Blog

ဖေဖော်ဝါရီ ၂၆၊ ၂၀၂၂
M-Media

-မြန်မာနိုင်ငံကိုယ်တိုင်က ပြဿနာဖြေရှင်းဖို့ ဆန္ဒမရှိဘူးဆိုရင် အာဆီယံအဖွဲ့ဝင်နိုင်ငံတွေက ဖြေရှင်းပေးလို့ မရဘူးလို့ မလေးရှားဝန်ကြီးချုပ် အစ္စမာအီလ် ဆာဘရီက ဒီကနေ့ပြုလုပ်တဲ့ သတင်းစာရှင်းလင်းပွဲမှာ ပြောကြားလိုက်ပါတယ်။

ပြည်သူလူထုရဲ့ အကျိုးစီးပွားကို ရှေ့ရှုပြီး အခင်အမင်မပြတ်ဘဲ၊ ဘက်ပေါင်းစုံ စဉ်းစားဖြေရှင်းသင့်တယ်လို့ ဆာဘရီက ဆိုပါတယ်။ ပြီးခဲ့တဲ့နှစ် အာဆီယံ ထိပ်သီးအစည်းအဝေးမှာ ရရှိခဲ့တဲ့​ သဘောတူညီချက် ၅ ချက်ကို ချက်ခြင်း အကောင်အထည်ဖော်နိုင်မယ်လို့ မျှော်လင့်ကြောင်းလည်း ထည့်သွင်းပြောဆိုခဲ့ပါတယ်။

“မြန်မာနိုင်ငံကိုယ်တိုင်က ငြိမ်းချမ်းရေးကို မလိုလားဘူးဆိုရင် အာဆီယံအဖွဲ့ဝင် နိုင်ငံတွေက ဘာမှ ဖြစ်ဖြစ်မြောက်မြောက် လုပ်ပေးလို့ မရပါဘူး။ အာဆီယံမှာ ကြားဝင်မစွက်ရေး မူဝါဒရှိတယ်။ နိုင်ငံတစ်ခုရဲ့ ပြည်တွင်းရေးကို တစ်ခြားနိုင်ငံတွေက ဝင်စွက်မှာ မဟုတ်ပါဘူး။ ဒါ့ကြောင့် ကိုယ့်ပြည်တွင်းက ပြဿနာကို ကိုယ်တိုင်ဖြေရှင်းရမယ်ဆိုတဲ့ စိတ်ဆန္ဒမျိုး မြန်မာနိုင်ငံမှာရှိဖို့ အရေးကြီးပါတယ်”

ထိုင်းဝန်ကြီးချုပ် ပရာယွတ်ချန်အိုချာနဲ့ တွေ့ဆုံမှုမှာလည်း မြန်မာ့အရေး ဆွေးနွေးခဲ့တယ်လို့ ဆာဘရီက ထည့်သွင်းပြောဆိုခဲ့ပါတယ်။

ဒီကနေ့သတင်းစာရှင်းလင်းပွဲမှာ ဆာဘရီဟာ ရိုဟင်ဂျာအရေးကိုလည်း ထည့်သွင်းပြောဆိုခဲ့ပါတယ်။

ရိုဟင်ဂျာကိစ္စဟာ ဒေသတွင်းနဲ့ ကမ္ဘာလုံးဆိုင်ရာ ကိစ္စတစ်ခုဖြစ်ပြီး အတူတကွ ၀ိုင်းဝန်းဖြေရှင်းဖို့ လိုအပ်ကြောင်း၊ မလေးရှားဟာ ရိုဟင်ဂျာ ဒုက္ခသည် ၂ သိန်းလောက်ကို လက်ခံထားရကာ ဒီကိစ္စမှာ အထိခိုက်ဆုံး တိုင်းပြည်တွေထဲက တစ်ခုဖြစ်ကြောင်း ဆာဘရီက ပြောပါတယ်။

“ဒီပြဿနာကို မလေးရှားလို တစ်နိုင်ငံတည်းက ကိုင်တွယ်ဖြေရှင်းလို့ မရဘူးလို့ ကျွန်တော် အရင်ကတည်း ပြောဖူးပါတယ်။ မြန်မာနိုင်ငံက သူတို့ရဲ့ တိုင်းရင်းသားလူမျိုးပြဿနာကို ကိုယ်တိုင်ဖြေရှင်းမှ ရိုဟင်ဂျာကိစ္စကို ဖြေရှင်းလို့ရမှာပါ”

Ref: Malay Mail

ဖေဖော်၀ါရီ ၂၂၊ ၂၀၂၂
M-Media

ပိတ်ဆို့အရေးယူခံရတဲ့ စာရင်းထဲမှာ စစ်ကောင်စီ၀န်ကြီးတွေနဲ့ မြန်မာစစ်တပ် ထိပ်တန်းအရာရှိ စုစုပေါင်း ၂၂ ဦး၊ စစ်တပ်ကို အဓိက ထောက်ပံ့ပေးနေတဲ့ လုပ်ငန်း ၄ ခု တို့ ပါ၀င်ပါတယ်။

မြန်မာနိုင်ငံရဲ့ နိုင်ငံခြား၀င်ငွေ ၅၀ ရာခိုင်နှုန်းလောက်ဟာ သဘာ၀ဓာတ်ငွေ့ရောင်းချမှုကနေ ရရှိတာဖြစ်ပြီး ၂၀၂၁-၂၀၂၂ ခုနှစ်အတွင်း မြန်မာ့ရေနံနဲ့ သဘာ၀ဓာတ်ငွေ့လုပ်ငန်းက နိုင်ငံခြား၀င်ငွေ ကန်ဒေါ်လာ ၁.၅ ဘီလီယံလောက် ရရှိလိမ့်မယ်လို့ ခန့်မှန်းထားပါတယ်။

MOGE ဟာ မြန်မာနိုင်ငံက ရေနံနဲ့ သဘာ၀ဓာတ်ငွေ့ လုပ်ကွက်တွေကို ထိန်းချုပ်ကာ ပြည်တွင်း၊ ပြည်ပ ကုမ္ပဏီတွေနဲ့ ဆက်လက်လုပ်ကိုင်တာ၊ လုပ်ကွက်ချပေးပြီး အခွန်ကောက်တာတွေကို လုပ်ဆောင်ပါတယ်။

“စစ်တပ်က ထိန်းချုပ်ထားပြီး အကျိုးအမြတ် ရယူနေတဲ့အတွက် MOGE ဟာ မြန်မာနိုင်ငံမှာ ဒီမိုကရေစီနဲ့ တရားဥပဒေ စိုးမိုးမှု ပျက်ဆီးအောင် လုပ်ဆောင်နေတဲ့ စစ်တပ်ကို ကူညီပံ့ပိုးပေးသလို ဖြစ်နေပါတယ်” လို့ ဥရောပသမဂ္ဂက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

အာဏာသိမ်းစစ်ကောင်စီ ပြောခွင့်ရ ဗိုလ်မှူးချုပ် ဇော်မင်းထွန်းက ဒီလိုပိတ်ဆို့မှုဟာ လုပ်ငန်းအပေါ် ထိရောက်မှုရှိမှာမဟုတ်ဘဲ အရင်ကလည်း ပိတ်ဆို့မှုတွေကြားထဲက ရှင်သန်အောင် လုပ်ဆောင်ခဲ့တယ်လို့ တုန့်ပြန်ပြောဆိုခဲ့ပါတယ်။

စစ်ကောင်စီ အဓိက၀င်ငွေရနေတဲ့ လုပ်ငန်းတွေမှာ ရင်းနှီးမြှုပ်နှံထားတာတွေ ရုပ်သိမ်းဖို့ နိုင်ငံတကာ လူ့အခွင့်အရေးအဖွဲ့တွေက တိုက်တွန်းဆော်သြခဲ့ပြီးတဲ့နောက် အမေရိကန်၊ ပြင်သစ်၊ ဂျပန်နဲ့ မလေးရှားတို့က ထိပ်တန်း ကုမ္ပဏီ ၄ ခုလောက်ဟာ မြန်မာနိုင်ငံက ကမ်းလွန်သဘာ၀ဓာတ်ငွေ့လုပ်ငန်း ၂ ခုကနေ နှုတ်ထွက်တော့မှာဖြစ်ကြောင်း ပြီးခဲ့တဲ့ သီတင်းပတ်တွေမှာ ကြေငြာခဲ့ပါတယ်။

ဗိုလ်မှူးချုပ် ဇော်မင်းထွန်းက ထွက်သွားတဲ့ကုမ္ပဏီတွေနေရာမှာ အစား၀င်လာမယ့် နိုင်ငံခြားကုမ္ပဏီတွေ အဆင်သင့်ရှိနေပြီး အမည်တွေကို ထုတ်မပြောလိုဘူးလို့ ပြောကြားခဲ့ပါတယ်။

Ref: South China Morning Post