မတ် ၄၊ ၂၀၂၃
M-Media
-နာမည်ကြီး ဟောင်ကောင်မော်ဒယ် အက်ဘီချိုင် ရက်ရက်စက်စက် သတ်ဖြတ်ခံရမှုအတွက် ဟောင်ကောင်ရဲတပ်ဖွဲ့က ခင်ပွန်းဟောင်းရဲ့ မိသားစုနဲ့ ပတ်သက်ဆက်နွယ်သူ အနည်းဆုံး ၆ ဦးကို ဖမ်းဆီးထားပါတယ်။
အက်ဘီချိုင်ဟာ ဖေဖော်၀ါရီ ၂၂ ရက်နေ့က ပျောက်ဆုံးသွားတာပါ။ စုံစမ်းစစ်ဆေးမှုတွေအရ ၈ နှစ်အရွယ် သူမရဲ့သမီးကို ကျောင်းသွားကြိုဖို့ ခင်ပွန်းဟောင်းရဲ့ညီ Anthony Kwong က ကားနဲ့လာခေါ်သွားပြီးတဲ့နောက် အဆက်အသွယ်ပြတ်တောက်သွားတာဖြစ်ပါတယ်။
ရဲတပ်ဖွဲ့က Anthony Kwong နဲ့ သူ့ရဲ့မိသားစုကို စစ်ဆေးမြန်းတာ၊ အသုံးပြုတဲ့ ကား၊ စောင့်ကြည့်ကင်မရာတွေကို ခြေရာခံတာတွေ ပြုလုပ်ခဲ့ပြီးတဲ့နောက် Tai Po ဆိုတဲ့ရွာက တိုက်ခန်းတစ်ခုကို တွေ့ခဲ့ရပါတယ်။
အဲဒီတိုက်ခန်းကို ၀င်ရောက်ရှာဖွေရာမှာ အက်ဘီရဲ့ ဦးခေါင်းခွံနဲ့ နံရိုးတွေကို စွပ်ပြုတ်အိုးကြီးနှစ်ခုထဲမှာ တွေ့ခဲ့ရပြီး၊ ခြေထောက် နှစ်ချောင်းကိုတော့ ရေခဲသေတ္တာထဲမှာ တွေ့ခဲ့ရပါတယ်။
အိမ်ထဲကနေ အသားကြိတ်စက်၊ လျှပ်စစ်လွှနဲ့ ဓားတော်တောများများကိုလည်း ရဲတပ်ဖွဲ့က သိမ်းဆည်းရမိခဲ့ပါတယ်။ ပျောက်ဆုံးတဲ့နေ့က အက်ဘီကိုင်ဆောင်သွားတဲ့ ပန်းရောင် ပိုက်ဆံအိတ်၊ သူမရဲ့ မှတ်ပုံတင်နဲ့ အကြွေး၀ယ်ကတ်တွေကိုလည်း အဲဒီတိုက်ခန်းမှာ တွေ့ရှိခဲ့ပါတယ်။
တိုက်ခန်းကို အခင်းမဖြစ်ခင် ၃ ပတ်လောက်အလိုမှာ အက်ဘီရဲ့ ယောက္ခထီးဟောင်း Kwong Kau က ငှားရမ်းထားတာပါ။
အက်ဘီရဲ့ ကိုယ်ခန္ဓာနဲ့ လက်တွေကို ဆက်လက်ရှာဖွေနေဆဲ ဖြစ်ပါတယ်။
အက်ဘီချိုင်ရဲ့ ယောက်က္ခထီးဟောင်း Kwong Kau နဲ့ ယောက္ခမဟောင်း Jenny Li၊ မတ်ဟောင်း Anthony Kwong တို့ကို ရဲတပ်ဖွဲ့က ဖမ်းဆီးထားပါတယ်။
ခင်ပွန်းဟောင်း Alex Kwong ကို အမြန်မော်တော်ဘုတ်နဲ့ ထွက်ပြေးဖို့ ကြိုးစားနေတဲ့အချိန် ဖေဖော်၀ါရီ ၂၅ ရက်နေ့မှာ ဖမ်းဆီးနိုင်ခဲ့ပြီး သူ့ဆီက ငွေသား ကန်ဒေါ်လာ ၆၄၀၀၀နဲ့ ကန်ဒေါ်လာ ၅၁၀၀၀၀ လောက်တန်တဲ့ တန်ဖိုးကြီးနာရီတွေ သိမ်းဆည်းရမိခဲ့ပါတယ်။
Kwong Kau၊ Alex Kwong နဲ့ Anthony Kwong တို့ကို လူသတ်မှုနဲ့ ရဲတပ်ဖွဲ့က တရားစွဲဆိုထားပြီး ယောက္ခမ Jenny Li ကို ပူးပေါင်းကြံစည်မှု၊ သက်သေအထောက်အထား ဖျက်ဆီးမှုတို့နဲ့ တရားစွဲဆိုထားပါတယ်။
Kwong Kau နဲ့ ချစ်ကြိုက်နေတဲ့ အသက် ၄၇ နှစ်အရွယ် အမျိုးသမီးတစ်ဦးကို အခင်းဖြစ်ပွားတဲ့ တိုက်ခန်း ငှားရမ်းရာမှာ ကူညီမှုနဲ့ ဖမ်းဆီးခဲ့ပြီး အက်ဘီချိုင်ရဲ့ ခင်ပွန်းဟောင်း ထွက်ပြေးဖို့ ကူညီပေးခဲ့တဲ့ လှေပိုင်ရှင်လည်း ဖမ်းဆီးခံထားရပါတယ်။
အက်ဘီချိုင်နဲ့ ခင်ပွန်းဟောင်း မိသားစုဟာ ကန်ဒေါ်လာ ၉ သန်း တန်ဖိုးရှိတဲ့ ဟောင်ကောင်က ဇိမ်ခံအိမ်တစ်လုံး ရောင်းချဖို့ကိစ္စအတွက် အငြင်းပွားနေကြတာဖြစ်ပါတယ်။ အက်ဘီမှာ ခင်ပွန်းဟောင်းနဲ့ ရထားတဲ့ ကလေးနှစ်ဦး ရှိပါတယ်။
ဒီအိမ်ကို အက်ဘီက ၀ယ်ခဲ့ပေမယ့် သူ့ယောက္ခမဟောင်း Kwong Kau က အမည်ခံထားတာပါ။
အက်ဘီဟာ Chris Tam ဆိုသူနဲ့ မကြာခင်မှာ တရား၀င် လက်ထပ်ဖို့ ရှိနေပြီး၊ ဒီမင်္ဂလာပွဲပြီးသွားရင် Kwong Kauနဲ့ အက်ဘီရဲ့ သားသမီးနှစ်ဦး ရရှိမယ့် ပိုင်ဆိုင်မှုတွေဟာ Chris Tam လက်ထဲ ရောက်သွားမယ့်အလားအလာ ရှိတဲ့အတွက် ယောက္ခမဟောင်း Kwong Kau က အက်ဘီကို သတ်ဖြတ်ဖို့ စီစဥ်ဆောင်ရွက်ခဲ့တာလို့ ယူဆကြောင်း ရဲတပ်ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။
Ref: Forbes, South China Morning Post
