News @ M-Media

Tag: WuhanVirus

  • ကိုဗစ်ကန့်သတ်မိန့်ဖောက်ဖျက်၍ ဟိန္ဒူဘုရားပွဲကျင်းပသူများကို အိန္ဒိယ ဖမ်းဆီး

    ကိုဗစ်ကန့်သတ်မိန့်ဖောက်ဖျက်၍ ဟိန္ဒူဘုရားပွဲကျင်းပသူများကို အိန္ဒိယ ဖမ်းဆီး

    ဧပြီ ၁၈၊ ၂၀၂၀
    M-Media

    ဘုရားပွဲမြင်ကွင်း

    -အိန္ဒိယနိုင်ငံ အနောက်တောင်ပိုင်း ကာနာတာကာပြည်နယ်က ရွာတစ်ရွာမှာ ရွေ့လျားသွာလာမှု ကန့်သတ်မိန့်ကို ဖောက်ဖျက်ပြီး​ ဟိန္ဒူဘုရားပွဲလှည့်မှုအတွက် လူ ၅ ဦးကို ရဲတပ်ဖွဲ့က ဖမ်းဆီးပြီး တရားစွဲဆိုလိုက်ပါတယ်။

    ရီဗူရ်ရွာမှာ ဘုရားပွဲလှည့်လည်မှုကို ဧပြီလ ၁၆ ရက်နေ့က ပြုလုပ်ခဲ့တာဖြစ်ပြီး လူ ၁၀၀ ကနေ ၂၀၀ လောက်အထိ ပါဝင်တယ်လို့ ရဲတပ်ဖွဲ့က ပြောပါတယ်။ ဘုရားကျောင်း ဂေါပကအပါအဝင် ဘုရားပွဲကျင်းပသူတွေကို ဖမ်းဆီးမှုအပြင် ခွင့်ပြုချက်ပေးတဲ့ ခရိုင်တာဝန်ရှိသူတစ်ဦးနဲ့ ရဲတပ်ဖွဲ့ အရာရှိတစ်ဦးတို့ကိုလည်း အာဏာပိုင်တွေက ရာထူးကနေ ရပ်ဆိုင်းလိုက်ပါတယ်။

    ဖမ်းဆီးထားသူတွေကို ၁၈၉၇ ခု ကူးစက်ရောဂါများဆိုင်ရာ ဥပဒေ၊ တရားမဝင် လူစုမှု၊ ကူးစက်ရောဂါ ပြန့်ပွားနိုင်မှုကို လစ်လျူရှုမှုတွေနဲ့ တရားစွဲဆိုထားပါတယ်။ ရဲတပ်ဖွဲ့ကတော့ နောက်ထပ်ချိုးဖောက်တဲ့ ပုဒ်မတွေ ရှိလားဆိုတာကို ဆန်းစစ်နေတယ်လို့ ပြောကြားခဲ့ပါတယ်။

    ရွေ့လျားသွားလာမှု ကန့်သတ်မိန့်ကြောင့် ဘုရားပွဲမကျင်းပဖို့ ဧပြီလ ၁၄ ရက်နေ့မှာ ခရိုင်ရဲတပ်ဖွဲ့က အကြံပြုခဲ့ပေမယ့် ဘုရားကျောင်းဂေါပကတွေဟာ နားမထောင်ပဲ စီစဉ်ထားတဲ့အတိုင်း ကျင်းပခဲ့တာ ဖြစ်ပါတယ်။

    Ref: Indian Express

  • မလေးရှားတွင် ကိုဗစ်ကူးစက်မှု သိသိသာသာ ကျဆင်း

    မလေးရှားတွင် ကိုဗစ်ကူးစက်မှု သိသိသာသာ ကျဆင်း

    ဧပြီ ၁၈၊ ၂၀၂၀
    M-Media

    မလေးရှားကျန်းမာရေးဝန်ကြီးဌာန ညွှန်ကြားရေးမှူး ဒေါက်တာ နူရဟီရှမ် အဘ်ဒူလာ

    -မလေးရှားနိုင်ငံမှာ မနေ့က Covid-19 ကူးစက်သူအရေအတွက် ၅၄ ဦးရှိပြီး ကူးစက်မှု ၂ လနီးပါးကာလအတွင်းအတွင်း တစ်နေ့တာကူးစက်မှု အနည်းဆုံး ပမာဏလည်း ဖြစ်ပါတယ်။

    စုစုပေါင်း ကူးစက်သူအရေအတွက်ဟာ ၅၃၀၅ ဦး ဖြစ်လာပါတယ်။ မနေ့က သေဆုံးမှု ၂ ခု ရှိခဲ့ပြီး စုစုပေါင်း သေဆုံးသူ ၈၈ ဦးရှိကာ ၁.၆၆ ရာခိုင်နှုန်း ဖြစ်ပါတယ်။ ပြန်လည်ကောင်းမွန်သူအရေအတွက် ၃၀၀၀ နီးပါး ရှိနေပါတယ်။

    နိုင်ငံအရှေ့ပိုင်းက ဆာဘားပြည်နယ်က ဆေးရုံ ၃ ခုမှာ ကျန်းမာရေးဝန်ထမ်း ၃၀ လောက် ဗိုင်းရပ်စ်ကူးစက်နေတာကို ထပ်တွေ့ခဲ့ရပါတယ်။

    ကျန်းမာရေးဝန်ကြီးဌာန ညွှန်ကြားရေးမှူး ဒေါက်တာ နူရ် ဟီရှမ် အဘ်ဒူလာက ကူးစက်မှု သိသိသာသာ ကျဆင်းသွားပေမယ့် ပြည်သူလူထုအနေနဲ့ သတိမလွတ်ကြဖို့ ဒီကနေ့ သတင်းစာရှင်းလင်းပွဲမှာ တိုက်တွန်းခဲ့ပါတယ်။

    မလေးရှားဟာ မတ်လ အလယ်ပိုင်းကတည်းက တိုင်းပြည်ကို တံခါးပိတ်ကာ​ ဧပြီလ ၂၈ ရက်နေ့အထိ ရွေ့လျားသွားလာမှုကန့်သတ်မိန့် ထုတ်ပြန်ထားပါတယ်။

    ဒေါက်တာ နူရ်ဟီရှမ်က ဒီကန့်သတ်မိန့်ကို ထပ်တိုးမလား၊ ရပ်ဆိုင်းရမလားဆိုတဲ့ကိစ္စဟာ သိပ္ပံဆိုင်ရာ သုံးသပ်ချက်နဲ့ လက်တွေ့အချက်အလက်တွေပေါ်မှာ မူတည်နေပြီး ကူးစက်မှုအန္တရာယ်ကို လျော့ချနိုင်ဖို့အတွက် တစ်ချို့ကန့်သတ်မှုတွေကို ဆက်လက်ဆောင်ရွက်ရနိုင်တယ်လို့ ထည့်သွင်းပြောဆိုခဲ့ပါတယ်။

    Ref: The Star

  • အာဆီယံတွင် စင်ကာပူက Covid-19 ကူးစက်မှု တတိယအများဆုံးဖြစ်လာ

    အာဆီယံတွင် စင်ကာပူက Covid-19 ကူးစက်မှု တတိယအများဆုံးဖြစ်လာ

    ဧပြီ ၁၈၊ ၂၀၂၀
    M-Media

    -စင်ကာပူနိုင်ငံမှာ ပြီးခဲ့တဲ့ ၂၄ နာရီအတွင်း Covid-19 ထပ်မံကူးစက်သူ ၉၄၂ ဦးရှိခဲ့ပြီး စုစုပေါင်း ကူးစက်မှု ၅၉၉၂ ဦးနဲ့ မလေးရှားကိုကျော်ကာ အာဆီယံမှာ တတိယအမြင့်ဆုံး ဖြစ်လာပါတယ်။

    ထပ်မံကူးစက်သူ အားလုံးနီးပါးလောက်ဟာ အလုပ်သမားတန်းလျားမှာ နေထိုင်ကြတဲ့ နိုင်ငံခြားသား အလုပ်သမားတွေဖြစ်ပြီး စင်ကာပူနိုင်ငံသားနဲ့ အမြဲတမ်းနေထိုင်ခွင့်ရထားသူ ၁၄ ဦးသာ ပါဝင်ပါတယ်။

    စက်ကာပူကျန်းမာရေးဝန်ကြီးဌာနက ထုတ်ပြန်တဲ့ ကြေငြာချက်မှာ ကူးစက်မှု အသေးစိတ်အချက်အလက်တွေကို စုံစမ်းစစ်ဆေးနေပြီး ဒီကနေ့ညပိုင်းမှာ ထပ်မံထုတ်ပြန်သွားမယ်လို့ ဖော်ပြထားပါတယ်။ မနေ့က ထုတ်ပြန်ချက်မှာတော့ တစ်ချို့နေရာတွေမှာ ကူးစက်သူတွေနဲ့ တိုက်ရိုက်ထိတွေ့မှုမရှိဘဲ ကူးစက်တာတွေ ရှိတဲ့အတွက် စိုးရိမ်မိတယ်လို့ ဆိုပါတယ်။

    ဝန်ကြီးချုပ်လီရှန်လွန်းက အလုပ်သမားတန်းလျားတွေမှာ ကူးစက်သူအရေအတွက် သိသိသာသာ မြင့်တက်လာပေမယ့် လူငယ်များတဲ့အတွက် အများစုက ရောဂါလက္ခဏာ ဆိုးဆိုးရွားရွား မရှိဘူးလို့ ဒီကနေ့ Facebook စာမျက်နှာမှာ ရေးသားခဲ့ပါတယ်။

    ကူးစက်မှုတွေ ရပ်တန့်သွားအောင် ကြိုးစားဆောင်ရွက်နေပြီး အချိန်အနည်းငယ် လိုအပ်တယ်လို့လည်း လီရှန်လွန်းက ထည့်သွင်းရေးသားခဲ့ပါတယ်။

    Ref: CNA

  • ရမ်ဇာန်ဥပုသ်လနှင့် ဝါကျွတ်အီးဒ်နေ့ ဝတ်ပြုဆုတောင်းမှုကို အိမ်တွင်ပြုလုပ်ဖို့ ဆော်ဒီအမိန့်ထုတ်

    ရမ်ဇာန်ဥပုသ်လနှင့် ဝါကျွတ်အီးဒ်နေ့ ဝတ်ပြုဆုတောင်းမှုကို အိမ်တွင်ပြုလုပ်ဖို့ ဆော်ဒီအမိန့်ထုတ်

    ဧပြီ ၁၇၊ ၂၀၂၀
    M-Media

    -Covid-19 ကူးစက်ပြန့်နှံ့မှာကို စိုးရိမ်တဲ့အတွက် ရမ်ဇာဥပုသ်လ သာရာဝီ ဝတ်ပြုမှုနဲ့ အီးဒ်နေ့ ဝတ်ပြုဆုတောင်းမှုတွေကို မိမိတို့အိမ်မှာသာ ဆောင်ရွက်ကြဖို့ ဆော်ဒီအာရေဗျ အစ္စလာမ်ဓမ္မသတ်မှူးချုပ်က ဒီကနေ့မှာ ညွှန်ကြားချက် ထုတ်ပြန်လိုက်ပါတယ်။

    တစ်လတာကြာမြင့်မယ့် ရမ်ဇာန်ဥပုသ်လဟာ လာမယ့်တစ်ပတ်မှာ ကျရောက်မှာ ဖြစ်ပါတယ်။

    ဆော်ဒီမှာ Covid-19 ကူးစက်ပြန့်နှံ့မှုကြောင့် မက္ကာနဲ့ မဒီနာက မြင့်မြတ်ရာ ဗလီဝတ်ကျောင်းတော် ၂ လုံး အပါအဝင် နိုင်ငံအတွင်းက ဗလီအားလုံးမှာ လူစုလူဝေးနဲ့ ဝတ်ပြုဆုတောင်းခွင့်ကို ပိတ်ထားပါတယ်။

    အခုနှစ် အွမ္မရာဟ်ဘုရားဖူးအစီအစဉ်ကို ရပ်ဆိုင်းခဲ့သလို၊ ဇူလိုင်လမှာ ကျရောက်မယ့် ဟဂျ်ဘုရားဖူးကာလအတွက် ပြင်ဆင်နေမှုကို ခေတ္တရပ်ဆိုင်းထားဖို့လည်း ကမ္ဘာတစ်ဝှမ်းက အစ္စလာမ်ဘာသာဝင်တွေကို ဆော်ဒီအစိုးရက မေတ္တာရပ်ခံထားပါတယ်။

    ဆော်ဒီ ဓမ္မသတ်မှူးချုပ် မွဖ်သီ ရှိခ် အဘ်ဒူလ်အဇစ် အလ်-ရှိခ်က ဗိုင်းရပ်စ်မပြန့်နှံ့ရေး ကြိုတင်ကာကွယ်မှုအတွက် အခုနှစ် ရမ်ဇာန်ဥပုသ်လအတွင်း ညပိုင်း သာရာဝီ ဝတ်ပြုဆုတောင်းမှုကို ဗလီဝတ်ကျောင်းတော်တွေမှာ ပြုလုပ်မှာမဟုတ်ဘူးလို့ ဒီကနေ့ ထုတ်ပြန်ချက်မှာ ပြောကြားခဲ့ပါတယ်။

    ဥပုသ်လအကုန် ဝါကျွတ်အီးဒ်ပွဲတော်မှာလည်း ဝတ်ပြုဆုတောင်းမှုတွေကို ဗလီတွေ၊ ကွင်းပြင်တွေမှာ လုပ်ဆောင်မှာမဟုတ်ဘဲ မိမိတို့အိမ်မှာသာ ဝတ်ပြုဖို့ မွဖ်သီက တိုက်တွန်းခဲ့ပါတယ်။

    လက်ရှိ ဆော်ဒီအာရေဗျမှာ ကိုဗစ်ကူးစက်သူအရေအတွက် ၆၃၈၀ ဦး ရှိနေပြီး သေဆုံးသူ ၈၃ ဦး ရှိပါတယ်။ ပြန်လည်ကောင်းမွန်သူအရေအတွက်လည်း ထောင်ချီရှိနေပါတယ်။

    Ref: Alarabiya

  • Covid-19 ပြန့်နှံ့မှုနှင့်ဆက်စပ်၍ သဘ်လီဂ် ဂျမာအသ်ခေါင်းဆောင်ကို အိန္ဒိယက တရားစွဲ

    Covid-19 ပြန့်နှံ့မှုနှင့်ဆက်စပ်၍ သဘ်လီဂ် ဂျမာအသ်ခေါင်းဆောင်ကို အိန္ဒိယက တရားစွဲ

    ဧပြီ ၁၇၊ ၂၀၂၀
    M-Media

    -အိန္ဒိယက အစ္စလာမ်သာသနာပြု ‘သဘ်လီဂ် ဂျမာအသ်’ အဖွဲ့ရဲ့ ခေါင်းဆောင် မိုဟာမက် ဆအဒ် ခန်ဒလ်ဝီကို Covid-19 ပြန်နှံ့မှုနဲ့ဆက်စက်ပြီး အစိုးရက ‘ကြိုတင်ကြံရွယ်မှုရှိသည့် လူသတ်မှုပုဒ်မ’ နဲ့ တရားစွဲဆိုလိုက်ပါတယ်။

    ဒေလီမြို့ဆင်ခြေဖုံး နေဇာမွဒ်ဒင်အရပ်က ဗလီတစ်လုံးအတွင်း မတ်လစောပိုင်းက ပြုလုပ်ခဲ့တဲ့ သဘ်လီဂ်အဖွဲ့ရဲ့ အခမ်းအနားတစ်ခုမှာ နိုင်ငံခြားသားတွေအပါအဝင် လူပေါင်း ၈ ထောင်ကျော်လောက် တက်ရောက်ခဲ့ပါတယ်။

    အဲဒီနောက်ပိုင်း အိန္ဒိယနိုင်ငံက ပြည်နယ် ၁၇ ခုမှာ ဒီပွဲကို တက်ရောက်သူတွေ၊ သူတို့နဲ့ ထိတွေ့သူ စုစုပေါင်း ၁၀၂၃ ဦးလောက် Covid-19 ကူးစက်နေတာကို တွေ့ခဲ့ရပါတယ်။

    အခမ်းအနားကို ရပ်ဆိုင်းဖို့ ၂ ကြိမ်တိုင်တိုင် သတိပေးခဲ့ပေမယ့် ခေါင်းဆောင် မိုဟာမက် ဆအဒ် ခန်ဒလ်ဝီဟာ မလိုက်နာခဲ့ကြောင်း၊ မတ်လ ၃ ရက်နေ့က စတင်တဲ့​ အဲဒီအခမ်းအနားဟာ တိုင်းပြည်ကို တံခါးပိတ်ချိန် မတ်လ ၂၄ ရက်နေ့အထိ မပြီးခဲ့ကြောင်း အိန္ဒိယရဲတပ်ဖွဲ့က ပြောကြားခဲ့ပါတယ်။

    သဘ်လီဂ် ဂျမာအသ် အဖွဲ့ကတော့ ဒီပြောကြားမှုကို ငြင်းပါတယ်။ တစ်ရက်တာ ညမထွက်ရအမိန့် ထုတ်ပြန်လိုက်တယ်လို့ ဝန်ကြီးချုပ်မိုဒီ မတ်လ ၂၂ ရက်နေ့က ​ကြေငြာပြီးပြီးချင်းမှာပဲ အခမ်းအနားကို ရပ်နားခဲ့ပြီး တက်ရောက်လာသူတွေကို ချက်ခြင်းပြန်ခိုင်းခဲ့တယ်လို့ ပြောကြားခဲ့ပါတယ်။

    အဲဒီရက်မှာ လူတော်တော်များများ ပြန်သွားနိုင်ခဲ့ကြပြီး နောက်ရက်မှာ ပြည်နယ် နယ်စပ်တွေကို ပိတ်ပစ်လိုက်တဲ့အတွက် တစ်ချို့လူတွေ သောင်တင်ခဲ့တယ်လို့လည်း ဆိုပါတယ်။ ညမထွက်ရအမိန့် ထုတ်ပြန်ပြီး ၂ ရက်အကြာမှာ အိန္ဒိယက တိုင်းပြည်ကို တံခါးပိတ်ပြီး ရွေ့လျားသွားလာမှု ကန့်သတ်လိုက်တာပါ။

    သဘ်လီဂ်အခမ်းအနား ပြုလုပ်ခဲ့မှု အကြောင်းစုံကို ဒေသခံရဲတပ်ဖွဲ့ထံ သတင်းပို့ခဲ့ပြီး ကျင်းပရာ ဗလီဝတ်ကျောင်းတော်နဲ့ အိပ်ဆောင်တွေကို ကျန်းမာရေးဝန်ထမ်းတွေက စစ်ဆေးမှုမှာလည်း ပူးပေါင်းပါဝင်နေတယ်လို့ အခမ်းအနားကျင်းပခဲ့သူတွေက ပြောကြားခဲ့ပါတယ်။

    Ref: BBC