News @ M-Media

Tag: Uighur Muslims

  • ဝီဂါများအပေါ် တရုတ်၏ကျူးလွန်မှုက လူမျိုးတုန်းသတ်ဖြတ်မှု သတ်မှတ်ချက် ၅ ချက်စလုံးနှင့် ကိုက်ညီနေ

    ဝီဂါများအပေါ် တရုတ်၏ကျူးလွန်မှုက လူမျိုးတုန်းသတ်ဖြတ်မှု သတ်မှတ်ချက် ၅ ချက်စလုံးနှင့် ကိုက်ညီနေ

    မတ် ၁၁၊ ၂၀၂၁
    M-Media

    -တရုတ်အစိုးရဟာ ဝီဂါမွတ်စလင်တွေအပေါ် လူမျိုးတုန်းသတ်ဖြတ်မှု ကျူးလွန်နေတယ်ဆိုတာကို မြေပြင်အထောက်အထားတွေက ရှင်းရှင်းလင်းလင်း ခိုင်ခိုင်မာမာ ဖော်ပြနေတယ်လို့ အမေရိကန်အခြေစိုက် တတ်သိပညာရှင်များအဖွဲ့ Newlines Institute for Strategy and Policy က ပြောကြားလိုက်ပါတယ်။

    Newlines Institute for Strategy and Policy အဖွဲ့ဟာ အင်္ဂါနေ့က ဝီဂါကိစ္စနဲ့ပတ်သက်ပြီး အစီရင်ခံစာတစ်စောင် ထုတ်ပြန်ခဲ့တာပါ။ ၁၉၄၈ ခုနှစ် လူမျိုးတုန်းသတ်ဖြတ်မှု တားဆီးကာကွယ်ရေးနှင့် အပြစ်ပေးအရေးယူရေး သဘောတူညီချက်ပါ အချက်အလက်တွေကို အခြေခံပြီး သုံးသပ်လေ့လာကာ လွတ်လပ်တဲ့အဖွဲ့အစည်းက ထုတ်ပြန်တဲ့ ပထမဆုံး အစီရင်ခံစာ ဖြစ်ပါတယ်။

    တရုတ်အစိုးရကထုတ်ပြန်တဲ့ စာရွက်စာတမ်းတွေ၊ မျက်မြင်သက်သေတွေရဲ့ ထွက်ဆိုချက်တွေ၊ ဂြိုဟ်တုပုံရိပ်တွေ အပါအဝင် အတည်ပြုလို့ရတဲ့ အထောက်အထားမှန်သမျှကို စုဆောင်းကာ နယ်ပယ်အသီးသီးက ကျွမ်းကျင်သူပေါင်း ၃၀ ကျော်နဲ့ လေ့လာ ဆန်းစစ်ခဲ့တာပါ။

    တရုတ်သမ္မတ ရှီကျင့်ဖျင်ဟာ ၂၀၁၄ ခုနှစ်က ‘အကြမ်းဖက်မှုတိုက်ဖျက်ရေး’ ဆိုတဲ့ခေါင်းစဉ်နဲ့ ဝီဂါလူမျိုးတွေကို ဖျက်ဆီးဖျောက်ဖျက်မယ့် စီမံကိန်းကို စတင်ခဲ့တယ်လို့ အစီရင်ခံမှာ ဖော်ပြထားပါတယ်။

    အဲဒီနောက် တရုတ်အာဏာပိုင်တွေဟာ လူသန်းချီ အကျဉ်းစခန်းထဲ ပိတ်လှောင်တာ၊ ဝီဂါခေါင်းဆောင်တွေကို သတ်ဖြတ်တာ၊ အဓမ္မသားကြောဖြတ်တာ၊ ကလေးတွေကို မိဘတွေထံကနေ ခွဲထုတ်တာတွေ လုပ်ဆောင်ခဲ့သလို၊ ဗလီတွေ၊ ဘာသာရေးနဲ့ ယဉ်ကျေးမှု အထိမ်းအမှတ် အဆောက်အဦးတွေ ဖျက်ဆီးကာ ဝီဂါလူမျိုးတွေရဲ့ အမှတ်သညာကိုဖျောက်ဖျက်ဖို့ လုပ်ဆောင်လာတယ်လို့ Newlines Institute for Strategy and Policy အဖွဲ့က ပြောပါတယ်။

    တရုတ်အစိုးရက ဝီဂါတွေအပေါ် ကျူးလွန်မှုတွေဟာ ​လူမျိုးတုန်းသတ်ဖြတ်မှု သတ်မှတ်ချက် ၅ ချက်စလုံးနဲ့ ကိုက်ညီနေတယ်ဆိုတဲ့ တိကျခိုင်မာတဲ့ အထောက်အထားတွေကို တွေ့ခဲ့ရကြောင်း လေ့လာသုံးသပ်ခဲ့တဲ့ ပညာရှင်တွေက ပြောပါတယ်။

    လူမျိုးတုန်းသတ်ဖြတ်မှုမြောက်တဲ့ အချက် ၅ ချက်က လူမျိုးစုတစ်စုကို သီးသန့်သတ်ဖြတ်တာ၊ အဲဒီလူမျိုးစုကို ရုပ်ပိုင်းဆိုင်ရာ စိတ်ပိုင်းဆိုင်အပေါ်မှာ ဆိုးဆိုးရွားရွား ဒုက္ခပေးတာ၊ လူမျိုးစုတစ်ခုလုံးရဲ့ အမှတ်သညာတစ်ခုလုံး ဒါမှမဟုတ် တစ်စိတ်တစ်ပိုင်း ပျက်ဆီးပပျောက်သွားစေမယ့် အခြေအနေမျိုးကို ရည်ရွယ်ချက်ရှိရှိ တွက်ချက် အကောင်အထည်ဖော် ဆောင်ရွက်တာ၊ ကလေးမွေးဖွားမှုကိုတားဆီးတဲ့ လုပ်ရပ်တွေ ဆောင်ရွက်တာ၊ အဲဒီလူမျိုးစုက ကလေးငယ်တွေကို အခြားလူမျိုးစုတွေဆီ အဓမ္မပို့ဆောင် ကြီးပြင်းစေတာတွေ ဖြစ်ပါတယ်။

    အစုလိုက်အပြုံလိုက် သေဆုံးမှု

    ဝီဂါတွေကို အကျဉ်းစခန်းထဲမှာ ပိတ်လှောင်ထားတဲ့ အစီအစဉ်အတွင်း အစုအလိုက်အပြုံလိုက်သေဆုံးမှု ဖြစ်ပေါ်ခဲ့တယ်ဆိုတဲ့ ခိုင်လုံတဲ့ သတင်းအချက်အလက်တွေကို ရရှိခဲ့သလို ဝီဂါခေါင်းဆောင်တွေကိုလည်း တရုတ်အစိုးရက သေဒဏ်ပေးသတ်ပစ်တာ၊ နှစ်ရှည်ထောင်ဒဏ်ချတာတွေ ရှိတယ်လို့ တတ်သိပညာရှင်များအဖွဲ့က ပြောပါတယ်။

    “အဓမ္မကျင့်တာ၊ လိင်ပိုင်းဆိုင်ရာစော်ကားတာ၊ လူမြင်ကွင်းမှာ အရှက်တကွဲအကျိုးနည်းအောင် လုပ်တာတွေအပါအဝင် ဝီဂါတွေဟာ စနစ်တကျညှင်းပမ်းမှု၊ ရက်စက်မှု၊ လူမဆန်မှု၊ နှိမ့်ချစော်ကားမှုတွေကို အကျဉ်းစခန်းထဲမှာရော အပြင်မှာပါ ခံစားနေရပါတယ်” လို့ အစီရင်ခံစာမှာ ဖော်ပြထားပါတယ်။

    တရုတ်အာဏာပိုင်တွေဟာ အရွယ်ကောင်း ဝီဂါအမျိုးသားတွေကို အသက်ရှင်ရပ်တည်လို့မရတဲ့ အခြေအနေမျိုးဖြစ်အောင် စနစ်တကျ အကျဉ်းချသလို၊ အလုပ်ကြမ်းစခန်းတွေကို အဓမ္မပို့ပစ်တာ၊ ဝီဂါမျိုးသမီးတွေကို အဓမ္မ သားကြောဖြတ်တာတွေ လုပ်ဆောင်ခဲ့ပါတယ်။

    ၂၀၁၉ တစ်နှစ်တည်းမှာပဲ ရှင်ကျန်းပြည်နယ်က က​လေးမွေးနိုင်တဲ့အရွယ် ဝီဂါအမျိုးသမီး အနည်းဆုံး ၈၀ ရာခိုင်နှုန်းကို သားကြောဖြတ်တာ၊ သန္ဓေတားပစ္စည်းထည့်တာတွေလုပ်ဖို့ တရုတ်အစိုးရက စီစဉ်ခဲ့ကြောင်း အစီရင်ခံစာမှာ ဖော်ပြထားပါတယ်။ တရုတ်အစိုးရဟာ ရှင်ကျန်းပြည်နယ်မှာ သန္ဓေတားမှုဗျူဟာကို ကျယ်ကျယ်ပြန့်ပြန့် ဆောင်ရွက်ခဲ့တာကြောင့် ၂၀၁၅ ခုနှစ်ကနေ ၂၀၁၈ ခုနှစ်အတွင်း ဝီဂါတွေအများအပြားနေထိုင်တဲ့ ခရိုင် ၂ ခုမှာ မွေးဖွားနှုန်းဟာ ၈၄ ရာခိုင်နှုန်းအထိ ကျဆင်းသွားခဲ့ပါတယ်။

    ဝီဂါမိသားစုတွေထဲက မိဘတွေကို အကျဉ်းစခန်းတွေထဲမှာ ပိတ်လှောင်ကာ ကလေးတွေကို အစိုးရရဲ့ မိဘမဲ့​ေဂဟာကို အဓမ္မပို့ဆောင်ပြီး ဝီဂါတွေရဲ့ယဉ်ကျေးမှု၊ ဘာသာစကား၊အမွေအနှစ် ပျောက်သွားအောင် တရုတ်ဇာတ်သွင်းနေတယ်လို့ Newlines Institute for Strategy and Policy အဖွဲ့က ပြောပါတယ်။

    ရှင်ကျန်းမှာ ဒီလို မိဘမဲ့​ဂေဟာ တည်ဆောက်မှုအရေအတွက် မြင့်တက်လာခဲ့ပြီး ၂၀၁၇ ခုနှစ်ကနေ ၂၀၁၉ ခုနှစ်အတွင်း မိဘတွေထံကနေခေါ်ဆောင်ကာ ဒီကျောင်းတွေကို အဓမ္မပို့ခံရတဲ့ ဝီဂါကလေးငယ်အရေအတွက် ၇၆.၉ ရာခိုင်နှုန်းအထိ ရှိတယ်လို့ အစီရင်ခံစာမှာ ဖော်ပြထားပါတယ်။

    ဒီမူဝါဒတွေဟာ သမ္မတ ရှီကျင့်ဖျင်နဲ့ ရှင်ကျန်းပြည်နယ် ကွန်မြူနစ်ပါတီ ထိပ်တန်းခေါင်းဆောင်တွေထံကနေ တိုက်ရိုက်လာတာဖြစ်ပြီး၊ အစိုးရရဲ့ အမိန့်စာတွေမှာ ‘ကျူငုတ်မကျန်စေနဲ့’ ‘ဇာတိ၊ ပုညတွေကို လုံး၀ ဖျက်ဆီးဖယ်ရှားပစ်’ ‘အားလုံးကို ပုံစံပေး’ ‘သနားတယ်ဆိုတာမျိုး မရှိစေနဲ့’ စတဲ့ စကားလုံးတွေကို သုံးနှုန်းထားတယ်လို့ အစီရင်ခံစာက ဆိုပါတယ်။

    ၂၀၂၀ ခုနှစ် မိန့်ခွန်းမှာ ရှီကျင့်ဖျင်က ရှင်းကျန်းမှာကျင့်သုံးတဲ့ မူဝါဒတွေ လုံး၀မှန်ကန်ပြီး အောင်မြင်တယ်လို့ ချီးကျူးခဲ့သလို ရှေ့လာမယ့်နှစ်တွေမှာလည်း ဆက်လက်ကျင့်သုံးသွားဖို့ ပြောကြားခဲ့ပါတယ်။

    “ဝီဂါတွေအပေါ် ချမှတ်ကျင့်သုံးတဲ့ မူဝါဒတွေဟာ ရင်းမြစ်တွေကို အပြည့်အ၀သုံးကာ
    အချိန်တော်တော်ကြာကြာ စီမံပြီး လူသိရှင်ကြားကြေငြာ၊ စနစ်တကျ အကောင်အထည်ဖော်ခဲ့တာ ဖြစ်ပါတယ်။ ဝီဂါလိုလူမျိုးစုကို တစ်ခုလုံးဖြစ်စေ တစ်စိတ်တစ်ပိုင်းဖြစ်စေ ဖျက်ဆီးဖျောက်ဖျက်လိုတဲ့ ရည်ရွယ်ချက်မျိုး ရှိတယ်ဆိုတာ ငြင်းလို့ကို မရပါဘူး။ ဒါ့ကြောင့် ဂျီနီဗာသဘောတူညီချက်ကို ချိုးဖောက်ပြီး ဝီဂါတွေအပေါ် လူမျိုးတုန်းသတ်ဖြတ်နေတာအတွက် တရုတ်အစိုးရက လုံး၀ တာဝန်ခံရမှာ ဖြစ်ပါတယ်” လို့ အစီရင်ခံစာမှာ ဖော်ပြထားပါတယ်။

    အမေရိကန်၊ ကနေဒါနဲ့ နယ်သာလန် လွှတ်တော်တွေက တရုတ်အစိုးရရဲ့ ဝီဂါတွေအပေါ် ကျူးလွန်မှုကို လူမျိုးတုန်းသတ်ဖြတ်မှုအဖြစ် သတ်မှတ်ထားပြီး၊ တာဝန်ရှိတဲ့ တရုတ်ခေါင်းဆောင်တွေအပေါ် အမေရိကန်က အရေးယူ ပိတ်ဆို့မှုတွေလည်း ပြုလုပ်ထားပါတယ်။

    တရုတ်အစိုးရကတော့ လူမျိုးတုန်းသတ်ဖြတ်တယ်ဆိုတဲ့ စွပ်စွဲချက်တွေကို တစ်စိုက်မတ်မတ် ငြင်းဆိုထားပါတယ်။

    Ref: Aljazeera

  • တရုတ်အစိုးရက ဝီဂါများကို မတရားဖမ်းဆီးထောင်ချမှု သိသိသာသာ မြင့်တက်လာ

    တရုတ်အစိုးရက ဝီဂါများကို မတရားဖမ်းဆီးထောင်ချမှု သိသိသာသာ မြင့်တက်လာ

    ဖေဖော်ဝါရီ ၂၄၊ ၂၀၂၁
    M-Media

    ဝီဂါများအား အကျဉ်းချထားသည့် အကျဉ်းစခန်း

    -နိုင်ငံအနောက်ပိုင်း ရှင်ကျန်းပြည်နယ်က ဝီဂါနဲ့ အခြား လူနည်းစု အစ္စလာမ်ဘာသာဝင်တွေကို ခေါင်းစဉ်အမျိုးမျိုးတပ်ကာ ဖမ်းဆီး ထောင်ချမှု​တွေကို တရုတ်အစိုးရက ပိုလုပ်လာတယ်လို့ လူ့အခွင့်အရေးစောင့်ကြည့်အဖွဲ့ HRW က ပြောကြားလိုက်ပါတယ်။

    ဝီဂါတွေ မတရား ဖမ်းဆီးထောင်ချခံရမှုနဲ့ပတ်သက်ပြီး HRW က ဒီကနေ့မှာ အစီရင်ခံစာတစ်စောင်ကို ထုတ်ပြန်ခဲ့တာပါ။

    ၂၀၁၆ ခုနှစ်ကတည်းက ရှင်ကျန်းပြည်နယ်မှာရှိတဲ့ ဝီဂါ စုစုပေါင်း ၂ သိန်း ၅ သောင်းကျော်လောက် ဒီလို ဖမ်းဆီးထောင်ချခံခဲ့ရကြောင်း အစီရင်ခံစာမှာ ဖော်ပြထားပါတယ်။

    “တရားဥပဒေအရလို့ ခေါင်းစဉ်တပ်ထားပေမယ့် ရှင်ကျန်းမှာ အကျဉ်းချခံရတဲ့ ဝီဂါတော်တော်များများဟာ သာမန်ပြည်သူတွေဖြစ်ပြီး သူတို့ရဲ့ နေ့စဉ်ဘ၀ အသက်ရှင်နေထိုင်မှုနဲ့ ဘာသာရေးကျင့်သုံးမှုတွေကြောင့် ပြင်ဒဏ်ချမှတ်ခံရတာ ဖြစ်ပါတယ်” လို့ HRW က သုတေသနပညာရှင် မာယာဝမ်က ပြောပါတယ်။

    အဲဒီလို မတရားထောင်ချမှုဟာ ၂၀၁၇ ခုနှစ်ကနေ ၂၀၁၉ ခုနှစ်အတွင်း သိသိသာသာကို မြင့်တက်လာခဲ့တာပါ။ ၂၀၁၆ ခုနှစ်မှာ လူ ၄ သောင်း အကျဉ်းချခံခဲ့ရပြီး၊ ၂၀၁၇ ခုနှစ် တစ်သိန်းနီးပါးအထိ မြင့်တက်လာပါတယ်။

    ဘယ်အစားအသောက်က စားလို့မရဘူး (ဟာရမ်ဖြစ်တယ်)၊ ဘယ်အစားအသောက်က စားလို့ရတယ် (ဟာလာလ်ဖြစ်တယ်) ဆိုတာမျိုး ပြောတာ၊ နိုင်ငံရပ်ခြားက ဆွေမျိုးအတွက် လက်ဆောင်ယူသွားတာ၊ အချင်းချင်း စကားများရန်ဖြစ်တာလို ကိစ္စတွေအတွက် ဖမ်းဆီးပြီး နှစ်ရှည် ထောင်ချတာမျိုးပါ။

    ရဲတပ်ဖွဲ့၊ ရှေ့နေတွေနဲ့ တရားရုံးတွေဟာ ‘အကြမ်းဖက်ဝါဒ တိုက်ဖျက်ရေး’ ခေါင်းစဉ်နဲ့ မြန်မြန်ဆန်ဆန် တရားစွဲဆိုထောင်ချပြီး တော်တော်များများကတော့ အမှန်တကယ် ရာဇဝတ်မှုကျူးလွန်မှု မရှိသူတွေဖြစ်တယ်လို့ HRW ရဲ့ အစီရင်ခံစာမှာ ဖော်ပြထားပါတယ်။

    တရုတ်အစိုးရဟာ ရှင်ကျန်းပြည်နယ်က ဝီဂါနဲ့ အခြား အစ္စလာမ်ဘာသာဝင် လူနည်းစု တစ်သန်းလောက်ကို အကျဉ်းစခန်းထဲမှာ ထိန်းသိမ်းပြီး လူမျိုးနဲ့ ဘာသာပျောက်အောင် လုပ်ဆောင်တာ၊ အမျိုးသမီးတွေကို သားကြောဖြတ်တာ၊ အဓမ္မလုပ်အားခိုင်းစေတာ စတဲ့ ညှမ်းပမ်းမှုပေါင်းစုံ လုပ်ဆောင်နေတယ်လို့ နိုင်ငံတကာ မီဒီယာတွေနဲ့ လူ့အခွင့်အရေးအဖွဲ့တွေက ဖော်ထုတ်ခဲ့ကြပါတယ်။

    ဒီလုပ်ရပ်တွေဟာ လူမျိုးတုန်းသတ်ဖြတ်မှုမြောက်တယ်လို့ အမေရိကန်နဲ့ ကနေဒါ လွှတ်တော်တို့က သတ်မှတ်ထားပါတယ်။

    “ရှင်ကျန်းမှာ လွတ်လပ်တဲ့ စုံစမ်းစစ်ဆေးမှုလုပ်နိုင်ရေး နိုင်ငံတကာက တရုတ်အစိုးရကို ဖိအားပိုပေးဖို့ လိုပါတယ်။ ​​ဒါဟာ မတရား ဖမ်းဆီးထောင်ချခံရတဲ့သူတွေ ပြန်လည်လွတ်မြောက်ဖို့ အကောင်းဆုံး မျှော်လင့်ချက် ဖြစ်ပါတယ်” လို့ မာယာဝမ်က ထည့်သွင်းပြောဆိုခဲ့ပါတယ်။

    Ref: Aljazeera

  • ဝီဂါများအပေါ် တရုတ်၏ညှင်းပမ်းမှု လူမျိုးတုန်းသတ်ဖြတ်မှုမြောက်ကြောင်း ကနေဒါ ဆုံးဖြတ်

    ဝီဂါများအပေါ် တရုတ်၏ညှင်းပမ်းမှု လူမျိုးတုန်းသတ်ဖြတ်မှုမြောက်ကြောင်း ကနေဒါ ဆုံးဖြတ်

    ဖေဖော်ဝါရီ ၂၃၊ ၂၀၂၁
    M-Media

    ရှင်ကျန်းရှိ ဝီဂါများအား ထိန်းသိမ်းထားသော အကျဉ်းစခန်းတစ်ခု၏ ဂိတ်ပေါက်

    -ဝီဂါမွတ်စလင်တွေအပေါ် တရုတ်အစိုးရရဲ့ ဖိနှိပ်ညှင်းပမ်းမှုတွေဟာ လူမျိုးတုန်းသတ်ဖြတ်မှု မြောက်တယ်လို့ ကနေဒါလွှတ်တော်က ဒီကနေ့မှာ ဆုံးဖြတ်လိုက်ပါတယ်။

    လွှတ်တော်ထဲက အာဏာရပါတီနဲ့ အတိုက်အခံပါတီ အမတ်တွေအားလုံးရဲ့ ထောက်ခံမှုနဲ့ ဒီဆုံးဖြတ်ချက် ချမှတ်နိုင်ခဲ့တာပါ။ ဝီဂါကိစ္စကို လူမျိုးတုန်းသတ်ဖြတ်မှုအဖြစ် လွှတ်တော်က သတ်မှတ်တာဟာ အမေရိကန်ပြီးရင် ကနေဒါက ဒုတိယမြောက်နိုင်ငံ ဖြစ်ပါတယ်။

    ဝီဂါတွေအပေါ် ဖိနှိပ်ညှင်းပမ်းမှုတွေကို တရုတ်အစိုးရက ဆက်လက်ဆောင်ရွက်နေမယ်ဆိုရင် ၂၀၂၂ ခုနှစ် ဘေဂျင်းမှာကျင်းပ​ဖို့ ပြုလုပ်ထားတဲ့ ဆောင်းရာသီအိုလံပစ်ပြိုင်ပွဲကို တစ်ခြားနိုင်ငံရွှေ့ရေး အိုလံပစ်ကော်မတီကို တိုက်တွန်းမယ့် ဆုံးဖြတ်ချက်တစ်ခုကိုလည်း ကနေဒါလွှတ်တော်က အတည်ပြုခဲ့ပါတယ်။

    တရုတ်နိုင်ငံအနောက်ပိုင်း ရှင်ကျန်းပြည်နယ်က ဝီဂါနဲ့ အခြား လူနည်းစုအစ္စလာမ်ဘာသာ၀င်တွေဟာ တရုတ်အစိုးရရဲ့ ဖိနှိပ်ညှင်းပမ်းမှုကို ခံနေရတာ ဖြစ်ပါတယ်။

    အနည်းဆုံး လူ ၁ သန်းလောက်ကို အကျဉ်းစခန်းတွေထဲ ထည့်ထားပြီး လူမျိုးရေးနဲ့ ဘာသာရေး ဓလေ့ထုံးတမ်းတွေ ပပျောက်အောင် လုပ်ဆောင်တာ၊ ကလေးမမွေးနိုင်အောင်လုပ်တာ စတဲ့ လူ့အခွင့်အရေးချိုးဖောက်မှုပေါင်းများစွာကို တရုတ်အစိုးရက ဆောင်ရွက်နေတယ်လို့ နိုင်ငံတကာမီဒီယာတွေ၊ လူ့အခွင့်အရေးအဖွဲ့တွေက လေ့လာဖော်ထုတ်ခဲ့ပါတယ်။

    တရုတ်အစိုးရကတော့ ဒီသတင်းတွေကို ငြင်းထားပါတယ်။

    ကနေဒါရဲ့ ဒီကနေ့ဆောင်ရွက်ချက်ကို တရုတ်က ရှုတ်ချခဲ့ပြီး သံတမန်ကြောင်းအရ ပြင်းပြင်းထန်ထန် ကန့်ကွက်ထားတယ်လို့ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ပြောပါတယ်။

    ကနေဒါလွှတ်တော်ရဲ့ ဒီဆုံးဖြတ်ချက်ကို ဝန်ကြီးချုပ် ထရူဒူဦးဆောင်တဲ့ ကနေဒါအစိုးရက ထောက်ခံတာမျိုးမလုပ်ဘဲ ကြားနေပါတယ်။

    အတိုက်အခံပါတီခေါင်းဆောင် အီရင် အိုတိုလီက စီးပွားရေးဆိုင်ရာ အခွင့်အလမ်းတစ်ချို့ကို စတေးရနိုင်ပေမယ့် လူ့အခွင့်အရေးနဲ့ လူသားဂုဏ်သိက္ခာအတွက် ရပ်တည်ရမယ်ဆိုတဲ့ ခိုင်မာရှင်းလင်းတဲ့ သတင်းစကားမျိုး ပေးဖို့ ဒီဆုံးဖြတ်ချက်က လိုအပ်တယ်လို့ လွှတ်တော်မှာ မဲမခွဲခွင် ပြောကြားခဲ့ပါတယ်။

    Ref: BBC

  • ဝီဂါများအပေါ် တရုတ်၏ ဖိနှိပ်မှု လူမျိုးတုန်းသတ်ဖြတ်မှုမြောက်နိုင်ဟု ကန်လွှတ်တော် သုံးသပ်

    ဝီဂါများအပေါ် တရုတ်၏ ဖိနှိပ်မှု လူမျိုးတုန်းသတ်ဖြတ်မှုမြောက်နိုင်ဟု ကန်လွှတ်တော် သုံးသပ်

    ဇန်နဝါရီ ၁၅၊ ၂၀၂၁
    M-Media

    -နိုင်ငံအနောက်ပိုင်းက ဝီဂါမွတ်စလင်တွေအပေါ် တရုတ်နိုင်ငံရဲ့ ဖိနှိပ်မှုဟာ လူမျိုးတုန်းသတ်ဖြတ်မှုအထိ မြောက်နိုင်တဲ့ အထောက်အထားတွေ တွေ့ရတယ်လို့ အမေရိကန်လွှတ်တော်ရဲ့ စုံစမ်းစစ်ဆေးရေးအဖွဲ့က ပြောကြားလိုက်ပါတယ်။

    တရုတ်နိုင်ငံဆိုင်ရာ လွှတ်တော်ကော်မရှင် (CECC) ဟာ ဆန်းစစ်သုံးသပ်မှုတွေ ပြုလုပ်ခဲ့ပြီးတဲ့နောက် မနေ့က အစီရင်ခံစာတစ်ခု ထုတ်ပြန်ခဲ့တာပါ။

    ပြီးခဲ့တဲ့နှစ်မှာ ရရှိခဲ့တဲ့ သက်သေအထောက်အထားအသစ်တွေကိုကြည့်ရင် တရုတ်အစိုးရရဲ့လုပ်ရပ်တွေဟာ လူသားထုအပေါ်ကျူးလွန်တဲ့ ရာဇဝတ်မှုအထိ ဖြစ်နေပြီး လူမျိုးတုန်းသတ်ဖြတ်မှုမြောက်နိုင်တယ်လို့ အစီရင်ခံစာမှာ ဖော်ပြထားပါတယ်။ တရုတ်အစိုးရဟာ အမေရိကန်မှာရှိနေတဲ့ ဝီဂါတွေကိုပါ နှောက်ယှက်နေတယ်လို့ CECC က စွပ်စွဲထားပါတယ်။

    ရှင်ကျန်းပြည်နယ်မှာ တရုတ်ဟာ အကျဉ်းစခန်းတွေဆောက်ပြီး ဝီဂါနဲ့ အခြား အစ္စလာမ်ဘာသာဝင်လူမျိုးစု ၁ သန်းလောက်ကို ချုပ်နှောင် ညှင်းပမ်းနေတယ်လို့ အမေရိကန်၊ ကုလနဲ့ နိုင်ငံတကာမီဒီယာတွေက ပြီးခဲ့တဲ့နှစ်တွေမှာ ဖော်ပြခဲ့ကြပါတယ်။

    တရုတ်အစိုးရက​ ဒါတွေဟာ အသက်မွေးပညာသင်ကျောင်းတွေသာဖြစ်ပြီး ဝီဂါတွေမှာရှိနေတဲ့ အစွန်းရောက်ဝါဒကို တိုက်ဖျက်ဖို့ လုပ်ဆောင်တာဖြစ်တယ်လို့ တုန့်ပြန်ထားပါတယ်။

    ဘာသာရေးခေါင်းဆောင်တွေ လူ့အခွင့်အရေး တက်ကြွလှုပ်ရှားသူတွေက တရုတ်အစိုးရရဲ့ ဝီဂါတွေအပေါ် ညှင်းပမ်းမငဟာ လူသားထုအပေါ် ကျူးလွန်တဲ့ ရာဇဝတ်မှု၊ လူမျိုးတုန်းသတ်ဖြတ်မှု မြောက်နိုင်တယ်လို့ စွပ်စွဲပြောဆိုထားပါတယ်။

    ရှင်းကျန်းပြည်နယ်မှာ “ရက်စက်ကြမ်းကြုတ်မှုတွေ ဖြစ်နေလားဆိုတာ” ဆုံးဖြတ်ထုတ်ပြန်ဖို့ ​CECC ရဲ့ အစီရင်ခံစာမှာ အမေရိကန်အစိုးရကို တိုက်တွန်းထားပါတယ်။ ဒီဇင်ဘာ ၂၇ ရက်နေ့က အတည်ပြုတဲ့ ဥပဒေအရ ရက် ၉၀ အတွင်း ဆုံးဖြတ်ချက်ကို ထုတ်ပြန်ရမှာပါ။

    CECC ရဲ့ ပူးတွဲဥက္ကဌ ဒီမိုကရက်တစ် လွှတ်တော်အမတ် ဂျင် မက်ဂါဗန်က ပြီးခဲ့တဲ့နှစ်အတွင်း တရုတ်ရဲ့ လူ့အခွင့်အရေး ချိုးဖောက်မှုတွေဟာ ‘အံ့ဩတုန်လှုပ်စရာကောင်းလွန်းတယ်’ လို့ ပြောကြားခဲ့ပြီး တရုတ်ကို အရေးယူဖို့ပိတ်ဆို့မှုတွေ လုပ်ဆောင်ဖို့ လွှတ်တော်နဲ့ နောက်တက်မယ့် သမ္မတဂျိုးဘိုင်ဒန်အစိုးရတို့ကို တိုက်တွန်းခဲ့ပါတယ်။

    “ရုန်းကန်တိုက်ပွဲဝင်နေရတဲ့ တရုတ်ပြည်သူတွေနဲ့အတူ အမေရိကန်က မားမားမတ်မတ် ရပ်တည်ဖို့လိုပြီး တရုတ်အစိုးရရဲ့ လူ့အခွင့်အရေး ချိုးဖောက်မှုတွေကို ကမ္ဘာကြီးက ညီညီညွတ်ညွတ်တုန့်ပြန်အရေးယူရာမှာ အမေရိကန်က ဦးဆောင်ရပါလိမ့်မယ်”

    လူ့အခွင့်အရေးချိုးဖောက်မှု၊ ကိုရိုနာဗိုင်းရပ်စ်၊ တောင်တရုတ်ပင်လယ်အရေး၊ သူလျှိုလုပ်မှု စတာတွေကြောင့် အမေရိကန်နဲ့ တရုတ်ကြားက ဆက်ဆံရေးဟာ သမိုင်းတစ်လျှောက် အနိမ့်ဆုံးအဆင့်ကို ရောက်နေပါတယ်။

    လူမျိုးတုန်းသတ်ဖြတ်မှု ကျူးလွန်တယ်လို့ အမေရိကန်က ဆုံးဖြတ်ထုတ်ပြန်တာဟာ တရုတ်ကို နိုင်ငံတကာအသိုင်းအဝိုင်းအလယ်မှာ အရှက်ရစေမှာ ဖြစ်ပါတယ်။

    သမ္မတသစ် ဂျိုးဘိုင်ဒန်က တရုတ်အစိုးရဟာ ရှင်ကျန်းပြည်နယ်မှာ လူမျိုးတုန်းသတ်ဖြတ်မှု ကျူးလွန်နေတယ်လို့ နိုဝင်ဘာ ရွေးကောက်ပွဲ မဲဆွယ်မှုမှာ တရားဝင် ထုတ်ပြောခဲ့ပါတယ်။

    အောက်တိုဘာလတုန်းက သမ္မတထရမ့်ရဲ့ အမျိုးသားလုံခြုံရေး အကြံပေး ရောဘတ် အိုဘရိုင်ယန်က တရုတ်အစိုးရဟာ ရှင်ကျန်းပြည်နယ်မှာ ‘လူမျိုးတုန်းသတ်ဖြတ်မှုနီးနီး’ ကျူးလွန်နေတယ်လို့ ထုတ်ပြောခဲ့သလို၊ အမေရိကန်အစိုးရ တာဝန်ရှိသူတွေကလည်း ရှင်ကျန်းပြည်နယ်က ​အကျဉ်းစခန်းတွေအကြောင်း အကြိမ်ကြိမ် ဝေဖန်ခဲ့ပါတယ်။

    ကုလသမဂ္ဂရဲ့ လူမျိုးတုန်းသတ်ဖြတ်မှု အဓိပ္ပါယ်ဖွင့်ဆိုချက်ထဲမှာ “လူအုပ်စုတစ်စုကို ပစ်မှတ်ထားပြီး ကလေးမွေးဖွားမှုတားမြစ်ခြင်း” ဆိုတဲ့အချက် ပါဝင်ပြီး ရှင်ကျန်းက တရုတ်အစိုးရဲ့ ဆောင်ရွက်ချက်တွေက ဒီအချက်နဲ့ ငြိစွန်းနေပါတယ်။

    တရုတ်အစိုးရဟာ ဝီဂါအမျိုးသမီးတွေကို ပစ်မှတ်ထားပြီး သားကြောဖြတ်တာ၊ ကလေးဖျက်ချခိုင်းတာတွေကို အဓမ္မလုပ်ဆောင်နေတာပါ။

    လူမျိုးတုန်းသတ်ဖြတ်တဲ့နိုင်ငံလို့ အမေရိကန်က ကြေငြာလိုက်ရင် နိုင်ငံတကာ ကုမ္ပဏီတွေအနေနဲ့ အဲဒီနိုင်ငံမှာ စီးပွားရေးလုပ်ငန်းလုပ်ဖို့ ခက်ခဲသွားမှာ ဖြစ်ပါတယ်။

    ဝီဂါတွေရဲ့ လုပ်အားကို ခေါင်းပုံဖြတ်အမြတ်ထုတ်ကာ လည်ပတ်နေတဲ့ စက်ရုံတွေက ထွက်ကုန်တွေကိုလည်း အမေရိကန်က အခုနောက်ပိုင်းမှာ တင်ပို့ခွင့် ပိတ်ပင်မှုတွေ ပြုလုပ်လာပါတယ်။

    Ref: Reuters

  • ဝီဂါလူမျိုးအပေါ်  ဖိနှိပ်မှုတွင် ပါဝင်နေသည့် Huawei ကုမ္ပဏီနှင့် စပွန်ဆာရပ်ဆိုင်းကြောင်း ဂရီဇ်မန်း ကြေငြာ

    ဝီဂါလူမျိုးအပေါ် ဖိနှိပ်မှုတွင် ပါဝင်နေသည့် Huawei ကုမ္ပဏီနှင့် စပွန်ဆာရပ်ဆိုင်းကြောင်း ဂရီဇ်မန်း ကြေငြာ

    ဒီဇင်ဘာ ၁၁၊ ၂၀၂၀
    M-Media

    -တရုတ်နိုင်ငံအနောက်ပိုင်း ရှင်ကျန်းဒေသက ဝီဂါမွတ်စလင်တွေပေါ် တရုတ်အစိုးရက ဖိနှိပ်ညှင်းပမ်းမှုမှာ Huawei ကုမ္ပဏီက ပါဝင်နေတယ်လို့ သတင်းထွက်လာတဲ့အတွက် ဒီကုမ္ပဏီကနဲ့ မိတ်ဖက်ဆက်ဆံရေးကို ရပ်ဆိုင်းကြောင်း ပြင်သစ်ဘောလုံးအသင်းရဲ့ နာမည်ကျော်တိုက်စစ်မှူး အန်တိုနီ ဂရီဇ်မန်းက မနေ့မှာ ထုတ်ပြန်လိုက်ပါတယ်။

    ဘာစီလိုနာတိုက်စစ်မှူး ဂရီဇ်မန်းဟာ Huawei ရဲ့ Brand Ambassador အဖြစ် ၂၀၁၇ ခုနှစ်မှာ စတင် ခန့်အပ်ခံရတာပါ။

    “မျက်နှာကို စကန်ဖတ်ပြီး ဘယ်သူဘယ်၀ါဆိုတာ ဖော်ထုတ်တဲ့ နည်းပညာ (Facial Recognition) အသုံးပြုပြီး ‘ဝီဂါတွေကို စောင့်ကြည့်တဲ့စနစ်’ ဖော်ဆောင်ရာမှာ Huawei ကုမ္ပဏီက ကူညီပေးခဲ့တယ်ဆိုတဲ့ ခိုင်မာတဲ့ သံသယတွေ ထွက်လာပြီးတဲ့နောက် ဒီကုမ္ပဏီနဲ့ မိတ်ဖက်အဖြစ် ဆောင်ရွက်နေမှုကို ချက်ခြင်း ရပ်ဆိုင်းလိုက်ပါတယ်” လို့ ဂရီဇ်မန်းရဲ့ ထုတ်ပြန်ချက်မှာ ဖော်ပြထားပါတယ်။

    ဒီစွပ်စွဲချက်တွေကို ငြင်းဆိုနေတာထက် လူအစုအလိုက်အပြုံလိုက် ဖိနှိပ်ညှင်းပမ်းတဲ့စနစ်ကို ဆန့်ကျင်ရေး ဆောင်ရွက်ဖို့၊ ကုမ္ပဏီရဲ့ လွှမ်းမိုးမှုကို အသုံးချပြီး လူ့အဖွဲ့အစည်းအတွင်းက အမျိုးသားတွေ၊ အမျိုးသမီးတွေရဲ့ လူ့အခွင့်ရေးကို လေးစားရေးမှာ ကူညီဆောင်ရွက်ပေးဖို့လည်း ဂရီဇ်မန်းက Huawei ကို တိုက်တွန်းခဲ့ပါတယ်။

    စောင့်ကြည့်ကင်မရာတွေက ဝီဂါတွေရဲ့မျက်နှာတွေကို ဖမ်းယူရရှိတာနဲ့ ရဲတပ်ဖွဲ့ကို အကြောင်းကြားတဲ့ တရုတ်အစိုးရရဲ့ စောင့်ကြည့်စနစ်မှာ Huawei ကုမ္ပဏီက ပါဝင်ပတ်သက်နေတယ်လို့ အမေရိကန်အခြေစိုက် ထောက်လှမ်းရေးဆိုင်ရာ သုတေသနအဖွဲ့ IPVM ရဲ့ အင်္ဂါနေ့က ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

    တရုတ်အစိုးရဟာ ဝီဂါတွေအပေါ် စောင့်ကြည့်ကာ ဘာသာရေးလူမျိုးရေး ဖိနှိပ်မှုတွေ လုပ်ဆောင်နေတယ်ဆိုတဲ့ သတင်းတွေဟာ ပြီးခဲ့တဲ့ နှစ်အနည်းငယ်ကတည်းက ထွက်လာတာဖြစ်ပါတယ်။

    ရှင်ကျန်းပြည်နယ်မှာ အကျဉ်းစခန်းတွေဆောက်ပြီး အနည်းဆုံး ဝီဂါနဲ့ အခြား အစ္စလာမ်ဘာသာဝင် လူမျိုးစု ၁ သန်းလောက်ကို ဖမ်းဆီးထိန်းသိမ်းကာ ဘာသာပျက်အောင်၊ ယဉ်ကျေးမှုပျောက်အောင် စီမံကိန်းချ လုပ်ဆောင်နေတယ်လို့ ၂၀၁၈ ခုနှစ်ကနေ စပြီး ကမ္ဘာ့မီဒီယာတွေနဲ့ ကုလသမဂ္ဂအဖွဲ့က ကျယ်ကျယ်ပြန့်ပြန့် ဖော်ပြခဲ့ကြပါတယ်။

    တရုတ်အစိုးရကတော့ ဒီစွပ်စွဲချက်တွေကို ငြင်းပါတယ်။

    Eurasian Sports Industry က ပရော်ဖက်ဆာ ဆိုင်မွန် ချဒ်ဝစ်က အားကစားသမားတွေ တရုတ်ကုမ္ပဏီနဲ့ စပွန်ဆာစာချုပ် ဖျက်သိမ်းတာဟာ မကြုံစဖူးကိစ္စဖြစ်ပြီး ဂရီဇ်မန်းဟာ အပြောတင်မဟုတ်ဘဲ လက်တွေ့လုပ်ပြခဲ့တယ်လို့ ပြောကြားခဲ့ပါတယ်။

    Ref: Aljazeera