ဧပြီ ၁၊ ၂၀၁၅
M-Media
– ဥရောပတွင် ကစားသည့် ဘရာဇီးလ်ဘောလုံးသမားများထဲမှ အကောင်းဆုံး ဘောလုံးသမားကို ပေးအပ်ချီးမြှင့် ၂၀၁၄ Samba Gold Award အား ဘာစီလိုနာအသင်းတိုက်စစ်မှူး နေးမာက ဆွတ်ခူးရရှိခဲ့သည်ဟု သိရသည်။
ပြင်သစ်ရှိ Sambafoot အဖွဲ့မှ ချီးမြှင့်သော အဆိုပါဆုအတွက် ကမ္ဘာတစ်ဝှမ်းမှ ဂျာနယ်လစ်များ ကစားသမားဟောင်းများက မဲပေးရွေးချယ်ခဲ့ကြခြင်း ဖြစ်ပြီး နေးမာက စုစုပေါင်း မဲအရေအတွက် ၁၅၀၀၀၀ ကျော် ရရှိခဲ့ကာ အက်သလက်တီကိုမှ မီရန်ဒါနှင့် ဂါလာတာစာရေးမှ ဖိလစ်ပိ မီလိုတို့ကို ကျော်ဖြတ်၍ ဆွတ်ခူးခဲ့ခြင်း ဖြစ်သည်။
ဘာစီလိုနာသို့ စရောက်သည့်နှစ်က နေးမာမှာ ရုန်းကန်ခဲ့ရသော်လည်း ၂၀၁၄ ခုနှစ်တွင် အကောင်းဆုံး ခြေစွမ်းကို ပြသနိုင်သောကြောင့် အဆိုပါ ဆုကို ဆွတ်ခူးရရှိခဲ့ခြင်း ဖြစ်သည်။ ၂၀၀၈ ခုနှစ်မှ စတင်ချီးမြှင့်သော ထိုဆုကို ပီအက်စ်ဂျီ နောက်ခံလူ သီယာဂိုဆေးလ်ဗားက ပြီးခဲ့သည့် ၃ နှစ်ဆက်တိုက် ဆွတ်ခူးခဲ့သည်။
အဆိုပါဆု ရရှိခဲ့သူများတွင် ကာကာ၊ လူးဝစ်ဖေဘီယာနိုနှင့် မိုင်ကွန်တို့ ပါဝင်ခဲ့သည်။ စနေနေ့က ကစားခဲ့သော ချီလီအသင်းနှင့် ခြေစမ်းပွဲပြီးနောက် ချီလီကစားသမား အလယ်တန်းလူ မီဒဲလ်က နေးမာမှာ ကွင်းထဲတွင် သရုပ်ဆောင်သည်ဟု ဝေဖန်ခဲ့ပြီး နေးမာကမူ မိမိအနေဖြင့် မီဒဲလ်ဆိုသူကို မသိကြောင်း၊ ထိုအတွက်လည်းဘာမှ မပြောချင်ကြောင်း ပြန်လည်တုံ့ပြန်ခဲ့သည်။
Ref: Dailymail
