ဇန်န၀ါရီ ၂၁၊ ၂၀၁၅
M-Media
– ပြင်သစ်မဂ္ဂဇင်း Charlie Hebdo မှ တမန်တော်မိုဟာမက်၏ ရုပ်ပြောင်ကာတွန်း ထပ်မံ ရေးဆွဲဖော်ပြမှုနှင့် ပတ်သက်၍ တရားစွဲဆိုသွားမည်ဟု ကမ္ဘာ့အကြီးဆုံး မွတ်စလင်နိုင်ငံများ အဖွဲ့ဖြစ်သည့် OIC က ပြောကြားလိုက်သည်။
`Charlie Hebdo မဂ္ဂဇင်းကို ဥပဒေကြောင်းအရ တရားစွဲဆိုနိုင်ဖို့အတွက် ဥရောပနဲ့ ပြင်သစ်က ဥပဒေတွေ၊ အခြားသော ရနိုင်တဲ့ နည်းလမ်းတွေကို OIC က လေ့လာနေပါတယ်။ ပြင်သစ်ဥပဒေက Charled Hebdo မဂ္ဂဇင်းကို ဥပဒေကြောင်းအရ ရင်ဆိုင်ခွင့် ပေးမယ်ဆိုရင် ဒီမဂ္ဂဇင်းကိုတရားစွဲဖို့ OIC က တွန့်ဆုတ်နေမှာမဟုတ်ပါဘူး´ ဟု OIC ၏ အထွေထွေအတွင်းရေးမှူး အီယဒ် မဒနီက ဆော်ဒီသတင်းစာတစ်စောင်သို့ ပြောကြားခဲ့သည်။
သေနတ်သမားများ၏ တိုက်ခိုက်မှုအပြီး ပထမဆုံးဖြန့်ချီခဲ့သည့် အဆိုပါ မဂ္ဂဇင်း၏ အဖုံးတွင် တမန်တော်မိုဟာမက်၏ ကာတွန်းပုံအား ထပ်မံဖော်ပြခဲ့ပြီး ထိုသို့ဖော်ပြမှုနှင့်ပတ်သက်၍ ကမ္ဘာတစ်ဝှမ်းမှ မွတ်စလင်အဖွဲ့အစည်းများ၊ မွတ်စလင်ခေါင်းဆောင်များနှင့် ပြည်သူများက ပြင်းပြင်းထန်ထန် ဝေဖန်ရှုတ်ချမှုများ ပြုလုပ်ခဲ့ပြီး ဆန္ဒပြမှုများလည်း ရှိခဲ့သည်။
၎င်း၏ ကိုယ်ပိုင် Twitter စာမျက်နှာတွင်လည်း မဒနီက `ဒီကာတွန်းဟာ ကမ္ဘာတစ်ဝှမ်းမှာရှိတဲ့ မွတ်စလင်တွေရဲ့ စိတ်နှလုံးသားကို နာကျင်စေပါတယ်။ လွတ်လပ်စွာပြောဆိုခွင့်ဆိုပေမယ့် အမုန်းတရားဖြန့်ဖြူးတာမျိုးတော့ မဖြစ်ရပါဘူး။ ပြီးတော့ တခြားသူတွေကို စော်ကားလို့ မရပါဘူး။ ဘယ်လိုဘာသာတရား၊ ဘယ်လိုယုံကြည်ချက်မဆို စိတ်ကောင်းစေတနာနဲ့ သက်ဝင်ယုံကြည်ထားကြသူတွေဟာ သူတို့ရဲ့ အယူဝါဒ လှောင်ပြောင်ခံရတာကို လက်ခံမှာ မဟုတ်ပါဘူး´ ရေးသားဖော်ပြခဲ့သည်။
Charlie Hebdo မဂ္ဂဇင်းမှ ကာတွန်းဆရာများမှာ ယခင်ကလည်း တမန်တော်မိုဟာမက်နှင့် အစ္စလာမ်ဘာသာအပါအ၀င် အခြားသော ဘာသာတရာများကို စော်ကားလှောင်ပြောင်သည့် ရုပ်ပြောင်များကို ရေးဆွဲဖော်ပြလေ့ ရှိခဲ့သည်။
OIC မှာ ယခင်ကလည်း အစ္စလာမ်ဘာသာအပါအ၀င် ကမ္ဘာ့ဘာသာတရားများအား အသရေဖျက်ခြင်းမှ ကာကွယ်ပေးရန်နှင့် ဘာသာတရားအားလုံးအပေါ် လေးစားမှုများ ရှိလာရန် ကြိုးပမ်းဆောင်ရွက်လျက်ရှိပြီး ကုလသမဂ္ဂသို့ ဆုံးဖြတ်ချက်မူကြမ်း တင်သွင်းမှုများလည်း ရှိခဲ့သည်။
Ref: onislam
