ဧပြီ ၉၊ ၂၀၁၆
M-Media
– ပင်လယ်နီကိုဖြတ်ကာ နိုင်ငံချင်းဆက် တံတားတစ်ခုကို ဆောက်လုပ်ရန်အတွက် အီဂျစ်နှင့် သဘောတူညီချက်ရရှိခဲ့သည်ဟု ဆော်ဒီဘုရင်ကြီး ဆလ်မန်က ယမန်နေ့တွင် ကြေငြာလိုက်သည်။
အီဂျစ်သို့ အလည်အပတ်ရောက်ရှိနေစဉ်တွင် ရုပ်သံမှထုတ်လွှင့်သော မိန့်ခွန်း၌ ထိုကဲ့သို့ပြောကြားခဲ့ခြင်းဖြစ်သည်။ ထိုသဘောတူညီချက်ကို အီဂျစ်သမ္မ အဘ်ဒဲလ် ဖာတာဟ် အလ်-စီစီနှင့် တွေ့ဆုံစဉ် ရရှိခဲ့ခြင်းဖြစ်ပြီး ၂ နိုင်ငံကိုယ်စားလှယ်များကလည်း ရင်းနှီးမြှုပ်နှံမှု သဘောတူညီချက်များကို လက်မှတ်ရေးထိုခဲ့ကြသည်။
“ဒါဟာ အာဖရိကနဲ့ အာရှ တိုက်ကြီး ၂ တိုက်ကို ဆက်သွယ်ဖို့အတွက် သမိုင်းဝင်ခြေလှမ်းပါပဲ။ ပြီးတော့ တိုက်ကြီးနှစ်တိုက်အကြား ကုန်သွယ်မှုတွေ တစ်မူထူးခြားတဲ့အဆင့်နဲ့ တိုးတက်လာမယ့် ပြောင်းလဲမှုတစ်ခုလည်း ဖြစ်ပါတယ်” ဟု ဘုရင်ကြီးက ပြောကြားခဲ့သည်။
မည်သည့်နေရာ၌ ဆောက်လုပ်မည်ကို ပြောဆိုခဲ့ခြင်းမရှိသော်လည်း အီဂျစ်နိုင်ငံ ရှာမ် အလ်-ရှိခ်၊ ဆော်ဒီအာရေဗျရှိ ရက်စ် အလ်ရှိခ် ဟာမစ် စသည့်နေရာများမှာ တံတားတည်ဆောက်ရန် အနီးစပ်ဆုံးနေရာ ဖြစ်နေသည်။ ထိုကဲ့သို့ နိုင်ငံချင်းဆက် တံတားဆောက်လုပ်ရန် ဆောင်ရွက်နေသည်မှာ ကြာပြီဖြစ်သော်လည်း ယခုမှ သဘောတူညီချက် ရရှိခြင်းဖြစ်သည်။
Ref: Aljazeera
