Blog

M-Media

ပိုလီယို ကာကွယ်ဆေးထိုးနှံရေး အပစ်ရပ်ရန် ကုလတောင်းဆို
————–
ဂါဇာကမ်းမြှောင်မှာ နောက်ထပ်တစ်ကြိမ် ပိုလီယိုကာကွယ်ဆေး ထိုးနှံနိုင်ရေး ခဏဝာာအပစ်ရပ်ဖို့အတွက် ကုလအဖွဲ့အစည်းတွေက တောင်းဆိုလိုက်ပါတယ်။ စက်တင်ဘာ ၁ ရက်နေ့က ၁၂ ရက်နေ့အထိ ပထမအကျော့မှာ အသက် ၁၀ နှစ်အောက် ကလေးငယ်ပေါင်း ၅၅၈၉၆၃ ဦးကို ပိုလီယိုကာကွယ်ဆေး ထိုးနှံပေးခဲ့ပြီး နောက်ထပ် ၄ ပတ်အတွင်း ဒုတိယအကြိမ် ထိုးနှံပေးဖို့ လိုအပ်မှာ ဖြစ်ပါတယ်။

၂ နှစ်နိုင်ငံတည်ရှိရေးကို ထောက်ခံကြောင်း ဥရောပထုတ်ပြန်
————–
ပါလက်စတိုင်းနိုင်ငံ ပေါ်ပေါက်လာရေးနဲ့ နှစ်နိုင်ငံတည်ရှိရေးအဖြေကိုသာ ထောက်ခံကြောင်း ဥရောပနဲ့ အာရပ် နိုင်ငံခြားရေး၀န်ကြီးတွေက စက်တင်ဘာ ၁၃ ရက်နေ့မှာ ပူးတွဲထုတ်ပြန်ပါတယ်။ ဂါဇာမှာ ချက်ခြင်း အပစ်ရပ်ပြီး အစ္စရေးတပ်တွေ ဆုတ်ခွာဖို့၊ ပါလက်စတိုင်းတွေ အိုးမဲ့အိမ်မဲ့ထပ်ဖြစ်တာမျိုး မလုပ်ဆောင်ဖို့ကိုလည်း ၀န်ကြီးတွေက တိုက်တွန်းခဲ့ပါတယ်။

ဂါဇာတွင် အသတ်ခံရသူ ၄၁၀၀၀ ကျော်လာပြီ
————
ပြီးခဲ့တဲ့နှစ် အောက်တိုဘာက စတင်တဲ့ ဂါဇာက အစ္စရေးရဲ့ လူသတ်ပွဲအတွင်း အသတ်ခံရသူအရေအတွက်ဟာ ၄၁၁၁၈ ဦး ရှိလာပါပြီ။ အဲဒီအထဲက ၁၆၅၀၀ ဟာ ကလေးငယ်တွေ ဖြစ်ပါတယ်။ ပျောက်ဆုံးနေသူက တစ်သောင်းကျော် ရှိပါတယ်။ ပြီးခဲ့တဲ့ သီတင်းနှစ်ပတ်အတွင်း အစ္စရေးဟာ ကိုယ်တိုင် သတ်မှတ်ပေးထားတဲ့ စစ်ရှောင်ဇုန်တွေကို ပစ်မှတ်ထား တိုက်ခိုက်ခဲ့ပြီး စစ်ဘေးရှောင် ဒါဇင်နဲ့ချီ သေဆုံးခဲ့ပါတယ်။

M-Media

ဂါဇာတွင် ထိခိုက်သူအများစုက ကလေးငယ်များဖြစ်နေ
—————
ဂါဇာကမ်းမြှောင်က ဥရောပ-ဂါဇာ ဆေးရုံမှာ သြဂုတ်လက ၂ ပတ်တာ တာ၀န်ထမ်းဆောင်ခဲ့မှုအတွင်း ကုပေးခဲ့ရတဲ့ လူနာတွေရဲ့ ၈၀ ရာခိုင်နှုန်းလောက်ဟာ ၁၆ နှစ်အောက် ကလေးငယ်တွေဖြစ်တယ်လို့ ယူကေ ဆရာ၀န် ဗစ်တိုးရီးယားရို့စ်က ပြောပါတယ်။ သူမဟာ အခုနှစ် မတ်လကလည်း ဒီဆေးရုံမှာ တာ၀န်ထမ်းဆောင်ခဲ့ပါတယ်။ ၁၁ လ ကြာမြင့်နေပြီဖြစ်တဲ့ အစ္စရေးရဲ့ ဂါဇာက တစ်ကျော့ပြန်လူသတ်ပွဲမှာ အသတ်ခံရသူ ၄၁၀၀၀ နီးပါးရှိလာပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။

အဟာရပြတ်လပ်သေဆုံးသည့် ကလေးငယ်အရေအတွက် ၃၇ ဦးအထိ ရှိလာ
——————
စက်တင်ဘာ ၇ ရက်နေ့မှာ ဂါဇာက ကလေးငယ်တစ်ဦး အဟာရပြတ်လပ် သေဆုံးခဲ့ပြီး၊ ၁၁ လအတွင်း အဟာရပြတ်သေဆုံးသူ ကလေးငယ် ၃၇ ဦးအထိ ရှိလာတာ ဖြစ်ပါတယ်။ အစ္စရေးဟာ လူသတ်ပွဲဆင်နွှဲနေသလို တစ်ဖက်မှာလည်း ဂါဇာကို နိုင်ငံတကာကပေးပို့တဲ့ အစားအသောက်၊ ဆေး၀ါး အကူအညီတွေ ၀င်ရောက်လို့မရအောင် နှောက်ယှက်ဟန့်တားနေပါတယ်။ ဂါဇာမှာ ကလေးငယ် ၅ သောင်းလောက်ဟာ အဟာရ ပြတ်လတ်မှုဒဏ်ကို ကာကွယ်ဖို့အတွက် ချက်ခြင်း ဆေးကုသမှုခံယူဖို့ လိုအပ်နေတယ်လို့ ကုလက ဇွန်လမှာ ထုတ်ပြန်ထားပါတယ်။

ဂါဇာတွင် တက္ကသိုလ် ၁၂ ခုစလုံး ဖျက်ဆီးခံထားရ
———————-
ဂါဇာမှာ စာသင်ကျောင်းပေါင်း ၅၆၄ ကျောင်း ရှိတဲ့အနက် ၈၅ ရာခိုင်နှုန်းဖြစ်တဲ့ ၄၇၇ ကျောင်းကို အစ္စရေးက လုံး၀ သုံးလို့မရအောင် ဖျက်ဆီးထားပါတယ်။ ကျန်ရှိနေတဲ့ ကျောင်းတွေလည်း တစ်စိတ်တစ်ပိုင်း ဖျက်ဆီးခံထားရပါတယ်။ ကမ်းမြှောင်အတွင်း တက္ကသိုလ် စုစုပေါင်း ၁၂ ခုရှိပြီး အားလုံးကို အစ္စရေးက တိုက်ခိုက်ဖျက်ဆီးထားပါတယ်။ ဂါဇာက တက္ကသိုလ်ကျောင်းသား ၈၈၀၀၀ လောက်ဟာ ပညာဆက်လက်သင်ယူနိုင်ခွင့် မရှိတော့ပါဘူး။

Ref: Aljazeera