မေ ၂၁၊ ၂၀၂၃
M-Media
၁။ ဟာလန်းကို ခေါ်ယူခြင်း
ပြီးခဲ့တဲ့နှစ် လီဗာပူးလ်အသင်းကို ပွတ်ကာသီကာ ကျော်ဖြတ်ပြီး ပရီးမီးယားလိဂ်ချန်ပီယံဖြစ်ခဲ့တဲ့ မန်စီးတီးအသင်းမှာ အဆုံးအဖြတ်ပေးနိုင်မယ့် တိုက်စစ်သမားကောင်းကောင်း မရှိခဲ့ပါဘူး။ ကွင်းလယ်လူ ဒီဘရိုင်း အသင်းရဲ့ ဂိုးအများဆုံးသွင်းသူ ဖြစ်ခဲ့တာက မန်စီးတီးအသင်းရဲ့ တိုက်စစ်အားနည်းမှုကို ပြသနေပါတယ်။
ဒီနှစ်မှာတော့ ဂွါဒီယိုလာဟာ ဒီကွက်လပ်ကို ဟာလန်းနဲ့ အကောင်းဆုံး ဖြည့်ဆည်းနိုင်ခဲ့ပါတယ်။ ဟာလန်းဟာ သူ့ရဲ့ ပထမဆုံးရာသီမှာပဲ ပရီးမီးယားလိဂ်သမိုင်းရဲ့ စံချိန်တင်ဂိုးသွင်းဘုရင်ဖြစ်ခဲ့ပြီး ပရီးမီးလားလိဂ်ဖလားကိုလည်း ကိုင်မြှောက်နိုင်တော့မှာ ဖြစ်ပါတယ်။
၂။ ဒါဘီပွဲ အနိုင်ရခြင်း
ဖလားစိန်ခေါ်မယ့်အသင်းတွေဟာ ရာသီအစောပိုင်းကာလမှာ ရလဒ်တွေကောင်းထားဖို့ လိုအပ်ပါတယ်။ အထူးသဖြင့် ဖလားလုမယ့်ပြိုင်ဘက်တွေ၊ မြို့ခံပြိုင်ဘက်တွေနဲ့ တွေ့တဲ့အချိန်မျိုးမှာပါ။ ရာသီအစ အောက်တိုဘာလ အိမ်ကွင်း မန်ယူနဲ့ ဒါဘီပွဲမှာ မန်စီးတီးဟာ ၆ ဂိုး ၃ ဂိုးနဲ့ အနိုင်ယူနိုင်ခဲ့ပါတယ်။ ဒီပွဲဟာ အခုနှစ် မန်စီးတီးရဲ့ အကောင်းဆုံးပွဲတွေထဲက တစ်ပွဲလည်း ဖြစ်ပါတယ်။
၃။ စပါးပွဲ ပြန်လာနိုင်ခြင်း
၂၀၂၃ အစပိုင်းမှာ မန်စီးတီးရဲ့ခြေစွမ်းဟာ အလွန်ဆိုးရွားခဲ့ပါတယ်။ နှစ်အစ အိမ်ကွင်းမှာ အဲဗာတန်ကို ၁ ဂိုးစီ သရေကျပြီး၊ နောက်တစ်ပွဲမှာ မန်ယူကို ၂ ဂိုး ၁ ဂိုးနဲ့ ရှုံးနိမ့်ခဲ့ပါတယ်။ တတိယပွဲဖြစ်တဲ့ စပါးနဲ့ ပွဲမှာလည်း မန်စီးတီးဟာ ပထမပိုင်းမှာ ၂ ဂိုးပြတ်နဲ့ ရှုံးနိမ့်နေတာပါ။ ဒုတိယပိုင်းမှာတော့ အလ်ဗာရက်ဇ်၊ ဟာလန်း၊ မာရက်ဇ်တို့ရဲ့ အစွမ်းပြမှုနဲ့ ၄ ဂိုးပြန်သွင်းကာ အနိုင်ရခဲ့ပါတယ်။ အဲဒီပွဲနောက်ပိုင်း မန်စီးတီးဟာ အများဆုံးရနိုင်တဲ့ အမှတ်တွေထဲက ၅ မှတ်သာ ဆုံးရှုံးခဲ့ပါတယ်။
၄။ ကန်ဆယ်လိုကို လက်လွှတ်ခြင်း
ပြီးခဲ့တဲ့ ၂ နှစ်မှာ အကောင်းဆုံးခြေစွမ်းပြခဲ့တဲ့ ကန်ဆယ်လိုဟာ ဟာလန်ကို အသားပေးတဲ့ ဂွါဒီယိုလာရဲ့ နည်းစနစ်အပြောင်းအလဲမှာ အံမ၀င်တော့ပါဘူး။ သူ့နေရာကို နသန်အေကီ ၀င်လာတဲ့အခါ ကန်ဆယ်လိုဟာ အသင်းရဲ့စည်းလုံးမှုကို ထိခိုက်စေတဲ့ ကစားသမားတစ်ယောက် ဖြစ်လာခဲ့ပါတယ်။ ဒါကို ရိပ်မိလာတဲ့ ဂွါဒီယိုလာဟာ ဇန်န၀ါရီနှောင်းပိုင်းမှာ ကန်ဆယ်လိုကို ဘိုင်ယန်မြူးနစ်ဆီ အငှားနဲ့ပိုခဲ့ပါတယ်။ သူ့နေရာကို အေကီနဲ့ အေကန်ဂျီတို့က အကောင်းဆုံး အစားထိုးနိုင်ခဲ့ပြီး အသင်းကလည်း ကွင်းတွင်းကွင်းပြင် ပိုမိုစည်းလုံးလာခဲ့ပါတယ်။
၅။ ဘဏ္ဍာရေးစည်းမျဥ်း ပြဿနာ
မန်စီးတီးအပါအ၀င် ပရီးမီးယားလိဂ် ထိပ်တန်းအသင်းတစ်ချို့ဟာ ဘဏ္ဍာရေးစည်းမျဥ်း ချိုးဖောက်တယ်ဆိုတဲ့ သတင်းတွေ ဖေဖော်၀ါရီ ၆ ရက်နေ့မှာ ထွက်လာပါတယ်။ မန်စီးတီးဟာ ပရီးမီးလားလိဂ် ချန်ပီယံဘွဲ့ကို စွန့်လွှတ်ရတာ၊ တန်းဆင်းရတာတွေအထိ ဖြစ်နိုင်တယ်လို့ ပြောလာကြပါတယ်။ ဂွါဒီယိုလာက ဒီပြဿနာကို အသင်းအတွက် တွန်းအားအဖြစ် အသုံးချနိုင်ခဲ့ပါတယ်။ ဒီသတင်းနောက်ပိုင်း မန်စီးတီးဟာ ပြိုင်ပွဲပေါင်းစုံ ၂၃ ပွဲဆက်တိုက် ရှုံးပွဲမရှိ ကစားနိုင်ခဲ့ပြီး၊ ပရီးမီးယားလိဂ်မှာရနိုင်တဲ့ ၄၂ မှတ်မှာ အမှတ် ၄၀ အထိ ရယူနိုင်ခဲ့ပါတယ်။
၆။ အာဆင်နိုင်ကို အနိုင်ယူခြင်း
ဇယားထိပ်မှာ တောက်လျှောက်ဦးဆောင်လာတဲ့ အာဆင်နယ်ကို ဖေဖော်၀ါရီလ အ၀ေးကွင်းမှာ အနိုင်ယူနိုင်ခဲ့တာကလည်း ချန်ပီယံလမ်းကြောင်းပေါ် ပိုမိုခိုင်မြဲစေမယ့် ဖြစ်ရပ်တစ်ခု ဖြစ်ပါတယ်။ ၃ ဂိုး ၁ ဂိုးနဲ့ အနိုင်ရတဲ့ အဲဒီပွဲဟာ အာဆင်နယ်အသင်းကို စိတ်ပိုင်းဆိုင်ရာ ထိခိုက်စေခဲ့ပါတယ်။ ဧပြီလ အိမ်ကွင်းပွဲမှာတော့ မန်စီးတီးဟာ ၄ ဂိုး ၁ ဂိုးနဲ့ ထပ်မံအနိုင်ယူကာ အာဆင်နယ်ကို အလဲထိုးနိုင်ခဲ့ပါတယ်။
၇။ လီဗာပူးလ်ကို အနိုင်ယူခြင်း
ဧပြီလ ၁ ရက်နေ့ လီဗာပူးလ်နဲ့ပွဲဟာ မန်စီးတီးရဲ့ ချန်ပီယံပြေးလမ်းကြောင်းမှာ အရေးပါတဲ့ ပွဲတစ်ပွဲပါ။ ဒီပွဲမှာ အားထားရတဲ့ တိုက်စစ်မှူးဟာလန်း ဒဏ်ရာကြောင့် မပါ၀င်နိုင်ခဲ့ပါဘူး။ အာဆင်နယ်ကို အမှီလိုက်နိုင်ရေး ဒီပွဲက အရေးကြီးနေပြီး ပထမပိုင်းမှာ မန်စီးတီးက ၁ ဂိုး ဂိုးမရှိနဲ့ ရှုံးနိမ့်ခဲ့ပါတယ်။ ဒုတိယပိုင်းမှာ မန်စီးတီးဟာ ချန်ပီယံ ခြေစွမ်းပြခဲ့ပြီး အယ်လ်ဗာရက်ဇ်၊ ဒီဘရိုင်း၊ ဂွမ်ဒိုဂန်နဲ့ ဂရင်းလစ်ရှ်တို့က ဂိုးတွေသွင်းကာ ၄ ဂိုး ၁ ဂိုးနဲ့ အနိုင်ရခဲ့ပါတယ်။
၈။ အခွင့်အရေးယူနိုင်ခြင်း
အာဆင်နယ်ရဲ့ အမှားတွေကို အခွင့်အရေးယူနိုင်ခဲ့တာကလည်း မန်စီးတီးရဲ့ ဖလားလမ်းကြောင်းကို ပိုမို ခိုင်မြဲစေခဲ့ပါတယ်။ ဧပြီလအတွင်း အာဆင်နယ်ဟာ လီဗာပူးလ်နဲ့ ၀က်စ်ဟမ်းတို့ကို ဦးဆောင်ဂိုးတွေ သွင်းယူပြီးမှ သရေကျခဲ့ပြီး၊ ဆောက်သက်တမ်နဲ့ပွဲမှာလည်း နောက်ဆုံး မိနစ်ချေပဂိုးကြောင့် သရေတစ်မှတ် ရခဲ့ပါတယ်။ အာဆင်နယ်က အမှတ်တွေဆုံးရှုံးနေချိန် မန်စီးတီးဟာ လက်စတာ၊ ဖူလ်ဟမ်နဲ့ ၀က်စ်ဟမ်းတို့ကို အနိုင်ကစားကာ အမှတ်ပြည့် ရယူနိုင်ခဲ့ပါတယ်။
၉။ ၁၁ ပွဲဆက်အနိုင်
မေလ ၁၄ ရက်နေ့က ကစားခဲ့တဲ့ အဲဗာတန်နဲ့ အ၀ေးကွင်းပွဲဟာ မန်စီးတီးတို့ ဖလားရဖို့ ၇၅ ရာခိုင်နှုန်း သေချာစေခဲ့ပါတယ်။ ပထမ မိနစ် ၃၀ အတွင်း ရုန်းကန်ခဲ့ရတဲ့ မန်စီးတီးဟာ နောက်ပိုင်းမှာ ၃ ဂိုးသွင်းကာ အနိုင်ယူနိုင်ခဲ့ပါတယ်။ တစ်ဖက်မှာ အာဆင်နယ်အသင်းက ဘရိုက်တန်ကို ရှုံးနိမ့်ခဲ့တာကြောင့် လက်ကျန် ၃ ပွဲမှာ တစ်ပွဲနိုင်တာနဲ့ ချန်ပီယံဖြစ်နိုင်မယ့် အခွင့်အရေးကို ရရှိခဲ့ပါတယ်။
မနေ့က အာဆင်နယ်ဟာ နော်တင်ဟမ်ဖောရက်စ်ကို ရှုံးနိမ့်ခဲ့တာကြောင့် မန်စီးတီးအသင်းဟာ ၃ နှစ်ဆက် ပရီးမီးယားလိဂ်ချန်ပီယံ ဖြစ်လာခဲ့ပါတယ်။
Ref: Goal
