Blog

မတ် ၁၃၊ ၂၀၂၂

M-Media 

-အခုလနှောင်းပိုင်းမှာလုပ်မယ့် အမေရိကန်-အာဆီယံ ထိပ်သီးအစည်းအ၀ေးမှာ မြန်မာနိုင်ငံက အာဏာသိမ်းစစ်ခေါင်းဆောင်တွေကို ဖိတ်ကြားမှာမဟုတ်ဘဲ နိုင်ငံရေးဖက်ကမဟုတ်တဲ့ ကိုယ်စားလှယ်တစ်ဦးသာ တက်ခွင့်ပြုမယ်လို့ အမေရိကန်က ထုတ်ပြန်ပါတယ်။ 

အစည်းအ၀ေးကို မတ်လ ၂၈၊ ၂၉ မှာ  ကျင်းပမှာပါ။ 

အမေရိကန်အစိုးရ ပြောရေးဆိုခွင့်ရှိသူက အဆင်မြင့်အစည်းအ၀ေးတွေမှာ နိုင်ငံရေးဖက်ကမဟုတ်တဲ့ ကိုယ်စားလှယ်တစ်ဦးသာ ဖိတ်ကြားရေး အာဆီယံရဲ့ မူ၀ါဒကို အပြည့်အ၀ ထောက်ခံတယ်လို့ ပြောပါတယ်။ 

“ထိပ်သီးအစည်းအ၀ေးမှာ မြန်မာအတွက် နိုင်ငံရေးဖက်ကမဟုတ်တဲ့ ကိုယ်စားလှယ်ကိုသာ ဖိတ်ကြားဖို့ ကျွန်တော်တို့ ဆုံးဖြတ်ခဲ့ပါတယ်။ အာဆီယံရဲ့ အချက် ၅ ချက်ပါ သဘောတူညီချက်နဲ့ပတ်သက်ပြီး ထိရောက်တဲ့ တိုးတက်မှုတွေ လုပ်မပြတဲ့ စစ်အစိုးရကို အရေးယူတဲ့သဘောလည်း ဖြစ်ပါတယ်”

အာဆီယံ အထူးကိုယ်စားလှယ်က မြန်မာနိုင်ငံကိုလာပြီး သက်ဆိုင်သူတွေအားလုံးနဲ့ တွေ့ဆုံ ဆွေးနွေးညှိနှိုင်းရေး အပါအ၀င် အချက် ၅ ချက်ပါတဲ့ အာဆီယံသဘောတူညီချက်ကို အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ၂၀၂၁ ခုနှစ် ဧပြီလမှာ လက်ခံသဘောတူခဲ့ပေမယ့် အကောင်အထည်ဖော်မှု မရှိပါဘူး။ 

Ref: Reuters 

မတ် ၁၁၊ ၂၀၂၂

M-Media 

-ရုရှားက ယူကရိန်းကို ကျူးကျော်မှုနောက်ပိုင်း တရုတ်ကလည်း မြန်မာနိုင်ငံအပေါ် ဒီလိုလုပ်ဆောင်လာမှာကို စိုးရိမ်တဲ့အတွက် စစ်ကောင်စီခေါင်းဆောင်တွေက အစည်းအ၀ေးတွေလုပ်ကာ ဆွေးနွေးနတယ်လို့ သတင်းထွက်လာပါတယ်။ 

တရုတ်ဟာ ခေတ်အဆက်ဆက် မြန်မာစစ်အာဏာရှင်တွေကို ကျောထောက်နောက်ခံပေးသူအဖြစ် ရပ်တည်လာတာပါ။ အပြန်အလှန်အားဖြင့် စစ်အာဏာရှင်တွေကလည်း နိုင်ငံအတွင်းက သယံဇာတတွေကို ကြိုက်သလောက်ထုတ်ယူခွင့် ပေးထားရပါတယ်။ 

ရခိုင်ပြည်နယ် ကျောက်ဖြူကနေ တရုတ်နိုင်ငံ အနောက်တောင်ပိုင်းအထိ သွယ်တန်းထားတဲ့ ရေနံနဲ့ သဘာ၀ဓာတ်ငွေ့ ပိုက်လိုင်းအပါအ၀င် မြန်မာနိုင်ငံမှာ တရုတ်ရဲ့ အကျိုးစီးပွား အများအပြား ရှိနေတာပါ။ 

၂၀၂၁ ခုနှစ် ဖေဖော်၀ါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း ပေါ်ပေါက်လာတဲ့ ပြည်သူလူထုရဲ့ လက်နက်ကိုင်တော်လှန်ရေး လှုပ်ရှားမှုမှာ စစ်ခေါင်းဆောင်တွေကို ကျောထောက်နောက်ခံပေးထားတဲ့ တရုတ်ရဲ့ အကျိုးစီးပွားတွေကို ပစ်မှတ်ထား တိုက်ခိုက်မှုတွေလည်း ဖြစ်လာပါတယ်။ 

အဲဒီနောက်ပိုင်း စစ်ကောင်စီဟာ တရုတ်အကျိုးစီးပွားရှိရာ ဒေသတွေမှာ လုံခြုံရေးကို ပိုမိုတင်းတင်းကြပ်ကြပ် ချထားပေးပါတယ်။ 

လုံခြုံရေးအကြောင်းပြချက်နဲ့ ရုရှားက ယူကရိန်းကို ကျူးကျော်တိုက်ခိုက်တာကြောင့် တရုတ်ကလည်း အကျိုးစီးပွားကို ကာကွယ်ဖို့ဆိုတဲ့ အကြောင်းပြချက်နဲ့ မြန်မာနိုင်ငံအပေါ် ၀င်ရောက်ကျူးကျော်မှာကို အာဏာသိမ်းစစ်ကောင်စီက စိုးရိမ်နေတယ်လို့ အတွင်းစည်းရင်းမြစ်တွေက ပြောပါတယ်။ 

ရုရှားက ယူကရိန်းအပေါ် ကျူးကျော်မှုကို စစ်ကောင်စီက လူသိရှင်ကြား ထောက်ခံထားတာပါ။ မြန်မာစစ်ခေါင်းဆောင်တွေဟာ ရုရှားကဘဏ်တွေမှာ အကောင့်တွေဖွင့်ကာ ငွေတွေအပ်ထားပြီး၊ မြန်မာလုပ်ငန်းရှင်တစ်ချို့ဟာ ရုရှားစစ်လက်နက်ကုမ္ပဏီတွေနဲ့ မြန်မာစစ်တပ်အကြား လက်နက်ပွဲစား လုပ်ပေးနေတာလည်း ရှိနေပါတယ်။ 

ယူကရိန်းအပေါ် ကျူးကျော်တဲ့ ရုရှားကို နိုင်ငံတကာအသိုင်းအ၀ိုင်းက ပိတ်ဆို့မှုတွေ လုပ်ဆောင်နေတဲ့အတွက် မြန်မာစစ်ခေါင်းဆောင်တွေဟာ ဒီအပေါ်မှာ စိုးရိမ်မှုတွေ ရှိနေတယ်လို့လည်း ဆိုပါတယ်။ 

Ref: Up Stream Online