မတ် ၆၊ ၂၀၂၂
M-Media
-ကိုဗစ်ကပ်ရောဂါ ကြိုတင်ကာကွယ်ရေး စည်းမျဉ်းစည်းကမ်းတွေ လုပ်ဆောင်ရမှုကို ပယ်ဖျက်လိုက်တယ်လို့ ဆော်ဒီအာရေဗျက စနေနေ့မှာ ကြေငြာလိုက်ပါတယ်။
ဒါ့ကြောင့် နိုင်ငံအတွင်း နှာခေါင်းစည်းတပ်ဆင်တာ၊ ခပ်ခွာခွာနေထိုင်တာတွေကို မဖြစ်မနေ လုပ်ဆောင်စရာ မလိုတော့ပါဘူး။ ဒါဟာ အခုနှစ် အွမ္မရာဟ်နဲ့ ဟဂျ်ဘုရားဖူးခရီးစဉ်တွေကို အပြည့်အ၀ ပြန်လည် ခွင့်ပြုပေးမလားဆိုတဲ့ မျှော်လင့်ချက်ကိုလည်း ခိုင်မာလာစေပါတယ်။
အစ္စလာမ်ဘာသာရဲ့ မြင့်မြတ်ရာ ဗလီဝတ်ကျောင်းတော်နှစ်လုံးနဲ့ နိုင်ငံတစ်ဝှမ်းက ဗလီဝတ်ကျောင်းတော်တွေမှာ ခပ်ခွာခွာနေထိုင်ဖို့ လိုအပ်တော့မှာမဟုတ်ပေမယ့် နှာခေါင်းစည်းတော့ တပ်ရလိမ့်မယ်လို့ ဆော်ဒီ ပြည်ထဲရေးဝန်ကြီးဌာနက ထုတ်ပြန်တဲ့ ကြေငြာချက်မှာ ဖော်ပြထားပါတယ်။
နိုင်ငံခြားက ဝင်ရောက်လာသူတွေအနေနဲ့ ကိုဗစ် ရှိ၊ မရှိ PCR Test စစ်စရာ မလိုတော့သလို ကွာရန်တင်းလည်း ဝင်ဖို့ မလိုတော့ပါဘူး။ ဒါပေမယ့် ကိုဗစ်ဖြစ်လာရင် ကုသနိုင်မယ့် ကျန်းမာရေးအာမခံမျိုး ခရီးသွားတွေ ထားရှိရမှာ ဖြစ်ပါတယ်။
ဆော်ဒီ ပြည်ထဲရေးဝန်ကြီးဌာနရဲ့ ထုတ်ပြန်ချက်မှာ တတိယအကြိမ် ကာကွယ်ဆေးထိုးတာ၊ အဆောက်အဦးတွေကို ဝင်ရောက်ရင် Tawakkalna အက်ပလီကေးရှင်းအသုံးပြုပြီး စကန်ဖတ် မှတ်တမ်းတင်တာလို တစ်နိုင်ငံလုံး ကိုဗစ်ကာကွယ်ရေး လုပ်ဆောင်ချက်တွေကို အလေးထား လုပ်ဆောင်ပေးဖို့လည်း တိုက်တွန်းထားပါတယ်။
Ref: Arab News
