Blog

အောက်တိုဘာ ၇၊ ၂၀၁၆
M-Media

– ဟဂ်ျခရီးစဉ်ဖြင့် သာသနာ့တာဝန် ထမ်းဆောင်ခဲ့သူများ ပြန်လာနေကြသည်။ တရုတ်နိုင်ငံ အနောက်ပိုင်း နင်ရှာပြည်နယ်၏ ဝေးလံခေါင်ဖျားသော တုန်ရှင်းမြို့မှ ဂျာမေဗလီဝတ်ကျောင်းတော် အပြင်ဘက်တွင် ၀တ်ပြုရန် စောင့်ဆိုင်းနေကြသည့် တရုတ်လူမျိုး အစ္စလာမ်ဘာသာဝင်များထဲမှ လီယူချွမ်းက ၎င်း၏ ဟဂ်ျကျင့်စဉ်ကို ‘လွတ်မြောက်ခြင်း’ဟု ကင်ပွန်းတပ်ခဲ့သည်။

“ကျွန်တော်တို့ရဲ့ ၀တ်ပြုဆုတောင်းမှုက ဒီဟဂ်ျကျင့်စဉ်ရဲ့ အိမ်စာပါပဲ။ ကျွန်တော်တို့ မွတ်စလင်တွေဟာ တစ်နေ့ကို ၅ ကြိမ် ၀တ်ပြုတယ်။ ကျွန်တော်တို့ဟာ ပြောင်းလွယ်ပြင်လွယ်ဖြစ်မှုနဲ့ ပြင်းထန်မှုကြားက အလယ်အလတ်လမ်းစဉ်ကို လိုက်နေသူတွေပါ” ဟု လီက ပြောကြားခဲ့သည်။

၎င်း၏ ထိုစကားက တရုတ်မွတ်စလင်များ တည်ရှိရမည့် အခြေအနေကို လှစ်ဟပြသွားခြင်းလည်းဖြစ်သည်။

တရုတ်နိုင်ငံတွင် ဘာသာရေးအရ သည်းမခံနိုင်မှုများက နာမည်ကျော်သည်။ တိဘက်တွင် ဗုဒ္ဓဘာသာဝင်များ၊ အနောက်ပိုင်း ဇင်ကျန်းပြည်နယ်တွင် မွတ်စလင်များ၊ ကမ်းရိုးတန်း ကျိကျန်းပြည်နယ်တွင် ခရစ်ယာန်ယာန်များမှာ အမြဲတမ်းလိုလို နှောက်ယှက်မှု၊ ဖမ်းဆီးမှု၊ ၎င်းတို့၏၀တ်ပြုရာနေရာများ ဖျက်ဆီးမှုတို့နှင့် ရင်ဆိုင်နေရသည်။ ဇင်ကျန်းတွင် အစ္စလာမ်ကို အစိုးရက အကြမ်းဖက်ဝါဒနှင့် နှိုင်းယှဉ်သမုတ်သည်။ မွတ်စလင်အမျိုးသမီးများ လုံလုံခြုံခြုံ ၀တ်စားဆင်ယင်ခြင်း မပြုရဟု အမိန့်ထုတ်သည်။ အစိုးရတာဝန် ထမ်းဆောင်နေကြသည့် မွတ်စလင်များကိုလည်း ဥပုသ်သီလမစောင့်ရန် ဖိအားပေးသည်။ သို့သော် ထိုကဲ့သို့ ဖိနှိပ်ချုပ်ချယ်မှုဒဏ်မှ ထူးထူးခြားခြားကင်းလွတ်နေသည့် တရုတ်မွတ်စလင် လူမျိုးစုတစ်ခုရှိပြီး ‘ဟွေ’ လူမျိုးများ ဖြစ်ကြသည်။

တရုတ်နိုင်ငံတွင် အစ္စလာမ်ဘာသာဝင် တိုင်းရင်သား အုပ်စုကြီး ၂ ခု ရှိပြီး တစ်စုက ဇင်ကျန်းပြည်နယ်ရှိ ၀ီဂါ လူမျိုးစုဖြစ်ကာ၊ နောက်တစ်စုက လူသိပ်မသိသည့် ဟွေ လူမျိုးစု ဖြစ်သည်။ တရုတ်၏ များပြားလှသော လူဦးရေနှင့်ယှဉ်လျှင် ထိုလူမျိုးစု နှစ်ခု၏ အရည်အတွက်က မပြောပလောက်သော်လည်း တစ်စုလျှင် လူဦးရေ ၁၀ သန်းခန့်ပြီး တူနီးရှားနိုင်ငံ လူဦးရေနှင့် တန်းတူ ရှိနေသည်။ ၀ီဂါမွတ်စလင်များက ဖိနှိပ်ချုပ်ချယ်ခံရသည့်အချိန်အတွင် ဟွေမွတ်စလင်များကတော့ တိုးတက်ထွန်းကားနေသည်။

(ဟွေလူမျိုး အများစုရှိသည့်) နင်ရှာပြည်နယ်တွင် ဗလီဝတ်ကျောင်းတော်အရေအတွက်က ၁၉၅၈ ခုနှစ်ထက်စာလျှင်လက်ရှိအချိန်၌ ၂ ဆတိုးလာပြီး ၁၉၀၀ မှ ၄၀၀၀ အထိ ရှိလာသည်ဟု Northern Nationalities တက္ကသိုလ်မှ အငြိမ်းစားပါမောက္ခ မာပင်းက ပြောကြားခဲ့သည်။ အသစ်အသစ်သော ဗလီဝတ်ကျောင်းတော်များကိုလည်း ပြည်နယ်အတွင်း ဆောက်လုပ်လျက် ရှိနေသည်။ ဟွေလူမျိုးများက စီးပွားရေးအရ အောင်မြင်ကြသူများဖြစ်သည်။ အစ္စလာမ်ကြောက်ရောဂါကြောင့် ပစ်မှတ်ထားခံရမှုလည်း နည်းသည်။ ထိုကဲ့သို့ အစ္စလာမ်ကြောင့်ရောဂါ၏ ပစ်မှတ်ထားခံရမှုမှ ကင်းလွတ်သည်ဆိုသည့် လူနည်းစု မွတ်စလင်လူ့အဖွဲ့အစည်းအရေအတွက်က ကမ္ဘာပေါ်တွက် လက်ချိုးရေတွက်၍ရသည်။

ဟွေတို့၏ ဘာသာရေးကျင့်သုံးမှုက တရုတ်နိုင်ငံတစ်ဝှမ်းရှိ အစ္စလာမ်ဘာသာဝင်များ၏ ကျင့်သုံးမှုအတိုင်းဖြစ်ပြီး အစ္စလာမ်၏ အဓိက ဓမ္မသတ်ကျောင်းတော်များကို ထင်ဟပ်စေသည်။ ဟွေပညာရှင်တစ်ဦးဖြစ်သူ မာထုန်က ဟွေလူမျိုးများ၏ ထက်ဝက်ကျော်မှာ လွန်ခဲ့သည့် ရာစုနှစ်ပေါင်းများစွာက တရုတ်နိုင်ငံသို့ ရောက်ရှိလာခဲ့သည့် ဟန္နဖီ ဓမ္မသတ်ကို လိုက်နာကျင့်သုံးကြသည်ဟု ဆိုသည်။ နင်ရှာမြို့တော် ယင်ချွမ်မြို့ တောင်ဘက်ရှိ နာဂျာဟူ ဗလီဝတ်ကျောင်းတော်၏ အ၀င်အ၀တွင် ‘ရှေးကျပြီး စစ်မှန်သည့် ဘာသာတရား’၊ ‘မူလဖြစ်တည်မှုမှ သွေဖယ်မသွား’ ဟူသည့် ဆိုင်းဘုတ်များကို ကပ်ထားသည်။ ဟွေလူမျိုးများ၏ ၅ ပုံတစ်ပုံက ၁၉ ရာစုတွင် ရောက်ရှိလာခဲ့သည့် ပိုပြင်းထန်းသော ၀ဟာဘီဝါဒကို လက်ခံကြသည်။ နောက်ထပ် ၅ ပုံ တစ်ပုံက အစ္စလာမ့် ၀ိပဿနာလမ်းစဉ်ဖြစ်သော ဆူဖီဝါဒ ၃ ခုမှ တစ်ခုကို လက်ခံကျင့်သုံးကြသည်။ ဟွေတို့၏ ထိုကဲ့သို့ ဘာသာရေးဆိုင်ရာ မတူကွဲပြားမှုက ကွန်မြူနစ်ပါတီ၏ မျက်စီစပါးမွေးစူးမှု မဖြစ်အောင် ကာကွယ်ပေးပြီး မွတ်စလင်လူမျိုးစုများအကြား ခွဲခြားအုပ်ချုပ်မှုကို ဖြစ်စေခဲ့သည်။

သို့သော်လည်း ဟွေလူမျိုးတို့ အောင်မြင်မှု၏ အဓိကလျှို့ဝှက်ချက်က ၀ီဂါမွတ်စလင်များနှင့် လူမျိုးရေးအရ၊ ယဉ်ကျေးမှုအရ ခြားနားမှုအပေါ် မူတည်သည်။ ၀ီဂါမွတ်စလင်များက တာ့က်အနွယ်များဖြစ်ပြီး လူမျိုးခြားအဖြစ် သတ်မှတ်ခံရသည်။ ကိုယ်ပိုင်စကားပြောဆိုကာ တူရကီ၊ ဥဇဘက်တို့နှင့် ဆက်နွယ်နေသည်။ ၎င်းတို့ ကိုယ်ပိုင်ပြည်နယ် ဇင်ကျန်းရှိနေပြီး အများစုက ထိုပြည်နယ်တွင် နေထိုင်ကြသည်။ ဟန်လူမျိုးများက ၎င်းတို့ဒေသအား ခွဲခြားဆက်ဆံမှုတံတိုင်း ကာရံထားသည်။ နိုင်ငံတော်ပိုင် လုပ်ငန်းများတွင် အလုပ်လုပ်လျှင်လည်း မင်းစေအဆင့်လောက်သာ ရသည်။

ဟွေလူမျိုးများကတော့ သန်းခေါင်စာရင်းများတွင် တရုတ်တိုင်းရင်းသားလူမျိုးစုအဖြစ် သတ်မှတ်ခံရသည်။ ၎င်း၏ ဘိုးဘေးများမှာ ပါရှားပြည်မှ ကုန်စည်ကူးသန်းမှု၊ သာသနာပြုမှု ခရီးစဉ်များဖြင့် ရောက်ရှိလာကြသော်လည်း မျိုးဆက်ပေါင်းများစွာ ဟန်လူမျိုးများနှင့် ရောနှောနေထိုင်ကြသောကြောင့် နောက်ပိုင်းတွင် လူများစုဖြစ်သည့် ဟန်လူမျိုးသွေး ဖြစ်လာခဲ့ကာ တရုတ်စကားကိုပင် ပြောကြသည်။ ထို့ပြင် နင်ရှာပြည်နယ်တွင် ဟွေလူမျိုး ၅ ပုံ ၁ ပုံသာ နေထိုင်ပြီး အများစုက နိုင်ငံတစ်ဝှမ်းတွင် ဖြန့်ကျက်နေထိုင်ကြသည်။ ၀ီဂါ၊ တိဘက်လူမျိုးများနှင့် မတူညီသည့်အချက်က ၎င်းတို့မှာ ပုံပန်းသွင်ပြင် တူညီမှုလမ်းကြောင်း လိုက်သွားခြင်းဖြစ်သည်။

တုန်ရှင်မြို့ရှိ ကျုံနန် ဗလီဝတ်ကျောင်းတော်သို့ ရောက်ရှိလာကြသည့် ၀တ်ပြုသူများက ဗလီဝတ်ကျောင်းတော်၏သမိုင်းနှင့် ဒေသတွင် အရေးပါသည့် ပုဂ္ဂိုလ်တစ်ဦးအတွက် အောက်မေ့ဖွယ် အခမ်းအနားကို ကျင်းပသည်။ အစီအစဉ်ကို ‘အဟုန်’ (ရှေ့ဆောင်အီမာမ်) ၏ တရားဒေသနာဖြင့် စတင်ဖွင့်လှစ်ပြီး အာရဘီဘာသာစကားဖြင့် ၀တ်ပြုဆုတောင်းမှုများ ပြုလုပ်သည်။ ထို့နောက် ထိုပုဂ္ဂိုလ်၏ မြေးဖြစ်သူ မစ္စတာ မာကျင်းလုံအိမ်တွင် ကုရ်အာန်ကျမ်းစာများ သွားရောက်ရွတ်ဖတ်ပေးကာ ထိုပုဂ္ဂိုလ်၏ အုတ်ဂူသို့ သွားရောက် ဆုတောင်း အမျှဝေကြသည်။

သို့သော်လည်း အခမ်းအနားဆုံးပိုင်းက လုံးဝ ခြားနားသွားသည်။ မာကျင်းလုံရေးသားထားသည့် ၁၈ မီတာရှည်လျားသော စာလွှာကို ဖတ်ပြသည်။ ထိုစာလွှာတွင် ၈ ရာစုက တရုတ်ဂန္တ၀င်ကဗျာတစ်ပုဒ်မှ ကောက်နှုတ်ချက်များ ပါဝင်သည်။ ထိုစာလွှာတွင် နှစ်မြို့ဖွယ်ကောင်းသည့် ရေဆေးများဖြင့်လည်း ချယ်သထားသည်။ မစ္စတာမာမှာ ကျုံနန် ဗလီဝတ်ကျောင်းတော်အတွက် အားထားရသည့် ပုဂ္ဂိုဖြစ်ပြီး ဒေသတွင် ရိုသေခန့်ညားသည့် ပညာရှင်တစ်ဦးလည်း ဖြစ်သည်။

တရုတ်လူ့အဖွဲ့အစည်းနှင့် အစေးကပ်အောင် နေနိုင်မှုက ဟွေလူမျိုးများ၏ ၀ိသေသလက္ခဏာဖြစ်သည်။ တရုတ်နိုင်ငံ၏ သမိုင်းတွင် ထင်ရှားကျော်ကြေားသည့် ပုဂ္ဂိုလ်များထဲတွင် ဟွေလူမျိုးများ ပါဝင်ပြီး တရုတ်ပြည်သူများပင် ထိုအရာအား မသိကြ။ တရုတ်နိုင်ငံ၏ ကိုလံဘတ်ဟု တင်စားပြောဆိုခံရသည့် ဇန်ဟီ (Zheng He) မှာ ဟွေလူမျိုးဖြစ်ပြီး သက္ကရာဇ် ၁၄၀၀ ၀န်းကျင်က ရေကြောင်းခရီးစဉ်များဖြင့် စွန့်စားသွားလာခဲ့သူဖြစ်သည်။ မကြာသေးမီက ကျန်းဆူး ပြည်နယ် ကွန်မြူ နစ်ပါတီ ဥက္ကဌဖြစ်လာကာ တရုတ်အစိုးရဌာနတစ်ခုဖြစ်သည့် တိုင်းရင်းသားရေးရာ ၀န်ကြီးဌာန၏ အကြီးအကဲကလည်း ဟွေလူမျိုးပင်ဖြစ်သည်။

ဟွေလူမျိုးများနှင့် ဟန်လူမျိုးများအကြား ဆက်ဆံရေးမှာ အမြဲတမ်း ကောင်းမွန်ခဲ့သည်တော့မဟုတ်။ ၁၈၆၀ ပြည့်နှစ်နှင့် ၁၈၇၀ ပြည့်နှစ်များက ဟွေလူမျိုးများ ပြုလုပ်ခဲ့သည့် ဒန်ဂန်တော်လှန်ရေး (Dungan) က သွေးချောင်းစီးခဲ့သည်။ သို့သော်လည်း ၁၉၇၆ မော်စီတုန်း ကွယ်လွန်သွားပြီးနောက် နှစ်ဖက်စလုံးမှာ ပြေညိမ်းမှု ရရှိခဲ့သည်။ ကယ်လီဖိုးနီးယားရှိ Pomona ကောလိပ်မှ ဒရူ ဂလဒ်နေးကတော့ ဟွေလူမျိုးများ၏ ပြောင်မြောက်သည့် အရည်အချင်းတစ်ခုက တရုတ်၏ နိုင်ငံရေးစနစ် ယိမ်းယိုင်လာသည့်အခါတိုင်း ညှိနှိုင်းဆွေးနွေးမှုကို ကျွမ်းကျင်စွာ ဆောင်ရွက်နိုင်ခြင်း ဖြစ်သည်ဟု မှတ်ချက်ပြုခဲ့သည်။

ထို့ကြောင့် ၎င်းတို့မှာ စီးပွားရေးအရ အောင်မြင်သူများ ဖြစ်လာခဲ့သည်။ ဟာလာလ်စားသောက်ကုန်လုပ်ငန်းကိုလည်း ၎င်းတို့က လွှမ်းမိုးထားသည်။ တရုတ်နိုင်ငံ၏ နိုင်ငံပိုင်လုပ်ငန်းများနှင့် အလယ်အာရှနိုင်ငံများ၊ ပင်လယ်ကွေ့နိုင်ငံများကို ချိတ်ဆက်ပေးရာတွင်လည်း ၎င်းတို့က အဓိကအခန်းကဏ္ဍမှ ပါဝင်နေသည်။ ယင်ချွမ်မြို့ ဆင်ခြေဖုံးတွင်ရှိသည့် တရုတ်နိုင်ငံ၏ အကြီးဆုံး အာရဘီကောလိပ်မှာ ပုဂ္ဂလိကကျောင်းတစ်ကျောင်းဖြစ်ပြီး ဟွေလူမျိုးများက တည်ထောင်ကာ တစ်စိတ်တစ်ပိုင်း ဘဏ္ဍာရေး ထောက်ပံ့မှု ပြုလုပ်နေခြင်းဖြစ်သည်။ ထိုကောလိပ်မှ ကျောင်းသားများကို စီးပွားရေးလုပ်ငန်းများတွင် စကားပြန်များဖြစ်လာအောင် အဓိကထား သင်ကြားပေးသည်။

ဟွေလူမျိုးများမှာ အချို့သော တရားရေးကိစ္စများကို အစ္စလာမ့်ရရှီအာဥပဒေဖြင့် စီရင်ဆုံဖြတ်နိုင်သည်အထိ တရုတ်အစိုးရက ခွင့်ပြုထားသည်။ တရုတ်ဥပဒေအရ ရရှီအာကို ခွင့်မပြုထား။ သို့သော်လည်း နာဂျာဟူ ဗလီဝတ်ကျောင်းတော်တွင်တော့ အဟုန်နှင့် ခရိုင်တရားရုံးတို့က တရားစီရင်ရေးကိစ္စများကို မျှဝေကိုင်တွယ်ကြသည်။ သီတင်းပတ်တိုင်းတွင် မိသားစုရေးရာ ပြဿနာများကို အဟုန်က ရရှီအာဥပဒေဖြင့် ဖြေရှင်းဆောင်ရွက်ပေးနေရသည်။ နှစ်ဦးနှစ်ဖက် ကျေနပ်သည့်အဆင့်သို့ မရောက်ပါက အာဏာပိုင်အဖွဲ့မှ ကြားဝင်ပေးသည်။

ရာစုနှစ်ပေါင်းများစွာ ဟန်လူမျိုးများနှင့် ရောနှောနေထိုင်သော်လည်း ဟွေလူမျိုးတို့၏ ဘာသာရေး အမှတ်သညာ ပျောက်ပျက်မသွားသည်က အံ့သြစရာကောင်းနေသည်။ အငြိမ်းစားပါမောက္ခတစ်ဦးဖြစ်သူ မစ္စတာမာက ဟွေလူမျိုများမှာ အမြဲတမ်းလိုလို အလွန်စည်းလုံးပြီး၊ အသက်မွေးဝမ်းကျောင်းလုပ်ငန်းမှာလည်း တစ်ပုံစံတည်းဖြစ်ကာ မြိုတိုင်းနယ်တိုင်းရှိ စားသောက်ဆိုင်များ၊ အငှာယာဉ်လုပ်ငန်းမျာကို လုပ်ကိုင်သူများမှာ ဟွေလူမျိုးများဖြစ်ကြသည်ဟု ဆိုသည်။ ၎င်းတို့၏ ဘာသာတရားက ‘ထိုစည်းလုံးမှု၏ အဓိကအရေးပါဆုံး အကြောင်းအရင်း’ ဖြစ်နေသည်ဟုလည်း ၎င်းက ဖွင့်ဟခဲ့သည်။ ဟွေလူမျိုးများမှာ ဘာသာရေးနှင့် လူမျိုးရေး ညီမျှမှုကို ထိန်းသိမ်းထားနိုင်သည်။ အတူတကွ ရောနှောနေထိုင်မှုကြောင့် ဘာသာတရားကို အနှောက်အယှက်ကင်းကင်း ကျင့်သုံးနိုင်သလို ဟန်လူမျိုးအများစုကြားတွင် နေထိုင်ရသော်လည်း လူ မျိုးရေးအမှတ်သညာ မပျောက်ပျက်အောင် ဘာသာတရားက ထိန်းညှိပေးထားသည်။

ထိုခြားနားချက် မျဉ်တစ်ကြောင်းကြောင့်ပင် ဟွေလူမျိုးများမှာ တရုတ်အစိုးရ၏ လိုတစ်မျိုး၊ မလိုတစ်မျိုး ဘာသာရေးဆိုင်ရာ ပေါ်လစီမှ ကင်းလွတ်နခြင်းဖြစ်သည်။ အစ္စလာမ်ကြောက်ရောဂါမှ ဟွေလူမျိုးများ သိသိသာသာ ကင်းလွတ်နေသည်ဟု ပြောနိုင်သော်လည်း ယခုနောက်ပိုင်းတွင် ဆိုရှယ်မီဒီယာများ၌ အမုန်းတရားများကို ပုံမှန်လိုလို မြင်လာရသည်။ (အစ္စလာမ်တွင် အရေးပါသည့် အရောင်ဖြစ်သော) ‘အစိမ်းရောင်’ က အွန်လိုင်းတွင် ရှုတ်ချစရာ အမှတ်အသားတစ်ခု ဖြစ်လာနေသည်။ လက်ရှိအချိန်အထိ တရုတ်အစိုးရက ဟွေလူမျိုးတို့၏ ရိုးရာယဉ်ကျေးမှုအပေါ် ထိခိုက်မှု မရှိသေး။ သို့သော်လည်း ဇူလိုင်လက နင်ရှာမြို့သို့ သမ္မတ ရှီကျင့်ဖျင် ရောက်ရှိလာသည့်အချိန်တွင် ပရိတ်သတ်များအား ‘လူပွားခြင်းကို လုံးဝ ဆန့်ကျင်ရမည်’ ဟု ပြောကြားခဲ့သည်။ လက်တွေ့တွင် ဟွေလူမျိုးများက ထိုကဲ့သို့ လူပွားခြင်းမရှိ။ (တရုတ်အစိုးရကသာ ဇင်ကျန်းပြည်နယ်ရှိ ၀ီဂါမွတ်စလင်များကို ရအောင်ယူ၍ ကွန်မြူနစ်ဖြစ်အောင် လုပ်နိုင်သူ ဟန်လူမျိုးများကို ဘက်စုံထောက်ပံ့မည်ဟု ပြီးခဲ့သည့်နှစ်အတွင်းက တရားဝင် ကြေငြာခဲ့သည်။ – ဘာသာပြန်သူ)

သမ္မတ၏ ထိုစကားကို ကြည့်ခြင်းအားဖြင့် တရုတ်အစိုးရမှာ ဘာသာရေးလူနည်းစုများအပေါ် ပိုမို ဖိနှိပ်ချုပ်ချယ်မည့်ပုံစံမျိုး ပိုမိုတွေ့လာရပြီး ဟွေလူမျိုးများက နောက်ထပ်ပစ်မှတ်တစ်ခု ဖြစ်လာနိုင်သည်။

သို့သော်လည်း ဟွေလူမျိုးများ၏ ဖြတ်သန်းခဲ့သော သမိုင်းတစ်လျှောက်တွင် ရရှိခဲ့သည့် သင်ခန်စာများက ၎င်းတို့အတွက် အပြုသဘောဆောင်နေသည်။ အစ္စလာမ်သာသနာမှာ ပါတီခေါင်းဆောင်များ ထင်ထားသလို ခြိမ်းခြောက်မှုမျိုးမဟုတ်ဟု ဟွေလူမျိုးများက ကျင့်သုံးပြသနိုင်ခဲ့သည်။ ထို့ပြင် တရုတ်လူမျိုးတစ်ယောက်မှာ စစ်မှန်သည့် အစ္စလာမ်ဘာသာဝင်တစ်ဦး ဖြစ်နိုင်သည်ကိုလည်း ၎င်းတို့က ပြသခဲ့သည်။ ဟဂ်ျပြုပြီး ပြန်လာသူတစ်ဦးက ယင်ချွမ်လေဆိပ်တွင် ၎င်း၏ ခရီးဆောင်အိတ်ကို စောင့်ယူနေသည်။ ‘တရုတ်နိုင်ငံမှ ဟဂ်ျခရီးသွားများ’ ဆိုသည့် စာတန်းနှင့် ဘာသာမဲ့ ကွန်မြူနစ်နိုင်ငံဖြစ်သော တရုတ်နိုင်ငံအလံကို ရေးထိုးထားသော ၀တ်ရုံရှည်ကို ၎င်းက ၀တ်ထားသည်။

“တစ်သက်မှာတစ်ခါ ကြုံတွေ့ရတဲ့ အတွေ့အကြုံပါ” ဟု ၎င်းက ဟဂ်ျကျင့်စဉ်နှင့်ပတ်သက်၍ ပြောကြားခဲ့ပြီး ဟဂ်ျခရီးစဉ်မှ ပြန်လာသည့် လူအုပ်ကြီးကို စောင့်ကြိုနေကြသည့် တရုတ်မွတ်စလင်လူပင်လယ်ကြီးအတွင်းသို့ တိုးဝင်ပျောက်ကွယ်သွား လေတော့သည်။

Ref: The Economist

(The Economist တွင် ဖော်ပြထားသည့် The Hui China’s other Muslims ဆောင်းပါးကို လေးမောင်က ဆီလျော်အောင် ဘာသာပြန်ဆိုသည်။