ဇန်န၀ါရီ ၁၁၊ ၂၀၁၅
M-Media
– ဂျာမန် ဘွန်ဒစ်လီဂါကလပ် ၀ုလ်ဘတ်အသင်း၏ ဘယ်လ်ဂျီယံ ကွင်းလယ် ကစားသမား ဂျူနီယာ မာလန်ဒါမှာ ကားမတော်တဆမှုအတွင်း သေဆုံး သွားခဲ့သည်ဟု သိရသည်။
ယမန်နေ့ နေ့လည်ပိုင်းက ဂျာမနီရှိ ဘီလီဖဲလ်ဒ်မြို့အနီးတွင် ဖြစ်ပွားခဲ့သော ကားမတော်တဆမှုအတွင်း သေဆုံးခဲ့ခြင်းဖြစ်ပြီး မာလန်ဒါမှာ အခင်ဖြစ်ပွားရာနေရာ၌ပင် သေဆုံးခဲ့သည်ဟု ရဲတပ်ဖွဲ့က အတည်ပြု ပြောကြားခဲ့သည်။
အသက် ၂၀ အရွယ် မာလန်ဒါမှာ ဆောင်းရာသီ လေ့ကျင့်ခန်းအစီအစဉ်အဖြစ် ၀ုလ်ဖ်ဘတ်အသင်းနှင့် စနေနေ့ညနေပိုင်းတွင် တောင်အာဖရိကသို့ သွားရောက်ရန် အစီအစဉ်ရှိနေသူဖြစ်သည်။
`ကျွန်တော်တို့ အရမ်းပဲ ၀မ်းနည်းကြေကွဲရပါတယ်။ ကျွန်တော်တို့အားလုံး သူ့ကို ချစ်ပါတယ်။ သူဟာ ကျွန်တော်တို့အသင်းရဲ့ မောင်းနှင်အားဖြစ်ပြီး ပရိတ်သတ်အချစ်တော်လည်း ဖြစ်ပါတယ်။ ပြီးတော့ ဂျူနီယာ (မာလန်ဒါ)ဟာ ခြေစွမ်းကောင်းမွန်တဲ့ ကစားသမားတစ်ဦးပါပဲ´ ဟု ၀ုလ်ဖ်ဘတ်အသင်း၏ မန်းနေးဂျင်းဒါရိုက်တာဖြစ်သူ ကာလုစ် အလော့ဖ်စ်က ပြောကြားခဲ့သည်။
မာလန်ဒါမှာ ဘယ်လ်ဂျီယံ လူငယ်ဘောလုံးအသင်းများတွင် တစ်စိုက်မတ်မတ် ပါဝင်ခွင့်ရခဲ့သူဖြစ်ပြီး ဘယ်လ်ဂျီယံ ဘောလုံးအဖွဲ့ချုပ်ကလည်း မာလန်ဒါကွယ်လွန်မှုအတွက် ၀မ်းနည်းကြောင်း ကြေညာချက် ထုတ်ပြန်ခဲ့သည်။
Ref: goal.com
Leave a Reply
You must be logged in to post a comment.