Blog

M-Media

ဂါဇာတွင် ပိုလီယိုကာကွယ်ဆေးထိုးနှံမှု အောင်မြင်စွာပြီးဆုံး
——————-
ကုလသမဂ္ဂနဲ့ အာရပ်နိုင်ငံတွေ ဦးဆောင်ပြီး ဂါဇာကမ်းမြှောင်မှာ ပထမအသုတ် ပိုလီယို ကာကွယ်ဆေး ထိုးနှံမှု အောင်မြင်စွာ ပြီးဆုံးသွားခဲ့ပြီး ကလေးငယ် ၃၅၅၀၀၀ လောက် ဆေးရရှိခဲ့ပါတယ်။ လာမယ့်ရက်ပိုင်းမှာ ဂါဇာတောင်ပိုင်းက ကလေးငယ် ၃ သိန်းလောက်ကို ထပ်မံထိုးနှံပေးမှာ ဖြစ်ပါတယ်။ ဂါဇာကျန်းမာရေးဌာနက အစ္စရေးဟာ ဂါဇာတောင်ပိုင်းမှာ ဆေး၀ါးတင်သွင်းမှုကို တားဆီးထားတဲ့အတွက် ခက်ခဲနိုင်တယ်လို့ သတိပေးထားပါတယ်။

တရားမ၀င်အခြေချသူများ၏ တိုက်ခိုက်မှု ပိုမိုမြင့်တက်လာ
—————
ပါလက်စတိုင်းပိုင်နက် အနောက်ဖက်ကမ်းက အစ္စရေးရဲ့ ကျူးကျော်အိမ်ယာမှာ နေထိုင်သူတွေရဲ့ ပါလက်စတိုင်းတွေအပေါ် အကြမ်းဖက်တိုက်ခိုက်မှုဟာ အခုသီတင်းပတ်တွေမှာ ပိုမိုမြင့်တက်လာတယ်လို့ စောင့်ကြည့်သူတွေက ပြောပါတယ်။ အနောက်ဖက်ကမ်းမှာ အစ္စရေးစစ်တပ်ရဲ့ စီနင်းတိုက်ခိုက်မှုကို အကာအကွယ်ယူကာ အကြမ်းဖက်မှုတွေ ပိုမိုတိုးလုပ်လာတာ ဖြစ်ပါတယ်။ အစ္စရေးရဲ့ စီးနင်းမှုအတွင်း အနည်းဆုံး ၂၀ ကျော် သေဆုံးခဲ့ပါတယ်။

အမေရိကန် တက်ကြွလှုပ်ရှားသူ အမျိုးသမီး အသတ်ခံရ
——————
အနောက်ဖက်ကမ်း ဘိုက်တာမြို့က ကျူးကျော်အိမ်ယာဆန့်ကျင်ရေး ဆန္ဒပြပွဲမှာ တူရကီနွယ်ဖွား အမေရိကန်နိုင်ငံသား တက်ကြွလှုပ်ရှားသူ အသက် ၂၆ နှစ်အရွယ် အဇ်ဂီ အိုင်ဂီဟာ အစ္စရေးရဲ့သတ်ဖြတ်ခြင်းကို ခံလိုက်ရပါတယ်။ သူမဟာ အင်္ဂါနေ့ကမှ ပါလက်စတိုင်းကို ရောက်ရှိလာတာ ဖြစ်ပါတယ်။ ပါလက်စတိုင်းပိုင်နက်တွေမှာ ကျူးကျော်အိမ်ယာဆောက်လုပ်မှုကို ဆန့်ကျင်တဲ့လှုပ်ရှားမှု ISM မှာ နိုင်ငံခြား တက်ကြွလှုပ်ရှားသူတွေ ပါ၀င်လေ့ရှိပြီး အစ္စရေးက ဒီလှုပ်ရှားမှုမှာ ပါ၀င်တဲ့ နိုင်ငံခြားသား ၃ ဦးအထိ သတ်ဖြတ်ထားပါတယ်။ ၂၀၀၃၊ ၂၀၀၄ နဲ့ ၂၀၂၄ ခုနှစ်တွေမှာ ဖြစ်ပါတယ်။

Ref: Aljazeera

စက်တင်ဘာ ၅၊ ၂၀၂၄
M-Media

ဂါဇာတွင် အပစ်ရပ်ရေးရရန် နီးစပ်လာ
————–
ဂါဇာအပစ်ရပ်ရေး စာပိုဒ် ၁၈ ပိုဒ်ပါတဲ့ စာချုပ်မှာ ၁၄ ပိုဒ်နဲ့ ပတ်သက်ပြီး ဟားမက်စ်နဲ့ အစ္စရေးတို့အကြား အပြည့်အ၀ သဘောတူညီချက် ရထားတယ်လို့ အမေရိကန်ဖက်က ထုတ်ပြန်လာပါတယ်။ ဂါဇာက ‘ဖီလာဒဲလ်ဖီး’ အကူအညီပေးရေးလမ်းကြောင်းမှာ အစ္စရေးတပ်တွေ မရှိရေး၊ အစ္စရေးက နှစ်ပေါင်းများစွာ ဓားစားခံအဖြစ် ဖမ်းထားတဲ့ ပါလက်စတိုင်းထောင်ချီကို လွှတ်ပေးရေးကိစ္စတွေနဲ့ပတ်သက်ပြီး သဘောထား ကွဲလွဲနေတာကြောင့် ဆက်လက်ဆွေးနွေးမှုတွေ လုပ်ဆောင်နေတယ်လို့ ဆိုပါတယ်။

အစ္စရေးကို ဘေးဖယ်ထားဖို့ ဓားစားခံမိသားစုများ တောင်းဆို
—————
ဓားစားခံတွေ လွှတ်ပေးရေးကိစ္စမှာ အစ္စရေးကတစ်ဆင့်မဟုတ်ဘဲ ဟားမက်စ်နဲ့ တိုက်ရိုက် ညှိနှိုင်းဖို့ အမေရိကန် ဓားစားခံတွေရဲ့ မိသားစု၀င်တွေက အမေရိကန်အစိုးရကို တောင်းဆိုလိုက်ပါတယ်။ အစ္စရေးပြည်သူတွေကလည်း အပစ်ရပ်ပြီး ဓားစားခံတွေ လွတ်မြောက်ရေး ဟားမက်စ်နဲ့ လက်တွေ့ကျကျ ညှိနှိုင်းဖို့ ပြီးခဲ့တဲ့ရက်ပိုင်းကစပြီး နေတန်ယာဟုအစိုးရကို ဆန္ဒပြ တောင်းဆိုနေကြပါတယ်။

Al-Aqsa Martyrs ဆေးရုံ၀င်းထဲက စစ်ရှောင်တွေ အသတ်ခံရ
————-
ဂါဇာကမ်းမြှောင် Al-Aqsa Martyrs ဆေးရုံ၀င်းထဲက စစ်ရှောင်တွေ ခိုလှုံနေတဲ့ တဲတွေကို အစ္စရေးက စက်တင်ဘာ ၅ ရက်နေ့မှာ ဒုံးကျည်နဲ့ တိုက်ခိုက်တာကြောင့် လူ ၄ ဦးထက်မနည်း သေဆုံးခဲ့ပါတယ်။ ဂါဇာမှာ အစ္စရေးရဲ့သတ်ဖြတ်မှုကို ခံရသူ အရေအတွက်ဟာ ၁၁ လအတွင်း ၄၁၀၀၀ နီးပါး ရှိလာပြီ ဖြစ်ပါတယ်။

အနောက်ဖက်ကမ်းတွင် အသက်ခံရသူ ၄၀ အထိ ရှိလာ
—————
ပါလက်စတိုင်းပိုင် အနောက်ဖက်ကမ်းမှာ သြဂုတ် ၂၈ ရက်နေ့စတင်ပြီး အစ္စရေးကလုပ်ဆောင်တဲ့ စီးနင်းတိုက်ခိုက်မှုတွေကြောင့် သေဆုံးသူအရေအတွက်ဟာ ၄၀ အထိ ရှိလာပါပြီ။ အသတ်ခံရသူ အများစုဟာ လူငယ်လူရွယ်တွေဖြစ်ပါတယ်။