ်ဆို့အရေးယူရေး တိုင်တွန်းဆော်ဩတဲ့ ဥပဒေမူကြမ်တစ်ခုကို အမေရိကန်သမ္မတ ဒေါ်နယ်ထရမ့်က လက်မှတ်ရေးထိုးလိုက်တယ်လို့ အိမ်ဖြူတော်က ထုတ်ပြန်တဲ့ကြေငြာချက်မှာ ဖော်ပြထားပါတယ်။

    အဲဒီမူကြမ်းကို ကန်လွှတ်တော်က တစ်ညီတစ်ညွတ်တည်း အတည်ပြုထားတာဖြစ်ပြီး ထရမ့်က လက်မှတ်ထိုးပြီးတဲ့နောက် ဥပဒေအဖြစ် အသက်ဝင်လာမှာ ဖြစ်ပါတယ်။ ဥပဒေဟာ လူ့အခွင့်အရေးနဲ့ပတ်သက်ပြီး တရုတ်ကို ပြင်းထန်းတဲ့ သတိပေးမှုလည်း ဖြစ်ပါတယ်။

    ရှင်ကျန်းပြည်နယ်က အကျဉ်းစခန်းတွေမှာ ဝီဂါနဲ့ အခြားလူနည်းစု အစ္စလာမ်ဘာသာဝင် အနည်းဆုံး ၁ သန်းလောက်ကို တရုတ်က ထိန်းသိမ်းထားပြီး ညှင်းပမ်းပြုလုပ်နေတယ်လို့ ပြီးခဲ့တဲ့နှစ်အတွင်း ကမ္ဘာ့မီဒီယာတွေနဲ့ ကုလတို့က ထုတ်ပြန်ပြောကြားထားပါတယ်။ တရုတ်ကတော့ ဒီပြောကြားချက်တွေကို ငြင်းဆိုပြီး အကျဉ်းစခန်းတွေမဟုတ်ဘဲ အသက်မွေးဝမ်းကြောင်း သင်တန်းကျောင်းတွေသာဖြစ်ကြောင်း တုန့်ပြန်ထားပါတယ်။

    ထရမ့်လက်မှတ်ရေးထိုးလိုက်တဲ့ အခုဥပဒေမှာ ရှင်ကျန်းပြည်နယ် ကွန်မြူနစ်ပါတီ ထိပ်တန်းခေါင်းဆောင်တွေအပေါ် ပိတ်ဆို့အရေးယူရေး အလေးထားဖော်ပြထားပါတယ်။

    တရုတ်နိုင်ငံခြားရေးဝန်ကြီးဌာနက ကန်ရဲ့ ဒီဆောင်ရွက်ချက်ဟာ တရုတ်နိုင်ငံအပေါ် ရန်ညှိုးထားတဲ့ တိုက်ခိုက်မှုဖြစ်ပြီး မိမိတို့အကျိုးစီးပွားနဲ့ ပြည်တွင်းရေးကို ဝင်ရောက် စွက်ဖက်မှု ရပ်တန့်ဖို့ ကြေငြာချက် ထုတ်ပြန်ခဲ့ပါတယ်။

    ဒါ့အပြင် မိမိတို့ကလည်း ထိုက်သင့်တဲ့ တုန့်ပြန်မှု​တွေ လုပ်ဆောင်သွားမယ်လို့ ပြောကြားခဲ့ပါတယ်။

    အဝေးရောက် ဝီဂါတွေဖွဲ့စည်းထားတဲ့ World Uyghur Congress ကတော့ ထရမ့်ရဲ့ လက်မှတ်ထိုးမှုကို ကြိုဆိုခဲ့ပြီး ဖိနှိပ်ခံရတဲ့ ဝီဂါတွေအတွက် မျှော်လင့်ချက်တစ်ခု ဖြစ်တယ်လို့ ထုတ်ပြန်ခဲ့ပါတယ်။

  • ဝီဂါများကိုဖိနှိပ်သည့် တရုတ်အာဏာပိုင်များကို အရေးယူမည့်ဥပဒေကို ထရမ့် လက်မှတ်ထိုးမည်

    ဝီဂါများကိုဖိနှိပ်သည့် တရုတ်အာဏာပိုင်များကို အရေးယူမည့်ဥပဒေကို ထရမ့် လက်မှတ်ထိုးမည်

    ဇွန် ၁၀၊ ၂၀၂၀
    M-Media

    -ဝီဂါမွတ်စလင်တွေအပေါ် ဖိနှိပ်မှုမှာ တာဝန်ရှိတဲ့ တရုတ်အာဏာပိုင်တွေကို ပိတ်ဆို့အရေးယူရေး တိုက်တွန်းတဲ့ ဥပဒေတစ်ရပ်ကို အမေရိကန်သမ္မတ ဒေါ်နယ်ထရမ့်က လက်မှတ်ရေးထိုးဖို့ ရှိတယ်လို့ ဒီကိစ္စနဲ့ နီးစပ်သူတွေက တနင်္လာနေ့မှာ ပြောကြားခဲ့ပါတယ်။

    အဲဒီဥပဒေကို ပြီးခဲ့တဲ့လမှာ အမေရိကန် အထက်လွှတ်တော်၊ အောက်လွှတ်တော် နှစ်ရပ်စလုံးက တစ်ညီတစ်ညွတ်တည်း ထောက်ခံအတည်ပြုခဲ့ကြတာပါ။

    တရုတ်နိုင်ငံအနောက်ပိုင်း ရှင်ကျန်းပြည်နယ်မှာ ဝီဂါနဲ့ အခြား အစ္စလာမ်ဘာသာဝင် လူမျိုးစုတွေအပေါ် တရုတ်အစိုးရက အကြီးအကျယ် ဖိနှိပ်ညှင်းပမ်းနေပြီး အနည်းဆုံး လူတစ်သန်းလောက်ကိုလည်း အကျဉ်းစခန်းတွေထဲ ထည့်ပိတ်ထားတယ်လို့ ကုလနဲ့ နိုင်ငံတကာမီဒီယာတွေက ဖော်ထုတ်တင်ပြခဲ့ပါတယ်။

    တရုတ်အစိုးရကတော့ ဒီသတင်းတွေကို ငြင်းပါတယ်။ အမေရိကန်ရဲ့ အခုဥပဒေသစ်အတွက်လည်း တရုတ်က မှတ်ချက်မပေးသေးပါဘူး။

    ထရမ့်က လက်မှတ်ရေးထိုးမယ့် ဥပဒေရဲ့ မူကြမ်းကို ရီပက်ဘလစ်ကန်အမတ် မာခရို ရူဘီယိုက လွှတ်တော်မှာ တင်သွင်းအဆိုပြုတာပါ။

    ဝီဂါမွတ်စလင်တွေအပေါ် ဖိနှိပ်ညှင်းပမ်းမှုနဲ့ လူ့အခွင့်အရေးချိုးဖောက်မှုတွေမှာ ရှင်ကျန်းကွန်မြူနစ်ပါတီရဲ့ အတွင်းရေးမှူးဖြစ်ပြီး ဩဇာရှိ နိုင်ငံရေးဗျူရိုက အဖွဲ့ဝင်တစ်ဦးလည်းဖြစ်တဲ့ ချန်ကျွမ်ဂိုဟာ အဓိက တာဝန်ရှိသူ ဖြစ်နေတယ်လို့ မူကြမ်းမှာ ဖော်ပြထားပါတယ်။