Blog

စက်တင်ဘာ ၁၁၊ ၂၀၂၁
M-Media

-တာလီဘန်အစိုးရရဲ့ မူဝါဒတွေကို ထောက်ခံကြောင်း ဆန္ဒထုတ်ဖော်ပွဲတစ်ခုကို အာဖဂန်အမျိုးသမီးတွေက ဒီကနေ့မနက် ကဘူးလ်တက္ကသိုလ်မှာ ပြုလုပ်ခဲ့ပါတယ်။

ဒီဆန္ဒထုတ်ဖော်ပွဲမှာ အမျိုးသမီး ၃၀၀ လောက်ပါဝင်ပြီး တာလီဘန်က ထုတ်ထားတဲ့ စည်းကမ်းအတိုင်း မျက်နှာပါအဝင် တစ်ကိုယ်လုံးကိုဖုံးထားတဲ့ ဝတ်ရုံတွေ ဝတ်ဆင်ထားကြကာ တာလီဘန်အလံတွေကိုလည်း ကိုင်ဆောင်ခဲ့ကြပါတယ်။

၁၉၉၆ ကနေ ၂၀၀၁ ခုနှစ် တာလီဘန်ရဲ့ အုပ်ချုပ်မှုကာလအတွင်း အာဖဂန်အမျိုးသမီးတွေဟာ ပညာသင်ကြားခွင့်၊ အလုပ်လုပ်ခွင့်၊ တစ်ယောက်တည်း အပြင်သွားလာခွင့် ပိတ်ပင်ခံရတာလို ကန့်သတ်ချုပ်ချယ်မှုတွေနဲ့ ကြုံတွေ့ခဲ့ရတာပါ။ အခုတစ်ခေါက်အာဏာရပြီးတဲ့နောက် ကန့်သတ်ချုပ်ချယ်မှုတွေကို ဖြေလျော့ပေးပြီး အမျိုးသမီးတွေကို ပညာသင်ကြားခွင့်၊ အလုပ်လုပ်ခွင့်ပေးမယ်လို့ တာလီဘန်အဖွဲ့က ထုတ်ပြန်ထားပါတယ်။

တာလီဘန်ရဲ့ ပညာရေးအာဏာပိုင်အဖွဲ့က တက္ကသိုလ်တွေမှာ ကျောင်းတက်ရင် အမျိုးသမီးတွေ တစ်ကိုယ်လုံးဖုံးထားတဲ့ဝတ်ရုံတွေ ဝတ်ရမှာဖြစ်ပြီး၊ အနည်းဆုံး ယောကျ်ားလေးနဲ့ မိန်းကလေး သီးသန့်ခွဲကာ အလယ်မှာ လိုက်ကာ ကာထားရမယ်လို့ ညွှန်ကြားချက် ထုတ်ပြန်ပါတယ်။

ဒီကနေ့ ကာဘူးလ်တက္ကသိုလ်က တာလီဘန်ထောက်ခံပွဲမှာ အမျိုးသမီးတစ်ချို့က အနောက်နိုင်ငံတွေကိုရှုတ်ချကြောင်း တာလီဘန်ကို ထောက်ခံကြောင်း ဟောပြောခဲ့ကြပါတယ်။ နိုင်ငံတစ်ဝှမ်း တာလီဘန်ကို ဆန့်ကျင်တဲ့ အမျိုးသမီးတွေရဲ့ ဆန္ဒပြမှုဟာ အာဖဂန်အမျိုးသမီးအားလုံးကို ကိုယ်စားမပြုဘူးလို့လည်း သူတို့က ဆိုပါတယ်။

ဟောပြောမှုတွေပြီးတဲ့နောက် အဲဒီအမျိုးသမီးတွေဟာ တက္ကသိုလ်အပြင်ကလမ်းမှာ တာလီဘန်အလံတွေဝှေ့ယမ်းပြီး ချီတက်ခဲ့ကြပါတယ်။

Ref: AFP

စက်တင်ဘာ ၁၀၊ ၂၀၂၁
M-Media

-နိုင်ငံရေးနဲ့ စီးပွားရေးပြဿနာတွေကို မဖြေရှင်းနိုင်ဘူးဆိုရင် အာဖဂနစ္စတန်မှာ ဆင်းရဲမွဲတွေမှု သတ်မှတ်ချက်အောက် နေထိုင်ရသူအရေအတွက်ဟာ လူဦးရေရဲ့ ၉၇ ရာခိုင်နှုန်းအထိ ရှိလာနိုင်တယ်လို့ ကုလသမဂ္ဂက သတိပေးလိုက်ပါတယ်။

အာဖဂန်နစ္စတန်ရဲ့ လူဦးရေတစ်ဝက်လောက်ဟာ လက်ရှိမှာ လူသားချင်း စာနာထောက်ထားမှုဆိုင်ရာ အကူအညီတွေ လိုအပ်နေတာ ဖြစ်ပါတယ်။ မနေ့က ကုလသမဂ္ဂ ဖွံ့ဖြိုးရေးအဖွဲ့ UNDP ရဲ့ ထုတ်ပြန်ချက်မှာ နိုင်ငံရဲ့ GDP ကျဆင်းမှုကြောင့် ဆင်းရဲမွဲတေမှုဟာ နောက်ထပ် ၂၅ ရာခိုင်နှုန်းအထိ တက်လာနိုင်တယ်လို့ ဖော်ပြထားပါတယ်။

“ဘက်ဂျက်ပြဿနာရှိတယ်။ အရံငွေပြဿနာရှိတယ်။ အရံငွေဆိုရင် ဒေါ်လာ ၉ ဘီလီယံလောက် ဆိုင်းငံ့ခံထားရတယ်။ ကုန်သွယ်ရေးပြဿနာရှိတယ်။ ပြည်တွင်း၊ ပြည်ပ ကုန်သွယ်ရေးမှာ အခက်အခဲအတားအဆီးတွေရှိတယ်” လို့ UNDP ရဲ့ အာဖဂန်ဌာနေကိုယ်စားလှယ် အဘ်ဒူလာ အလ် ဒါဒါရီက ပြောပါတယ်။

နိုင်ငံတစ်နိုင်ငံ ဒီလိုအခြေအနေမျိုးရောက်လာရင် နိုင်ငံတကာငွေကြေးရန်ပုံငွေအဖွဲ့ (IMF)၊ ကမ္ဘာ့ဘဏ်တို့လို နိုင်ငံတကာ ဘဏ္ဍာရေးအဖွဲ့စည်းတွေက ပူးပေါင်းကူညီလေ့ရှိပေမယ့် တာလီဘန်အုပ်စိုးနေတဲ့ အာဖဂန်နစ္စတန်မှာတော့ ဒါမျိုးဖြစ်လာမှာ မဟုတ်ဘူးလို့လည်း သူက ဆိုပါတယ်။

တာလီဘန်မသိမ်းပိုက်ခင်ကတည်းက အာဖဂန်ဟာ နိုင်ငံတကာ ကူညီထောက်ပံ့မှုတွေကို အဓိကမှီခိုနေရတာ ဖြစ်ပါတယ်။ ကုလသမဂ္ဂကတော့ သူတို့ရဲ့ အကူအညီပေးရေးလုပ်သားတွေကို ဆက်လက်လုပ်ကိုင်ခွင့်ပြုဖို့ တာလီဘန်ကို တောင်းဆိုထားပါတယ်။

အာဖဂန်နစ္စတန်နိုင်ငံမှာ လူသားချင်းစာနာထောက်ထားမှုဆိုင်ရာ အကြပ်အတည်း ရင်ဆိုင်ရဖွယ်ရှိတယ်လို့ နိုင်ငံတကာ အကူအညီပေးရေးအဖွဲ့တွေက အခုသီတင်းပတ်အစောပိုင်းမှာ ပြောကြားထားပြီး နယ်စည်းမခြား ဆရာဝန်များအဖွဲ့ကလည်း တိုင်းပြည်ရဲ့ အားနည်းနေတဲ့ ကျန်းမာရေးစောင့်ရှောက်မှုစနစ်၊ ​ပြိုလဲဖွယ်ရှိနေတယ်လို့ သတိပေးထားပါတယ်။

လက်ရှိ အာဖဂန်နစ္စတန်က ပြည်သူတွေရဲ့ ၇၂ ရာခိုင်နှုန်းဟာ ဆင်းရဲမွဲတွေမှု သတ်မှတ်ချက်အောက်မှာ နေထိုင်နေရပြီး နှစ်ရှည် မိုးခေါင်ရေရှားမှု၊ ကိုဗစ်ကပ်ရောဂါ၊ နိုင်ငံရေးမတည်ငြိမ်မှု စတာတွေကြောင့် ဖြစ်ပါတယ်။

Ref: Aljazeera