နိုဝင်ဘာ ၂၆၊ ၂၀၂၁
M-Media
-အစ္စလာမ်သာသနာ စတင်ပေါ်ပေါက်ရာ ခေတ်ဦးပိုင်းက တည်ဆောက်ခဲ့တဲ့ ရွှံ့ဗလီတစ်လုံးကို သုတေသနပညာရှင်တွေက အီရတ်နိုင်ငံတောင်ပိုင်း ဒီကွာဒေသမှာ တူးဖော်တွေ့ရှိခဲ့ပါတယ်။
အလ်ရာဖိုင်မြို့က လူနေရပ်ကွက်အလယ်မှာ တွေ့ခဲ့တဲ့ ဒီဗလီဟာ ၂၆ ပေအကျယ်၊ ၁၆ ပေအမြင့် ရှိပါတယ်။ အနည်းဆုံး လူ ၂၅ ဦး ဝတ်ပြုနိုင်တဲ့ အနေအထားဖြစ်ပြီး ဗလီရဲ့အလယ်မှာ ရှေ့ဆောင်အီမာမ်တစ်ဦးရဲ့ အုတ်ဂူ ရှိပါတယ်။
အူမိုင်ယာမင်းဆက်လက်ထက် အေဒီ ၆၇၉ ခုနှစ်မှာ ဆောက်လုပ်ထားတဲ့ ဗလီပါ။ ဆော်ဒီအာရေဗျနိုင်ငံ မက္ကာမြို့မှာ တမန်တော် မိုဟာမက်က အစ္စလာမ်သာသနာကို စတင်ဟောကြားပြီး နှစ်ပေါင်း ၇၀ အတွင်း တည်ဆောက်ခဲ့တဲ့ ဗလီလည်း ဖြစ်ပါတယ်။
ဒီကွာဒေသ ရှေးဟောင်းပစ္စည်းများ တူးဖော်ရေးဌာန အကြီးအကဲ အလီ ရှာလ်ဂမ်က အခုတွေ့ရှိမှုဟာ အရေးပါပြီး ကြီးမားတဲ့ ရှာဖွေတွေ့ရှိမှုတစ်ခုဖြစ်တယ်လို့ ပြောကြားခဲ့ပါတယ်။ အူမိုင်ယာမင်းဆက်လက်ထက်က ဆောက်လုပ်ထားတဲ့ ရှေးဟောင်းဘာသာရေးဆိုင်ရာအဆောက်အဦးတွေကို အရင်က အနည်းငယ်သာ တွေ့ရှိခဲ့ပြီး ရာသီဥတုဒဏ်ကြောင့် ပျက်ဆီးနေတဲ့အတွက် တည်ဆောက်ခဲ့တဲ့ ကာလအတိအကျကို မဖော်ထုတ်နိုင်ခဲ့ဘူးလို့လည်း ရှာလ်ဂမ်က ဆိုပါတယ်။
အီရတ်နိုင်ငံက ဒီကွာဒေသဟာ ရှေးဟောင်းနေရာအများအပြားရှိတဲ့ဒေသဖြစ်ပြီး နိုင်ငံပေါင်းစုံက ရှေးဟောင်း သုတေသနပညာရှင်တွေ လာရောက် ရှာဖွေတူးဖော်မှုတွေ လုပ်ဆောင်နေကြပါတယ်။ အီရတ်အစိုးရတော့ နိုင်ငံအတွင်း မတည်ငြိမ်မှုတွေ၊ စီမံခန့်ခွဲမှုအမှားတွေကြောင့် ရှေးဟောင်းသုတေသနဖက်မှာ ငွေကြေးစိုက်ထုတ်နိုင်ခြင်း မရှိပါဘူး။
အခုအစ္စလာမ့်ခေတ်ဦးက ရှေးဟောင်း ရွှံ့ဗလီကို ဗြိတိန်-အီရတ် ရှေးဟောင်းသုတေသနအဖွဲ့က တူးဖော်တွေ့ရှိခဲ့တာ ဖြစ်ပါတယ်။
Ref: Aljazeera
