ဇန်နဝါရီ ၅ ၊ ၂၀၁၅
M-Media
. ဦးအောင်ထွန်း ပေးပို့သည်။
Photo- Internet
ယခုအခါမြန်မာနိုင်ငံတွင် သာမက ကမ္ဘာ အရပ်ရပ်၌ပင် လူသိ ထင်ရှားလာသော ကျောက်နီမော်။ အစိုးရသစ်လက်ထက် ၂၀၁၂ ခုနှစ်မှ စတင်ကြီးထွားလာသော မြန်မာနိုင်ငံအရပ်ရပ်မှ ဘာသာရေး၊ လူမျိုးရေး ပဋိပက္ခတို့၏ မြစ်ဖျားခံရာဟု ယိုးစွပ်ခြင်းခံရသည့် ရွာကလေး။ မပြေးသော် ကန်ရာရှိဆိုသလို ထိုရွာကလေးမှစတင်ခဲ့သော သာမန်လူမှုရေးပြစ်မှုတစ်ခုမှသည် မီးပွားသဖွယ် အနယ်နယ်သို့လွင့်စင်ကာ ရခိုင်ပြည်နယ် တစ်ခုလုံးသာမက ရခိုင်ရိုးမကိုကျော် ၍ မြေပြန့်ဒေသ၊ တောင်ပေါ်ဒေသ အနှံ့အပြားသို့တိုင် အဖျက် မီးတောက်များ ကျယ်ပြန့်ခဲ့၏။
သမ္မတမှသည် သာမန် လဘက်ရည်ဆိုင် ထိုင်ဝိုင်းအထိ ထိုပဋိပက္ခများနှင့် စပ်လျဉ်း၍ ““ ကျောက်နီမော်မှ စခဲ့သည်”” ဟု ယနေ့ထိ ကိုးကားပြောဆိုနေကြသည့်တိုင် ထို ပဋိပက္ခများကို ကျောက်နီမော် ရွာသားများက မြန်မာ ပြည် အရပ်ရပ်တွင် ဖန်တီးနေခြင်းကား မဟုတ်ပေ။ တဖြည်း ဖြည်းချင်း ဆိုသလို အစိုးရအဆက်ဆက်၊ ခေတ်အဆက် ဆက် ရှိနေခဲ့သည့် နိုင်ငံရေး၊ လူမျိုးရေး၊ ဘာသာရေး၊ လူမှုရေး မကြေလည်မှုများသည် အနည်းငယ်ပွင့်လင်း လာသည့်အချိန် အရှိန်အဟုန်ဖြင့် တောက်လျောက်ရန် တာစူနေချိန်တွင် ကျောက်နီမော် ကိစ္စသည် အချိန် ကိုက်ပေါ်ထွက် လာသဖြင့် လောင်စာအပေါ် မီးကျသကဲ့သို့ ဖြစ်ခဲ့ရခြင်းသာဖြစ်သည်။
ထို ပဋိပက္ခများ၏ နောက်ဆက်တွဲ ရလဒ်အဖြစ် ပေါ်ပေါက်ခဲ့သော အမုန်းတရားများ၊ မယုံသင်္ကာမှုများ၊ ရန်လိုမှုများ၏ လက်ညှိုးပေါင်းထောင်သောင်း၊ မျက်လုံးပေါင်း အသင်္ချေကြားတွင် အခြားသော အစ္စလာမ် ဘာသာဝင်များထက် ကျောက်နီမော် ရွာသားများ အနေခက် ခဲ့ရသည်ဟုဆိုလျှင် လွန်အံ့ မထင်ပေ။ အဆိုပါ ပဋိပက္ခများနှင့် အတူ ရခိုင်ပြည်နယ်မြောက်ပိုင်း မှ““ရိုဟင်ဂျာ”” ပြသနာသည် လည်း ကမ္ဘာသိဖြစ်ခဲ့ရာ ရိုဟင်ဂျာဆိုသူတို့အား ““ဘင်္ဂါလီ””ဟု ကင်ပွန်းတပ်ခြင်းဖြင့် ပြည်တွင်းမှ ပြန်လည် တုန့်ပြန်ခဲ့ကြ၏။ ယင်းသို့ဖြင့် ““ရိုဟင်ဂျာ””လော၊ ““ဘင်္ဂါလီ”” လောဟူသော ပုစ္ဆာတွင်အဖြေမှန်ကိုဖေါ်ထုတ်ရန်ထက် အမြတ်ထုတ်ရန်ကိုသာ အားသန်နေကြပြန်၏။ ယင်းအထဲတွင် ပဲလှော်ကြားဆားညပ် ခံရသူများမှာ ကျောက်နီမော်ရွာသား အစ္စလာမ်ဘာသာဝင်များပင်ဖြစ်သည်။
ဆိုရလျှင်၊ ကျောက်နီမော်သား အစ္စလာမ်ဘာသာဝင်များသည် မည်သည့်အခါကမျှ မိမိတို့ကိုယ်ကို ““ရိုဟင်ဂျာ””ဟု ခံယူ ခဲ့သည်မရှိပေ။ ရခိုင်မွတ်စလင်ဟု ခံယူသူများ၊ ကမန်ဟုခံယူသူများသာဖြစ်သည်။ သို့ပါလျှက် ယခုအခါ ““ရိုဟင်ဂျာ””နှင့်ရော ကာ ကျောက်နီမော်သား အစ္စလာမ်ဘာသာဝင်များအား ““ဘင်္ဂါလီ””ဟု ယိုးစွပ် လာကြသောအခါ မဆိုင်သည့် ပြသနာထဲသို့ ဆွဲသွင်းသည်ဟု ခံစားရ၏။ ထိုအခါ ရှင်းသင့်သည်ကို ရှင်းရန်လိုလာ၏။ မရှင်းဘဲ ကြာရှည်ထားပါက အမှားကြာလျှင် အမှန်ဖြစ်ဆိုသကဲ့သို့ဖြစ်ကာ သားစဉ်မြေးဆက် နစ်နာရန်ရှိသဖြင့် ယခုကဲ့သို့ ရှင်းလင်းရခြင်းဖြစ်ပါသည်။
ကျောက်နီမော်ကျေးရွာသည် ရခိုင်ပြည်နယ်အလယ်ပိုင်းရှိ ရမ်းဗြဲကျွန်း၏ တောင်ဘက်ယွန်းယွန်း တွင်တည်ရှိပြီး အုပ်ချုပ်ရေး အရဆိုသော် ကျောက်ဖြူခရိုင်၊ ရမ်းဗြဲမြို့နယ်တွင် ပါဝင်ပါသည်။ ကျောက်နီမော် ကျေးရွာအုပ်စုတွင် တိုက်နယ်အဆင့် ဆေးရုံတစ်ရုံ၊ အထက် တန်းကျောင်း တစ်ကျောင်း၊ အလယ်တန်း ကျောင်းခွဲတစ်ကျောင်း၊ မူလတန်းကျောင်း (၂)ကျောင်း၊ ရဲစခန်းတို့ရှိပြီး ကျေးရွာ အုပ်စုတစ်ခုလုံးတွင် အိမ်ခြေ (၁၆၀၀)ခန့် ရှိ၍ လူဦးရေ အားဖြင့်(၈၈၀၀) ဦးခန့်ရှိသည့် ကျေးရွာကြီး တစ်ရွာဖြစ်ပါသည်။ ကျေးရွာအုပ်စု အတွင်းတွင် ကျောက်နီမော် ရွာမှ အပ ကျန်ရွာ(၃၂)ရွာတို့မှာ ဗုဒ္ဓဘာသာရွာများဖြစ်ပြီး၊ ကျောက်နီမော် တစ်ရွာတည်းသာ အစ္စလာမ်ဘာသာဝင် အများစုနေထိုင်ရာ ရွာဖြစ်ပါသည်။
ကျောက်နီမော်ရွာသား အစ္စလာမ်ဘာသာဝင်တို့သည် ၀တ်စားဆင်ယင်မှုအရ ပတ်ဝန်းကျင်ရှိ အခြား တိုင်းရင်းသားများနှင့် မခြားနားပေ။ ပညာရေးကိုအားပေးကြသဖြင့် ခေတ်ပညာရော၊ ဘာသာရေးပညာကိုပါ လေ့လာ လိုက်စားကြသည်။ ပျမ်းမျှအားဖြင့် တစ်အိမ်ထောင် တစ်ယောက်နှုန်းခန့် ဘွဲ့ရပညာတတ်များရှိကာ ထိုအထဲမှ ပညာရေး ၀န်ထမ်း၊ ကျန်းမာရေးဝန်ထမ်း၊ ဥပဒေပညာရှင်များ၊ ကိုယ်ပိုင်လုပ်ငန်းရှင်များ ရှိနေပါသည်။ ကျောက်နီမော်ရွာတွင် အစဉ်အလာအရ ရေ လုပ်ငန်းလုပ်သူများ လည်းရှိရာ ကျောက်နီမော် ရွာသားများသည် ၀န်ထမ်းများ၊ လုပ်ငန်းရှင်များ အနေဖြင့်ဖြစ်စေ၊ ကုန်သည်များအနေဖြင့်ဖြစ်စေ အရောင်းအ၀ယ်ကိစ္စ၊ ရုံးကိစ္စ၊ သာရေး၊နာရေး ကိစ္စများဖြင့် စစ်တွေ၊ ကျောက်ဖြူ၊ သံတွဲစသည့် ရခိုင်ပြည်နယ် မြို့ကြီး၊မြို့ငယ်များသို့ ဥဒဟိုဝင် ထွက်သွား လာခဲ့ကြသည်မှာ ခေတ်အဆက်ဆက်မှသည် ယနေ့ထက်တိုင်ဖြစ်၏။ ယင်းမြို့ကြီးမြို့ငယ်များ တွင်လည်း ကျောက်နီမော် ရွာသားတို့၏ သားချင်းများ၊ စီးပွားဘက်များ၊ ကျောင်းနေဘက်များ၊ ဆရာသမားများ၊ တပည့် သားမြေးများ ရှိနေခဲ့သည်သာဖြစ်၏။
ထိုသို့ခေတ်အဆက်ဆက် လွတ်လပ်စွာသွားလာခဲ့သော ကျောက်နီမော်ရွာသားများမှာ န၀တ-ခေတ်နှောင်းပိုင်းတွင် ရခိုင်ပြည်နယ်ရှိ အခြားသော အစ္စလာမ်ဘာသာဝင်များနည်းတူ ခရီးသွားလာခွင့် ကန့်သတ်ခြင်းကို ခံခဲ့ရပါသည်။ ယင်းနှင့် တစ်ဆက်တည်း တွင် ကျောက်နီမော် ရွာသားများအား နိုင်ငံသားကိစ္စဖြင့် သံသယ၀င်ကာ ခွဲခြားဆက်ဆံခြင်းကိုလည်း ခံရပြန်ပါသည်။ အမှန်စင်စစ် ကျောက်နီမော်သည် ရခိုင်ပြည်နယ်မြောက်ပိုင်းနှင့် ဆက်ဆံ ခြင်း၊ ရောနှောခြင်း၊ ပတ်သက်ခြင်းများကင်းလျှက် သီးခြားရပ်တည်ခဲ့သော ကျေးရွာဖြစ်ပါသည်။
အစ္စလာမ်ဘာသာကိုးကွယ်ယုံကြည်ရုံမျှဖြင့် ဤသို့ခွဲခြားဆက်ဆံခံရသည်သာမက ယခုနောက်ဆုံး လက်ရှိအစိုးရလက်ထက် ပဋိပက္ခများတွင် ““ရိုဟင်ဂျာ””နှင့်ရောနှောကာ ““ဘင်္ဂါလီ””ဟု ကင်ပွန်းတပ်၍ နှိမ့်ချစော်ကား၊ ရန်လိုမှုများကိုပါ ခံလာရ သဖြင့် ကျောက်နီမော် ရွာသား တစ်ဦး အနေဖြင့် လက်လှမ်းတမီ လေ့လာသိရှိရသော ကျောက်နီမော်ရွာ၏ သမိုင်းကို အနည်းငယ်တင်ပြအပ်ပါသည်။
““ကျောက်နီမော်””ဟူသည့် ဘင်္ဂလား ပင်လယ်အော်ထဲမှ ကျေးရွာငယ်လေးသည် မနေ့တနေ့က ပေါ်ပေါက်လာခဲ့ခြင်း မဟုတ်ဘဲ နှစ်ပေါင်း ရာချီ သက်တမ်းရှိသည့် ရှေးဟောင်း တံငါ ရွာကလေး တစ်ရွာဖြစ်၏။ သမိုင်း စာပေအထောက်အထားအရဆိုသော် ကာကွယ်ရေး ၀န်ကြီး ဌာနမှ ၁၉၉၇-ခုနှစ်တွင် ထုတ်ဝေခဲ့သော ““သာသနာရောင်ဝါ ထွန်းစေဖို့”” စာအုပ်၊ စာမျက်နှာ (၆၆)တွင် ဖေါ်ပြချက် အရ၊ ခရစ်သက္ကရာဇ် အေဒီ(၇)ရာစုမှ စ၍ အရှေ့ အလယ်ပိုင်းဒေသ အာရဗ်၊ အီရန် စသည့်နိုင်ငံများမှ မာလာယု ကျွန်းဆွယ်(မလေးရှား)နှင့် အရှေ့အိန္ဒိယ ကျွန်းစု (အင်ဒိုနီးရှား)သို့ ကုန်သွယ်ရေကြောင်း ခရီးနှင်ခဲ့ကြသည့် သင်္ဘောများသည် ရခိုင် ကမ်းရိုးတန်းကို ဖြတ်သန်းရာမှ မုန်တိုင်းမိ၍ သင်္ဘော ပျက်သည့်ဖြစ်စဉ်များ ရှိခဲ့ရာ ရမ်းဗြဲကျွန်းအနီးတွင်လည်း သင်္ဘောများစွာ အကြိမ်ကြိမ် ပျက်ခဲ့သဖြင့် သင်္ဘောသား အစ္စလာမ် ဘာသာဝင်များသည်လည်း ထိုအရပ်တွင်ပင် အခြေချ နေထိုင်ခဲ့ကြောင်း သမိုင်းကျမ်းစာ အစောင်စောင်ကို ကိုးကား၍ဖေါ်ပြထားပါသည်။ ရမ်းဗြဲကျွန်း အနီး အာရဗ် သင်္ဘောများ ပျက်သည့်အရပ်မှာ ““လေးတောင်””ဟူသည့် အရပ်ဖြစ်ကြောင်း အရပ်ရာဇ၀င်၊ ပါးစပ်ရာဇ၀င်များအရ သိရ၏။ ကျောက်နီမော်၏ မူလရွာ ဖြစ်သည့် ““ကျောက်ထရံ”” ရွာ(ယခုတိုင်ရှိသေးသည်)မှ ရှေးလူကြီးများဆို စကားအရ လေးတောင်ဘက်မှ ပြောင်းခဲ့သည့် ရွာဟုဆိုထားရာ ကျောက်နီမော် ရွာသည် သင်္ဘောပျက် အာရဗ်များနှင့် ဆက်စပ်နေကြောင်းသိနိုင်ပါသည်။
နောက်ပိုင်းတွင် ရခိုင်ဘုရင်များက ၎င်းတို့ထံ အမှုထမ်းခဲ့သည့် ကမန်လေးသည်တော်များအား လုပ်မြေ၊ လယ်မြေများ ပေး၍ နေရာ ချထားခဲ့သည်များ ရှိခဲ့ရာ ဓည၀တီတောင်ကျောင်း ဆရာတော်အပါအ၀င် ပုဂ္ဂလိက သုတေသီများ၏ ဖေါ်ပြချက်များအရ ကမန်များအား ရမ်းဗြဲ (ရမ္မာဝတီ) အပိုင်းတွင်လည်း နေရာချထားခဲ့ကြောင်း သိရှိရပါ သည်။ ကျောက်နီမော်ရွာသို့ ရှေးကရောက်နှင့် သူများနှင့် နောက်မှရောက်လာ သူများ အချင်း ချင်း သွေးနှောကြခြင်းများ ရှိမည်မှာလည်း ဧကန်သာဖြစ်၏။
ဤသမိုင်းများ၏ ခိုင်မာမှုကို ကျောက်နီမော်ရွာအနီးအနားရှိ နှစ်ပေါင်းရာပေါင်းများစွာ သက်တမ်းရှိ သည့် ဗလီဝတ်ကျောင်း တော်များ၊ အုတ်ဂူသင်္ချီုင်းများက ထောက်ခံနေပါသည်။ ကျောက်ထရံရွာတွင် နှစ်ပေါင်း(၈၀၀) ခန့် သက်တမ်းရှိသည့် ဗလီကြီးနှင့် ဗလီချေတို့ ယခုအချိန်ထိ ရှိနေခြင်း၊ ကျောက်နီမော် ရွာမှ သက်တမ်းနှစ်(၂၀၀)ကျော် ခန့်ရှိသည့် မကျည်းတော ဗလီ၊ ကျောက်နီမော်နှင့် ကျောက်ထံရံ ရွာ နှစ်ရွာကြား ရှိ သင်္ချီုင်းတောင်မှ အရှည် တစ်တောင်ခန့်၊ အထူ လက်လေးသစ်ခန့်ရှိသည့် ယနေ့ခေတ် အုတ်ချပ်များထက် များစွာကြီးသော အုတ်များဖြင့် ပြုလုပ်ခဲ့သည့် ရှေးသူတော်စင်ဟု ယူဆရသူတို့၏ သင်္ချီုင်းဂူများက ကျောက်နီမော်ရွာ၏ သက်တမ်းကြာမြင့်မှုကို တစ်စွန်းတစ်စဖေါ်ပြနေပေသည်။
ထိုသမိုင်းကြောင်းနှင့် ရုပ်ဝတ္ထု အထောက်အထားများအရ ကျောက်နီမော်ရွာ၏ သက်တမ်းသည် မြန်မာဘုရင် ဘကြီးတော်ဘုရား လက်ထက် အင်္ဂလိပ်မြန်မာ ပထမစစ်ပွဲ(၁၈၂၄-ခုနှစ်) ထက်စောသည်သာမက ဘိုးတော်ဘုရားရခိုင်ပြည်ကို တိုက်ခိုက်သိမ်းပိုက်သည့် (၁၈၇၁-ခုနှစ်) ထက်လည်း ရှေးကျနေသည်ကို တွေ့ရမည် ဖြစ်သည်။
ဤသို့ ရှေးနှစ်ပေါင်း ရာထောင်ချီ၍ သက်တမ်းရှိခဲ့ပြီဖြစ်ကာ၊ ရခိုင်ဘုရင်၊မြန်မာဘုရင်၊ အင်္ဂလိပ် နယ်ချဲ့ခေတ်များတွင် ပတ်ဝန်းကျင်ကျေးရွာ များမှ ညီနောင် တိုင်းရင်းသားများနှင့် ညီအစ်ကို၊ သားအမိဖွဲ့၍ ဆွေမျိုးရင်းချာပမာ နေခဲ့ကြသော၊ မည်သည့် အတားအဆီးမျှ မရှိဘဲ လွတ်လပ်စွာဖြင့် စီးပွားဥစ္စာ၊ ပညာရှာခဲ့ကြသည့် ကျောက်နီမော်ရွာသား အစ္စလာမ် ဘာသာဝင်များသည် ယခုကဲ့သို့ ဒီမိုကရေစီဖေါ်ဆောင်နေသည့် ကောင်းမွန်သော အုပ်ချုပ်ရေးကို ဖေါ်ဆောင်နေသည့် ခေတ်တွင်မှ အကန့်အသတ်များ၊ ခွဲခြားဆက်ဆံခံရမှုများ၊ မမှန်မကန်စွပ်စွဲခံရမှု များဖြင့် ပဋိပက္ခတို့၏ သားကောင်ဖြစ်ရသည်မှာ များစွာဝမ်းနည်းစရာကောင်းလှပေသည်။
သို့ဖြစ်၍ တာဝန်ရှိဒေသအာဏာပိုင်များ၊ အေးချမ်းသာယာမှုနှင့် အမှန်တရားကိုမြတ်နိုးကြသည့် ညီနောင်ရခိုင် တိုင်းရင်းသားများ စောင့်ကြည့်လေ့လာသူများ အနေဖြင့် ကျောက်နီမော်ရွာသား အစ္စလာမ်ဘာသာဝင် တို့အား စာနာထောက် ထားစွာဖြင့် ရှေးယခင်ကကဲ့သို့ ပွင့်လင်းရင်းနှီး သံသယကင်းစွာ ဆက်ဆံကြစေလိုကြောင်း မေတ္တာရှေ့ထား၍ တင်ပြအပ်ပါသည်။
** M-Media သို့ စာရေးသူ ဦးအောင်ထွန်း ပေးပို့လာသည့် ဆောင်းပါးဖြစ်ပါသည်။
—————————
M-Media ပေးစာကဏ္ဍတွင် ဖော်ပြပေးစေလိုသူများ [email protected] သို့ စာမူများ ပေးပို့နိုင်ပါသည်။
အမှားပြင်ဆင်ချက်
=========
ဘိုးတော်ဘုရားရခိုင်ပြည်ကို တိုက်ခိုက်သိမ်းပိုက်သည့် (၁၇၈၁-ခုနှစ်) ဟုပြင်ဆင်ဖတ်ရှုပေးပါရန်။
