Tag: Youth

သြဂုတ် ၁၅ ၊ ၂၀၁၄
M-Media
သတင်း/ဓါတ်ပုံ- ချို

သြဂုတ်လ (၁၂)ရက်နေ့တွင် မန္တလေးမြို့၊ ရတနာပုံဈေး တတိယထပ်ရှိ စက်မှုကုန်သည်ကြီးများအသင်း ခန်းမ၌ အပြည်ပြည်ဆိုင်ရာ လူငယ်နေ့ ကျင်းပပြုလုပ်ခဲ့ပါသည်။ “ခွဲခြားမှုကင်းသော အနာဂတ် မျိုးဆက်ဆီသို့” ဆိုသော ခေါင်းစဉ်ဖြင့် ဆရာဦးဘုန်း (ဓာတု)၊ ဆရာနေဘုန်းလတ်၊ ဆရာမ မသီတာ (စမ်းချောင်း)တို့က ပါဝင်ဆွေးနွေးခဲ့ကြသည်။

သီချင်းများ၊ သံချပ်များ၊ ပြဇာတ်များ၊ တစ်ခန်းရပ်ပြဇာတ်၊ တေးသရုပ်ဖော်၊ လူငယ်ပညာပေး သရုပ်ဖော်၊ ပန်းချီ အနုပညာ သရုပ်ဖော်မှုများဖြင့် စည်ကားစွာ ကျင်းပခဲ့ပြီး လူငယ်အမြောက်အများ တက်ရောက်ခဲ့ကြသည်။

Activity Right ၊ Democracy Right ၊ Liberal Right ၊ Human Right များ လုပ်ဆောင်နေသူ မကြီးပွင့် (Rainbow)အား နိုင်ငံတကာလူငယ်နေ့ ပွဲနှင့် ပတ်သက်၍ မေးမြန်းကြည့်ရာ “ဒီပွဲလေး လုပ်ဖြစ်ရတာတော့ နှစ်တိုင်းလည်း ဒီနေ့ ဒီရက်မှာ ပြုလုပ်နေကြပါ။ အမက Mandalay Youth Network Central Board မှာ ပါပါတယ်။ ဒီနှစ်မှာ တိုင်ပင်ကြတာတော့ Mandalay Youth Network လေးတစ်ခုကနေပဲ လုပ်မလား၊ အရင်နှစ်လိုပဲ CBO , CSO အားလုံးပဲ ပေါင်းမလုပ်မလားဆိုပြီး တိုင်ပင်ခဲ့ကြပြီး ခုလို အားလုံးပူးပေါင်းပြီး လုပ်ဖြစ်ခဲ့တာပါ။ ဒီမှာ ပါဝင်ကြတာတော့ လောကအလင်း၊ Mandalay Youth Network ၊ Equality Mandalar ၊ The Seagull တို့ပါ။ ရည်ရွယ်ချက်ကတော့ အမှန်အတိုင်းပြောရမယ်ဆိုရင် လူငယ်တွေက ခုနောက်ပိုင်းမှာ တစ်ဘက်စွန်းရောက်နေတာလေးတွေ ရှိပါတယ်။ ဥပမာအနေနဲ့ ပြောရမယ်ဆိုရင် မန္တလေး ဘာသာရေးအရေးအခင်းမှာ လူငယ်တွေက ၀ုန်းဆို ၀င်ပါလာကြတယ်။ လူငယ်တွေဆိုတာ မျိုးချစ်စိတ်ပြင်းထန်တယ်၊ တကယ်အလုပ်လုပ်နိုင်ပါတယ်။

 ဒါပေမယ့် ခုဖြစ်နေတာက သူတို့စိတ်တွေက နိုးဆွလိုက်လို့ ၀င်ပါလာတာပါ။ အမတို့က အဲ့လို မဖြစ်စေချင်ဘူး။ ဘယ်သူက ဘယ်သူ့ကိုမှ ဖိနှိပ်တာမျိုး မဖြစ်စေချင်ဘူး၊ အဲ့ဒါကြောင့် ခုက စပြီး တွဲခေါ်တဲ့ပုံစံနဲ့ အလုပ်လုပ်တဲ့သဘောပါ။ ဒီနေ့ဆို လူငယ်တွေကို လုံးဝနေရာပေးထားတယ်။ အမတို့က လူငယ်တွေကို တိုင်ပင်တယ်၊ တက်နိုင်သလောက် သူတို့ဘာဖြစ်ချင်သလဲ လုပ်ပေးထားတယ်။ မနှစ်ကထိကို လူကြီးတွေကပဲ တိုင်ပင်ပြီးမှ လူငယ်တွေကို ခေါ်တယ်။ ဒီနှစ်မှာတော့ အစတည်းက လူငယ်တွေကိုခေါ်ပြီး ဘာလုပ်မလဲဆိုတာ တိုင်ပင်ပါတယ်။ လိုချင်တဲ့ အကျိုးရလဒ်ကတော့ မန္တလေးမှာ ရှိနေတဲ့ လူငယ်တွေကို CBO , CSO မှာဖြစ်ဖြစ်၊ Party Side တွေမှာဖြစ်ဖြစ် ခေါင်းဆောင်ကောင်းတွေ ဖြစ်လာစေချင်တယ်။ ဒီလူတွေနဲ့ ဒီလူတွေပဲ လုပ်နေမယ့်အစား လူကြီးတွေနေရာမှာ လူငယ်ခေါင်းဆောင်လေးတွေ ရောက်လာစေချင်တယ်။ ပြုပြင်ပြောင်းလဲရေး ကာလမှာ ဒီမိုကရေစီ အရေးတွေ အများကြီးလုပ်ဖို့ လိုပါတယ်၊ ဒီလိုနေရာတွေမှာ လူငယ့်အရေးကိစ္စတွေမှာ လူငယ်တွေကို ပိုလုပ်စေချင်တဲ့ အတွက် ဒီပွဲလေးကို စီစဉ်ဖြစ်တာပါ။ အဓိက Target အနေနဲ့ကတော့ အသက် ၁၆ကနေ ၂၄ လူငယ်တွေ နဲ့ အသက် ၁၆ ကနေ ၃၅ အတွင်းမှာရှိတဲ့ လူငယ်အရေးကို စိတ်ဝင်စားတဲ့ ခေါင်းဆောင်တွေပါ။ ဒီလိုပွဲလေးလုပ်ခြင်းအားဖြင့် မန္တလေးမှာရှိတဲ့ လူငယ်တွေက လူငယ်အရေးအရာတွေ လုပ်နေတယ်ဆိုတာတွေ သိသွားမယ်။ လူငယ်ပညာတက်တွေ၊ စိတ်ဓာတ်တက်ကြွသူတွေ အများကြီးရှိပေမယ့် မချိတ်မိသေးပါဘူး။ ဒီပွဲလေးကြောင့် ချိတ်ဆက်မိလာမယ်ထင်ပါတယ်” လို့ ဖြေကြားခဲ့ပါသည်။

ဆရာဦးဘုန်း (ဓာတု)၊ ဆရာနေဘုန်းလတ်၊ ဆရာမ မသီတာ (စမ်းချောင်း) ဆွေးနွေးချက်များကို အသေးစိပ် ဒီနေရာမှာ ဖတ်ပါ။

သြဂုတ် ၁၃၊ ၂၀၁၄
M-Media
လမင်း

ရန်ကုန်  ။      ။ မြန်မာနိုင်ငံတွင် ပထမဆုံးအကြိမ် ကျင်းပပြုလုပ်သော မြန်မာ့လူငယ်ရုပ်ရှင်ပွဲတော်တွင် ယနေ့ခေတ် လူငယ်များ၏ နှလုံးခုန်သံကို ကြားသိခဲ့ရသည်ဟု ရန်ကုန်မြို့ Sky Star Hotel တွင် ကျင်းပပြုလုပ်သော မြန်မာလူငယ်ရုပ်ရှင်ပွဲတော် ဆုချီးမြှင့်ပွဲနှင့် နိုင်ငံတကာလူငယ်များနေ့ အခမ်းအနားတွင် ဦးဇာဂနာက ယင်းကဲ့သို့ ပြောကြားခဲ့သည်။

နိုင်ငံတစ်နိုင်ငံမှာ သြဇာအရှိဆုံးက ရုပ်ရှင်ဖြစ်ပြီး သြဇာအရှိဆုံးဖြစ်တဲ့ ရုပ်ရှင်ကို အသုံးမချတတ်ရင်တော့ တိုင်းပြည် ညံ့ဖျင်းရာရောက်သွားပါပြီး အဲ့လို အသုံးမချတတ်တဲ့ အစိုးရတွေနဲ့လည်း မတွေ့ပါရစေနဲ့ ဟု ဆက်လက်ပြောဆိုခဲ့သည်။

“ကျွန်တော်တို့ ငယ်ငယ်တုန်းက မရခဲ့တဲ့အခွင့်အရေးတွေ လုပ်ချင်ရက်နဲ့ မလုပ်ရတဲ့အရာတွေကို သူတို့ရသွားပါပြီ သူတို့လုပ်နေပါပြီ ။ လူကြီးတွေဟာ သူတို့နေရာကို လူငယ်တွေအတွက် ဖယ်ပေးရတော့မှာဖြစ်ပါတယ်။

လူငယ်တွေကို လက်တွဲလို့ရရင်တွဲခေါ်ပါ။ တွဲလို့ မရရင် တွဲတင်ပေးပါ ” ဟု နိုင်ငံတကာလူငယ်များနေ့နှင့် ပတ်သက်ပြီး ဦးဇာဂနာမှ ပြောဆိုခဲ့သည်။သြဂုတ်လ ၇ ရက်နှင့် ၈ ရက်နေ့များတွင် ရန်ကုန်မြို့Junction Square တွင်ပြသခဲ့သော ပထမဆုံးအကြိမ် လူငယ်ရုပ်ရှင်ပွဲတော်တွင် ပြသခဲ့သော ဇာတ်ကားများကို အကဲဖြတ်ဒိုင်များမှ ဆုံးဖြတ်ခဲ့ကြပြီး အကောင်းဆုံး မှတ်တမ်းရုပ်ရှင်ဆုကို Violenz Against Violence မှလည်းကောင်း၊ အကောင်းဆုံးဇာတ်လမ်းတိုဆုကို Chicken Carry မှလည်းကောင်း၊ အကောင်းဆုံးအထူးပြုလုပ်ချက်ဆုကို Save the World မှလည်းကောင်း၊ ပရိတ်သတ်မဲပေးမှုအများဆုံးဆုကို ပန်းလှိုင် ဇာတ်ကားမှ လည်းကောင်း အသီးသီးရရှိခဲ့ပါသည်။

“မြန်မာနိုင်ငံလူငယ်များ အစည်းအရုံးအနေနဲ့ လူငယ်တွေရဲ့ ရပိုင်ခွင့် အခွင့်အရေးတွေ အဆုံးရှုံးစေရန်အတွက် ဆောင်ရွက်နေပါတယ်။ တစ်နိုင်ငံလုံးအတိုင်းအတာအနေနဲ့ မထိရောက်နိုင်သေးပေမဲ့ အကောင်းဆုံးကြိုးစားလုပ်ဆောင်နေပါတယ်။ ကျွန်တော်ခံယူထားတာကတော့ လူငယ်တွေရဲ့အနာဂတ်ကို လစ်လျူရှုတာဟာ တိုင်းပြည်ရဲ့ အနာဂတ်ရေသောက်မြစ်ကို ဖျက်ဆီးတာနဲ့အတူတူပါပဲ” ဟု မြန်မာနိုင်ငံအစည်းအရုံး ဥက္ကဌ ကိုဇွဲရန်နိုင်က ပြောဆိုခဲ့သည်။

မြန်မာနိုင်ငံလူငယ်အစည်းအရုံးကို ၂၀၁၁ ဒီဇင်ဘာလက စတင်ဖွဲ့စည်းခဲ့ပြီး မည်သည့်ပါတီ မည်သည့်အဖွဲ့အစည်း၏ လက်အောက်ခံမှ မဟုတ်ဘဲ အသက် ၁၆ နှစ်မှ အသက် ၃၅ နှစ်အတွင်းရှိ လူငယ်များဖြင့် ဖွဲ့စည်းတည်ဆောက်ထားသော အဖွဲ့အစည်းတစ်ခုဖြစ်သည်။ မြန်မာနိုိင်ငံရှိ လူငယ်များ၏ အသံများကိုလည်း ပြည်သူ့လွှတ်တော်သို့ ရောက်ရှိအောင် ဆောင်ရွက်ပေးနေသော အဖွဲ့အစည်းတစ်ခုလည်းဖြစ်သည်။

သြဂုတ်လ ၁၂ ရက်နေ့ကို နိုင်ငံတကာ လူငယ်များနေ့အဖြစ် ကမ္ဘာ့ကုလသမဂ္ဂမှ ၁၉၉၉ခုနှစ်တွင် စတင်သတ်မှတ်ခဲ့ပြီး ၂၀၀၀ ခုနှစ်တွင် အခမ်းအနားများ စတင်ကျင်းပခဲ့သည်။