News @ M-Media

အများပြည်သူနေရာများတွင် ဆေးလိပ်ပိတ်ပင်ရန် ဖိလစ်ပိုင် စီစဉ်နေ

အောက်တိုဘာ ၁၃၊ ၂၀၁၆
M-Media

duterte

– မူးယစ်နှိမ်နှင်းရေး လှုပ်ရှားမှုကြောင့် နိုင်ငံတကာမှ ဖိအားများနှင့် ရင်ဆိုင်နေရသည့် ဖိလစ်ပိုင်သမ္မတ ရော်ဒရီဂို ဒူတာတေးမှာ ယခုလမကုန်ခင် အများပြည်သူနှင့် သက်ဆိုင်သည့် နေရာများ၌ ဆေးလိပ်သောက်မှု ပိတ်ပင်ရန် စီစဉ်နေသည်ဟု သိရသည်။

ဖိလစ်ပိုင်ကျန်းမာရေးဝန်ကြီး ပေါ်လင်း ယူဘီယဲလ်က AP သတင်းဌာနနှင့် တွေ့ဆုံစဉ် ထိုအစီအစဉ်နှင့်ပတ်သက်၍ ပြောကြားခဲ့ခြင်းဖြစ်ပြီး ဆေးရွက်ကြီးထုတ်ကုန်များတွင် ကျန်းမာရေး သတိပေးဓာတ်ပုံများ ကပ်ရမည့် ဥပဒေ နိုဝင်ဘာ ၄ ရက်နေ့ အသက်မ၀င်ခင် ထိုကဲ့သို့ အများပြည်သူနှင့် သက်ဆိုင်သည့် နေရာများ၌ ဆေးလိပ်သောက်သုံးမှုကို ပိတ်ပင်ရန် သမ္မတက မိမိအား တိုက်တွန်းခဲ့သည်ဟု ဆိုသည်။

ဒူတာတေးမှာ ယခင် နိုင်ငံတောင်ပိုင်း ဒါဗာအိုမြို့၏ မြို့တော်ဝန်ဖြစ်ခဲ့စဉ် ထိုကဲ့သို့ ပိတ်ပင်ခဲ့ဖူးပြီး ယခုနှစ်တွင် တစ်နိုင်ငံလုံးရှိ အများပြည်သူနှင့် သက်ဆိုင်သည့်နေရာများတွင် ဆေးလိပ်ကင်းစင်ဒေသအဖြစ် ဆောင်ရွက်ရန် အလိုရှိနေသည်ဟု ၀န်ကြီးက ဆိုသည်။

ထို့ပြင် အဆောက်အဦးအပြင်ဘက်၊ အများပြည်သူနှင့်သက်ဆိုင်သည့် နေရာများ၏ အဝေးတွင် ဆေးလိပ်သောက်သုံးသည့်နေရာ သီးသန့်ထားရှိမည်ဖြစ်ပြီး ဒေသအတွင်းအစိုးရများကိုလည်း ဆေးလိပ်သောက်သုံးမှုပိတ်ပင်ရန်နှင့် ဒဏ်ကြေးများ ချမှတ်ရန် အမိန့်ပေးသွားမည်ဖြစ်သည်။

ထိုကဲ့သို့ ပိတ်ပင်မှုတွင် အီလက်ထရောနစ် စီးကရက်များလည်း ပါဝင်မည်ဖြစ်ပြီး ၎င်းတို့မှာ အငွေ့ထွက်သောကြောင့်ဖြစ်သည်ဟု ယူဘီယဲလ်က ထည့်သွင်းပြောကြားခဲ့သည်။ ဒါဗာအိုမြို့အား ဒူတာတေး မြို့တော်ဝန်အဖြစ်ဆောင်ရွက်စဉ်က ထိုပိတ်ပင်မှုမှာ အောင်မြင်ခဲ့ပြီး စံပြဒေသအဖြစ် မှတ်ယူခံခဲ့ရသည်။

Ref : Aljazeera

Comments

Leave a Reply