အောက်တိုဘာ ၂၅၊ ၂၀၁၇
M-Media
– ဆီးရီးယားတွင် IS လက်ထဲသို့ ကျရောက်နေသည့် နယ်မြေမှာ ၅ ရာခိုင်နှုန်းသာ ရှိတော့သည်ဟု ရုရှားက ပြောကြားလိုက်ပြီး မိမိတို့၏ လေတပ်အထောက်အပံ့ဖြင့် ဆီးရီးယားအစိုးရစစ်တပ်မှာ ထိုးစစ်များကို ဆက်လက်ဆောင်ရွက်နေသည်ဟု ဆိုသည်။
တနင်္လာနေ့တွင် ဖိလစ်ပိုင်၌ပြုလုပ်သော ညီလာခံတစ်ခု၌ ရုရှားကာကွယ်ရေးဝန်ကြီး Sergei Shoigu က IS အကြမ်းဖက်အဖွဲမှာ ရုရှားစစ်တပ်ဦးဆောင်သော လေကြောင်းထိုးစစ်များမပြုလုပ်မီ ၂၀၁၅ စက်တင်ဘာလက ဆီးရီးယား ပိုင်နက် ၇၀ ရာခိုင်နှုန်းကျော်ကို ထိန်းချုပ်ထားကြောင်း၊ ရုရှားစစ်လေယာဉ်များသည် အကြမ်းဖက်စခန်း ၉၀၀ ကျော်နှင့် လက်နက်အမြောက်အများကိုလည်း ဖျက်စီးပစ်နိုင်ခဲ့ကြောင်း ပြောကြားခဲ့သည်။
ရုရှားစစ်တပ်နှင့် မဟာမိတ်တပ်များ၏ ပံ့ပိုးမှုဖြင့် ဆီးရီးယားစစ်တပ်သည် IS တပ်ဖွဲ့များ သုံးနှစ်ကြာတပ်စွဲထားသော Dayr al-Zawr ပြည်နယ်ကို ပြီးခဲ့သည့်တစ်ပတ်တွင် ပြန်လည်ထိန်းချုပ်နိုင်ခဲ့သည်။
၂၀၁၄ ခုနှစ် အလယ်ပိုင်းက ဆီးရီးယားနှင့် အီရတ်ရှိ နယ်မြေအမြောက်အများကို IS အကြမ်းဖက်သမားများက သိမ်းယူနိုင်ခဲ့သည့်အချိန်တွင် Dayr al-Zawr ပြည်နယ်မှာလည်း ၎င်းတို့လက်သို့ ကျရောက်ခဲ့သည်။
Ref: Press TV
