ဧပြီ ၂၉၊ ၂၀၂၀
M-Media
UFO များ ပျံသန်းနေသည့် ဗီဒီယိုကို အမေရိကန်စစ်ဌာနချုပ် ထုတ်ပြ
ကောင်းကင်ယံမှာ အမျိုးအမည်မသိ အရာတွေ ပျံသန်းနေတဲ့ ဗီဒီယို ၃ ခုကို အမေရိကန်စစ်ဌာနချုပ် ပင်တဂွန်က မနေ့မှာ ထုတ်ပြလိုက်ပါတယ်။ ၂၀၀၄ ခုနှစ်နဲ့ ၂၀၁၅ ခုနှစ်တုန်းက အမေရိကန် တိုက်လေယာဉ်မှူးတွေ ရိုက်ထားတဲ့ ဗီဒီယိုတွေဖြစ်ပြီး အရင်ကလည်း ပေါက်ကြားဖူးပါတယ်။
ပင်တဂွန်ကတော့ အရင်က ပေါက်ကြားထားတဲ့ဗီဒီယိုတွေဟာ အမှန်ဖြစ်တယ်ဆိုတာကို အများပြည်သူတွေ သိရှိနိုင်ဖို့ ဒီလိုထုတ်ပြန်ရတာလို့ ပြောပါတယ်။ အမျိုးအမည်မသိ ပျံသန်းတဲ့အရာ UFO တွေဟာ သိပ္ပံလောကမှာ စိတ်ဝင်စားစရာအကောင်းဆုံး ကိစ္စဖြစ်ပြီး အခြားဂြိုဟ်တွေကနေ လာရောက်တာဆိုတဲ့ ယူဆမှုတွေလည်း ရှိနေပါတယ်။ ဒါပေမယ့် အသေးစိတ် ဖော်ထုတ် သက်သေပြနိုင်တာမျိုးတော့ မရှိသေးပါဘူး။
ကိုဗစ်တားဆီးရေး လက်ပတ်အသုံးပြု စောင့်ကြည့်နည်းကို ကမ္ဘာ့နိုင်ငံများ အသုံးပြုလာ
ကိုဗစ်ကာလအတွင်း ပြည်သူတွေရဲ့ အသွားအလာကို စောင့်ကြည့် ထိန်းချုပ်နိုင်ဖို့အတွက် ကမ္ဘာ့နိုင်ငံတွေဟာ ခြေရာခံနိုင်တဲ့ လက်ပတ်တွေကို အသုံးပြုလာကြပါတယ်။
လက်ရှိ ဟောင်ကောင်၊ တောင်ကိုရီးယားနဲ့ ဘူလ်ဂေးရီးယားတို့မှာ စမ်းသပ် အသုံးပြုနေပါတယ်။ လက်ပတ်တွေမှာ GPS ခြေရာခံစနစ်ကို အသုံးပြုထားပြီး သတ်မှတ်ဧရိယာထဲက အပြင်ထွက်တာ၊ လက်ပတ်ကို ချွတ်ဖို့ ကြိုးစားတာတွေမှာ အာဏာပိုင်တွေက အလိုအလျောက် သိရှိမှာပါ။
အရင်က ဖုန်းအက်ပလီကေးရှင်း အသုံးပြုတဲ့ စောင့်ကြည့်တဲ့ နည်းလမ်းကို အသုံးပြုခဲ့ပေမယ့် လူတွေဟာ ဖုန်းကို အိမ်မှာထားပြီး အပြင်ထွက်ကြတဲ့အတွက် အခုလို လက်ပတ်နည်းကို ပြောင်းလဲအသုံးပြုလာတာ ဖြစ်ပါတယ်။
ယူကေထောက်လှမ်းရေးတွင် AI နည်းပညာကို အသုံးပြုရန် လိုအပ်နေ
ရန်သူတွေရဲ့ ခြိမ်းခြောက်မှု မြင့်လာတဲ့အတွက် ဗြိတိန်ထောက်လှမ်းရေးအဖွဲ့ဟာ ဉာဏ်ရည်တုနည်းပညာ (AI) ကို အသုံးပြုဖို့ လိုအပ်တယ်လို့ တတ်သိပညာရှင်များအဖွဲ့ Rusi က ဆိုပါတယ်။
Rusi အဖွဲ့ဟာ ယူကေထောက်လှမ်းရေးဌာနကို နက်နက်နဲနဲ လေ့လာဆန်းစစ်ခွင့် ရခဲ့တာပါ။ ရန်သူတွေထဲမှာ နိုင်ငံတွေသာမကဘဲ၊ ရာဇဝတ်ကောင်တွေပါ ပါဝင်နေပြီး အနာဂတ်မှာ AI ကို အသုံးပြုထားတဲ့ တိုက်ခိုက်မှုတွေ ပိုလုပ်လာနိုင်တဲ့အတွက် AI နဲ့ ပြန်လည်တုန့်ပြန်ဖို့ ပြင်ဆင်ထားရမှာဖြစ်ကြောင်း Rusi အဖွဲ့ရဲ့ အစီရင်ခံစာမှာ ဖော်ပြထားပါတယ်။
AI ကို အသုံးပြုရင် တစ်ကိုယ်ရယ်အချက်အလက် ကာကွယ်မှု၊ လူ့အခွင့်အရေးကိစ္စတွေကို ထည့်သွင်းစဉ်းစားကာ စည်းကမ်းအသစ်တွေ ချမှတ်ဖို့ လိုအပ်တယ်လို့လည်း အစီရင်ခံစာက ဆိုပါတယ်။
Ref: BBC
