Blog

နိုဝင်ဘာ ၂၅၊ ၂၀၂၁
M-Media

-နို၀င်ဘာ ၂၅ ရက် (‌ယနေ့)မှာ ကျင်းပပြုလုပ်တဲ့ အာရှ-ဥရောပ ထိပ်သီးအစည်းအဝေး (Asem) ကို မြန်မာ စစ်အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ခွင့်မရပါဘူး။

အာဆီယံရဲ့ မူအတိုင်း နိုင်ငံရေးနယ်ပယ်ကမဟုတ်သူတစ်ဦးကို မြန်မာနိုင်ငံကိုယ်စားပြု တက်ခွင့်ပေးပေမယ့် စစ်ကောင်စီက စေလွှတ်ခြင်း မရှိပါဘူး။

Asem အစည်းအဝေးကို ၁၉၉၆ ခုနှစ်ကတည်းက စတင်ကျင်းခဲ့တာဖြစ်ပါတယ်။ ၂ နှစ်တစ်ကြိမ် ကျင်းပ​လေ့ရှိပြီး ပြီးခဲ့တဲ့နှစ်က ကျင်းပရမှာဖြစ်ပေမယ့် ကိုဗစ်ကပ်ရောဂါကြောင့် ရွှေ့ဆိုင်းကာ ဒီနှစ်မှ ကျင်းပနိုင်တာဖြစ်ပါတယ်။

အွန်လိုင်းက ပြုလုပ်မှာဖြစ်ပြီး ကမ္ဘောဒီယားဝန်ကြီးချုပ် ဟွန်ဆန်က ဦးဆောင်မှာ ဖြစ်ပါတယ်။ အခုနှစ်အစည်းအဝေးမှာ ဥရောပနိုင်ငံ ၃၀ နဲ့ အာရှ ၂၁ နိုင်ငံက ခေါင်းဆောင်တွေ တက်ရောက်မှာ ဖြစ်ပါတယ်။

Asem အစည်းအဝေးဟာ နိုင်ငံရေး၊ စီးပွားရေးနဲ့ ဘဏ္ဍာရေး၊ လူမှုယဉ်ကျေးမှုဆိုင်ရာ အချက် ၃ ချက်ကို အဓိကထားတာဖြစ်ပြီး ပြီးခဲ့တဲ့နှစ်တွေအတွင်း အာရှနဲ့ ဥရောပက ဒီနယ်ပယ်တွေမှာ ဖြစ်ပေါ်တိုးတက်မှုတွေကို အခုအစည်းအဝေးမှာ သုံးသပ်ဆွေးနွေးကြမှာ ဖြစ်ပါတယ်။

အာဆီယံဟာ အောက်တိုဘာကလုပ်တဲ့ ထိပ်သီးအစည်းအဝေးမှာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို တက်ခွင့်မပေးသလို၊ ပြီးခဲ့တဲ့တစ်ပတ်ကလုပ်တဲ့ အာဆီယံ-တရုတ် ထိပ်သီးအစည်းအဝေးကိုလည်း တက်ခွင့်မပေးပါဘူး။

ဖေဖော်ဝါရီ ၁ ရက်နေ့ စစ်အာဏာသိမ်းပြီးတဲ့နောက် မြန်မာနိုင်ငံမှာ ဖြစ်ပေါ်လာတဲ့ ပြဿနာတွေကို ဖြေရှင်းရေး ဧပြီလက အာဆီယံခေါင်းဆောင်တွေနဲ့ သဘောတူညီချက်ကို လိုက်နာဆေငာ်ရွက်ခြင်း မရှိတဲ့အတွက် ဖယ်ကျဉ်ရခြင်းဖြစ်တယ်လို့ အာဆီယံက ထုတ်ပြန်ထားပါတယ်။

Ref: The Star

နိုဝင်ဘာ ၂၃၊ ၂၀၂၁
M-Media

-ကယားပြည်နယ် လွိုင်ကော်မြို့က Christ the King Cathedral ခရစ်ယာန် ကက်သလစ်ဘုရား​ကျောင်းကို စစ်ကောင်စီတပ်တွေက တနင်္လာနေ့မှာ ဝင်ရောင်စီးနင်းရှာဖွေခဲ့ပြီး ကျန်းမာရေးဝန်ထမ်း ၁၈ ဦးကို ဖမ်းဆီးသွားပါတယ်။

ဘုရားကျောင်းပရ၀ုဏ်၊ ဂိုဏ်းအုပ်ဘုန်းကြီးနေထိုင်ရာ အိမ်နဲ့ ဘုရားကျောင်းက ကမကထပြု ဖွင့်လှစ်ထားတဲ့ ဆေးခန်းတွေကို စစ်သားနဲ့ ရဲ ၂၀၀ ကျော်လောက်က ဝင်ရောက်စီးနင်းခဲ့တယ်လို့ ဘုရားကျောင်းတာဝန်ရှိသူတွေက ကက်သလစ် သတင်းဌာနတစ်ခုဖြစ်တဲ့ UCA ကို ပြောကြားခဲ့ပါတယ်။

ဆေးခန်းကို ဝင်စီးရာမှာ ကိုဗစ်လူနာ ၄ ဦးအပါအဝင် လူနာ ၄၀ လောက်ကို စစ်ကောင်စီတပ်သားတွေက မောင်းထုတ်ခဲ့ပြီး၊ ကျန်းမာရေးဝန်ထမ်း ၁၈ ဦးကို ဖမ်းဆီးခဲ့ပါတယ်။ ဖမ်းဆီးခံရသူတွေထဲမှာ ဆရာဝန် ၄ ဦး၊ သူနာပြုတွေ၊ ဆေးဝါးကျွမ်းကျင်သူနဲ့ စေတနာ့ဝန်ထမ်းတွေ ပါဝင်ပါတယ်။ စစ်သားတွေဟာ ဆေးမှတ်တမ်းတွေ၊ ဆေး၀ါးပစ္စည်း ကိရိယာတွေကို ယူဆောင်သွားခဲ့ပါတယ်။

ဘုရားကျောင်းပရ၀ုဏ်အတွင်းမှာရှိတဲ့ အ​ဆောက်အဦးတွေကို စစ်ကောင်စီတပ်သားတွေက မနက် ၉ နာရီကနေ ညနေ ၄ နာရီအတွင်း အနည်းဆုံး ၃ ကြိမ် ဝင်ရောက်စီးနင်းခဲ့ကြကာ၊ အဲဒီအချိန်အတွင်း ဘုရားကျောင်းတစ်၀ိုက်မှာ လုံခြုံရေးကို ထူထပ်စွာ ချထားတယ်လို့ မျက်မြင်သက်သေတွေက ပြောပါတယ်။

“ကျွန်တော်တို့ ပရဟိတအလုပ်တွေကို လုပ်နေတာပါ။ ဘာအမှားအယွင်းမှ မလုပ်ထားပါဘူး။ ဘာဖြစ်လို့ ဒီလိုစီးနင်းတာလဲ၊ ဘာတွေရှာတာလဲဆိုတာ ကျွန်တော်တို့လည်း မပြောတတ်တော့ဘူး” လို့ လွိုင်ကော် ကက်သလစ်သာသနာ့နယ်မြေက တာဝန်ရှိသူ ဖာသာ ဖရန်စစ်စိုးနိုင်က ပြောပါတယ်။

ဒီလိုဝင်ရောက်စီးနင်းတာကြောင့် ဘုရားကျောင်းဆေးခန်းမှာ လာပြတဲ့လူနာတွေ၊ မေလကတည်းက တိုက်ပွဲပြင်းထန်မှုနောက်ဆက်တွဲ ဘုရားကျောင်းမှာ လာရောက်ခိုလှုံနေသူတွေကြားမှာ စိုးရိမ်စိတ်တွေ၊ မလုံခြုံမှုတွေ ဖြစ်လာတယ်လို့ ဖာသာက ထည့်သွင်းပြောဆိုခဲ့ပါတယ်။

​ဖေဖော်ဝါရီ ၁ ရက် စစ်တပ်က အာဏာသိမ်းပြီးနောက်ပိုင်း ဖြစ်လာတဲ့ မတည်ငြိမ်မှုတွေအတွင်း ကာယားပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီးနဲ့ မကွေးတိုင်းဒေသကြီးတွေမှာ စစ်ကောင်စီတပ်တွေရဲ့ လက်ချက်ကြောင့် အနည်းဆုံး ခရစ်ယာန်ဘုရားကျောင်း ၅ ခု ထိခိုက်ပျက်ဆီးခဲ့ပါတယ်။

Ref: UCA