Blog

ဒီဇင်ဘာ ၁၉၊ ၂၀၁၅
M-Media

– ရုံးပိတ်ရက်ဖြစ်သော စနေ၊ တနင်္ဂနွေနေ့များတွင် တစ်ဦးနှင့်တစ်ဦး တံတောင်ဆစ်များပင်ထိကာ ပူးပူးကပ်ကပ် ၀တ်ပြုကြရသည့် Little India မှ အန်ဂူလီယာ (Angullia) ဗလီဝတ်ကျောင်းတော်မှာ ၀တ်ပြုသူများ မဆန့်မှုကို မကြာမကြာ ကြုံတွေ့ရလေသည်။ ဟာရီယာရာ ဟာဂျီ (အီဒွလ်အသွဟာ) နှင့် ဟာရီယာရာ ဘွာဆာ (အီဒွလ်ဖိသီရ်) တို့ကဲ့သို့ အစ္စလာမ့် အခါကြီးရက်ကြီးများတွင် ထိုဗလီဝတ်ကျောင်းတော်၌ ၀တ်ပြုမှုများကို အသုတ်လိုက်ခွဲ၍ ဆောင်ရွက်ရလေသည်။

အဆိုပါ ပွဲတော်နေ့များ၌ တစ်သုတ်လျှင် ၀တ်ပြုသူ ၁၅၀၀ ဖြင့် လေးသုတ်ခွဲ၍ ၀တ်ပြုကြရသည်။ ထိုကဲ့သို့ နေရာအခက်အခဲဖြစ်မှုကို ဖြေရှင်းရန်အတွက် အန်ဂူလီယာ ဗလီဝတ်ကျောင်းတော်၏ စီမံခန့်ခွဲရေးနှင့် ဂေါပကအဖွဲ့မှာ လက်ရှိ ၂ ထပ်ရှိသော ဗလီဝတ်ကျောင်းတော်ကို ၂ ဆ ချဲ့ထွင်ရန် စီစဉ်နေပြီဖြစ်သည်။

ဗလီဝတ်ကျောင်းတော်သစ်တွင် အမျိုးသမီးဝတ်ပြုသူများအတွက် တစ်လွှာ ထည့်သွင်းပေးမည်ဖြစ်ကာ၊ မီးဖိုဆောင်၊ မင်္ဂလာအခမ်းအနားကျင်းပရန်နေရာနှင့် အသုံးအဆောင်များ၊ ခန်းမတစ်ခု၊ စာသင်ခန်းများနှင့် စင်ကာပူမွတ်စလင်များ၏ သမိုင်းကြောင်းများ၊ အမွေအနှစ်များကို ပြသမည့် ပြခန်းတစ်ခုတို့ ပါဝင်မည်ဖြစ်သည်။

အမှတ် ၂၆၅ ဆီရန်ဂွန်းလမ်းမတွင်ရှိပြီး ၉၅၀၀ စကွဲယားပေကျယ်သည့် မြေနေရာ၌ တည်ရှိနေသည့် အဆိုပါဗလီဝတ်ကျောင်းတော် တိုးချဲ့ဆောက်လုပ်မှုအား လာမည့်နှစ်ကုန်ပိုင်းတွင် စတင်ရန် ရည်ရွယ်ပြီး စီမံကိန်းအတွက် ဘက်ဂျက်မှာ ဒေါ်လာ ၆.၅ သန်းနှင့် ၇ သန်းကြားတွင် ကုန်ကျမည်ဟု လျာထားလေသည်။

Farrer Park ရထားဘူတာနှင့် မွတ်စ်တာဖာ စင်တာ (Musfafa Centre) တို့ အနီးတွင်ရှိသည့် အဆိုပါဗလီဝတ်ကျောင်းတော်မှာ စင်ကာပူနိုင်ငံသားများနှင့် နိုင်ငံရပ်ခြားမှ အလုပ်လာလုပ်သောသူများအတွက် ဆယ်စုနှစ်များစွာကြာ ဘာသာရေးနှင့် လူမှုရေးဆိုင်ရာ အချက်အချာနေရာ ဖြစ်ခဲ့လေသည်။

ဗလီဝတ်ကျောင်း၏ စီမံခန့်ခွဲရေးဘုတ်အဖွဲ့ဥက္ကဌ မစ္စတာ အယွဘ် အန်ဂူလီယာက အဆောက်အဦး တိုးချဲ့ဆောက်လုပ်ခြင်းမှာ အနာဂတ်အတွက်ရည်ရွယ်သည်ဟု The straits Times သို့ ပြောကြားခဲ့သည်။ အန်ဂူလီယာ ဗလီဝတ်ကျောင်းတော်မှာ အမျိုးအမျိုးအထွေသော အစီအစဉ်များ၊ လှုပ်ရှားသွားလာမှုများနှင့် နိုင်ငံခြားခရီးသွားများဖြင့် စည်ကားရာနေရာတွင်ရှိပြီး၊ Connexion ဆေးရုံ ဖွင့်လှစ်လိုက်ခြင်းက ပို၍ စည်ကားသွားစေသည်ဟု ၎င်းက ထည့်သွင်းပြောကြားခဲ့သည်။

“ဗလီက လူတွေကျပ်ညပ်လာပြီး နေရာထပ်ပေးနိုင်ဖို့အတွက် အရေးတကြီး လိုအပ်လာပါတယ်။ ကျွန်တော်တို့ဟာ နောက်ထပ် နှစ် ၃၀ အတွင်းမှာဖြစ်လာမယ့် လူ့အဖွဲ့အစည်းကို နေရာပေးနိုင်ဖို့အတွက်ပါ ရည်ရွယ်ပြီး ဒါကို ဆောက်လုပ်မှာပါ။ အခုအချိန်မှာလည်း ၀တ်ပြုရတာ သက်တောင့်သက်သာ မရှိပါဘူး”

အန်ဂူလီယာဗလီဝတ်ကျောင်းတော်မှာ ၎င်း၏ အ၀င်အ၀မုခ်ဦး ဒီဇိုင်းကြောင့် ထင်ရှားသည်။ အဆိုပါဗလီဝတ်ကျောင်းတော်ကို မွန်ဘိုင်းမြို့မြောက်ဖက် ရန်ဒါဒေသမှ ဂူဂျာရတ်နွယ်ဖွား ဆွန်နီမွတ်စလင်တစ်ဦးဖြစ်ပြီး ကုန်သည်နှင့် အိမ်ခြံမြေရင်းနှီးမြှုပ်နှံသူ တစ်ဦးဖြစ်သည့် မိုဟာမက် ဆာလေဟ် ယူဆွဖ်က ၁၈၉၀ ပြည့်နှစ်များတွင် တည်ဆောက်ခဲ့ခြင်းဖြစ်သည်။ ၎င်းမှာ လက်ရှိ ဗလီဝတ်ကျောင်းတော် စီမံခန့်ခွဲရေးဥက္ကဌ မစ္စတာ အယွဘ်နှင့် ဘေးတော်စပ်သူလည်း ဖြစ်လေသည်။

ဗလီဝတ်ကျောင်းတောာ် စတင်တည်ဆောက်ကတည်းက ရှိနေသည်ခဲ့သည့် မုခ်ဦးကို စင်ကာပူ မြို့ပြ ပြန်လည်ဖွံ့ဖြိုးတိုးတက်ရေး အာဏာပိုင်အဖွဲ့ URA က ပြီးခဲ့သည့်နှစ်ကစ၍ ရှေးဟောင်းအမွေအနှစ်အဖြစ် ထိန်းသိမ်းစောင့်ရှောက်ခဲ့လေသည်။ လက်ရှိ ဗလီဝတ်ကျောင်းတော် အဆောက်အဦးကို ၁၉၇၀ ပြည့်နှစ်များတွင် ပြန်လည်တည်ဆောက်ခဲ့ခြင်းဖြစ်သည်။

အသစ်ဆောက်လုပ်မည့် ဗလီဝတ်ကျောင်းတော်သစ်တွင် မုခ်ဦးနှင့် ဗလီဝတ်ကျောင်းတော် အဆောက်အဦးအကြား မြေကွက်လပ်ထားရှိမည်ဟု မစ္စတာအယွဘ်က ပြောကြားခဲ့သည်။ စီမံကိန်းမှာ မုခ်ဦးဝကို ထိခိုက်မည်မဟုတ်ဘဲ၊ ထိုစီမံကိန်းအတွက်လည်း URA ၏ ရှေးဟောင်းအမွေအနှစ်ထိန်းသိမ်းရေးဌာနမှ ခွင့်ပြုချက်တောင်းခံစရာ လိုအပ်မည်မဟုတ်ပေ။

ဗလီဝတ်ကျောင်းတော်အသစ်တွင် အိန္ဒိယမွတ်စလင်များ၏ ဗိသုကာလက်ရာများကို ထည့်သွင်းမည်ဖြစ်ပြီး မုခ်ဦးအား ဂုဏ်ပြုသည့်အနေဖြင့် ထိုမုခ်ဦးတွင်ပါရှိသည့် အမိုးခုံးပုံစံများကိုလည်း ထည့်သွင်းတည်ဆောက်သွားမည်ဟု မစ္စတာအယွဘ်က ပြောကြားခဲ့သည်။

ထို့ပြင် ရှုပ်ထွေးပွေလီလှသည့် လောကကြီးတွင် စိတ်နှလုံးအေးချမ်းမှုကို ရှာဖွေသူများအတွက် သင့်တော်သည့်နေရာဖြစ်အောင်လည်း ဗလီဝတ်ကျောင်းတော်သစ်ကို ဖန်တီးသွားမည်ဟု ၎င်းက ဆိုသည်။

“၀တ်ပြုသူတွေကို ကျယ်ကျယ်ဝန်းဝန်း တရားအားထုတ်နိုင်တဲ့ နေရာမျိုး ပေးနိုင်ဖို့အတွက် ဗလီဝတ်ကျောင်းတော်ရဲ့ မျက်နှာကျက်တွေကို မြင့်မြင့်မားမား တည်ဆောက်သွားဖို့ စီစဉ်ထားပါတယ်”

ဆောက်လုပ်ရေးလုပ်ငန်းများ စတင်ရန်အတွက်မူ အန်ဂူလီယာ ၀ကားဖ်ငွေပဒေသာပင် ဒေါ်လာ သန်း ၅၀ မှ ၄ သန်းကို မစ္စတာအယွဘ်က ရယူထားသည်။ ထို့ပြင် ရန်ပုံငွေရှာဖွေရေးလုပ်ငန်းများကိုလည်း ပြီးခဲ့သည့်နှစ်က စတင်ခဲ့ပြီး ဒေါ်လာ လေးသိန်း ရရှိနေပြီဖြစ်သည်။

ဥပဒေရေးရာလုပ်ငန်းတစ်ခုတွင် လုပ်ကိုင်နေပြီး အန်ဂူလီယာဗလီဝတ်ကျောင်းတော်တွင် ဆယ်စုနှစ်တစ်ခုကြာ လာရောက်ဝတ်ပြုခဲ့သည့် အသက် ၆၇ နှစ်အရွယ် မစ္စတာ ဟမ်ဒီ ပါဟ်အီက ပြင်ဆင်မွမ်းမံမှုကို စိတ်ဝင်တစ်စား စောင့်ကြည့်နေသည်ဟု ဆိုသည်။

“ဗလီက ပုံမှန်လိုလို လူကြပ်နေတာပဲ။ လူတွေရဲ့ ဖိနပ်တွေကလည်း ပွစာတက်နေတယ်။ တိုးချဲ့ဆောက်လုပ်ဖိုပ အချိန်ပါပဲ” ဟု ပါဟ်အီက ပြောကြားခဲ့လေသည်။

(စင်ကာပူနေ့စဉ်ထုတ် The Strait Times သတင်းစာတွင် ဖော်ပြခဲ့သည့် Angullia Mosque to be rebuilt to double capacity ကို လေးမောင်မှ ဆီလျော်အောင် ဘာသာပြန်ဆိုသည်။)