News @ M-Media

Tag: Uyghur

  • မွတ်စလင်နိုင်ငံအများစုက ကန့်ကွက်ခဲ့သည့် လူ့အခွင့်အရေးကောင်စီမှ ၀ီဂါအရေး ဆွေးနွေးမှု

    အောက်တိုဘာ ၁၀၊ ၂၀၂၂
    M-Media

    -တရုတ်နိုင်ငံ အနောက်ပိုင်းက ၀ီဂါလူမျိုးတွေ ညှင်းပမ်းခံရမှုနဲ့ပတ်သက်ပြီး ဆွေးနွေးဖို့ ပြီးခဲ့တဲ့တစ်ပတ်က ကုလလူ့အခွင့်အရေးကောင်စီမှာ မဲခွဲမှု ရှုံးနိမ့်သွားခဲ့ပါတယ်။

    တရုတ်အစိုးရက ဒါဟာ ‘အောင်ပွဲ’ တစ်ခုလို့ ပြောဆို သုံးနှုန်းခဲ့ပါတယ်။

    ၀ီဂါအရေးဆွေးနွေးဖို့ မဲခွဲရာမှာ ထောက်ခံမဲက ၁၇ မဲသာ ရှိခဲ့ပြီး၊ ကန့်ကွက်မဲ ၁၉ မဲ ရှိခဲ့တာပါ။ ကန့်ကွက်မဲအများစုကို မွတ်စလင်နိုင်ငံတွေက ပေးခဲ့တာဖြစ်ကာ အဲဒီအထဲမှာ အင်ဒိုနီးရှား၊ ဆိုမာလီယာ၊ ပါကစ္စတန်၊ ယူအေအီးနဲ့ ကာတာတို့ ပါ၀င်ပါတယ်။

    မဲမပေးဘဲနေခဲ့တဲ့ ၁၁ နိုင်ငံထဲမှာလည်း မလေးရှားလို့ မွတ်စလင်နိုင်ငံတွေ ပါ၀င်ပါတယ်။

    တရုတ်နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ ဟွာချွမ်ယင်က လူ့အခွင့်အရေးကောင်စီမှာ ၀ီဂါအရေး ဆွေးနွေးဖို့ မအောင်မြင်မှုဟာ ဖွံ့ဖြိုးဆဲနိုင်ငံတွေအတွက် အောင်ပွဲ၊ အမှန်တရားနဲ့ တရားမျှတမှုအတွက် အောင်ပွဲဖြစ်တယ်လို့ ပြောကြားခဲ့ပါတယ်။

    “လူ့အခွင့်အရေး ခေါင်းစဥ်တပ်ပြီး လိမ်ညာပြောဆိုတာ၊ အခြားနိုင်ငံတွေရဲ့ ပြည်တွေရေးကို ၀င်ရောက်စွက်ဖက်တာ၊ အခြားသူတွေကို ထိန်းချုပ်တာ၊ ဖိအားပေးတာ၊ အရှက်ရအောင်လုပ်တာမျိုးတွေ မဖြစ်သင့်ပါဘူး”

    တရုတ်အစိုးရဟာ နိုင်ငံအနောက်ပိုင်း ရှင်ကျန်းပြည်နယ်က ၀ီဂါနဲ့ အခြားလူမျိုးစုငယ် တစ်သန်းလောက်ကို အကျဥ်းစခန်းတွေထဲ ထည့်ပြီး လူမျိုး၊ ဘာသာနဲ့ ယဥ်ကျေးမှု အမှတ်သညာပျောက်အောင် ညှင်းပမ်းကာ တရုတ်ဇာတ်သွင်းနေတာ ဖြစ်ပါတယ်။

    ဒီလို လူ့အခွင့်အရေး ချိုးဖောက်မှုတွေနဲ့ပတ်သက်ပြီး ကုလသမဂ္ဂက ၂၀၁၈ ခုနှစ်ကတည်းက စတင်က ထုတ်ဖော်ပြောဆိုလာခဲ့တာပါ။

    ပြီးခဲ့တဲ့လအနည်းငယ်က ရှင်ကျန်းက တရုတ်အာဏာပိုင်တွေရဲ့ လျှို့၀ှက်ညွှန်ကြားချက်တွေ ပေါက်ကြားလာခဲ့ပြီး ဒီစာရွက်စာတမ်းတွေဟာ ၀ီဂါတွေအပေါ် ညှင်းပမ်းမှုနဲ့ပတ်သက်တဲ့ ခိုင်မာတဲ့ သက်သေအထောက်အထားတွေ ဖြစ်ခဲ့ပါတယ်။

    Ref: Aljazeera

  • တရုတ်နိုင်ငံ ရှင်ကျန်းမှ ကုန်ပစ္စည်းများကို ပိတ်ပင်သည့် ဥပဒေတစ်ခုကို အမေရိကန်က အသက်သွင်း

    ဇွန် ၂၂၊ ၂၀၂၂
    M-Media

    -တရုတ်နိုင်ငံအနောက်ပိုင်း ရှင်းကျန်းဒေသမှာ ထုတ်လုပ်တဲ့ ကုန်ပစ္စည်းတွေအားလုံး တင်သွင်းခွင့်ပိတ်ပင်တဲ့ ဥပဒေကို အမေရိကန်က အင်္ဂါနေ့မှာ စတင် အသက်သွင်းလိုက်ပါတယ်။

    “၀ီဂါများအပေါ် လုပ်အားခေါင်းပုံဖြတ်မှု တားဆီးရေး အက်ဥပဒေ” လို့ အမည်ပေးထားတဲ့ ဒီဥပဒေကို ပြီးခဲ့တဲ့ ဒီဇင်ဘာမှာ သမ္မတ ဂျိုးဘိုင်ဒန်က အတည်ပြု လက်မှတ်ရေးထိုးခဲ့တာပါ။

    အမေရိကန် အကောက်ခွန်ဌာနက ဥပဒေကို အင်္ဂါနေ့မှာ စတင်ကျင့်သုံးခဲ့ပါတယ်။

    “လုပ်အားခေါင်းပုံဖြတ်မှု ကင်းစင်တဲ့ ကုန်သွယ်မှုဖြစ်လာရေး ဆောင်ရွက်ဖို့၊ ရှင်ကျန်းက ရက်စက်ကြမ်းကြုတ်မှုတွေကို ပွင့်ပွင့်လင်းလင်း ထုတ်ဖော်ပြောဆိုဖို့၊ လုပ်အား ခေါင်းပုံဖြတ်မှု အပါအ၀င် ၀ီဂါတွေအပေါ် လူ့အခွင့်အရေး ချိုးဖောက်မှုတွေကို ချက်ခြင်းရပ်တန့်ရေး တရုတ်အစိုးရကို ဆော်သြဖို့ မိတ်ဖက်နိုင်ငံတွေကို ကျွန်တော်တို့ တိုက်တွန်းပါတယ်” လို့ ကန်နိုင်ငံခြားရေး၀န်ကြီး အန်တိုနီ ဘလင်ကန်က ပြောကြားခဲ့ပါတယ်။

    အမေရိကန်ရဲ့ အခုဥပဒေအသစ်ကို စီးပွားရေး ကုမ္ပဏီတွေ သတိပြုနိုင်ရေး ဆက်လက်ဆောင်ရွက်သွားမယ်လို့လည်း ဘလင်ကန်က ဆိုပါတယ်။

    ၀ီဂါတွေအပေါ် လုပ်အားခေါင်းပုံဖြတ်ကာ လည်ပတ်နေတဲ့ ရှင်ကျန်းက လုပ်ငန်းတွေထဲမှာ အထည်ချုပ်လုပ်ငန်း၊ ဆိုလာ ပိုလီစီလီကွန် ထုတ်လုပ်ရေးလုပ်ငန်း၊ လျှပ်စစ်ပစ္စည်းထုတ်လုပ်ရေးလုပ်ငန်းတွေ ပါ၀င်ပါတယ်။

    အမေရိကန်ရဲ့ အခုဥပဒေအသစ်မှာ ရှင်ကျန်းက ပစ္စည်းတွေ တင်ပို့မှုကို ပိတ်ပင်တာအပြင်၊ ရှင်ကျန်းကကုန်ကြမ်းတွေ အသုံးပြု ထုတ်လုပ်တဲ့ အခြားကုမ္ပဏီက ပစ္စည်းတွေကိုလည်း တင်ပို့ခွင့် ပိတ်ပင်မှာ ဖြစ်ပါတယ်။

    တရုတ်ဟာ ရှင်ကျန်းမှာ အကျဥ်းစခန်းတွေဆောက်ပြီး ၀ီဂါနဲ့ အခြား လူမျိုးစုငယ်တွေကို ပိတ်လှောင်ကာ လူ့အခွင့်အရေး ချိုးဖောက်မှုတွေ လုပ်ဆောင်နေတယ်လို့ နိုင်ငံတကာ မီဒီယာတွေက ထုတ်ဖော်ရေးသားထားပါတယ်။

    တရုတ်ဟာ အစောပိုင်းမှာ ဒီသတင်းကို ငြင်းဆိုခဲ့ပေမယ့် နောက်ပိုင်းမှာ ၀န်ခံခဲ့ပြီး ရှင်ကျန်းမှာ ဆောက်လုပ်ထားတာတွေက အကျဥ်းစခန်းတွေ မဟုတ်ဘဲ၊ အသက်မွေးသင်တန်းကျောင်းတွေသာဖြစ်ကြောင်း၊ ၀ီဂါတွေဟာ မိမိဆန္ဒအလျောက် ဒီသင်တန်းတွေမှာ လာတက်နေတာဖြစ်ကြောင်း ထုတ်ပြန်ခဲ့ပါတယ်။

    ပြီးခဲ့တဲ့လ ရှင်ကျန်းရဲဌာန ဆာဗာကနေ ပေါက်ထွက်လာတဲ့ အချက်အလက်တွေမှာတော့ တရုတ်အစိုးရဟာ ၀ီဂါတွေကို လူမျိုး အမှတ်သညာ၊ ဘာသာတရား၊ ယဥ်ကျေးမှု ဓလေ့ထုံးတမ်းတွေ ပပျောက်သွားအောင် စနစ်တကျ စီမံနှိပ်ကွပ်နေတာကို တွေ့ရပြီး၊ ရှင်ကျန်းဒေသမှာ လူ့အခွင့်အရေးချိုးဖောက်မှု အများအပြား ဖြစ်နေတဲ့ အထောက်အထားတွေကို တွေ့ရှိခဲ့ရပါတယ်။

    Ref: Reuters

  • ၀ီဂါများအပေါ် တရုတ်အစိုးရ၏ ရက်စက်ကြမ်းကြုတ်မှုများကို အချက်အလက်အသစ်များက ထပ်မံအတည်ပြုနေ

    ၀ီဂါများအပေါ် တရုတ်အစိုးရ၏ ရက်စက်ကြမ်းကြုတ်မှုများကို အချက်အလက်အသစ်များက ထပ်မံအတည်ပြုနေ

    မေ ၂၄၊ ၂၀၂၂
    M-Media

    -တရုတ်နိုင်ငံအနောက်ပိုင်း ရှင်ကျန်းပြည်နယ်က ရဲတပ်ဖွဲ့ ဒေတာဘေ့စ်ကို ဟက်ကာတွေက ဖောက်ထွင်းပြီး အချက်အလက်တွေ ရယူခဲ့ရာမှာ ၀ီဂါတွေအပေါ် တရုတ်အစိုးရက ဘယ်လောက်အတိုင်းအတာအထိ ညှင်းပမ်းနှိပ်စက်နေလဲဆိုတာကို အသေးစိတ် တွေ့ခဲ့ရပါတယ်။

    ရှင်းကျန်းက ၀ီဂါနဲ့ အခြား အစ္စလာမ်ဘာသာ၀င်လူမျိုးစု တစ်သန်းလောက်ကို အကျဥ်းစခန်းထဲ ထည့်ပြီး သူတို့ရဲ့ ယဥ်ကျေးမှု၊ အနုပညာနဲ့ လူမျိုးပျောက်အောင် တရုတ်အစိုးရက လုပ်ဆောင်နေတယ်ဆိုပြီး နိုင်ငံတကာ အဖွဲ့အစည်းတွေက လွန်ခဲ့တဲ့ နှစ်အနည်းငယ်ကတည်းက ဖော်ပြလာခဲ့ကြတာပါ။

    တရုတ်အစိုးရက ဒါကို ပထမပိုင်းမှာ ငြင်းပေမယ့် နောက်ပိုင်းမှာတော့ ၀ီဂါတွေဟာ အသက်မွေး၀မ်းကျောင်းသင်တန်းကျောင်းတွေကို သူတို့ဆန္ဒနဲ့သူတို့ တက်ရောက်နေတာဖြစ်တယ်လို့ ပြောကြားခဲ့ပါတယ်။

    အခု ဟက်ကာတွေ ဖောက်ထွင်းရယူနိုင်ခဲ့တဲ့ မှတ်တမ်းတွေကို သုံးသပ်မှုအရ တရုတ်အစိုးရရဲ့ ပြောကြားမှုတွေဟာ လိမ်လည်ထားတာသားဖြစ်ပြီး မြေပြင်မှာ ၀ီဂါတွေဟာ နိုင်ငံတကာအသိုင်းအ၀ိုင်းကပြောသလို အကျဥ်းစခန်းထဲ အဓမ္မထည့်ပြီး နှိပ်စက်ခံနေရတယ်ဆိုတာကို ကွက်ကွက်ကွင်းကွင်း ပေါ်လွင်လာပါတယ်။

    လူမျိုးစု အမှတ်သညာ၊ ဘာသာရေး၊ ယဥ်ကျေးမှု ဓလေ့ထုံးတမ်းကို ဖျောက်ဖျက်တဲ့ လုပ်ငန်းစဥ်တွေ၊ အရက်မသောက်တာ၊ တရားနားထောင်တာလို၊ မွတ်စလင်အများစုရှိရာ နိုင်ငံကို သွားတာ စတဲ့ ကိစ္စမျိုးနဲ့ နှစ်ရှည်ထောင်ဒဏ်ချမှတ်တာ၊ ခေါင်းစဥ်မျိုးစုံတပ်ပြီး ဖမ်းဆီးအကျဥ်းချတာ၊ အကျဥ်းချထားသူတွေရဲ့ မိဘဆွေမျိုးတွေကိုပါ ဖမ်းဆီးပြီး အကျဥ်းစခန်းထဲ ထည့်ထားတာ၊ သားသမီးတွေကို အစိုးရဘော်ဒါဆောင် အဓမ္မပို့ပြီး ဦးနှောက်ကျဥ်းတာ စတဲ့ ဖိနှိပ်ညှင်းပမ်းမှု ပေါင်းစုံကို ဒီအခုပေါက်ကြားလာတဲ့ အချက်အလက်တွေမှာ တွေ့ရပါတယ်။

    ဒီအချက်အလက်တွေကို ကမ္ဘာတစ်၀ှမ်း နိုင်ငံပေါင်း ၁၁ နိုင်ငံက မီဒီယာအဖွဲ့အစည်း ၁၄ ခုကနေ ဆန်းစစ်အတည်ပြုထားတာ ဖြစ်ပါတယ်။

    ဘာတွေပါလဲ

    ကွန်ပျူတာပညာရှင်တွေ ဖောက်ထွင်းရယူခဲ့တဲ့ ဖိုင်တွေထဲမှာ ၂၀၁၈ ခုနှစ် ဇန်န၀ါရီလကနေ ဇူလိုင်လအတွင်း ရှင်ကျန်းက ရဲတွေ ရိုက်ယူထားတဲ့ မှတ်တမ်းဓာတ်ပုံ ၅၀၀၀ ကျော် ပါ၀င်ပါတယ်။

    တရုတ်အစိုးရ အကြီးတန်းအရာရှိတွေတဲ့ လျှို့၀ှက် ညွှန်ကြားချက်တွေ၊ ရဲတပ်ဖွဲ့ရဲ့ ဌာနတွင်းညွှန်ကြားစာတွေ၊ နှိပ်ကွပ်ရေးနည်းနာတွေ၊ အကျဥ်းစခန်းထဲမှာ ထိန်းသိမ်းခံထားရတဲ့ ၀ီဂါလူမျိုး တစ်ဦးချင်းစီရဲ့ အသေးစိတ်အချက်အလက်တွေ၊ လျှို၀ှက်စခန်းတွေရဲ့ တည်နေရာ စတာတွေကိုလည်း အချက်အလက်တွေထဲမှာ တွေ့ရပါတယ်။

    ၀ီဂါတွေရဲ့ မှတ်တမ်းဓာတ်ပုံပေါင်း ၅ ထောင်ကျော်ထဲက ၂၈၈၄ ဦးကို အခြား ရရှိထားတဲ့ အချက်အလက်တွေနဲ့ တိုက်ပြီး ဘယ်သူဘယ်၀ါလဲဆိုတာ ပညာရှင်တွေက ဖော်ထုတ်နိုင်ခဲ့ပါတယ်။

    တရုတ်အစိုးရက အကျဥ်းစခန်းတွေထဲမှာရှိတဲ့ ၀ီဂါတွေဟာ ကိုယ့်သဘောနဲ့ကိုယ် ဒီစခန်းတွေကို လာရောက်ပြီး အသက်မွေး၀မ်းကျောင်းပညာ သင်တယ်လို့ ပြောပေမယ့် ဓာတ်ပုံတွေက မျက်နှာအမူအရာတွေကိုကြည့်ရင် အဓမ္မ အကျဥ်းစခန်းထဲထည့်ထားတာကို ပေါ်လွင်နေစေပါတယ်။

    တရုတ်အစိုးရဟာ ၀ီဂါတော်တော်များများကို မုတ်ဆိတ်ထားတာ၊ ပု၀ါဆောင်းတာ၊ အရက်မသောက်တာ၊ ၀တ်ပြုဆုတောင်းတာ၊ မွတ်စလင်နိုင်ငံကို ခရီးသွားတာလို အကြောင်းအရင်းမျိုးတွေနဲ့ ဖမ်းဆီးပြီး နှစ်ရှည်ထောင်ဒဏ်ချတာ၊ အကျဥ်းစခန်းတွေထဲ ထည့်ထားတာတွေ လုပ်ဆောင်တာ ဖြစ်ပါတယ်။

    သားကြောင့် အမေကိုဖမ်းဆီး

    တာဂျီဂူလ် သာဟီရ်ဟာ အသက် ၆၀ ရှိပါပြီ။ သူမရဲ့သားဖြစ်သူက အရက်မသောက်၊ ဆေးလိပ်မသောက်တဲ့အတွက် တရုတ်အာဏာပိုင်တွေက ဘာသာရေးအစွန်းရောက်လို့ သတ်မှတ်ပြီး အကြမ်းဖက်စွဲချက်နဲ့ ထောင် ၁၀ နှစ်ချမှတ်ခဲ့ပါတယ်။ အဲဒီနောက် သာဟီရ်ကိုလည်း ၂၀၁၇ ခုနှစ်မှာ ကြံရာပါအဖြစ် ဖမ်းဆီးပြီး အကျဥ်းစခန်းထဲမှာ ထိန်းသိမ်းခဲ့ပါတယ်။

    တရုတ်အစိုးရဟာ ရှင်ကျန်းမှာ သူတို့အပြစ်ရှိသူလို့ သတ်မှတ်တဲ့သူတွေရဲ့ မိသားစုတွေ၊ ဆွေမျိုးတွေကိုပါ ဖမ်းဆီးအကျဥ်းချထားတာကို ရရှိခဲ့တဲ့ အချက်အလက်တွေမှာ တွေ့ရပါတယ်။

    ၀ီဂါအမျိုးသမီး ရာဟီလ်အိုမာရ်ဟာ မှတ်တမ်းတွေအရ အသက် ၁၅ နှစ်အရွယ်မှာ သူမကို တရုတ်အစိုးရက ဖမ်းဆီးကာ အကျဥ်းစခန်းထဲ ပို့လိုက်တာပါ။ ဒါဟာ ရရှိခဲ့တဲ့ အချက်အလက်မှတ်တမ်းတွေအရ အသက်အငယ်ဆုံး အကျဥ်းချ ခံရသူ ဖြစ်ပါတယ်။

    အသက် ၇၃ နှစ်ရှိပြီဖြစ်တဲ့ အနီဟန် ဟာမစ်ကတော့ မှတ်တမ်းတွေအရ အကျဥ်းစခန်ထဲမှာ ပိတ်လှောင်ခံရတဲ့ ၀ီဂါတွေထဲမှာ အသက်အကြီးဆုံး ဖြစ်ပါတယ်။

    ရှင်ကျန်းရဲတပ်ဖွဲ့ဖိုင်

    “ရှင်ကျန်းရဲတပ်ဖွဲ့ဖိုင်များ” လို့ အမည်ပေးထားတဲ့ အဲဒီအချက်အလက်တွေထဲမှာ ထောင်နဲ့ချီတဲ့ ဓာတ်ပုံတွေ၊ စာရွက်စာတမ်းတွေ ပါ၀င်ပါတယ်။

    ဒီအချက်အလက်တွေကို ရှင်ကျန်းရဲတပ်ဖွဲ့ရဲ့ ဆာဗာတွေကို ကွန်ပျူတာပညာရှင်တွေက ဖောက်ထွင်းရယူထားတာဖြစ်ပြီး ၀ီဂါအရေး လေ့လာနေတဲ့ အမေရိကန်အခြေစိုက် ပညာရှင် ဒေါက်တာ အေဒရီယန် ဇန့်ဆီ ပေးပို့ခဲ့ပါတယ်။ ဒေါက်တာဇန့်ဟာ အမေရိကန်အခြေစိုက် Victims of Communism Memorial Foundation က ပညာရှင်တစ်ယောက်ဖြစ်ပြီး ရရှိတဲ့အချက်အလက်တွေကို အတည်ပြုကာ သတင်းဌာနတွေဆီ ပေးပိုခဲ့ပါတယ်။

    မှတ်တမ်းတွေမှာပါတဲ့ လူတွေကို ဘီဘီစီက ဆက်သွယ်လို့ရပေမယ့် သူတို့ဘယ်သူဘယ်၀ါဆိုတာနဲ့ ဘယ်မှာရှိနေလဲဆိုတာ ထုတ်မပြောလိုကြဘူးလို့ ဆိုပါတယ်။

    ရရှိခဲ့တဲ့မှတ်တမ်းတွေဟာ ၂၀၁၈ ခုနှစ်အတွင်းက ဖြစ်ပါတယ်။ ၂၀၁၉ ခုနှစ်မှာ ရှင်ကျန်းပြည်နယ်နဲ့ပတ်သက်တဲ့ မှတ်တမ်းတွေ လျှို့၀ှက်ထိန်းသိမ်းမှုအဆင့်ကို တရုတ်အစိုးရက မြှင့်တင်လိုက်ပြီး၊ ဒီအတွက် ၂၀၁၉ ခုနှစ်က မှတ်တမ်းတွေ ပါမလာတာလို့ ပညာရှင်တွေက သုံးသပ်ပါတယ်။

    “ရတဲ့ အချက်အလက်တွေက ဘာမှ မတည်းဖြတ်ရသေးတဲ့ဟာတွေပါ။ လျှော့ပေါ့ရေးထားတာမရှိဘူး။ အကြောင်းအရာစုံတယ်။ ကျွန်တော်တို့မှာ အချက်အလက်အားလုံး ရှိနေပါတယ်”

    “ထိပ်တန်းလျို့၀ှက် စာရွက်စာတမ်းတွေ။ တရုတ်ခေါင်းဆောင်တွေ သူတို့အယူအဆကို ပွင့်ပွင့်လင်းလင်းပြောထားတဲ့ မှတ်တမ်းတွေ၊ ညွှန်ကြားလွှာတွေ၊ ဓာတ်ပုံတွေ၊ အစုံပါပဲ။ တရုတ်အစိုးရရဲ့ ၀ါဒဖြန့်မှုတွေ မဟုတ်ဘူးဆိုတာ ဗူးပေါ်သလို ပေါ်သွားပါပြီ”

    အကျဥ်းစခန်းများ

    ၀ီဂါလူမျိုးစုဒေသဖြစ်တဲ့ ရှင်ကျန်းပြည်နယ်မှာ တရုတ်အစိုးရက အကျဥ်းစခန်းကွန်ယက်တွေကို တည်ဆောက်ထားပြီး အနည်းဆုံး ၀ီဂါ ၁ သန်းလောက်ကို အကျဥ်းချထားပါတယ်။

    တရုတ်အစိုးရက ဒါတွေဟာ အသက်မွေး၀မ်းကြောင်း သင်တန်းကျောင်းတွေလို့ ကမ္ဘာကိုပြောထားပေမယ့် အခုရရှိတဲ့ အချက်အလက်တွေအရ အကျဥ်းထောင်ထက်တောင်ပိုဆိုးတဲ့နေရာတွေ ဖြစ်တယ်ဆိုတာ သိရှိခဲ့ရပါတယ်။

    အကျဥ်းစခန်းနဲ့ ပတ်သက်တဲ့ ညွှန်ကြားချက်တွေထဲမှာ စခန်းအတွင်း လက်နက်ကိုင်အစောင့်တွေသာ ချထား အသုံးပြုဖို့၊ ကင်းမျှော်စင်တွေမှာ စက်သေနတ်တွေ၊ စနိုက်ပါတွေ ချထားဖို့၊ ထွက်ပြေးတဲ့သူတွေကို နေရာတင်ပစ်သတ်ဖို့ စတာတွေ ပါ၀င်ပါတယ်။

    ဒါ့အပြင် အကျဥ်းစခန်းကလူတွေကို ရွှေ့ပြောင်းတာ၊ ဒါမှမဟုတ် ဆေးရုံပို့တာလို အခြေအနေမျိုးမှာတောင် ခေါင်းကိုအ၀တ်စွတ်ကာ၊ လက်ထိပ်ခြေထိပ်ခတ်ထား ရမယ်လို့ အာဏာပိုင်တွေက ညွှန်ကြားထားပါတယ်။

    ကျမ်းစာသင်သည့်အတွက် ထောင် ၁၀ နှစ်

    သူကတော့ အသက် ၅၈ နှစ်အရွယ် သူရ်ဆန် ကာဒရ်ပါ။ ၁၉၈၀ ပြည့်နှစ်တွေက အစ္စလာမ်ဘာသာရေးစာပေ လေ့လာမှု၊ တရားဟောမှုနဲ့ မကြာသေးခင်က မုတ်ဆိတ်အရှည်ထားမှုအတွက် အကြမ်းဖက်ခေါင်းစဥ်တပ်ပြီး ထောင်ဒဏ် ၁၆ နှစ်နဲ့ ၁၁ လ ချမှတ်ခံခဲ့ရသူဖြစ်ပါတယ်။

    လွန်ခဲ့တဲ့ ၄၊ ၅၊ ၁၀ နှစ်အရင်က လုပ်ခဲ့တဲ့ ကိစ္စတွေကြောင့် နှစ်ရှည်ထောင်ဒဏ်ချမှတ်ခံရတာကိုလည်း အချက်အလက်တွေမှာ တွေ့ရပါတယ်။

    ၀ီဂါအမျိုသားတစ်ဦးဆိုရင် ၂၀၁၀ ခုနှစ်က အဖွားဖြစ်သူနဲ့ ရက်အနည်းငယ် ကျမ်းစာသင်ခဲ့တဲ့အတွက် ၂၀၁၇ ခုနှစ်မှာ ထောင် ၁၀ နှစ် ချခံခဲ့ရပါတယ်။

    ဖုန်းထဲမှာ တရားနားထောင်တာ၊ VPN ဆော့ဖ်၀ဲ ထည့်ထားတာလို ကိစ္စမျိုးနဲ့ ထောင်ချခံရသူတွေ ရာထောင်ချီ ရှိပါတယ်။

    ဖုန်းရှိပြီး မသုံးလို့ဆိုတဲ့အမှုနဲ့ ၁၀ နှစ်လောက်ထောင်ချခံရသူတွေကိုလည်း မှတ်တမ်းတွေမှာ တွေ့ရပါတယ်။ ဖုန်းထဲ ပိုက်ဆံမရှိလို့ ဖုန်းမသုံးနိုင်တာဟာ သူတို့ရဲ့ ဒစ်ဂျစ်တယ်စောင့်ကြည့်မှုကို ရှောင်ရှားတယ်လို့ တရုတ်အာဏာပိုင်တွေက အမှုတွဲတွေမှာ ခေါင်းစဥ်တပ်ထားပါတယ်။

    ဒါတင်မကသေးဘဲ ‘ရန်ဖြစ်တယ်’ ‘၀တ္တရားနှောက်ယှက်တယ်’ ‘အကြမ်းဖက်၀ါဒ’ စသဖြင့် ခေါင်းစဥ်အမျိုးမျိုးနဲ့ တရုတ်ရဲတွေဟာ ၀ီဂါတွေကို ထောင် ၁၀ နှစ်ကနေ အနှစ် ၂၀၊ ၃၀ အထိ ချထားတာတွေကိုလည်း အချက်အလက်တွေမှာ တွေ့ရပါတယ်။

    အိမ်မှာနေသူတွေ

    အကျဥ်းစခန်းမှာ ထိန်းသိမ်းခြင်းမရခံတဲ့ ၀ီဂါတွေလည်း တရုတ်အစိုးရရဲ့ ဖိနှိပ်ညှင်းပမ်းမှုနဲ့ မလွတ်ပါဘူး။

    အိမ်မှာနေထိုင်နေတဲ့ ၀ီဂါတွေကို သက်ကြီးရွယ်အိုတွေနဲ့ ကလေးတွေပါမကျန် ရဲတွေက အချိန်အခါမရွေး ခေါ်ယူစစ်ဆေးတဲ့ အကြောင်းအရာတွေကိုလည်း မှတ်တမ်းတွေမှာ တွေ့ရပါတယ်။

    ရှင်ကျန်းက ၀ီဂါလူ့အဖွဲ့အစည်းအားလုံးနီးပါး နေ့ညမရွေး ဒီလို ခေါ်ယူစစ်ဆေး၊ ဓာတ်ပုံရိုက်ခံရတာတွေ ရှိခဲ့ပြီး၊ ဓာတ်ပုံဖိုင် နာမည်တွေဟာ အကျဥ်းစခန်းက ဖိုင်နာမည်တွေရဲ့ ပုံစံအတိုင်း ဖြစ်နေတာကြောင့် အလိုအလျောက် မျက်နှာစောင့်ကြည့် ထောက်လှမ်းတဲ့စနစ်အတွက် မှတ်တမ်းရယူတာလို့ ပညာရှင်တွေက သုံးသပ်ပါတယ်။

    ၂၀၁၈ ခုနှစ်က အဲဒီလိုဓာတ်ပုံရိုက်ပြီး ၅ လအကြာမှာ အာဏာပိုင်တွေက တူရ်ဆန် မီမီတင်မီနဲ့ ဇနီးဖြစ်သူ အာရှီဂူလ် တူတူရ်ဂ်ဟွန်တို့ကို လာဖမ်းသွားပါတယ်။ လွန်ခဲ့တဲ့ ၆ နှစ်အရင်က တရားတစ်ပုဒ် နားထောင်တယ်ဆိုတဲ့ စွဲချက်နဲ့ပါ။

    ၁၀ နှစ်နဲ့ ၆ နှစ်အရွယ် သမီးနှစ်ယောက် အပြင်မှာကျန်တယ်လို့ မှတ်တမ်းတွေမှာ ဖော်ပြပြီး ဒီကလေးနှစ်ဦး ဘယ်လိုဖြစ်သွားလည်းဆိုတာ မပါတော့ပါဘူး။

    တရုတ်အာဏာပိုင်တွေဟာ ရှင်ကျန်းမှာ အကျဥ်းစခန်းတွေ တည်ဆောက်တဲ့ တစ်ချိန်တည်းမှာပဲ ဘော်ဒါကျောင်းတွေလည်း တစ်ဖက်မှာ တည်ဆောက်ခဲ့ပြီး ကလေး ၂ ယောက်ကို အဲဒီကျောင်းတွေဆီ ပို့လိုက်တယ်လို့ ယူဆနိုင်ပါတယ်။

    အကျဥ်းစခန်းထဲ ရောက်လာတဲ့သူတွေရဲ့ သားသမီးတွေဟာ ဒီဘော်ဒါကျောင်းတွေမှာ နှစ်ရှည်သွားနေရပြီး မိဘအစုံအလင်ရှိပေမယ့်လည်း အာဏာပိုင်တွေက အနည်းဆုံး တစ်ပတ် ၂ ရက် အဲဒီဘော်ဒါကျောင်းတွေမှာ ကလေးတွေကို အဓမ္မ တက်ခိုင်းလေ့ရှိပါတယ်။

    ရရှိခဲ့တဲ့ ရဲမှတ်တမ်းက ကလေးငယ်တွေရဲ့ ဓာတ်ပုံတော်တော်များများ ပုံစံတူခေါင်းရိတ်ထားတာတွေ့ရပြီး ဒါဟာ အစိုးရကဖွင့်ထားတဲ့ ဘော်ဒါကျောင်းတွေကို သွားတက်ရတယ်ဆိုတဲ့ လက္ခဏာ ဖြစ်ပါတယ်။

    တရုတ်အစိုးရမှတ်တမ်းတွေမှာ ၀ီဂါတွေရဲ့ ‘ဇာတိကိုဖျောက်ပစ်၊ မျိုးဆက်ကိုဖြတ်ပစ်’ လို့ တရား၀င် သုံးနှုန်းညွှန်ကြားထားပြီး ဓာတ်ပုံတွေနဲ့ တစ်ခြားအချက်အလက်တွေက ဒီမူ၀ါဒနဲ့ပတ်သက်တဲ့ ခိုင်မာတဲ့ သက်သေအထောက်အထားတွေပဲ ဖြစ်ပါတယ်။

    ဘယ်လောက်များလဲ

    ဟက်ကာတွေရရှိခဲ့တဲ့ အခုအချက်အလက်တွေထဲမှာ ရှင်ကျန်းက ၀ီဂါ ဘယ်လောက်များများကို အကျဥ်းစခန်းထဲထည့်ပြီး နှိပ်စက်နေလဲဆိုတာကိုပါ ရှင်းရှင်းလင်းလင်း သိလိုက်ရပါတယ်။

    မှတ်တမ်းတော်တော်များများဟာ ပြည်နယ်တောင်ပိုင်း တရုတ်လို ရှူဖူလိုခေါ်တဲ့ ကိုနာရှီဟာခရိုင်က ဖြစ်ပါတယ်။

    မှတ်တမ်းတွေကို လေ့လာမှုအရ ၂၀၁၇ ခုနှစ်ကနေ ၂၀၁၈ ခုနှစ်အတွင်း ကိုနာရှီဟာခရိုင်က အရွယ်ရောက်ပြီးသူတွေရဲ့ ၁၂ ရာခိုင်နှုန်းဖြစ်တဲ့ ၂၂၇၆၂ ဦး အကျဥ်းစခန်းထဲထည့်ခံရတာ၊ ဒါမှမဟုတ် ထောင်ချခံရတာတွေ ရှိတာကို တွေ့ရပါတယ်။

    ဒီပမာဏအတိုင်း ရှင်းကျန်းပြည်နယ်တစ်ခုလုံးကို ပျမ်းမျှချတွက်ရင် ၀ီဂါနဲ့ အခြားတူရကီစကားပြော လူနည်းစု စုစုပေါင်း ၁.၂ သန်းလောက် အကျဥ်းစခန်းထဲ ရောက်နေတဲ့ အနေအထားပါ။ ပညာရှင်တွေရဲ့ အရင်က တွက်ချက်မှုကလည်း အဲဒီလောက်၀န်းကျင်ရှိနေပြီး တရုတ်အစိုးရက ဒီပမာဏကို ငြင်းပါတယ်။

    တရုတ်ခေါင်းဆောင်တွေရဲ့ သဘောထား

    ရရှိခဲ့တဲ အထောက်အထားတွေထဲမှာ တရုတ်ခေါင်းဆောင်တွေက ၀ီဂါတွေအပေါ်ထားရှိတဲ့ မုန်းတီးစိတ်၊ ဖိနှိပ်ညှင်းပမ်းလိုစိတ်တွေကိုလည်း အထင်းသား တွေ့ရပါတယ်။

    တရုတ်ပြည်သူ့လုံခြုံရေး၀န်ကြီး ကျောက်ခချီရဲ့ ၂၀၁၈ ခုနှစ် ဇွန်လ ရှင်ကျန်းကိုလာတဲ့ ခရီးစဥ်မှာ ပြည်နယ်တောင်ပိုင်းက အနည်းဆုံး ၀ီဂါ ၂ သန်းလောက် အစွန်းရောက်အတွေးအခေါ်တွေ ကူးစက်နေတယ်လို့ ပြောခဲ့ကြောင်း လျှို့၀ှက်ဖိုင်ထဲမှာ မှတ်တမ်းတင်ထားပါတယ်။

    ဒီလူ ၂ သန်းကို ဖမ်းဆီးထိန်းသိမ်းနိုင်ရေး အဆောက်အဦးတွေ ဆောက်ပေးတာ၊ ရန်ပုံငွေထုတ်ပေးတာတွေအတွက် သမ္မတ ရှီကျင့်ဖျင်ကို ကျေးဇူးတင်တယ်လို့လည်း သူက ထည့်ပြောပါတယ်။

    သိပ်မကြာခင်အချိန်ကအထိ ရှင်ကျန်းကွန်မြူနစ်ပါတီ အတွင်းရေးမှုးအဖြစ် တာ၀န်ထမ်းဆောင်ခဲ့တဲ့ ချန်ကျန်ဂိုရဲ့ ၂၀၁၇ ခုနှစ်က စစ်တပ်နဲ့ ရဲတပ်ဖွဲ့ကိုပြောတဲ့ မိန့်ခွန်းမှာလည်း ၀ီဂါတွေကို အကျဥ်းစခန်းထဲထည့်ပြီး ပုံစံပေးတာဟာ ၅ နှစ်လောက်နဲ့ မလုံလောက်ကြောင်း၊ ၀ီဂါတွေဟာ ပြဿနာကောင်တွေသာဖြစ်ကြောင်း ထည့်သွင်းပြောဆိုခဲ့တာကို လျှို့၀ှက်မှတ်တမ်းမှာ တွေ့ရပါတယ်။

    တရုတ်ရဲ့ တုန့်ပြန်မှု

    အချက်အလက်တွေကို ဆန်းစစ်အတည်ပြုခဲ့တဲ့ မီဒီယာအဖွဲ့အစည်းတွေက မေးမြန်းမှုကို အမေရိကန်ပြည်ထောင်စုမှာရှိတဲ့ တရုတ်သံရုံးက တုန့်ပြန်ခဲ့ပါတယ်။

    ရှင်ကျန်းမှာ သူတို့လုပ်ဆောင်နေတာတွေဟာ အစွန်းရောက်၀ါကို တိုက်ဖျက်ဖို့ဖြစ်ပြီး၊ ဒေသတွင်းမှာ တည်ငြိမ်အေးချမ်းမှုနဲ့ စီးပွားရေး ဖွံ့ဖြိုးတိုးတက်မှုကို ခံစားနေရတယ်လို့ သံရုံးရဲ့ ထုတ်ပြန်ချက်မှာ ဖော်ပြထားပါတယ်။

    ရှင်ကျန်းနဲ့ပတ်သက်ပြီး ကမ္ဘာကြီးက ပြောဆိုနေတာတွေဟာ အလိမ်အညာတွေ ၀ါဒဖြန်မှုတွေသာဖြစ်တယ်လို့ သံရုံးကဆိုပြီး၊ ပေါက်ကြားလာတဲ့ အထောက်အထားတွေကို ရှင်းလင်းတာမျိုး မရှိခဲ့ပါဘူး။

    Ref: BBC

  • ဝီဂါဖိနှိပ်မှုတွင် ပါဝင်သည့် တရုတ်ဇီ၀နည်းပညာကုမ္ပဏီများ ပိတ်ဆို့အရေးယူမှုခံရ

    ဝီဂါဖိနှိပ်မှုတွင် ပါဝင်သည့် တရုတ်ဇီ၀နည်းပညာကုမ္ပဏီများ ပိတ်ဆို့အရေးယူမှုခံရ

    ဒီဇင်ဘာ ၁၇၊ ၂၀၂၁
    M-Media

    -နိုင်ငံအနောက်ပိုင်းက လူမျိုးစုငယ်တွေအပေါ် တရုတ်အစိုးရရဲ့ လူ့အခွင့်အရေး ချိုးဖောက်မှုတွေမှာ ပူးပေါင်းပါဝင်မှုအတွက် တရုတ် ဇီ၀နည်းပညာကုမ္ပဏီတစ်ချို့ကို အမေရိကန်က ပိတ်ဆို့အရေးယူမှု​တွေလုပ်ဆောင်လိုက်ပါတယ်။

    ဇီ၀နည်းပညာကုမ္ပဏီတွေကို ပိတ်ဆို့အရေးယူမှုတွေ ပြုလုပ်ကြောင်း အမေရိကန်ကုန်သွယ်ရေးဌာနကနေ မနေ့က ကြေငြာချက်ထုတ်ပြန်ခဲ့သလို၊ တရုတ်နိုင်ငံအနောက်ပိုင်း ရှင်ကျန်းဒေသက ပို့ကုန်တွေကို ပိတ်ပင်ရေး ရည်ရွယ်တဲ့ ဥပဒေတစ်ခုကိုလည်း အမေရိကန်လွှတ်တော်က ပြဌာန်းခဲ့ပါတယ်။

    “ဇီ၀နည်းပညာနဲ့ ဆေးဘက်ဆိုင်ရာ တီထွင်ဖန်တီးမှုတွေမှာ လူ့အသက်တွေကို ကယ်တင်နိုင်ပါတယ်။ ကံဆိုးတာက တရုတ်နိုင်ငံဟာ ဒီနည်းပညာတွေကို ပြည်သူလူထုအပေါ် ကန့်သတ်ထိန်းချုပ်ဖို့၊ လူမျိုးစုငယ်တွေ၊ ဘာသာရေးလူနည်းစုတွေကို ဖိနှိပ်ဖို့ အသုံးပြုနေတာပါ” လို့ ကန် ကုန်သွယ်ရေးဝန်ကြီး ဂီနာရိုင်မွန်ဒိုက ပြောပါတယ်။

    ပိတ်ဆို့မှုစာရင်းထဲ ထည့်သွင်းခံလိုက်ရတဲ့ တရုတ် ဇီ၀နည်းပညာကုမ္ပဏီတွေက HMN Internationa၊ Jiangsu Hengtong Marine Cable Systems၊ Jiangsu Hengtong Optic Electric၊ Shanghai Aoshi Control Technology Co Ltd နဲ့ Zhongtian Technology Submarine Cable တို့ ဖြစ်ပါတယ်။

    တရုတ်စစ်တပ်ရဲ့ ဆေးဝါးသိပ္ပံဆိုင်ရာ အကယ်ဒမီနဲ့ လက်အောက်က သုတေသနအဖွဲ့အစည်း ၁၁ ခုကိုလည်း သွင်းကုန်ပိတ်ပင်တဲ့စာရင်းမှာ အမေရိကန် ကုန်သွယ်ရေးဌာနက ထည့်သွင်းခဲ့ပါတယ်။ ပြီးခဲ့တဲ့တစ်ပတ်ကလည်း တရုတ်နည်းပညာကုမ္ပဏီ SenseTime ကို ပိတ်ဆို့ အရေးယူမှု ပြုလုပ်ခဲ့ပါတယ်။

    ပိတ်ဆို့အရေးယူမှု ခံရတဲ့ ကုမ္ပဏီတွေဟာ အမေရိကန်ကုမ္ပဏီတွေနဲ့ ပူးပေါင်းဆောင်ရွက်လို့ရမှာ မဟုတ်သလို၊ ထုတ်ကုန်တွေကိုလည်း အမေရိကန်ကို တင်ပို့လို့ရမှာ မဟုတ်ပါဘူး။

    နည်းပညာအသုံးပြုပြီး နိုင်ငံအတွင်းက လူနည်းစုတွေအပေါ် ဖိနှိပ်ညှင်းပမ်းမှု တိုးမြှင့်ပြုလုပ်လာတဲ့ တရုတ်ကို တုန့်ပြန်ရေး သမ္မတဘိုင်ဒန်အစိုးရက ကျယ်ကျယ်ပြန့်ပြန့်လုပ်ဆောင်လာပါတယ်။ အမေရိကန်လွှတ်တော်ကလည်း ဝီဂါတွေ လူ့အခွင့်အရေးချိုးဖောက်ခံရတဲ့ကိစ္စမှာ အမေရိကန်က တရုတ်အစိုးရကို ပြစ်ဒဏ်ပေးနိုင်မယ့် ဥပဒေတွေကို ပြဌာန်းပေးထားပါတယ်။

    Ref: Reuters

  • ဝီဂါများ ညှင်းပမ်းနှိပ်စက်ခံနေရသည်ဆိုသည့် သတင်းကို တရုတ်က ထပ်ငြင်း

    ဝီဂါများ ညှင်းပမ်းနှိပ်စက်ခံနေရသည်ဆိုသည့် သတင်းကို တရုတ်က ထပ်ငြင်း

    ဒီဇင်ဘာ ၁၀၊ ၂၀၂၁
    M-Media

    -တရုတ်အစိုးရက နိုင်ငံအနောက်ပိုင်းမှာ လူမျိုးတုန်းသတ်ဖြတ်မှု ကျူးလွန်နေတယ်လို့ ဗြိတိန်အခြေစိုက် ခုံအဖွဲ့တစ်ခုရဲ့ ဆုံးဖြတ်မှုကို လန်ဒန်မြို့ တရုတ်သံရုံးက ပယ်ချလိုက်​ပြီး တရုတ်ရန်သူတွေရဲ့ နိုင်ငံရေး ထိုးနှက်မှုတစ်ခုသာ ဖြစ်တယ်လို့ ဆိုပါတယ်။

    ဗြိတိန်က ရှေ့နေတွေ၊ လူ့အခွင့်အရေးလှုပ်ရှားသူတွေ ဖွဲ့စည်းထားတဲ့ ‘ဝီဂါခုံအဖွဲ့’ က ရှင်ကျန်းပြည်နယ်မှာ ဝီဂါနဲ့ ကာဇက်လူမျိုးစုတွေအပေါ် တရုတ်အစိုးရက ​လူမျိုးတုန်းသတ်ဖြတ်မှု၊ လူသားထုအပေါ် ကျူးလွန်တဲ့ ရာဇဝတ်မှု​တွေ လုပ်ဆောင်နေရာမှာ သမ္မတရှီကျင့်ဖျင်က တာဝန်အရှိဆုံးဖြစ်တယ်လို့ ဒီဇင်ဘာ ၉ ရက် နေ့မှာ ဆုံးဖြတ်ထုတ်ပြန်ခဲ့ပါတယ်။

    ဒီအဖွဲ့ဟာ သူတို့ရဲ့ ဆုံးဖြတ်ချက်တွေကို ကျင့်သုံးနိုင်တဲ့ အာဏာမျိုး မရှိပါဘူး။

    လန်ဒန်မြို့ တရုတ်သံရုံးရဲ့ ပြောရေးဆိုခွင့်ရှိသူက ဒါဟာ တရုတ်ဆန့်ကျင်ရေးနဲ့ ခွဲထွက်ရေးအဖွဲ့တစ်ချို့က ပြည်သူတွေကို လှည့်စားဖို့ အသုံးပြုတဲ့ နိုင်ငံရေးလက်နက်တစ်ခုဖြစ်တယ်လို့ မှတ်ချက်ပေးခဲ့ပါတယ်။

    ခုံအဖွဲ့က ဘာပြောလဲ

    ရှင်ကျန်းက ဝီဂါနဲ့ တစ်ခြားလူမျိုးစုတွေ ကြုံတွေနေရတဲ့ ဖိနှိပ်ညှင်းပမ်းမှုတွေကို စုံစမ်းဖော်ထုတ်တဲ့ လန်ဒန်အခြေစိုက် ခုံအဖွဲ့ကို ဗြိတိန်ရှေ့​နေ ဂျီယိုဖရေး နိုက်စ်က ဦးဆောင်တာပါ။

    “တရုတ်ပြည်သူ့သမ္မတနိုင်ငံဟာ ရှင်ကျန်းလို့ခေါ်တဲ့ နိုင်ငံအနောက်မြောက်ပိုင်းဒေသက ဝီဂါ၊ ကာဇက်နဲ့ အခြား တိုင်းရင်းသားလူနည်းစုတွေအပေါ် လူသားထုအပေါ်ကျူးလွန်တဲ့ ရာဇဝတ်မှုနဲ့ လူမျိုးတုန်းသတ်ဖြတ်မှုတွေ လုပ်ဆောင်ခဲ့ပါတယ်။ ရှင်ကျန်းမှာဖြစ်ခဲ့တဲ့ ကိစ္စတွေအတွက် သမ္မတ ရှီကျင့်ဖျင်၊ တရုတ်ကွန်မြူနစ်ပါတီ (CCP) က ထိပ်ပိုင်းခေါင်းတွေမှာ လုံး၀ တာဝန်ရှိကြောင်း ခုံအဖွဲ့က သုံးသပ်ဆုံးဖြတ်ပါတယ် ” လို့ ကြာသာပတေးနေ့ ထုတ်ပြန်ချက်မှာ ဖော်ပြထားပါတယ်။

    ကမ္ဘာ့ ဝီဂါကွန်ဂရ် (WUC) က ရှင်ကျန်းပြည်နယ်မှာ ဖြစ်ပွားတဲ့ ဖိနှိပ်ညှင်းပမ်းမှုတွေနဲ့ပတ်သက်ပြီး လွတ်လပ်တဲ့ စုံစမ်းစစ်ဆေးရေးအဖွဲ့တစ်ခုကို ထူထောင်ဖို့ ၂၀၂၀ ခုနှစ်မှာ ရှေ့နေနိုက်စ်ကို တိုက်တွန်းခဲ့တာပါ။

    ရှင်ကျန်းပြည်နယ်က လူနည်းစုတွေ ဖိနှိပ်ညှင်းပမ်းခံရမှုကို လူမျိုးတုန်းသတ်ဖြတ်မှုအဖြစ် နိုင်ငံတစ်ချို့က လွှတ်တော်တွေ၊ လွှတ်တော်အမတ်တွေက သတ်မှတ်ထားကြပြီး၊ ထရမ့်အစိုးရနဲ့ လက်ရှိ ဘိုင်ဒန်အစိုးရက အမေရိကန်နိုင်ငံခြားရေးဝန်ကြီးတွေလည်း ပါဝင်ပါတယ်။

    ဝီဂါနဲ့ အခြားလူနည်းစုတွေဟာ လူမျိုးရေး၊ ဘာသာရေး၊ ယဉ်ကျေးမှု၊ အနုပညာ နယ်ပယ်စုံမှာ တရုတ်အစိုးရရဲ့ ဖိနှိပ်ညှင်းပမ်းမှုကို ခံနေရပြီး၊ လူ ၁ သန်းလောက် အကျဉ်းစခန်းတွေမှာ တရုတ်ဇာတ်သွင်းခြင်းခံနေရတယ်လို့ ကမ္ဘာ့မီဒီယာတွေ စုံစမ်းဖော်ထုတ် တင်ပြခဲ့ပါတယ်။

    တရုတ်နိုင်ငံခြားရေးဝန်ကြီးဌာနရဲ့ မနေ့ကထုတ်ပြန်ချက်မှာ ကမ္ဘာ့ဝီဂါကွန်ဂရက်အဖွဲ့ဟာ ခွဲထွက်ရေးအဖွဲ့သာဖြစ်ပြီး ဝီဂါခုံအဖွဲ့ကလည်း ယုံကြည်စိတ်ချရမှုမရှိတဲ့အဖွဲ့ ဖြစ်တယ်လို့ ဖော်ပြထားပါတယ်။

    Ref: Reuters