Blog

မတ် ၁၅၊ ၂၀၂၂

M-Media 

-ထိုင်းနဲ့ အိန္ဒိယနယ်စပ်က ကုန်သွယ်ရေးလုပ်ငန်းတွေမှာ ဘတ်ငွေ၊ ရူပီးငွေတွေနဲ့ လက်ခံဆောင်ရွက်ဖို့ အာဏာသိမ်းစစ်ကောင်စီက စီစဥ်နေပါတယ်။ 

၂၀၂၁ ခုနှစ် ဖေဖော်၀ါရီလ ၁ ရက်နေ့ အာဏာသိမ်းပြီးနောက်ပိုင်း စစ်ေကာင်စီရဲ့ လုပ်ရပ်တွေကြောင့် မြန်မာနိုင်ငံရဲ့စီးပွားရေးဟာ အလွန်အမင်း ထိုးကျသွားပြီး ဒေါ်လာ၊ ရွှေစျေးတွေ ထောင်တက်သွားပါတယ်။ 

ငွေကြေးဖောင်းပွမှု မြင့်တက်လာတာကြောင့် အခြေခံစားသောက်ကုန်တွေ စျေးအဆမန်တ တက်လာသလို၊ မီးပြတ်၊ ရေပြတ်နဲ့ ပြည်သူလူထုဟာ အထွေထွေအကြပ်အတည်းနဲ့ ရင်ဆိုင်နေရတာ ဖြစ်ပါတယ်။ 

စစ်ကောင်စီ ရင်းနှီးမြှုပ်နှံမှုဌာနရဲ့ ဒီကနေ့ထုတ်ပြန်ချက်မှာတော့ နယ်စပ်ကုန်သွယ်ရေးမှာ ထိုင်းဘက်၊ အိန္ဒိယရူပီးတွေကို လက်ခံ အသုံးပြုတာဟာ အမေရိကန်ဒေါ်လာအပေါ်  မှီခိုနေရမှုကို လျှော့ချကာ ပထ၀ီနိုင်ငံရေးအခြေအနေကြောင့် ငွေလဲနှုန်း ရုတ်တရက် တက်လာတဲ့ အန္တရာယ်ကို လျှော့ချနိုင်လိမ့်မယ်လို့ ဖော်ပြထားပါတယ်။

တရုတ်နိုင်ငံနဲ့ ကပ်နေတဲ့ ဒေသတွေမှာ တရုတ်ယွမ်ငွေနဲ့ တိုက်ရိုက် ပေးချေနိုင်အောင်လည်း စစ်ကောင်စီက စီစဥ်ထားပါတယ်။ 

နိုင်ငံရဲ့ စီးပွားရေးကျဆင်းမှုဟာ အတိုက်အခံတွေက ဘဏ်လုပ်ငန်းနဲ့ ငွေကြေးစနစ်ကို ပြည်သူတွေ အယုံအကြည်မရှိအောင် လုပ်ဆောင်တာကြောင့်ဖြစ်ပြီး၊ ကျပ်ငွေတန်ဖိုး ကျဆင်းမှုကလည်း စီးပွားရေး အဖျက်အမှောက်လုပ်ရပ်ကြောင့်လို့ စစ်ကောင်စီ ၀န်ကြီးဌာနရဲ့ ထုတ်ပြန်ချက်မှာ စွပ်စွဲပြောဆိုထားပါတယ်။ 

မြန်မာအာဏာသိမ်းစစ်ကောင်စီရဲ့ ဒီအစီအစဥ်နဲ့ပတ်သက်ပြီး ထိုင်း၊ အိန္ဒိယတို့ဖက်က တရား၀င် ထုတ်ပြန်တာမျိုး မရှိသေးပါဘူး။ 

Ref: Bangkok Post