ဧပြီ ၃၊ ၂၀၁၆
M-Media
– မြန်မာနိုင်ငံအတွင်းရှိ အစ္စလာမ်ဘာသာဝင်များ၊ ဟိန္ဒူဘာသာဝင်များနှင့်ပတ်သက်၍ သာသနာရေးနှင့် ယဉ်ကျေးမှုဝန်ကြီးဌာန ၀န်ကြီး သူရဦးအောင်ကို၏ အငြင်းပွားဖွယ်မှတ်ချက်အား သာသနာရေးဝန်ကြီးဌာနက ၎င်းတို့၏ ၀ဘ်ဆိုက်မှနေ၍ ပြန်လည် ဖြည့်စွက်ပြင်ဆင်ခဲ့သည်ဟု သိရသည်။
ဧပြီလ ၁ ရက်နေ့ က ယဉ်ကျေးမှုဝန်ကြီးဌာနရုံး၌ ပြုလုပ်ခဲ့သည့် VOA သတင်းဌာနနှင့် အင်တာဗျူးတွင် မြန်မာနိုင်ငံ၌ ဗုဒ္ဓဘာသာဝင်မဟုတ်သူများ စစ်အစိုးရလက်ထက်နှင့် ဦးသိန်းစိန်အစိုးရလက်ထက်တွင် ဖိနှိပ်ခံရမှုနှင့်ပတ်သက်၍ မေးမြန်းရာတွင် ၀န်ကြီး သူရဦးအောင်ကိုက “ဧည့်နိုင်ငံသားတွေ အများစုကိုးကွယ်တဲ့ အစ္စလာမ်ဘာသာ၊ ဟိန္ဒူဘာသာအပါအ၀င် အခြားဘာသာငယ်တွေအပေါ်မှာတော့ဖြင့် ထူးပြီးတော့မှ ဖိနှိပ်ချုပ်ချယ်တာမျိုး မရှိခဲ့ပါဘူး” ဟု ပြန်လည်ဖြေကြားခဲ့ခြင်းဖြစ်သည်။
ထိုသို့ဖြေကြားမှုများမှာ လူနည်းစုဖြစ်ပြီး မြန်မာနိုင်ငံတွင် သမိုင်းအခိုင်အမာရှိနေသည့် အစ္စလာမ်ဘာသာဝင်များနှင့် ဟိန္ဒူဘာသာဝင်များအား စော်ကားပြောဆိုသည့်သဘော သက်ရောက်နေသောကြောင့် ပြည်သူများက အင်တာနက်စာမျက်နှာများတွင် သူရဦးအောင်ကိုအား ဝေဖန်ရှုတ်ချမှုများ ကျယ်ကျယ်ပြန့်ပြန့် ပြုလုပ်ခဲ့ကြသည်။
ထိုကိစ္စနှင့်ပတ်သက်၍ ယနေ့တွင် သာသနာရေးနှင့် ယဉ်ကျေးမှုဝန်ကြီးဌာန၏ ၀ဘ်ဆိုက်၌ ပို့စ်တစ်ခု လွှင့်တင်ခဲ့ပြီး ထိုပို့စ်တွင် သူရဦးအောင်ကို၏ “ဧည့်နိုင်ငံသားတွေ အများစုကိုးကွယ်တဲ့ အစ္စလာမ်ဘာသာ၊ ဟိန္ဒူဘာသာအပါအ၀င် အခြား ဘာသာငယ်တွေအပေါ်မှာတော့ဖြင့် ထူးပြီးတော့မှ ဖိနှိပ်ချုပ်ချယ်တာမျိုး မရှိခဲ့ပါဘူး” ဟုသော ပြောကြားချက်အစား
“နိုင်ငံသားအချို့နှင့် ဧည့်နိုင်ငံသားများကိုးကွယ်တဲ့ အစ္စလာမ်ဘာသာ၊ ဟိန္ဒူဘာသာအပါအ၀င် အခြား ဘာသာငယ်တွေအပေါ်မှာတော့ဖြင့် ထူးပြီးတော့မှ ဖိနှိပ်ချုပ်ချယ်တာမျိုး မရှိခဲ့ပါဘူး” ဟု ထပ်မံဖြည့်စွက်ကြောင်း ဖော်ပြခဲ့သည်။
သို့သော်လည်း နိုင်ငံအတွင်းရှိ လူ့အဖွဲ့အစည်းတစ်ခုကို ထိခိုက်နစ်နာစေသည့် ထိုအငြင်းပွားဖွယ်မှတ်ချက်ကို ပြောဆိုခဲ့မှုအတွက် ၀န်ကြီး သူရဦးအောင်ကိုက မည်ကဲ့သို့ တာဝန်ယူမည်ဆိုသည်ကို သိရှိရခြင်းမရှိသေးပေ။
Ref: သာသနာရေးနှင့် ယဉ်ကျေးမှုဝန်ကြီးဌာန ၀ဘ်ဆိုက်
